Ẹkeme Ndifiak Nnyene Mbuọtidem!

OKPOSỤKEDI unana mbuọtidem oro odude ke emi edide idiọn̄ọ “ukperedem ini,” unana mbuọtidem ama odu n̄ko ke ediwak tọsịn isua ẹmi ẹkebede. (2 Timothy 3:1) Enye ekebem iso etịbe ke ebiet oro mîkpanaha-na enye etịbe—ke paradise. Bible etịn̄ aban̄a ebiet oro ete: “Abasi onyụn̄ ọtọ in̄wan̄ ke Eden ke edem usiaha-utịn; onyụn̄ emen owo emi enye okobotde enịm do. Jehovah Abasi onyụn̄ anam isọn̄ etịbe kpukpru eto eke ẹnemde ndise ẹnyụn̄ ẹfọnde ndidia; ye eto uwem n̄ko ke ufọt in̄wan̄, ye eto ifiọk eti ye idiọk.”—Genesis 2:8, 9.

Mme ufan̄ikọ oro ẹtienede ẹsịn un̄wana ke se emi enyenede ndinam ye unana mbuọtidem eyomfịn. Nnyịn ikot ite: “Jehovah Abasi onyụn̄ owụk owo oro, ete, Dia kpukpru eto in̄wan̄; Edi ama edi eto ifiọk, eti ye idiọk, kûdia ke esịt: koro ke usen eke afo adiade ke esịt afo ayakpa n̄kpa.” (Genesis 2:16, 17) Ndi Adam ama enyene ntak ndomokiet ndiyịk se Jehovah eketịn̄de?

Nnyịn ikot ika iso ite: “Ndien urụkikọt enyene n̄kari akan kpukpru unam obot emi Jehovah Abasi akanamde. Ekem enye ọdọhọ n̄wan oro, ete, Nte Abasi ọkọdọhọ ete, Mbufo ẹkûdia baba eto in̄wan̄ emi kiet? Ndien n̄wan ọdọhọ urụkikọt, ete, Nnyịn idadia mfri eto in̄wan̄: edi ama edi mfri eto emi odude ke ufọt in̄wan̄, Abasi ama ọdọhọ ete, Mbufo ẹkûdia ke esịt, ẹkûnyụn̄ ẹtụk enye, mbak ẹdikpan̄a. Ndien urụkikọt ọdọhọ n̄wan ete, Mbufo idikpaha: koro Abasi ọmọfiọk ete, ke usen eke mbufo ẹdiade ke esịt, ndien enyịn mbufo ẹyetara; mbufo ẹyenyụn̄ ẹtie nte Abasi, ẹfiọk eti ye idiọk. Ekem n̄wan okụt nte eto oro ọfọnde ke udia, nte onyụn̄ eyede ke enyịn, nte eto onyụn̄ enemde ndise, ndien enye ada mfri esie adia; onyụn̄ ọnọ ebe esie n̄ko, ndien enye adia.”—Genesis 3:1-6.

Ke ndifụmi in̄wan̄în̄wan̄ ntọt Abasi, Adam ye Eve ẹma ẹwụt unana mbuọtidem ke Jehovah. Mmọ ẹketie ukem nte asua Abasi, Satan, emi eketịn̄de ikọ ọnọ Eve ebe ke ata ata urụkikọt. Satan ikenyeneke mbuọtidem ke usụn̄ oro Jehovah akarade. Ke ntak emi ye ntan̄idem ye udọn̄ ikpọ n̄kpọ esie, enye ama ọsọn̄ ibuot ye Abasi onyụn̄ otụn mme owo usụn̄ ndinam ukem ntre. Enye ama anam mmọ ẹkere nte ke Abasi idịghe se ẹkpeberide edem.

Nso Ikedi Utịp? Mbiara Itie Ebuana

Ekeme ndidi afo omokụt nte ke esidi ọkpọsọn̄ n̄kpọ mbon oro mînịmke mbon efen ke akpanikọ ndisọn̄ọ mmụm itie ufan n̄kama. Publilius Syrus, ewetn̄wed owo Latin eke akpa isua ikie M.E.N., ama ewet ete: “Mbuọtidem edi n̄kukụre mbọbọ itie ufan.” Otode ke edinam nsọn̄ibuot mmọ, Adam ye Eve ẹma ẹwụt nte ke mmimọ ikọbuọtke idem ke Abasi. Ntem, Abasi ke akpanikọ ikenyeneke ntak ndibuọt idem ke mmọ. Nte utịp ediduọk mbuọtidem, m̀mê ibetedem, mme akpa owo oro ẹma ẹtaba itie ufan ye Abasi. Idiọn̄ọ ndomokiet idụhe nte ke Jehovah ama afiak etịn̄ ikọ ye mmọ ke ama okobiom mmọ ikpe ke ntak nsọn̄ibuot mmọ.

Itie ebuana Adam ye Eve n̄ko ama abiara. Jehovah ama ọtọt Eve ete: “Ke ubiak ke afo ediman nditọ; oyonyụn̄ osụk idem ọnọ uberi ndien enye ayakan fi.” (Genesis 3:16, sịghisịghi ubọkn̄wed edi eke nnyịn.) The Jerusalem Bible ọdọhọ ete: “Enye ayakara fi.” Utu ke ndiwụt n̄wan esie ima ima itieibuot, nte Abasi okoyomde, Adam ama akabade edi eteufọk esie, emi akarade enye.

Ke mmọ ẹma ẹkenam idiọkn̄kpọ, Adam ama an̄wana ndisịk nduduọhọ ndori n̄wan esie. Ke ekikere esie, ekedi se n̄wan esie akanamde akanam ẹbịn mmọ ẹsion̄o ke mfọnmma in̄wan̄ ẹsịn ke akai, ndibọ ufen ke anana-mfọnmma idaha mbemiso ẹfiakde ke ntan. (Genesis 3:17-19) Nnyịn imekeme ndikere n̄ko nte ke emi ekedi ntak ntuaha ke ufọt mmọ mbiba. Ekeme ndidi Adam ama anam n̄kpọ ebe adan̄a, ọdọhọde ke imọ idikpan̄ke utọn̄ inọ Eve aba tutu amama. Eyedi enye ama ekere ke enen ndidọhọ enye, ke nditịm ntịn̄, ‘Ọtọn̄ọde ke emi, ami ndi etubom!’ Ekeme ndidi Eve, ke n̄kan̄ eken, ama okụt nte ke Adam ama okpu ke utom esie nte ibuot ufọk, anamde enye okûnyene mbuọtidem ke idem esie aba. Ke idaha ekededi, ke ndiwụt unana mbuọtidem ke Abasi, mme owo ẹma ẹtaba itie ufan mmọ ye enye ẹnyụn̄ ẹbiat itie ebuana mmọ ye kiet eken.

Nnyịn Ikpọbuọt Idem ke Anie?

Idịghe kpukpru owo ẹdot ndidi se nnyịn ibuọtde idem, nte uwụtn̄kpọ Adam ye Eve anamde an̄wan̄a. Didie ke nnyịn ikeme ndidiọn̄ọ owo oro odotde ye owo oro mîdotke nnyịn ndibuọt idem?

Psalm 146:3 eteme nnyịn ete: “Mbufo ẹkûbuọt idem ye mbọn̄, ẹkûbuọt ye eyen owo, emi edinyan̄a mîdụhe enye ke idem.” Ndien ke Jeremiah 17:5-7, nnyịn ikot ite: “Osụk ọdọdiọk ọnọ owo eke edibuọtde idem ye owo, onyụn̄ enịmde obụkidem ke ubọk esie, esịt esie onyụn̄ ọwọn̄ọrede ọkpọn̄ Jehovah.” Ke n̄kan̄ eken, “osụk ọfọfọn ọnọ owo eke ọbuọtde idem ye Jehovah, eke Jehovah edide ibetedem esie.”

Edi akpanikọ, idịghe ofụri ini ke esidiọk ndibuọt idem ye owo. Mme itien̄wed oro n̄kukụre ẹsio ẹwụt nte ke ndibuọt idem ke Abasi ikemeke-keme ndidi ndudue, edi ndibuọt idem ke mme anana-mfọnmma owo ekeme ndida nsịm afanikọn̄ ndusụk ini. Ke uwụtn̄kpọ, mbon oro ẹberide edem ke owo ndinam mme n̄kpọ oro Abasi ikpọn̄ ekemede ndinam—ndinọ edinyan̄a nnyụn̄ nda ata emem ye ifụre ndi—ẹsak iso ẹse edikpu.—Psalm 46:9; 1 Thessalonica 5:3.

Ke nditịm ntịn̄, mme owo ye mme n̄ka oro mmọ ẹsiakde ẹdot se ẹbuọtde idem n̄kukụre edieke mmọ ẹnamde n̄kpọ ke n̄kemuyo ye mme edumbet Abasi ẹnyụn̄ ẹwụtde mme edumbet Abasi. Ntem, edieke iyomde mbon efen ẹnyene mbuọtidem ke idem nnyịn, ana itịn̄ akpanikọ, inam akpanikọ inyụn̄ idi se ẹberide edem. (Mme N̄ke 12:19; Ephesus 4:25; Mme Hebrew 13:18) Edi n̄kukụre ke ndidu uwem ekekem ye mme edumbet Bible ke mbuọtidem oro mbon efen ẹnyenede ke idem nnyịn edidi nnennen onyụn̄ edi ebiet oro ukeme ye nsịnudọn̄ edem mbiba otode.

Ndifiak Nnyene Mbuọtidem

Mme Ntiense Jehovah ẹnyene eti nsọn̄ọ ke ndibuọt idem ye Abasi nnyụn̄ nsịn udọn̄ nnọ mbon efen ndinam ntre. Jehovah anam akpanikọ onyụn̄ enyene nsọn̄ọnda, enye emi ẹkemede ndiberi edem kpukpru ini ndinam se enye etịn̄de, koro “Abasi mîkemeke ndisu nsu.” Mbuọtidem oro ẹnyenede ke Abasi ima ididaha ikesịm edikpu tutu amama.—Mme Hebrew 6:18; Psalm 94:14; Isaiah 46:9-11; 1 John 4:8.

Mme owo ẹmi ẹdianade kiet ke ndinyene mbuọtidem ke Jehovah ẹmi ẹnyụn̄ ẹdade mme edumbet esie ẹdu uwem ẹnyene ọkpọsọn̄ udọn̄ ndiwụt mbuọtidem ke idem kiet eken. Ke ererimbot oro mbuọtidem ananade, nso n̄kpọ idara ke edi ntem ndikụt mbon oro ẹkemede ndiberi edem! Kere nte ererimbot ekpedide ata isio isio edieke nnyịn ikpenyenede ọyọhọ mbuọtidem ke se mbon efen ẹtịn̄de m̀mê ẹnamde! N̄kpọ editie ntem ke obufa ererimbot emi osụk edide oro Abasi ọn̄wọn̄ọde. Unana mbuọtidem ekededi ididụhe aba tutu amama!

Nte afo akpama ndidu uwem ini oro? Ke edide ntre, Mme Ntiense Jehovah ẹnọ fi ikot ndisọn̄ọ mbuọtidem fo ke Abasi ye ke mme un̄wọn̄ọ esie ebe ke ndikpep mme n̄kpọ efen efen oro enye oyomde man enyene uwem. Ukpepn̄kpọ Bible ọnọ nsọn̄ọ nte ke Abasi odu, nte ke enye enyene udọn̄ ke mfọnọn̄kpọ ubonowo, ye nte ke ibịghike enye ayanam n̄kpọ ndinen̄ede mme mfịna ererimbot ebe ke Obio Ubọn̄ esie. Ediwak miliọn owo ẹkpep ndibuọt idem ke Abasi ye ke Ikọ esie, kpa Bible. Mme Ntiense Jehovah ẹyema ndiwụt fi ukpepn̄kpọ Bible mfọn oro mmọ ẹnọde mme owo. Mîdịghe wet n̄wed nọ ẹsọk mme andimịn̄ magazine emi ke oyomde ntọt efen efen.

[Se Ẹwetde ke Ikpọ Abisi ke page 5]

Unana mbuọtidem ke Abasi ada esịm mbiara itie ebuana eke owo

[Se Ẹwetde ke Ikpọ Abisi ke page 6]

Mme owo ẹdot se ẹbuọtde idem n̄kukụre edieke mmọ ẹnamde n̄kpọ ke n̄kemuyo ye mme edumbet Abasi