Ẹben̄e Idem Kpukpru Ini Ẹnọ Usen Jehovah

1. Nso ke ana inam man ibọhọ usen Jehovah?

ẸMA ẹtịn̄ ẹban̄a “usen Jehovah” ke Bible, esiban̄a ini emi Jehovah ebierede ikpe ọnọ mme asua esie onyụn̄ anyan̄ade ikọt esie. Ke eset, Jehovah ama esinọ ndusụk idụt ufen. (Isa. 13:1, 6; Ezek. 13:5; Zeph. 1:8) Ke eyo nnyịn, “usen Jehovah” editọn̄ọ ini mme andikara ẹdisobode Akwa Babylon, onyụn̄ etre ke ekọn̄ Armageddon. Ikpoyom ndibọhọ “usen” oro, ana itịm idem idahaemi. Jesus ama ekpep nnyịn ke ana itịm idem kpukpru ini iben̄e “akwa ukụt.” Ikọ esie ọkọwọrọ ke ididịghe mfịn nnyịn itịm idem, n̄kpọn̄ nnyịn itịmke aba.​—Matt. 24:21; Luke 12:40.

2. Ntak emi se idude ke 1 Thessalonica ekemede ndin̄wam nnyịn?

² Ke akpa leta emi Abasi akanamde apostle Paul ewet ọnọ nditọete ke Thessalonica, Paul ama ọnọ uwụtn̄kpọ ifan̄ emi akan̄wamde mmọ ẹben̄e idem kpukpru ini ẹnọ akwa usen emi Jehovah edibierede ikpe inọ mme asua Esie. Paul ama ọdiọn̄ọ ke usen Jehovah ididịghe ini enye ekewetde leta oro. (2 Thess. 2:1-3) Edi enye ama ọdọhọ nditọete esie ẹtịm idem ẹnọ usen oro nte n̄kpọ eke ẹdọhọde ke edidi n̄kpọn̄ emi edisierede. Nnyịn n̄ko imekeme ndinam item Paul oro. Ẹyak ineme se Paul eketịn̄de aban̄a n̄kpọ ita emi: (1) nte usen Jehovah edidide, (2) mbon emi mîdibọhọke usen oro, ye (3) nte ikpetịmde idem man ibọhọ.

DIDIE KE USEN JEHOVAH EDIDI?

3. Didie ke usen Jehovah edidi nte inọ ke okoneyo? (Se ndise n̄ko.)

³ “Nte inọ ke okoneyo.” (1 Thess. 5:2) Akpa ke otu uwụtn̄kpọ ita emi ẹban̄ade nte usen Jehovah edidide edi emi. Inọ ẹsiwak ndibiọn̄ọde inikiet inikiet ke okoneyo, ini owo mîkodorike enyịn. Usen Jehovah edinyụn̄ ọbiọn̄ọde ntre, oyonyụn̄ akpa ata ediwak owo idem. Idem ekeme ndikam n̄kpa ata mme Christian nte edide ẹte ibọp enyịn itat n̄kpọ okpụhọde ke ererịmbot, usen Jehovah ọbiọn̄ọde inikiet inikiet. Ẹyesobo ndiọi owo, edi owo idisoboke nnyịn.

4. Didie ke usen Jehovah ebiet ubiak uman?

⁴ “Ayabuat . . . kpa nte uman abuatde n̄wan idịbi.” (1 Thess. 5:3) N̄wan idibi isidiọn̄ọke akpan ini emi ubiak uman editọn̄ọde enye, edi esidiọn̄ọ ke eyedi. Ama ọtọn̄ọ, anaedi edibabuat enye. Ayabiak enye. Ẹkpenam se ẹnanam, ubiak oro idisụhọkede tutu enye aman. Ukem ntre, nnyịn idiọn̄ọke usen m̀mê hour emi usen Jehovah edidide, edi imọdiọn̄ọ ke eyedi, ke Jehovah eyebiere ikpe usọp usọp ọnọ ndiọi owo; mmọ idibọhọke.

5. Didie ke akwa ukụt ebiet usiere?

⁵ Ebiet usiere. Ke ọyọhọ uwụtn̄kpọ Paul ita, Paul ama afiak etịn̄ aban̄a nte inọ ẹkade ndiyịp n̄kpọ okoneyo. Edi isan̄ emi, enye okpụhọde ukot ikọ esie ekpri. Ndien etie nte enye emen usen Jehovah odomo ye usiere. (1 Thess. 5:4) Inọ emi ẹkade ndiyịp n̄kpọ okoneyo ẹkeme ndiyịp tutu idiọn̄ọke ke ini aka. Eyo ekeme ndisiere mbaha mmọ, onyụn̄ ayarade mmọ. Enyene mbon emi ẹkọbọde ẹnam se Jehovah mîmaha, se mmọ ẹnamde oro etie nte mmọ ẹdọn̄ọ ke ekịm. Ukem nte usiere esiyararede inọ, akwa ukụt eyediyarade mmọ. Nnyịn itiehe nte mmọ. Imesịn ndinam se isiyatde Jehovah, inyụn̄ ika iso inam “kpukpru orụk eti ido ye edinen ido ye akpanikọ.” Oro ke ida iwụt ke imeben̄e idem ibet akwa ukụt. (Eph. 5:8-12) Ke Paul ama eketịn̄ oro ama, enye ama ọnọ uwụtn̄kpọ iba efen emi ẹsụk ẹsan̄ade n̄kpọ ye ita enye eken, aban̄a mbon emi mîdibọhọke usen Jehovah.

MMANIE MÎDIBỌHỌKE USEN JEHOVAH?

6. Nso inam idọhọ ke n̄wakn̄kan owo ke ẹde idap? (1 Thessalonica 5:6, 7)

⁶ “Mmọ eke ẹdede idap.” (Kot 1 Thessalonica 5:6, 7.) Paul ekemen mbon emi mîdibọhọke usen Jehovah odomo ye mbon emi ẹdede idap. Mbon emi ẹdede idap isidiọn̄ọke se ikade iso, isinyụn̄ idiọn̄ọke ke ini ke aka. Akpan n̄kpọ ekpetịbe, mmọ isidiọn̄ọke, isinyụn̄ ikemeke ndinam n̄kpọ ndomokiet mban̄a n̄kpọ oro. Ata ediwak owo mfịn ẹtie ntre. (Rome 11:8) Mmọ ẹkụt mme n̄kpọ emi ẹwụtde ke idu uwem ke “mme akpatre usen,” ke akwa ukụt ọmọn̄ ọtọtọn̄ọ, edi mmọ inịmke. Ikpọ n̄kpọ ẹma ẹtịbe ke ererimbot, ndusụk owo ẹsiyom ndikop eti mbụk Obio Ubọn̄ Abasi. Edi ediwak mmọ ẹsidi ẹma ẹkop ẹma, ẹfiak ẹkedụk idap utu ke nditat enyịn nse se ikade iso. Idem ndusụk mbon emi ẹnịmde ke enyene usen emi Abasi edibierede ikpe inọ ndiọi owo ẹkere ke idịghe n̄kpọ mfịn, ke edidi ko ke ini iso. (2 Pet. 3:3, 4) Edi amaedi nnyịn, edi eyo esiere nnyịn itetịm ida item Bible emi ọdọhọde itaba idap ke ata akpan n̄kpọ.

7. Didie ke mbon emi Abasi oyomde ndisobo ẹbiet mme akpammịn?

⁷ “Mmọ eke ẹkpade mmịn.” Apostle Paul ekemen mbon emi Abasi edisobode odomo ye mme akpammịn. N̄kpọ ekpetịbe, mbon emi ẹkpade mmịn isisọpke idiọn̄ọ se ẹkpenamde, mmọ ẹkpebebiere se ẹdinamde, ẹsibiere ata ntịme. Ukem ntre ke edi ye ndiọi owo. Adan̄a se Abasi odụride mme owo utọn̄ emi, mmọ idọn̄ke utọn̄. Uto uwem emi mmọ ẹdude ayanam ẹsobo mmọ. Edi Bible ọdọhọ mme Christian ẹnyene ikike, oro edi, yak mmọ ẹtịm ẹkere n̄kpọ ọfọn. (1 Thess. 5:6) Ataifiọk kiet emi anamde ndụn̄ọde aban̄a Bible ọdọhọ ke ‘ekikere utọ owo oro esina sụn̄, idịghe mfịn enye ete fiọk ikpekere ntem, n̄kpọn̄ enye ete fiọk ikpekere ntem. Enye esitịm ekere se enye edinamde, se enye onyụn̄ ebierede ndinam ọyọfọn.’ Ntak emi anade ekikere ana nnyịn sụn̄, okûnyụn̄ edi mfịn nnyịn ikere ntem, n̄kpọn̄ nnyịn ikpụhọ ekikere? Ntak edi man nnyịn idisịn idem ke pọlitiks ye mfịna eken emi ererimbot ẹfan̄ade ẹdụk nnasia ye ufien. Nte usen Jehovah ekperede, ntre ke mme n̄kpọ oro ẹdisọn̄ ubọk ika, onyụn̄ edi se inen̄erede ikpeme mbak idinyene n̄kan̄ emi idade inọ. Kpa ye oro, ufọn idụhe nditịmede esịt n̄kere m̀mê idinam didie ini oro ama ekem. Spirit Abasi ekeme ndinam ekikere ana nnyịn sụn̄, nnyịn inyụn̄ idịghe fiọk ikpekere ika n̄kan̄ emi, fiọk ikpekere ika n̄kan̄ oko. Se idibierede oyonyụn̄ ọfọn.​—Luke 12:11, 12.

DIDIE KE IKPETỊM IDEM IBEN̄E USEN JEHOVAH?

8. Akpa Thessalonica 5:8 emen mme edu emi ẹdin̄wamde nnyịn itaba idap inyụn̄ inyene ikike odomo ye nso? (Se ndise n̄ko.)

⁸ “Ẹyak . . . isịne . . . ukwak ikpanesịt inyụn̄ iyara . . . ndụn.” Paul ekemen nnyịn odomo ye mbonekọn̄ emi ẹkamade enyịn ẹse se ikade iso, ẹnyụn̄ ẹsịnede ofụri n̄kpọekọn̄ mmọ ẹben̄e idem ekọn̄. (Kot 1 Thessalonica 5:8.) Ana owoekọn̄ eben̄e idem ndin̄wana ekọn̄ ini ekededi. Ana inam ntre n̄ko. Se idin̄wamde nnyịn iben̄e idem kpukpru ini inọ usen Jehovah edi ndisịne mbuọtidem ye ima nte ukwak ikpanesịt, inyụn̄ iyara idotenyịn edinyan̄a nte ndụn. Mme edu emi ẹkeme ndin̄wam nnyịn etieti.

9. Didie ke mbuọtidem nnyịn esikpeme nnyịn?

⁹ Ukwak ikpanesịt ekesikpeme owoekọn̄ esịt. Mbuọtidem ye ima ẹnyụn̄ ẹkpeme ndamban̄a esịt nnyịn. Edu iba oro ẹyen̄wam nnyịn ika iso inam n̄kpọ Abasi inyụn̄ ika iso itiene Jesus. Mbuọtidem esinam inịm ke Jehovah ọyọdiọn̄ nnyịn nte isiode ofụri esịt iyom enye. (Heb. 11:6) Kpa mbuọtidem oro edinam isọn̄ọ ida ye Jesus Adausụn̄ nnyịn idem ke ini mme afanikọn̄ ẹsịmde nnyịn. Se idinamde inen̄ede inyene mbuọtidem man ikeme ndiyọ mme afanikọn̄ uwem emi edi nnyịn ndikpep n̄kpọ nto mme owo mfịn emi ẹsọn̄ọde ẹda ẹnam n̄kpọ Abasi kpa ye emi ẹkọbọde mmọ, m̀mê emi n̄kpọ ọsọn̄de ye mmọ etieti. Ikpekpebe mbon emi ẹdade n̄kpọ Abasi ke ata akpan n̄kpọ, nnyịn idinen̄ekede ima okụk ye se inyenede ikan n̄kpọ Abasi.b

10. Didie ke nnyịn ndima Abasi ye mbọhọidụn̄ nnyịn edinam ikûkpa mba ndikwọrọ ikọ?

¹⁰ Akpan n̄kpọ efen emi an̄wamde nnyịn itaba idap inyụn̄ inyene ikike edi ima. (Matt. 22:37-39) Ima emi imade Abasi anam ikûkpa mba ndikwọrọ ikọ kpa ye mfịna ekededi emi ekemede ndisịm nnyịn ke ntak oro. (2 Tim. 1:7, 8) Sia mîdịghe nditọete nnyịn kpọt ke ima, nnyịn isikpaha mba ndikwọrọ ikọ nnọ mme owo. Ndusụk ini imesikot mme owo ke fon ikwọrọ, mîdịghe iwet leta ida ikwọrọ. Idotenyịn edi ke usen kiet usen kiet ke mbọhọidụn̄ nnyịn ẹyekabade esịt ẹnyụn̄ ẹtọn̄ọ ndinam nnennen n̄kpọ.​—Ezek. 18:27, 28.

11. Didie ke nnyịn ndima nditọete nnyịn an̄wam nnyịn? (1 Thessalonica 5:11)

¹¹ Idịghe mbọhọidụn̄ nnyịn kpọt ke isima, imama nditọete nnyịn n̄ko. Nnyịn ‘ndidọn̄ kiet eken esịt nnyụn̄ mbọp kiet eken ọkọri’ owụt ke imama idem nnyịn. (Kot 1 Thessalonica 5:11.) Mbonekọn̄ ẹsisọn̄ọ ekemmọ mbonekọn̄ idem ke ekọn̄, nnyịn n̄ko imesisọn̄ọ nditọete nnyịn idem. Edi ini ekọn̄ enen̄erede ọsọn̄ ubọk, owoekọn̄ ekeme ndidue nnọ ekemmọ owoekọn̄ unan, edi tutu amama enye ikemeke ndikokoi nnam ntre. Onyụn̄ edi ntre ye nnyịn. Tutu amama nnyịn idikohokoi inam se ibiakde nditọete nnyịn, mmọ ẹkpenam nnyịn idiọkn̄kpọ, nnyịn idikohokoi inam mmọ usiene. (1 Thess. 5:13, 15) Ima ikpono mbon emi ẹdade usụn̄ ke esop, oro oyowụt ke imama mmọ. (1 Thess. 5:12) Ini Paul ewetde leta emi, esop Thessalonica ikọyọhọke ukpọk isua kiet kan̄a. Etie nte mbiowo ke esop oro ikenen̄ekede idiọn̄ọ utom mmọ ọfọn kan̄a, anaedi mmọ ẹma ẹsinyụn̄ ẹnam ndudue. Kpa ye oro, mmọ ẹma ẹdot se ẹkponode. Mbiowo ẹsiteme nnyịn se ikpanamde idahaemi, ndien nte akwa ukụt ekperede, ekeme ndidi eyedi se iyomde mmọ ẹteme nnyịn se ikpanamde ikan nte iyomde idahaemi. Ini oro, ekeme ndidi nnyịn idikopke n̄kpọ ndomokiet ito ibuot itieutom ye n̄kọk itieutom. Ntre ọfọn itọn̄ọ ndikpep ndima nnyụn̄ n̄kpono mbiowo nnyịn idahaemi. M̀mê n̄kpọ etie didie, ọfọn inyene ikike, ikûyet enyịn ise ndudue mbiowo. Se ikpakam isịnde ekikere edi ke Jehovah ke ada Christ eteme nti ikọt Abasi emi se ẹkpenamde.

12. Didie ke idotenyịn nnyịn esin̄wam nnyịn ikere n̄kpọ ọfọn?

¹² Ndụn ekesikpeme owoekọn̄ ibuot. Ntre n̄ko ke idotenyịn emi inyenede ke ẹyenyan̄a nnyịn esinam ikere n̄kpọ ọfọn. Ọkpọsọn̄ idotenyịn oro anam ikụt ke se ededi emi ererimbot emi ẹnyande nnyịn ke iso iwọrọke usụn̄. (Phil. 3:8) Idotenyịn nnyịn esinam ekikere ana nnyịn sụn̄, idịghe mfịn ikere ntem, n̄kpọn̄ ikpụhọ ekikere. Se ikan̄wamde Wallace ye Laurinda emi ẹdude ke Africa ẹnam n̄kpọ Abasi edi oro. Ke ufan̄ urua ita, eka Laurinda ye ete Wallace ẹma ẹkpa. Ndien ke ntak COVID-19, mmọ ikekemeke ndinyọn̄ edem mmọ n̄kodu ye mbon mmọ nnyụn̄ ndọn̄ mmọ esịt. Wallace ekewet ete: “Sia edide mmenịm ke mme akpan̄kpa ẹyeset, mma n̄kere mban̄a mmọ, nsikereke nte mmọ ẹketiede usen ifan̄ mbemiso ẹkpade ke ererimbot emi. Nsikere nte mmọ ẹditiede ke ntọn̄ọ ntọn̄ọ obufa ererimbot. Idotenyịn oro esinam esịt ana mi sụn̄ n̄kpofụhọ, mîdịghe akpabiak mi nte mmọ mîdụhe aba.”

13. Ikpanam nso man Abasi ọnọ nnyịn edisana spirit esie?

¹³ “Ẹkûnịme ikan̄ spirit.” (1 Thess. 5:19) Paul ekemen edisana spirit odomo ye ikan̄ emi asakde nnyịn ke esịtidem. Ima inyene spirit Abasi, eyenen̄ede ọdọn̄ nnyịn ndinam se inende, iyonyụn̄ inen̄ede inyene odudu inam n̄kpọ Jehovah. (Rome 12:11) Idinam nso man Abasi ọnọ nnyịn edisana spirit? Imekeme ndibọn̄ akam mben̄e enye spirit oro, ikpep Bible emi enye akanamde ẹda spirit esie ẹwet, inyụn̄ isịn idem inam n̄kpọ ke esop emi spirit esie adade usụn̄. Ima inam ntre, iyenyene “mbun̄wụm spirit,” oro edi, mme edu emi spirit Abasi esinamde owo enyene.​—Gal. 5:22, 23.

14. Ikpoyom Abasi aka iso ọnọ nnyịn spirit esie, nso ke nnyịn mîkpanamke? (Se ndise n̄ko.)

¹⁴ Ke Abasi ama ọkọnọ nnyịn edisana spirit esie, ana ikpeme se inamde man nnyịn ‘idinịme ikan̄ spirit’ oro. Mbon emi ẹsikerede nti n̄kpọ ẹnyụn̄ ẹnamde mmọ kpọt ke Abasi esinọ spirit esie. Edieke ikade iso ikere ndiọi n̄kpọ inyụn̄ inamde mmọ, Jehovah idinọhọ nnyịn spirit esie aba. (1 Thess. 4:7, 8) Ikpoyom Abasi aka iso ọnọ nnyịn spirit esie, inaha ‘isịn ikọ prọfesi ke ndek.’ (1 Thess. 5:20) “Ikọ profesi” emi edi mme etop emi Jehovah adade spirit esie ọnọ nnyịn. Se ẹtịn̄de ẹban̄a usen Jehovah ye nte ikpatatde enyịn ise se ikade iso ke ererimbot ẹsịne ke otu mme etop oro. Nnyịn idikereke ke Armageddon ididịghe ke eyo uwem nnyịn, utu ke oro, iyekere iban̄a enye kpukpru ini, oro edi, ida nte ke edisesịm ama. Nnyịn ndika iso nnam nnennen n̄kpọ nnyụn̄ n̄ka iso nsịn idem nnam “mme edinam uten̄e Abasi” kpukpru usen oyowụt ke imenịm ke Armageddon edisesịm ama.​—2 Pet. 3:11, 12.

“ẸDỤN̄ỌDE KPUKPRU N̄KPỌ ẸFIỌK”

15. Ikpanam nso man nsu emi ẹsuande ye abian̄a emi mme demon ẹdisiode isuan idida nnyịn itụn usụn̄? (1 Thessalonica 5:21)

¹⁵ Ibịghike, mme asua Abasi ẹyetịn̄ n̄kpọ emi owụtde ke mmọ ẹnịm ke “emem ye ifụre!” odu. (1 Thess. 5:3) Se mme demon ẹdiyomde ndida mbian̄a mme owo ediyọyọhọ ererimbot emi, mmọ ẹyetụn n̄wakn̄kan owo usụn̄. (Edi. 16:13, 14) Nnyịn-e? Edieke ‘idụn̄ọrede kpukpru n̄kpọ ifiọk,’ owo idibian̄ake nnyịn. (Kot 1 Thessalonica 5:21.) Ikọ Greek emi ẹkabarede nte ‘ẹdụn̄ọde ẹfiọk’ edi ikọ emi aban̄ade nte ẹkesidụn̄ọrede utọ n̄kpọ nte gold ye silver ẹse m̀mê edi ata enye. Ntre ima ikop n̄kpọ mîdịghe ikot n̄kpọ, ọfọn itịm idụn̄ọde m̀mê edi akpanikọ. Akpan n̄kpọ emi akanade mbon Thessalonica ẹnam ekedi oro, se anade inam n̄ko edi oro nte akwa ukụt ekperede. Utu ke ndidi se mme owo ẹkpetetịn̄ nnyịn inịm, ana itịm ikere n̄kpọ ọfọn, imen se ikotde m̀mê se ikopde idomo ye se idude ke Bible ye se esop Abasi ẹtịn̄de. Ima inam ntre, abian̄a ye n̄kari ekededi emi mme demon ẹsiode ẹdi idimụmke nnyịn.​—N̄ke 14:15; 1 Tim. 4:1.

16. Nso ke idiọn̄ọ ke ana etịbe? Oro anam inam nso?

¹⁶ Ikọt Jehovah ẹyebọhọ akwa ukụt. Edi owo nnyịn ndomokiet idiọn̄ọke se n̄kpọn̄ edimande. (Jas. 4:14) Edide iyodu isịm akwa ukụt m̀mê iyakpa mbemiso akwa ukụt ọtọn̄ọde, ikpọsọn̄ọ ida ye Jehovah, enye ayanam inyene nsinsi uwem. Mbon emi ẹyetde aran ẹyeka heaven ẹkedu ye Christ, mme erọn̄ en̄wen ẹyedu ke Paradise ke isọn̄ emi. Yak kpukpru nnyịn isịn ofụri ekikere nnyịn ke edidiọn̄ oro, inyụn̄ iben̄e idem kpukpru ini inọ usen Jehovah!