Matthew 6:34—“Ẹkûtịmede Esịt Ẹban̄a N̄kpọn̄”

“Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie. Afanikọn̄ usen ekem ye usen.”—Matthew 6:34, Edikabade Eke Obufa Ererimbot.

“Ekutimere esit ebaŋa mkpọŋ ndien: koro mkpọŋ eyeda utimere-esit esie edi. Afanikọŋ usen ekem ye usen.”—Matthew 6:34, Edisana Ŋwed Abasi Ibom.

Se Matthew 6:34 Ọwọrọde

Jesus eketịn̄ ikọ oro. Enye okoyom mbon oro enye eketịn̄de ikọ ọnọ ẹnen̄ede ẹdiọn̄ọ ke ufọn idụhe owo nditịmede esịt m̀mê ndifịna idem n̄kaha mban̄a n̄kpọn̄, m̀mê se iditịbede ke iso. Utu ke oro, ke akam ọfọn owo anam se enye ekemede ke usen ke usen.

Ikọ Jesus ikọwọrọke ke inaha nnyịn ikere iban̄a n̄kpọn̄ m̀mê ini iso. (Mme N̄ke 21:5) Jesus okoyom nnyịn idiọn̄ọ ke ifọnke ifịna idem ikaha, m̀mê itịmede esịt, iban̄a se ikerede ke ekeme nditịbe. Utọ editịmede esịt oro ekeme ndinam ikûkop inemesịt, inyụn̄ iyakke itịn̄ enyịn inam se anade inam. Ọkpọkọm ikere se ikekere, oro idinamke se ikerede oro etịbe, idinyụn̄ ikpanke se iditịbede nditịbe. Ediwak n̄kpọ emi isitiede ifịna idem iban̄a isitịbeke, ndien mbon emi ẹtịbede, isidiọkke nte ikekerede.

Se Iban̄ade Matthew 6:34

Jesus eketịn̄ se idude ke itie Bible emi ini enye ọkwọrọde ikọ ke obot ọnọ otuowo; ukwọrọikọ oro odu ke Matthew ibuot 5-7. Jesus ama ọdọhọ n̄ko ke editịmede esịt isikpụhọke n̄kpọ ndomokiet, ke isinyụn̄ idianke isua uwem inọ owo. (Matthew 6:27) Enye ọkọdọhọ ke edieke idade n̄kpọ Abasi nte ata akpan n̄kpọ ke uwem, ke ufọn nnyịn nditịmede esịt mban̄a n̄kpọn̄ idụhe. Edieke Abasi esede aban̄a mbiet, inuen, ye mme unam, enye iditreke ndise mban̄a mbon oro ẹnamde n̄kpọ esie.—Matthew 6:25, 26, 28-33.