Ndi Okụk Edi Ntak Kpukpru Idiọkn̄kpọ Ererimbot Emi??

Se Bible ọdọhọde

Ihih. Bible idọhọke ke okụk ọdiọk, inyụn̄ idọhọke ke ọkụk ada kpukpru idiọkn̄kpọ ererimbot emi edi. Mme owo ẹsidọhọ ke “okụk edi ntak idiọkn̄kpọ ererimbot emi,” edi Bible itịn̄ke utọ ikọ oro. Bible akam ọdọhọ ke “itọn̄ inyene [ima okụk] edi orụn̄ kpukpru orụk mme idiọkn̄kpọ.”a—1 Timothy 6:10, Edisana Ŋwed Abasi Ibom.

Nso ke Bible etịn̄ aban̄a okụk?

Bible ọdọhọ ke okụk enyene ufọn; ke akam ekeme ndikpeme owo, ẹkpeda enye ẹnam nnennen n̄kpọ. (Ecclesiastes 7:12) Bible onyụn̄ otoro mbon emi ẹsitatde ubọk ẹnọ owo n̄kpọ utọ nte okụk.—Mme N̄ke 11:25.

Kpa ye oro, Bible akpan owo ndida okụk nte ata akpan n̄kpọ. Bible ọdọhọ ete: “Ẹkûyak usụn̄ uwem mbufo asan̄a ye ima okụk, edi ẹyụhọ ye se mbufo ẹnyenede.” (Mme Hebrew 13:5) Se ikpepde edi yak isida okụk inam nnennen n̄kpọ, ikûyom ndinyene enyọn̄ ye isọn̄. Edi yak idomo ndisiyụhọ ye mme akpan n̄kpọ oro inen̄erede iyom, utọ nte udia, ọfọn̄, ye ufọk.—1 Timothy 6:8.

**Ntak emi Bible akpande owo ndima okụk?**

Mbon idiọkitọn̄ ididuhe uwem nsinsi. (Ephesus 5:5) Ntak idọhọde ntre edi ke owo idiọkitọn̄ edi okpono ndem. (Colossae 3:5) Ntak en̄wen edi ke mbon idiọkitọn̄ ndisịn ibuot nsịn itọn̄ nyom inyene esinam mmọ ẹkûnam se Bible ọdọhọde. Mme N̄ke 28:20 ọdọhọ ke mbon ‘oro ẹbụmerede ẹyom inyene iditreke ndidue.’ Mmọ ẹkeme ndibiat ibet, utọ nte ndibre owo utọ-tọ, ẹbọ owo n̄kpọ ke n̄kanubọk, ẹmụm owo ẹkedịp ẹyom okụk, mîdịghe ẹwot owo.

Idem ekpededi ima okụk ikpepke owo idiọkido, enye esida nsio nsio mfịna ndi. Bible ọdọhọ ke “mbon oro ẹbierede ndinyene inyene ẹduọ ẹdụk idomo ye ekpọ ye ediwak ndisịme ye ndiọi udọn̄, emi ẹdụride mme owo.”—1 Timothy 6:9.

Didie ke item Bible emi aban̄ade okụk ekeme ndin̄wam nnyịn?

Edieke nnyịn mîyakke uyom okụk anam itre ndinam se ifọnde m̀mê ndinem Abasi esịt, mme owo ẹyekpono nnyịn, Abasi ayama onyụn̄ an̄wam nnyịn. Abasi on̄wọn̄ọ ọnọ mbon emi ẹnamde se ẹkekeme man enem enye esịt ete: “Ndidehedei n̄kpọn̄ fi, ndinyụn̄ nsịnke fi.” (Mme Hebrew 13:5, 6) Mme N̄ke 28:20 ọdọhọ n̄ko ke “owo eke anamde akpanikọ eyenyene ekese edidiọn̄.”

Mme Itie Bible Emi Ẹtịn̄de N̄kpọ Aban̄a Okụk

Ecclesiastes 7:12: “Koro ọniọn̄ ekpemede owo kpa nte okụk ekpemede.”

Ọwọrọ ke okụk enyene ufọn ẹkpeda enye ẹnam nnennen n̄kpọ, sia enye ekeme ndin̄wam owo ke ndusụk n̄kpọ.

Luke 12:15: “Idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.”

Ọwọrọ ke idịghe okụk edi ata akpan n̄kpọ ke uwem; ke inyụn̄ idịghe okụk edinam Abasi anyan̄a nnyịn.

1 Timothy 6:10: “Ima okụk edi orụn̄ kpukpru orụk idiọkn̄kpọ, ndien ke edinyanade mbịne ima emi, ndusụk owo ẹma ẹyo ẹkpọn̄ mbuọtidem ẹnyụn̄ ẹda ediwak ubiak ẹnọmọ idemmọ.”

Ọwọrọ ke idiọkke ndinyene okụk. Edi ndima okụk m̀mê ndida enye nte kpukpru n̄kpọ esisịn owo ke mfịna, utọ nte ndisuan ufọk m̀mê ndinam owo ọdọn̄ọ ke ntak enye esịnde ibuot esịn itọn̄ oyom okụk.

Mme Hebrew 13:5: “Ẹkûyak usụn̄ uwem mbufo asan̄a ye ima okụk, edi ẹyụhọ ye se mbufo ẹnyenede.”

Ọwọrọ ke utu ke ndiyom okụk n̄wot idem, ke ọfọn iyụhọ ye se inen̄erede iyom.

Matthew 19:24: “Edi mmemmem n̄kpọ camel ndibe ke odudu abiabon akan owo inyene ndidụk obio ubọn̄ Abasi.”

Ọwọrọ ke ete oro Jesus ọkọdọhọde etiene imọ eketre nditiene Jesus ke ntak emi enye akamade okụk ye inyene esie. Jesus akanam nnyịn idiọn̄ọ ke edisọsọn̄ owo emi amade okụk m̀mê inyene akan Abasi, ndidu uwem nsinsi.

a Bible en̄wen esịn ufan̄ikọ oro ntem: “Koro ima okụk edi orụn̄ kpukpru orụk idiọkn̄kpọ.”