Afanikọn̄ Oro Owụtde ke N̄kpọ Ọmọn̄ Ọfọn

“Ndiọkeyo emi ọsọn̄de ndiyọ oyodu ke mme akpatre usen.”—2 TIMOTHY 3:1.

NDI akanam omokop mîdịghe okokụt ekededi ke otu ndiọi idaha oro iyomde ndisiak mi?

● Ata idiọk udọn̄ọ owot owo ọkwọkudịm.

● Akan̄ owot owo nte utọrọ odụk ufọk unen.

● Unyekisọn̄ owot ata ediwak owo onyụn̄ anam ediwak owo ẹnana ebietidụn̄.

Ke mme page oro ẹtienede, oyokụt mme n̄kpọ emi ẹdinamde fi enen̄ede afiak ekere se iwọrọde ererimbot emi, oyonyụn̄ okụt ke Bible ama etetịn̄ ke mme n̄kpọ emi ẹditịbe ke ini oro ẹkotde “mme akpatre usen.”a

Owo iwetke mme ibuotikọ emi man afo okụt ke ererimbot emi ọdiọk, sia ekeme ndidi afo omokokụt emi ke idemfo. Edi ẹyom ndinam fi ọfiọk ke n̄kpọ ọmọn̄ ọfọfọn. Mme ibuotikọ emi ẹyenam okụt ke ntịn̄nnịm ikọ Bible itiokiet emi ẹsude idahaemi ẹwụt ke “mme akpatre usen” emi ẹmọn̄ ẹsesịm utịt. Oyokụt n̄ko se mbon oro mînịmke ke mme ntịn̄nnịm ikọ Bible ẹsu ẹsiwakde nditịn̄, ye ntak oro afo ekpenịmde ke n̄kpọ ọmọn̄ ọfọfọn.

[Ikọ Idakisọn̄]

Ntịn̄nnịm Ikọ 1. Mme Unyekisọn̄

“Ikpọ unyekisọn̄ ẹyedu.”—LUKE 21:11.

● Ẹdụri Winnie, eyen isua kiet ye ọfiọn̄ inan̄, ẹsio ke n̄wụre ufọk ke ini unyekisọn̄ etịbede ke Haiti. Mme ọkọmbụk n̄kpọntịbe ẹkedada ẹkop uyo eyet esie ndap ndap. Nsekeyen emi ama ọbọhọ, edi ete ye eka esie ikọbọhọke.

NSO KE MBỤK OWỤT? Se ibede owo 300,000 ẹkekpan̄a ke ini ata akamba unyekisọn̄ eketịbede ke Haiti ke January 2010, ndien n̄kpọ nte owo miliọn kiet ye ubak ikonyụn̄ inyeneke aba ebietidụn̄. Okposụkedi unyekisọn̄ emi okokponde etieti, idịghe Haiti kpọt ke utọ unyekisọn̄ emi etịbe. Ikpọ unyekisọn̄ 18 ke nsụhọde n̄kaha ẹma ẹtịbe ke nsio nsio ebiet ke ererimbot ke ufan̄ isua kiet kpọt—oro edi, ọtọn̄ọde ke April 2009 esịm April 2010.

NSO KE MME OWO ẸSIWAK NDITỊN̄? Idịghe nte ke unyekisọn̄ etịbe idahaemi akan nte eketịbede ke eset, n̄kukụre edi nte ke ifiọk ntaifiọk anam mme owo ẹfiọk nsio nsio ebiet emi unyekisọn̄ ẹtịbede idahaemi akan nte ẹkefiọkde ke eset.

NDI MMỌ ẸNEN? Kere ban̄a emi ise: Idịghe ibat unyekisọn̄ ke Bible etịn̄ aban̄a, edi ọdọhọ ke “ikpọ unyekisọn̄” ẹyedu “ke nsio nsio ebiet,” anamde emi edi kiet ke otu akpan n̄kpọntịbe oro ẹdade ẹdiọn̄ọ ke idu ke mme akpatre usen.—Mark 13:8; Luke 21:11.

AFO EKERE DIDIE? Ndi ikpọ unyekisọn̄ ẹtịbe nte Bible ọkọdọhọde ke ẹyetịbe?

Ekeme ndidi unyekisọn̄ kpọt idinamke owo ekere ke idu ke mme akpatre usen. Edi unyekisọn̄ edi kiet ke otu ntịn̄nnịm ikọ Bible oro ẹsude. Yak itịn̄ iban̄a ọyọhọ ntịn̄nnịm ikọ iba.

[Se ẹwetde ke ikpọ abisi ke page 4]

“Nnyịn emi idide ntaifiọk ikot enye ikpọ unyekisọn̄. Edi mbon eken ẹkot enye ata enyene ndịk n̄kpọ.”—KEN HUDNUT, ATAIFIỌK UNITED STATES EMI EKPEPDE N̄KPỌ ABAN̄A ISỌN̄.

[Ebiet ẹdade ndise ẹto ke page 4]

© William Daniels/Panos Pictures

Ntịn̄nnịm Ikọ 2. Akan̄

“Akan̄ oyodu.”—MARK 13:8.

● Ete kiet aka ndiyom se adiade ke Quaratadji, obio-in̄wan̄ kiet ke Niger. Mme iman ye nditọeka esie ẹma ẹto obio-in̄wan̄ en̄wen ẹdi do n̄ko ndiyom se ẹdiade. Edi enye osụhọde ana ikpọn̄ ke mbri. Ntak emi enye anade ikpọn̄? Sidi, ọbọn̄ obio oro, ọdọhọ ke “enye inyeneke se ọkpọnọde ubon esie ẹdia, inyụn̄ ikemeke nditie nse mmọ iso.”

NSO KE MBỤK OWỤT? Ekpere ndidi owo kiet ke otu owo itiaba ke ererimbot inyeneke udia emi ekemde mmọ ke usen. Edi ibat emi enen̄ede ọdọk ke edem usụk Sahara Africa koro owo kiet ke otu owo ita do ẹsitie biọn̄ ke ata ediwak usen. Man ibat emi enen̄ede an̄wan̄a fi, da ufọk emi owo ita ẹdude ke uwụtn̄kpọ—oro edi, ete ye eka, ye nsekeyen. Anie editie biọn̄ ke ini udia emi odude ekemde owo iba kpọt? Ndi ete, m̀mê eka, m̀mê nsekeyen editie biọn̄? Se se mme owo ẹsisobode mi kpukpru usen.

NSO KE MME OWO ẸSIWAK NDITỊN̄? Se idude ke isọn̄ ekeme ndinọ kpukpru owo udia afiak ọyọhọ osụhọ. Mfịna edi ke owo itịmke mme n̄kpọ emi ikama.

NDI MMỌ ẸNEN? Edi akpanikọ nte ke mme ọtọin̄wan̄ ẹtọ n̄kpọ ẹnyụn̄ ẹnọ mme n̄kpọ emi ẹka nsio nsio itie idahaemi ẹkan nte akanam edide. Imọfiọk ke akpana ukara ekeme ndinọ udia emi ekemde kpukpru owo. Edi mmọ ẹtịme ndinam emi ke ediwak isua edi ikemeke.

AFO EKERE DIDIE? Okukam edi Mark 13:8 osu emi. Ndi akan̄ emi isịmke ofụri ererimbot kpa ye ofụri se ntaifiọk ẹnamde?

Unyekisọn̄ ye akan̄ ẹsiman afanikọn̄ en̄wen emi osụk esịnede ke idiọn̄ọ mme akpatre usen emi.

[Se ẹwetde ke ikpọ abisi ke page 5]

“Mîkpedịghe biọn̄, ata ediwak nditọwọn̄ emi udọn̄ọ obufre, utọrọ, ye ndiọi udọn̄ọ eken ẹwotde ikpakpaha.”—ANN M. VENEMAN, AKANI AKWA OWO UNICEF.

[Ebiet ẹdade ndise ẹto ke page 5]

© Paul Lowe/Panos Pictures

Ntịn̄nnịm Ikọ 3. Udọn̄ọ

“Ndiọi udọn̄ọ . . . ẹyenyụn̄ ẹdu.”—LUKE 21:11.

● Bonzali, abiausọbọ kiet ke idụt Africa oro ekọn̄ ọnọmọde anam se enye ekemede ndinọ mbio obio esie emi ẹdọn̄ọde Marburg,a usọbọ. Kpukpru eseme oro enye esemede ọdọhọ ikpọ owo ukara ke ikpọ obio ẹdin̄wam imọ ọwọrọ ikpîkpu. Edi ikpọ owo ukara emi ẹte idi idinọ un̄wam ke ọfiọn̄ inan̄ ama ekebe, Bonzali ama akpakpa. Udọn̄ọ emi ama ebe enye ke ini enye okosụk ọnọde usọbọ.

NSO KE MBỤK OWỤT? Udọn̄ọ obufre, utọrọ, AIDS, akpaikpai ikọn̄, utoenyịn, ẹsịne ke otu ndiọi udọn̄ọ oro ẹnọmọde ubonowo. Ke ndondo emi, udọn̄ọ mbition emi ẹwot n̄kpọ nte owo miliọn 11. Emi owụt ke udọn̄ọ emi esiwot n̄kpọ nte owo kiet kpukpru sekọn ita ke isua.

NSO KE MME OWO ẸSIWAK NDITỊN̄? Se inamde etie nte udọn̄ọ awak idahaemi akan akpa edi nte ke mme owo ẹnen̄ede ẹwak n̄ko ke ererimbot idahaemi. Nte mme owo ẹwakde, ntre ke ẹmen udọn̄ọ.

NDI MMỌ ẸNEN? Imọfiọk ke mme owo ẹwak idahaemi ke ererimbot, edi mbiausọbọ ẹnen̄ede ẹdiọn̄ọ udọn̄ọ, se ẹkpenamde man udọn̄ọ osụhọde ubọk, ye nte ẹkpekọkde udọn̄ọ idahaemi ẹkan akpa. Ndi kpukpru emi iwụtke ke akpana owo akan udọn̄ọ ubọk idahaemi? Utu ke oro, udọn̄ọ akam akan owo ubọk.

AFO EKERE DIDIE? Ndi ukereke ke ndiọi udọn̄ọ emi Bible eketịn̄de aban̄a omụm mme owo emi?

Unyekisọn̄, akan̄, ye ndiọi udọn̄ọ ẹtụhọrede ẹnyụn̄ ẹwowot ata ediwak owo mfịn. Ndien ekese owo ẹkam ẹkụt ukụt ke ubọk ekemmọ owo—ediwak ke otu emi ẹbọ ufen emi ke ubọk mbon oro ẹkpekam ẹkpemede-kpeme mmọ. Yak ise se Bible ọkọdọhọde ke eyetịbe.

[Ikọ Idakisọn̄]

[Se ẹwetde ke ikpọ abisi ke page 6]

“Edi ata enyene ndịk n̄kpọ ekpe m̀mê idiọk unam en̄wen ndita owo; n̄kpọ en̄wen emi enyenede ndịk ntre edi idiọk udọn̄ọ ndisịne owo ke esịtidem nta owo n̄wot, ndien se iwọrọde ata ediwak owo edi oro.”—MICHAEL OSTERHOLM, ATAIFIỌK EMI EKPEPDE N̄KPỌ ABAN̄A UDỌN̄Ọ.

[Ebiet ẹdade ndise ẹto ke page 6]

© William Daniels/Panos Pictures

Ntịn̄nnịm Ikọ 4. Ẹnana Ndammana Ima

“Mme owo idinyeneke ima ke ubon.”—2 TIMOTHY 3:1-3, Bible oro ẹkotde God’s Word.

● Chris anam utom ye n̄ka emi ẹsede ẹban̄a afai esịtufọk ke United Kingdom. Enye ọdọhọ ete, “Mmeti nte mma kiet odụkde edi ọfis nnyịn usen kiet, ẹma ẹtịm mma emi tutu ndiọn̄ọke enye aba. Ẹfiomo ndusụk iban tutu mmọ ikam ikemeke ndimenede iso nse owo.”

NSO KE MBỤK OWỤT? Ke idụt kiet ke Africa, ẹma ẹsabade n̄wan kiet ke otu iban ita emi ẹdude do ke ini eyenọwọn̄. Ndụn̄ọde emi ẹkenamde ke idụt oro owụt ke se ibede mbahade ita ke otu irenowo emi ẹdude ke idụt oro ẹkere ke idiọkke owo ndimia n̄wan esie. Edi idịghe iban ikpọn̄ ke ẹsifiomo ke ubon. Ke uwụtn̄kpọ, ke otu mme ebe duop oro ẹdude ke Canada, ita ke otu emi ẹsibọ umia ye mfiomo ke ubọk iban mmọ.

NSO KE MME OWO ẸSIWAK NDITỊN̄? Idịghe mfịn ke afai esịtufọk ọtọn̄ọ. Se idude edi nte ke mme owo ikesisioroke uyo itịn̄ utọ n̄kpọ emi ke eset.

NDI MMỌ ẸNEN? Imọfiọk ke ibịghike mme owo ẹketọn̄ọ ndisioro uyo ke ini mbonubon ẹfiomode mmọ. Edi ndi ndisioro uyo ntem anam mfịna emi osụhọde ubọk? Baba! Ima idụhe aba ke ubon.

AFO EKERE DIDIE? Okûkam udi 2 Timothy 3:1-3 osu emi. Ndi ima inen̄ekede inana ke ubon mfịn?

Ọyọhọ ntịn̄nnịm ikọ ition osu ke mme ubon ye ke isọn̄. Ẹyak ikop se Bible etịn̄de aban̄a emi.

[Se ẹwetde ke ikpọ abisi ke page 7]

“Afai esịtufọk edi kiet ke otu ata idiọk ubiatibet emi mme owo mîsiwakke ndinam ukara ẹdiọn̄ọ ẹban̄a. Ke nsụhọde n̄kaha, iban ẹsiyak mme ebe mmọ ẹmia mmọ utịm ike 35 mbemiso ẹkade ẹketịn̄ ẹnọ mme bodisi.”—ETỊN̄IKỌ KE IBUOT N̄KA EMI ESEDE ABAN̄A AFAI ESỊTUFỌK KE U.K.

Ntịn̄nnịm Ikọ 5. Ẹbiat Isọn̄

‘Abasi oyosobo mbon oro ẹbiatde isọn̄.’—EDIYARADE 11:18.

● Ete kiet emi ekerede Pirri edi atuak-ukọt ke Kpor mi ke Nigeria. Aranisọn̄ emi odụtde ke Niger Delta abiat mbubehe esie. Enye ọdọhọ ke aran emi ‘owot iyak ke mmọn̄ mmimọ, abiat mmimọ ikpaidem, abiat idịm mmimọ, ke imọ inyeneke aba se inamde.’

NSO KE MBỤK OWỤT? Ntaifiọk ẹdọhọ ke se ẹbiomde ẹdọn̄ ke inyan̄ akak inyan̄ uyo. Ndien ke mbahade iba ke otu emi ẹdi ọkpọ emi edidade ata ediwak isua mbemiso enye atahade ama. Ke adianade do, mme owo ẹbiat mme n̄kpọ eken n̄ko ke isọn̄ ke usụn̄ oro enyenede ndịk. Ndụn̄ọde owụt ke esida n̄kpọ nte isua kiet ye ubak mbemiso isọn̄ afiak enyene mme n̄kpọ emi mme owo ẹsion̄ode ke esịt. Emi anam n̄wedmbụk n̄kpọntịbe Australia, Sydney Morning Herald ọdọhọ ke “edieke isụk ikade iso itọt nte isụk itọtde ke isọn̄ idahaemi, inyụn̄ ikade iso ision̄o mme n̄kpọ ke isọn̄ nte isụk ision̄ode idahaemi, ọwọrọ ke etisịm isua 2035, ke iyoyom isọn̄ en̄wen ke adianade ye enye emi isụk idodụn̄ mi.”

NSO KE MME OWO ẸSIWAK NDITỊN̄? Mme owo ẹnyene ifiọk etieti. Ntre nnyịn imekeme ndikọk mfịna emi nnyụn̄ nnyan̄a isọn̄ nnyịn emi.

NDI MMỌ ẸNEN? Ediwak owo ke ẹsịn idem ẹkpep mme owo nte ẹkpekamade isọn̄ nnyịn emi. Edi kpa ye emi, ke ẹsụk ẹbabiat isọn̄ emi ke ata enyene ndịk usụn̄.

AFO EKERE DIDIE? Ndi imoyom Abasi edinyan̄a isọn̄ emi—kpa nte enye ọn̄wọn̄ọde—mbak ẹdisobo enye?

Ke ẹsiode ntịn̄nnịm ikọ ition emi isụk inemede mi ẹfep, enyene nti n̄kpọ emi Bible ọdọhọde ke ẹyetịbe ke mme akpatre usen emi. Ẹyak ineme kiet ke otu emi ise.

[Se ẹwetde ke ikpọ abisi ke page 8]

“Itiehe mi aba nte ke ndụn̄ ke paradise, edikam etie nte ke ndụn̄ ke ifụm emi ẹduọn̄ọde ibọkn̄kpa.”—ERIN TAMBER EMI ODỤN̄DE KE MBENESỤK KE UNITED STATES, ETỊN̄ NTE ARANISỌN̄ EMI ẸKEDUỌKDE KE ESỤK MEXICO KE 2010 AKABIATDE N̄KPỌ.

[Ekebe ke page 8]

Ndi Abasi Edi Ntak?

Sia Bible ama eketetịn̄ ke ndiọi n̄kpọ ẹyetịbe mfịn, ndi oro ọwọrọ ke Abasi edi ntak ndiọi n̄kpọ oro ẹtịbede mfịn? Ndi enye anam nnyịn ibọ ufen? Emekeme ndikụt nnennen ibọrọ mbụme emi ke ibuot 11 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.

[Ebiet ẹdade ndise ẹto ke page 8]

U.S. Coast Guard photo

Ntịn̄nnịm Ikọ 6. Ẹkwọrọ Ikọ ke Ofụri Ererimbot

“[Ẹyekwọrọ] eti mbụk obio ubọn̄ emi ke ofụri isọn̄.”—MATTHEW 24:14.

● Vaiatea odụn̄ ke Tuamotu Archipelago emi odude ke isuo Pacific. N̄kpri isuo 80 ẹdu ke Tuamotu emi edide kilomita 802,900. N̄kpọ nte owo 16,000 ẹdụn̄ọ mi. Kpa ye isuo emi odude ke ata esịt esịt, Mme Ntiense Jehovah ẹsika ẹbịne Vaiatea ye mme mbọhọidụn̄ esie. Ntak-a? Sia Mme Ntiense emi ẹyom ndikwọrọ etop Obio Ubọn̄ Abasi nnọ kpukpru owo—inamke n̄kpọ m̀mê m̀mọ̀n̄ ke mmọ ẹdụn̄ọ.

NSO KE MBỤK OWỤT? Etop Obio Ubọn̄ Abasi esịm kpukpru itụn̄ ye inụk ererimbot. Ke 2010 kpọt, Mme Ntiense Jehovah ẹma ẹbiat se ibede hour biliọn kiet ye ubak ẹkwọrọ eti mbụk Obio Ubọn̄ Abasi ke idụt 236. Edieke ẹbaharede hour emi ukem ukem, ọwọrọ ke Ntiense kiet kiet akabiat minit 30 kpukpru usen ọkwọrọ ikọ. Ke ufan̄ isua duop oro ẹbede, Mme Ntiense ẹsion̄o mme n̄wed ye mme n̄kpọ eken oro ebede idem biliọn 20 ndin̄wam mme owo ẹkpep Bible.

NSO KE MME OWO ẸSIWAK NDITỊN̄? Idịghe mfịn ke ukwọrọikọ emi ọtọn̄ọ.

NDI MMỌ ẸNEN? Imọfiọk ke ediwak owo ẹkwọrọ n̄kpọ ẹban̄a Bible. Edi ekese mmọ isinamke utom emi ibịghi, isinyụn̄ inamke ke ofụri ererimbot. Edi Mme Ntiense Jehovah ẹnam eke mmọ ke ofụri ererimbot man ata ediwak owo ẹkop etop emi. Mmọ ikpaha mba kpa ye ọkpọsọn̄ ukọbọ oro mmọ ẹsobode ke ubọk ikpọ mbon ukara ererimbot emi mînyeneke esịtmbọm.a (Mark 13:13) Ke adianade do, owo isikpehe Mme Ntiense Jehovah okụk ndikwọrọ ikọ. Edi mmọ ẹnam emi ke imaesịt, isinyụn̄ inyamke-nyam n̄wed mmọ. Ẹda enọ imaesịt ẹnam kpukpru utom mmọ.

AFO EKERE DIDIE? Ndi ẹkwọrọ “eti mbụk obio ubọn̄” emi ke ofụri ererimbot? Ndi usụn̄ oro ntịn̄nnịm ikọ Bible emi osude iwụtke ke n̄kpọ ọmọn̄ ọfọfọn?

[Ikọ Idakisọn̄]

[Se ẹwetde ke ikpọ abisi ke page 9]

“Edieke Jehovah enyịmede, nnyịn iyaka iso isịn ifịk ikwọrọ eti mbụk Obio Ubọn̄ emi, inam kpukpru se ikekeme ndikwọrọ ikọ nnọ mme owo.”—2010 YEARBOOK OF JEHOVAH’S WITNESSES.

N̄kpọ Ọmọn̄ Ọfọfọn!

“Ayak esisịt, idiọkowo ididụhe aba . . . Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”—PSALM 37:10, 11.

NDI akpama ndikụt nte itien̄wed emi osude? Imọfiọk ke ayama. Imenyene ekese ntak ndinịm ke itie Bible emi ọmọn̄ ososu.

Ibuotikọ itiokiet oro isụk ikụrede do ẹneme ndusụk ntịn̄nnịm ikọ Bible emi ẹnen̄erede ẹwụt ke idu ke “mme akpatre usen.” (2 Timothy 3:1-5) Abasi ọkọnọ mme owo spirit ndiwet mme ntịn̄nnịm ikọ emi man ikpenyene idotenyịn. (Rome 15:4) Ndikụt nte mme ntịn̄nnịm ikọ emi ẹsude owụt ke kpukpru afanikọn̄ oro isobode idahaemi ẹmọn̄ ẹbebe ẹfep.

Nso iditịbe ke oro ebede? Obio Ubọn̄ Abasi ayakara kpukpru owo. (Matthew 6:9) Se se Bible etịn̄de mi aban̄a nte isọn̄ editiede ini oro:

● Biọn̄ ididụhe aba. “Uwak n̄kpasịp ẹyedu ke isọn̄; ọyọyọhọ ọduọhọ ke mme enyọn̄ obot.”—Psalm 72:16.

● Udọn̄ọ ididụhe aba. “Baba andidụn̄ kiet ididọhọke ite: “Ndọdọn̄ọ.”—Isaiah 33:24.

● Ẹyenam isọn̄ emi edi obufa. “Wilderness ye edisat ebiet ẹyedara, ndien unaisọn̄ desat ayadara onyụn̄ asiaha ikọn̄ nte saffron.”—Isaiah 35:1.

Emi ẹdi ibat ibat ke otu ndinem ntịn̄nnịm ikọ Bible emi ẹdisude ke mîbịghike. Mbọk dọhọ Mme Ntiense Jehovah ẹtịn̄ se inamde mmọ ẹnen̄ede ẹnịm ke n̄kpọ ọmọn̄ ọfọfọn.