Ẹsida Ẹse Ẹban̄a Mme Ufọkmbono Obio Ubọn̄ Nnyịn

Ekpri sista kiet ke Colombia emi ekerede Nicole, ọkọdọhọ ete: “Mmama Ufọkmbono Obio Ubọn̄ nnyịn! Mi ke isitie ye ndima nditọ-ete nnyịn ikpono Jehovah.” Ndi esitie fi ke idem ntre n̄ko?

Ke ofụri ererimbot, Mme Ntiense Jehovah ẹsisobo idem ke n̄kpọ nte Ufọkmbono Obio Ubọn̄ 63,000. Mme Ufọkmbono Obio Ubọn̄ emi ẹsinam inyene itie emi enemde nnyịn ndidu n̄kpono Jehovah. Edi idịghe n̄kukụre se isinamde do edi oro. David, emi edide asiakusụn̄ ofụri ini ke Colombia, ọkọdọhọ ete: “Ufọkmbono Obio Ubọn̄ nnyịn esinam se isikpep enyene uku. Esikpa ediwak isenowo idem ndikụt nte Ufọkmbọno Obio Ubọn̄ nnyịn eyede ye nte ẹkamade enye ọfọn.” Mme Ufọkmbono Obio Ubọn̄ emi isitiehe-tie ntre ke idem esie iye. Imesisịn idem inam utom man enye asana, inyụn̄ itịm enye ikama. Isisan̄a didie inam emi?

Ẹsinam Didie Ẹse Ẹban̄a Mme Ufọkmbono Obio Ubọn̄ Emi?

Mme esop emi ẹsidụkde mbono esop ke mme Ufọkmbono Obio Ubọn̄ kiet kiet ẹsise ẹban̄a Ufọkmbono Obio Ubọn̄ oro. Nditọ-ete ke mme esop oro ẹsinam enye asana. Mmọ ẹsinam se ẹkekeme man n̄kpọ okûsọp ubiara ẹnyụn̄ ẹdiọn̄ se ibiarade.

Itie-utom LDC ẹmek mbon emi ẹsikpepde nditọ-ete nte ẹkpetịmde Ufọkmbono Obio Ubọn̄ ẹkama man mmọ ẹkpep nditọ-ete ke mme esop oro nte mmọ ẹkpesede ẹban̄a Ufọkmbono Obio Ubọn̄ mmọ. Mbon emi ẹkpepde nditọ-ete nte ẹkpetịmde Ufọkmbono Obio Ubọn̄ ẹkama ẹsise ẹban̄a n̄kpọ nte Ufọkmbono Obio Ubọn̄ itiokiet esịm duop. Mmọ ẹsika ẹkese mme Ufọkmbono Obio Ubọn̄ oro ẹnyụn̄ ẹkpep mme asuanetop ke mme esop oro nte mmọ ẹkpetịmde Ufọkmbono Obio Ubọn̄ mmọ ẹkama. Isua ita ama ebe, mmọ ẹsika ẹkese mme Ufọkmbono Obio Ubọn̄ emi kiet kiet, ẹse mme mfịna oro odude ye mme n̄kpọ oro ẹyomde ẹdiọn̄.

Nditọ-ete nnyịn ẹnen̄ede ẹma nte mbon emi ẹsikpepde nditọ-ete nte ẹkpetịmde Ufọkmbono Obio Ubọn̄ ẹkama ẹsikpepde mmọ se ẹkpenamde. Sista Indhumathi ke India, ọkọdọhọ ete: “Se ẹkekpepde nnyịn ama enem tutu. Ama enem mi nditiene n̄kpep nte n̄kpetịmde Ufọkmbono Ubio Ubọn̄ nnyịn n̄kama.” Brọda Evans ke Kenya, ọkọdọhọ ete: “Ima ikpep nte ikpesidiọn̄de n̄kpri n̄kpri n̄kpọ oro ẹbiarade mbemiso mmọ ẹmande akamba n̄kpọ.”

Nte Isisan̄ade Inyene Okụk Oro Isibiatde

Kpukpru isua, ẹsibiat ediwak okụk ẹda ẹse ẹban̄a Ufọkmbono Obio Ubọn̄ kiet kiet. Okụk emi esiwak etiene ebiet emi Ufọkmbono Obio Ubọn̄ odude, nte enye ebịghide, ye ibat esop emi ẹsidụkde mbono esop do. Isisan̄a didie inyene okụk oro isibiatde?

Okụk oro isitịpde ke ẹsida ẹse ẹban̄a mme Ufọkmbono Obio Ubọn̄ nnyịn. Brọda Alexander ke Kazakhstan, ọdọhọ ete: “Imesida ndusụk okụk oro idep data, ida ikpe okụk ikan̄, okụk mmọn̄ ye mme n̄kpọ ntre. Mme n̄kpọ en̄wen oro isidade idep ẹdi, tissue pepa, glove, mme n̄kpọ ukwọhọde n̄kpọ, ye paint.” Okụk en̄wen ekededi oro ẹtịpde, isinọ ẹsọk esop Abasi man ẹda ẹnam ikpọ utom eken oro inyenede ke ofụri ererimbot.

Ndidiọn̄ Ikpọ N̄kpọ Oro Ẹbiarade

Edieke se ẹyomde ndinam ke Ufọkmbono Obio Ubọn̄ edibede ọfiọn̄ iba m̀mê ita, mbiowo do ẹsinam owo emi esikpepde mmọ nte ẹkpetịmde Ufọkmbono Obio Ubọn̄ ẹkama ọdiọn̄ọ. Itie-utom LDC ẹkpenyịme ẹnam utom oro, okụk oro isinọde ẹda ẹnam utom ofụri ererimbot ke ẹdida ise iban̄a utom oro. Ke isua utom 2023, ikpọ utom oro ikanamde ke ofụri ererimbot ẹkedi 8,793, ndien ikabiat miliọn dollara 76.6 ida inam utom oro. Yak itịn̄ iban̄a iba ke otu utom emi.

Ke Angola, Ufọkmbono Obio Ubọn̄ nnyịn emi ekedide isua 15 ama enyene ediwak mfina. Mme n̄kpọ ikan̄ ẹma ẹbiara ẹma, ibibene ẹsiaha, ndien mme mbọhọ-idụn̄ ẹma ẹdọhọ ke mmọn̄ esito do odụk n̄kan̄ mmimọ. Itie-utom LDC ẹma ẹnyịme ẹdiọn̄ mme n̄kpọ oro ẹkebiarade do. Utom oro akakpa dollar 9,285. Mme mbọhọ-idụn̄ oro ẹma ẹkọm nnyịn, mmọ ẹma onyụn̄ ẹma nte ikanamde utom oro.

Ke Poland, ọkọm Ufọkmbono Obio Ubọn̄ kiet ama odụt, ndien carpet ama onyụn̄ abiara ama. Itie-utom LDC ẹma ẹnyịme ẹdiọn̄ ọkọm oro, ẹfụk waterproof ke ọkọm oro ẹnyụn̄ ẹdep obufa carpet. Utom oro akakpa dollar 9,757. Ke ntak oro, ediwak isua ẹyebe mbemiso ẹfiakde ẹnam akamba utom ke Ufọkmbono Obio Ubọn̄ oro.

Utom Emi Ọnọde Jehovah Ubọn̄

Ndidiọn̄ mme n̄kpọ oro ẹbiarade ke Ufọkmbono Obio Ubọn̄ isinamke ikûnen̄ede ubiak okụk kpọt, edi esinam ẹnọ Jehovah ubọn̄. Brọda Shaun ke Tonga, ọkọdọhọ ete: “Ndisise mban̄a Ufọkmbono Obiọ Ubọn nnyịn nnyụn̄ ndiọn̄ mme n̄kpọ oro ẹbiarade esinam inyene itie emi asanade onyụn̄ eyede ndida n̄kpono Jehovah. Emi esinyụn̄ anam mme owo ẹtịn̄ nti ikọ ẹban̄a Jehovah. Esinenem nnyịn ndikot mme owo ẹdi Ufọkmbono Obio Ubọn̄ nnyịn.”

Didie ke Ekeme Nditiene N̄wam?

Kpukpru nnyịn imekeme ndidian ubọk ndiọn̄ nnyụn̄ nnam Ufọkmbono Obio Ubọn̄ nnyịn asana. Marino, emi esikpepde nditọ-ete nte ẹkpetịmde Ufọkmbono Obio Ubọn̄ ẹkama ke Australia, ọkọdọhọ ete: “Kpukpru nnyịn imekeme nditiene ntịm Ufọkmbono Obio Ubọn̄ nnyịn n̄kama. Ke ini inamde oro, in̄wam esop Abasi ifam okụk man mmọ ẹnyene okụk ndida n̄n̄wam ke mme ebiet oro ẹnen̄erede ẹyom Ufọkmbono Obio Ubọn̄.”

Esinen̄ede enem brọda Joel ke India nditiene ntịm Ufọkmbono Obio Ubọn̄ mmọ n̄kama. Enye ọkọdọhọ ete: “Ndisidiana kiet ye nditọ-ete mi nnam utom esinam n̄kụt nte Obio Ubọn̄ Abasi edinemde.” Nicole, emi iketịn̄de iban̄a ke ntọn̄ọ ntọn̄ọ, ọkọdọhọ: “Ndondo emi, mma ntiene n̄keyet Ufọkmbono Obio Ubọn̄ nnyịn ke ini nditọ-ete irenowo ẹkesụk ẹdiọn̄de itie emi okodụtde ke itie uken̄idem. Kpa ye oro mmen̄ketieneke ndiọn̄ n̄kpọ oro, se n̄ketienede nnam ama anam mme owo idaha unan.”

Edieke edimade ndisitiene ndiọn̄ mme n̄kpọ oro ẹbiarade m̀mê nditịm Ufọkmbono Obio Ubọn̄ mbufo n̄kama, ka keneme ye mbiowo mbufo. N̄kpọ en̄wen edi ke okụk oro esitịpde ke ẹsida ẹse ẹban̄a Ufọkmbono Obio Ubọn̄ mbufo ye mme Ufọkmbono Obio Ubọn̄ eken ke ofụri ererimbot. Emekeme ndisitịp okụk emi nsịn ke mme ẹkebe ẹtịbe oro ẹdude ke Ufọkmbono Obio Ubọn̄ mîdịghe afo ada donate.jw.org etịp. Ẹmenam tutu ke kpukpru okụk oro ẹsitịpde.