Jehovah—Abasi Oro Odotde Ẹfiọk

NTE ekeme ndidi afo amataba akpan n̄kpọ ke uwem? Ke akpanikọ afo amataba edieke afo enyenede esisịt ifiọk aban̄a Abasi. Ntak-a? Koro nte ediwak miliọn owo ẹkụtde, ndifiọk Abasi a-Bible ada mme akpan ufọn edi ke uwem. Mme ufọn emi ẹsitọn̄ọ idahaemi ẹnyụn̄ ẹbịghi ẹsịm ini iso.

Jehovah Abasi, kpa Enye Emi akanamde ẹwet Bible, oyom nnyịn ifiọk imọ. Andiwet Psalm ekewet ete: “Ndien owo ẹyefiọk ẹte ke afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.” Enye ọdiọn̄ọ ete ke nnyịn ndifiọk imọ edi ke ufọn nnyịn. “Ami ndi Jehovah Abasi fo, emi n̄kpepde fi usụn̄ udori.” Didie ke nnyịn ibọ ufọn ito edifiọk Jehovah Abasi, kpa Ata Edikon̄?—Psalm 83:18; Isaiah 48:17.

Ata ata ufọn kiet edi nte ke nnyịn imenyene ndausụn̄ kpa ye mme mfịna ofụri usen, imenyene ọkpọsọn̄ idotenyịn iban̄a ini iso, imonyụn̄ inyene ifụre ekikere. N̄ko-n̄ko, nditịm mfiọk Jehovah onụk nnyịn ndikọri isio isio edu kaban̄a mme ata akpan mbụme oro mme owo ke ofụri ererimbot ẹsakde iso ẹse mfịn. Nso idi mme mbụme oro?

Ndi Uwem Fo Enyene Uduak?

Kpa ye n̄wọrọnda n̄kọri oro ubonowo anamde ke ifiọk ubotn̄kpọ, mme owo mfịn ẹsụk ẹbobụp mme ukem akpan mbụme emi: ‘Ntak emi ami ndude mi-e? M̀mọ̀n̄ ke ami n̄ka? Nso idi uduak uwem?’ Edieke owo mînyeneke mme ibọrọ oro ẹnọde uyụhọ, uwem esie idinyeneke ata uduak. Nte ediwak owo ẹkụt edikpu emi? Ndụn̄ọde oro ẹkenamde ke Germany ke utịt utịt iduọk isua 1990 owụt nte ke mbahade iba ke otu mbon oro ẹkedade ẹnam ndụn̄ọde ẹma ẹkere ediwak ini m̀mê ndusụk ini ẹte ke etie nte uwem inyeneke uduak. Ekeme ndidi ẹnyene ukem ekikere oro ke ebiet emi afo odụn̄de.

Edieke owo mînyeneke uduak ke uwem, enye idikemeke ndinịm nti utịtmbuba nnọ idemesie. Ediwak owo ẹsidomo ndinam n̄kpọ mban̄a unana uduak emi ke ndibịne ubọkọkọ oro okụtde unen m̀mê ndikọ inyene mbon. Nte ededi, unana uduak emi ekeme ndikama editịmede esịt. Ndinana uduak ke uwem esikam etịmede ndusụk owo tutu esịm udomo oro mmọ mîyomke ndidu uwem aba. Nte ekemde ye International Herald Tribune, emi edi se iketịbede inọ ekpri ediye n̄kaiferi kiet, emi ọkọkọride okpon “ke ufọk oro ẹnyenede uwouwo inyene ye ukeme ndinam n̄kpọ ekededi.” Okposụkedi enye okodude ọkpọmiọk uwem, enye ama okop ndobo onyụn̄ ekere ke uwem imọ inyeneke uduak. Enye ama emen ibọkidap emi okowotde enye. Ekeme ndidi afo ọmọfiọk mbon en̄wen oro ẹkekopde ndobo, emi ẹkekpade enyene-ndịk n̄kpa.

Nte ededi, ndi afo emesikop mme owo ẹdọhọde ke ifiọk ntaifiọk ekeme ndisian nnyịn kpukpru n̄kpọ mban̄a uwem? N̄wedmbụk n̄kpọntịbe Germany eke urua ke urua, Die Woche, ọdọhọ ete: “Okposụkedi ifiọk ntaifiọk ekemede ndinen, enye emem ke n̄kan̄ eke spirit. Etie nte ukpepn̄kpọ edito ke unam mforo owo inyeneke iwụk, ndien awak-n̄kukọhọ ukpepn̄kpọ obot, inọhọ ndọn̄esịt ye ifụre ndomokiet.” Mme efiọhọ ifiọk ntaifiọk ẹnam ekese ke ndinam nsio nsio orụk uwem ẹn̄wan̄a ndinyụn̄ nnam mme oto-obot edisan̄a n̄kanade ye mme ndutịm oro ẹnamde uwem ẹka iso ẹn̄wana. Kpa ye oro, ifiọk ntaifiọk ikemeke ndisian nnyịn ntak emi nnyịn idude mi ye ebiet emi nnyịn ikade. Edieke nnyịn iberide edem ofụri ofụri ke ifiọk ntaifiọk, owo idibọrọke mme mbụme nnyịn ẹban̄ade uduak uwem. Nte n̄wedmbụk n̄kpọntịbe oro Süddeutsche Zeitung ọkọtọtde, emi osụn̄ọ ke “ntatara udọn̄ kaban̄a ndausụn̄.”

Anie odot ndinọ utọ ndausụn̄ oro akan Andibot? Sia edide enye okobot mme owo esịn ke isọn̄ ke editọn̄ọ, ana enye ọfiọk ntak emi mmọ ẹdude mi. Bible anam an̄wan̄a ete ke Jehovah okobot mme owo man mmọ ẹkpekeme ndidụn̄ ke isọn̄ nnyụn̄ nse mban̄a enye. Mme owo ẹkenyene ndiwụt mme edu esie, utọ nte unenikpe, ọniọn̄, ye ima ke kpukpru edinam mmọ. Ke ini nnyịn ifiọkde ntak oro Jehovah okobotde nnyịn, nnyịn iyọfiọk ntak emi nnyịn idude mi.—Genesis 1:26-28.

Nso ke Afo Ekeme Ndinam?

Nso edieke afo ke ini edem mûkenyeneke mme ibọrọ oro ẹnọde uyụhọ ke mme mbụme emi: ‘Ntak emi ami ndude mi-e? M̀mọ̀n̄ ke ami n̄ka? Nso idi uduak uwem?’ Bible esịn udọn̄ ọnọ fi nditịm mfiọk Jehovah. Ke akpanikọ, Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.” Ẹsịn udọn̄ ẹnọ fi n̄ko ndikọri mme edu Abasi, akpan akpan ima, nnyụn̄ nnam edi ọkpọkpọ utịtmbuba fo ndidu uwem ke idak Obio Ubọn̄ Messiah Abasi emi edide. Do, afo eyenyene uduak ke uwem ye utịbe utịbe idotenyịn ini iso oro enyenede nsọn̄ọ. Ekeme ndidi ẹyebọrọ mme akpan mbụme oro ẹkesifịnade fi ke mbemiso.—John 17:3; Ecclesiastes 12:13.

Nso ukpụhọde ke mme ibọrọ emi ẹkeme ndinam? Hans edi owo kiet oro ekemede ndifiọk emi.a Ediwak isua ko, enye ikenen̄ekede inịm ke Abasi odu, ido ukpono Hans ịkonyụn̄ inyeneke odudu ke uwem esie. Hans ama esida n̄kpọsọn̄ ibọk, ama mme oburobụt iban, abuana ke n̄kpri ubiatibet, onyụn̄ esima ndiwat ọkpọkkpọk moto. Enye anam an̄wan̄a ete: “Edi uwem eketie ukpọk ukpọk, inen̄ekede inọ uyụhọ.” Ke ini enye okodude ke ufọt ufọt iduọk isua 20, Hans ama ebiere ndidiọn̄ọ Abasi ke idemesie ebe ke nditịn̄ enyịn n̄kot Bible. Ke ndondo oro enye eketịmde ọfiọk Jehovah onyụn̄ ọfiọkde se uwem enen̄erede ọwọrọ, Hans ama okpụhọde usụn̄ uwem esie onyụn̄ ana baptism nte kiet ke otu Mme Ntiense Jehovah. Enye odu ke utom ukwọrọikọ uyọhọ ini ke isua duop emi ẹkebede. Enye etịn̄ in̄wan̄-in̄wan̄ ete: “Ndinam n̄kpọ Jehovah edi mfọnn̄kan usụn̄ uwem. Idụhe n̄kpọ ndomokiet oro ẹkemede ndimen ndomo. Ndifiọk Jehovah anam mi nnyene uduak ke uwem.”

Nte ededi, edinyene uduak ke uwem idịghe n̄kukụre n̄kpọ oro afịnade ediwak owo. Nte mme idaha ke ererimbot ẹbiarade, odu akpan mbụme efen oro afịnade ata ediwak owo.

Ntak Emi Eketịbede?

Ke ini afanikọn̄ etịbede, ekikere owo unọmọ esiwak ndikọn̄ọ ke mbụme kiet emi: Ntak emi eketịbede? Ukeme eke ntụk ndiyọ afanikọn̄ enen̄ede ọkọn̄ọ ke ndinyene nnennen ibọrọ nnọ mbụme oro. Edieke ibọrọ oro ọnọde uyụhọ mîdụhe, ubiak oro esika iso ndien owo unọmọ oro ekeme ndikop iyatesịt. Ke uwụtn̄kpọ, kere ban̄a se iketịbede inọ Bruni.

Bruni, eka emi odude idahaemi ke ufọt ufọt isua uwem esie anam an̄wan̄a ete: “Ke ndusụk isua emi ẹkebede, nsek eyenan̄wan mi ama akpa. Mma nnịm ke Abasi odu, ntre mma nyom ndọn̄esịt nto oku n̄kann̄kụk. Enye ọkọdọhọ mi ete ke Abasi ama emen Susanne aka heaven, ebiet emi enye edide angel idahaemi. Mma n̄kụt edikpu ke uwem mi ke ntak n̄kpa esie nnyụn̄ nsua Abasi ke ndikemen enye.” Ubiak ye ndutụhọ Bruni ama aka iso ke ediwak isua. “Ekem kiet ke otu Mme Ntiense Jehovah ama ada Bible owụt mi nte ke n̄kenyeneke ntak ndomokiet ndisua Abasi. Jehovah ikemenke Susanne ika heaven, ndien enye idịghe angel. Udọn̄ọ esie ekedi utịp unana mfọnmma. Susanne ke ede ke n̄kpa, ebetde Jehovah ndinam enye eset. Ami n̄ko mma n̄kpep nte ke enye okobot mme owo ndidu uwem ke nsinsi ke paradise isọn̄, ndien emi oyosu ke mîbịghike. Ke ndondo oro n̄kọtọn̄ọde ndifiọk orụk owo emi Jehovah edide, mma nsan̄a n̄kpere enye, ndien ubiak mi ama ọtọn̄ọ ndisụhọde.”—Psalm 37:29; Utom 24:15; Rome 5:12.

Afanikọn̄ esitụk ediwak miliọn owo ke nsio nsio usụn̄: edisobo n̄kpọ mmọn̄eyet, ekọn̄, akan̄, m̀mê oto-obot afanikọn̄. Bruni ama ọtọn̄ọ ndikop ndọn̄esịt ke ndondo oro enye okokụtde ke Bible nte ke inaha ẹduọhọ Jehovah kaban̄a afanikọn̄, nte ke akananam enye iduakke ite ubonowo ẹbọ ndutụhọ, ye nte ke mîbịghike enye ayada utịt ọsọk idiọkn̄kpọ. N̄kọri ke idiọkido edi idiọn̄ọ nte ke nnyịn ke emi idu uwem ke “ukperedem ini” eke editịm n̄kpọ emi. N̄wọrọnda ukpụhọde oro edinamde n̄kpọ ọfọn akan, emi kpukpru nnyịn iyomde enen̄ede ekpere.—2 Timothy 3:1-5; Matthew 24:7, 8.

Ndifiọk Abasi

Hans ye Bruni ẹkenyene esisịt ifiọk ẹban̄a Abasi. Mmọ ẹma ẹnịm ke enye odu edi iketịmke ifiọk enye. Mmọ ẹma ẹbọ ufọn ẹto mme ukeme oro mmọ ẹkesịnde nditịm mfiọk Jehovah. Mmọ ẹma ẹnyene mme ibọrọ oro ẹdotde ke mme akpan mbụme oro ẹsibụpde ke eyo nnyịn. Emi ama ọnọ mmọ ifụre ekikere ye idotenyịn ini iso oro enyenede nsọn̄ọ. Ediwak miliọn mme asan̄autom Jehovah ẹma ẹnyene ukem ifiọk n̄kpọntịbe emi.

Ndifiọk Jehovah ọtọn̄ọ ke nditịn̄ enyịn n̄kpep Bible emi asiande nnyịn aban̄a enye ye se enye oyomde oto nnyịn. Oro edi se ndusụk owo ẹkenamde ke akpa isua ikie. Ewetmbụk ye abiausọbọ oro Luke, ọtọt ete ke mme andibuana ke esop mme Jew ke Beroea, Greece, ẹma “ẹkop ikọ [Paul ye Silas] ke edinyịme esịt, ẹnyụn̄ ẹdụn̄ọde n̄wed Abasi ke usen ke usen, ẹte ifiọk m̀mê mme ikọ oro ẹkem ntre.”—Utom 17:10, 11.

Mme Christian akpa isua ikie n̄ko ẹma ẹsisop idem ọtọkiet ke mme esop. (Utom 2:41, 42, 46; 1 Corinth 1:1, 2; Galatia 1:1, 2; 2 Thessalonica 1:1) Ukem oro ke edi mfịn. Mme esop Mme Ntiense Jehovah ẹsisop idem ọtọkiet man ẹdụk mme mbono esop oro ẹtịmde akpan akpan man ẹn̄wam mme owo ẹnen̄ede ẹsan̄a ẹkpere Jehovah ẹnyụn̄ ẹkop idatesịt ke ndinam n̄kpọ esie. Ndibuana ye Mme Ntiense n̄kann̄kụk enyene ufọn en̄wen. Sia mme owo ẹsikabarede ẹbiet Abasi oro mmọ ẹtuakde ibuot ẹnọ, Mme Ntiense Jehovah ẹsiwụt mme edu Jehovah, okposụkedi ẹnyenede adan̄a. Ntre ndisop idem ọtọkiet ye Mme Ntiense an̄wam nnyịn nditịm mfiọk Jehovah.—Mme Hebrew 10:24, 25.

Nte oro etie nte ukeme oro okponde akaha ke ndifiọk Owo kiet? Ẹnen̄ede ẹyom ukeme. Edi nte oro idịghe ukem ye ediwak n̄kpọ oro afo oyomde ndinyene ke uwem? Kere ban̄a ukeme oro ọwọrọetop owo mbuba esisịnde. Ke uwụtn̄kpọ, Jean-Claude Killy, owo France emi ọkọbọde gold Olympic ke mbre mbuba snow etịn̄ emi aban̄a se oyomde man owo edi ebre mbre mbuba ofụri ererimbot emi okụtde unen: “Afo enyene nditọn̄ọ isua 10 mbemiso ini mbre oro onyụn̄ etịm idem ọnọ enye ke ediwak isua onyụn̄ ekere aban̄a enye kpukpru usen . . . Enye edi utom emi afo anamde kpukpru usen ke isua, ke n̄kan̄ eke ekikere ye eke ikpọkidem.” Ẹkam ẹsịn kpukpru ini ye ukeme oro ke mbuba oro ekemede ndibịghi ke minit duop! Adan̄a didie akan oro ke oyom isịn ini ye ukeme ke ndifiọk Jehovah nnyụn̄ mbọ ufọn oro ebịghide akan.

Itie Ebuana Oro Ekperede Akan

Anie oyom nditaba akpan n̄kpọ ke uwem? Idụhe owo oro oyomde. Ntem, edieke afo okụtde ke uwem fo inyeneke ata uduak mîdịghe edieke afo oyomde ẹnam ntak emi afanikọn̄ esitịbede an̄wan̄a, do nen̄ede biere ndifiọk Jehovah, kpa Abasi a-Bible. Ndikpep n̄kpọ mban̄a enye ekeme n̄ko ndinen̄ede n̄kpụhọde uwem fo nnam ọfọn akan, ke nsinsi.

Ndi nnyịn iyetre ndikpep n̄kpọ mban̄a Jehovah tutu amama? Idem ẹsisụk akpakpa mbon oro ẹnamde n̄kpọ ẹnọ enye ke ediwak isua aban̄a mme n̄kpọ oro mmọ ẹkekpepde ẹban̄a enye ye mbufa n̄kpọ oro mmọ ẹkade iso ndikpep mban̄a enye. Ndikpep mme utọ n̄kpọ oro anam nnyịn ikop inemesịt onyụn̄ anam nnyịn inen̄ede isan̄a ikpere enye. Nnyịn ikpakam inyene ukem ekikere apostle Paul, emi ekewetde ete: “Uwak ọniọn̄ ye ifiọk Abasi ẹditụn̄ọ adan̄a didie! Mme ikpe Esie ẹkak owo ndidụn̄ọde adan̄a didie, onyụn̄ ayan̄a owo nditiene nde usụn̄ Esie. Koro anie ọfiọk ekikere Ọbọn̄? Anie okonyụn̄ ọnọ Enye item?”—Rome 11:33-35a.

[Ikọ idakisọn̄]

[Se Ẹwetde ke Ikpọ Abisi ke page 5]

Mme owo ẹsụk ẹbobụp mme ukem akpan mbụme emi: ‘Ntak emi ami ndude mi-e? M̀mọ̀n̄ ke ami n̄ka? Nso idi uduak uwem?’

[Se Ẹwetde ke Ikpọ Abisi ke page 6]

“Ke ndondo oro n̄kọtọn̄ọde ndifiọk orụk owo emi Jehovah edide, mma ntetịm nsan̄a n̄kpere enye”

[Se Ẹwetde ke Ikpọ Abisi ke page 7]

“Ndinam n̄kpọ Jehovah edi mfọnn̄kan usụn̄ uwem. Idụhe n̄kpọ ndomokiet oro ẹkemede ndimen ndomo. Ndifiọk Jehovah anam mi nnyene uduak ke uwem”