Enoch—Ikopke Ndịk Kpa Ye Kpukpru Ubiọn̄ọ

EKEDI ndiọkn̄kan ini ọnọ eti owo. Edu unana uten̄e Abasi ama ọyọhọ isọn̄. Idaha eti ido uwem ubonowo ama etetịm ọdiọk. Ke akpanikọ, ikebịghike ẹma ẹdọhọ ẹte: “Jehovah okụt idiọk-n̄kpọ owo nte okponde ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdi idiọk kpukpru ini.”—Genesis 6:5.

Enoch, ọyọhọ owo itiaba ke udịm ubon ọtọn̄ọde ke Adam, ama enyene uko ndidi isio. Enye ama ọsọn̄ọ ada kaban̄a edinen ido inamke n̄kpọ m̀mê nso ididi utịp. Etop Enoch ama enen̄ede otụhọde mme anamidiọk oro mîketen̄eke Abasi tutu ẹyom ndiwot enye, ndien Jehovah ikpọn̄ ekekeme ndin̄wam enye.—Jude 14, 15.

Enoch ye Eneni Ofụri Ekondo

Anyan ini mbemiso Enoch akamanade, ẹma ẹdemede eneni aban̄ade itie edikara ofụri ekondo. Nte Abasi enyene unen ndikara? Ke nditịm ntịn̄, Satan kpa Devil ọkọdọhọ ke inyeneke. Enye ọkọdọhọ ke mme edibotn̄kpọ oro ẹnyenede ifiọk ẹkeme ndinam ọfọn akan edieke mmọ ẹdude ye unana ndausụn̄ Abasi. Satan ama odomo ndinọ uyarade esie ndibiọn̄ọ Jehovah Abasi ebe ke ndida n̄kari n̄kari usụn̄ n̄wọn̄ọde mme owo nsịn ke n̄kan̄ esie. Ẹtịm ẹdiọn̄ọ Adam, n̄wan esie Eve, ye akpa eyeneren mmọ, Cain, nte ẹkedade ke n̄kan̄ Satan ebe ke ndimek ndikara idemmọ utu ke ndiyak Abasi akara. Akpa owo iba oro ẹkenam emi ebe ke ndidia mfri oro Abasi akakpande, ndien Cain akanam ntre ebe ke ndikokoi n̄wot edinen eyeneka esie, Abel.—Genesis 3:4-6; 4:8.

Abel ama ada ke n̄kan̄ Jehovah uko uko. Sia nsọn̄ọnda Abel ekemenerede edisana utuakibuot ke enyọn̄, nte eyịghe mîdụhe Satan ama okop inemesịt ndikụt Cain ayatde esịt owot enye. Ọtọn̄ọde ke ini oro ka iso, Satan amada ‘ndịk n̄kpa’ nte n̄kpọekọn̄ ndisịn owo ndịk ke idem. Enye oyom ndisịn ndịk ke esịt owo ekededi oro oyomde ndituak ibuot nnọ ata Abasi.—Mme Hebrew 2:14, 15; John 8:44; 1 John 3:12.

Etisịm ini emi Enoch akamanade, eketie nte ẹma ẹnen̄ede ẹda ye ekikere oro Satan ọkọnọde nte ke mme owo idinyịmeke ukara Jehovah. Abel ama akpa, ndien owo iketieneke uwụtn̄kpọ edinam akpanikọ esie. Edi, Enoch ama owụt ke imọ idi isio. Enye ama enyene ọkpọsọn̄ ntak ndinyene mbuọtidem, koro enye ama etịm emehe ye mme n̄kpọntịbe oro ẹkedade itie ke in̄wan̄ Eden.a Didie ke enyene ndidi enye ama ama prọfesi Jehovah oro okowụtde nte ke Mfri un̄wọn̄ọ ayada utịt ọsọk Satan ye mme edinam esie ntem!—Genesis 3:15.

Ye idotenyịn emi ke ekikere esie kpukpru ini, Enoch ikokopke ndịk iban̄a mbụk n̄kpa Abel oro Devil ekedide ntak. Utu ke oro, enye ama aka iso asan̄a ye Jehovah, ebịnede usụn̄ edinen ido ke ofụri eyouwem. Enoch ama adianade idem ọkpọn̄ ererimbot, esịnde edu nda-ke-idem esie.—Genesis 5:23, 24.

N̄ko-n̄ko, Enoch ama etịn̄ ikọ uko uko onyụn̄ anam an̄wan̄a nte ke mme utom Devil idikwe unen. Ke idak odudu edisana spirit, m̀mê anamutom odudu Abasi, Enoch ama etịn̄ prọfesi aban̄a mme idiọkowo ete: “Sese, Ọbọn̄ asan̄a ye ata ediwak ndisana ikọt Esie edi, ndikpe ikpe ye kpukpru owo, ndinyụn̄ mbiom kpukpru mmọ ẹmi mîbakke Enye ikpe mban̄a kpukpru mbukpo ido eke mmọ ẹnamde ye kpukpru n̄kpọsọn̄ ikọ eke mmọ ẹmi mîbakke Enye ẹketịn̄de ẹdian Enye.”—Jude 14, 15.

Ke ntak uko uko etop Enoch, apostle Paul, ke ewetde leta ọnọ ẹsọk mme Christian Hebrew, ama asiak enye esịn ke akwa “otu ntiense” emi ekenịmde eti uwụtn̄kpọ mbuọtidem oro odude ke edinam.b (Mme Hebrew 11:5; 12:1) Nte eren mbuọtidem, Enoch ama ọsọn̄ọ eyịre ke usụn̄uwem nsọn̄ọnda ke se iwakde ikan isua 300. (Genesis 5:22) Didie ke enyene ndidi edinam akpanikọ Enoch ama ayat mme asua Abasi ke heaven ye ke isọn̄ ntem! Ọkpọsọn̄ prọfesi Enoch ama edemede usua Satan, edi enye ama ada ukpeme Jehovah edi.

Abasi Ama Emen Enoch —Didie?

Jehovah ikayakke Satan m̀mê ikọt esie eke isọn̄ ẹwot Enoch. Utu ke oro, n̄wetnnịm n̄kpọ eke odudu spirit ọdọhọ ete: ‘Abasi ada enye ọnyọn̄.’ (Genesis 5:24) Apostle Paul anam n̄kpọ an̄wan̄a ke usụn̄ emi: “Oto mbuọtidem [ẹkekpụhọ Enoch itie, NW], man enye okûkụt n̄kpa; owo inyụn̄ ikwe enye, sia Abasi [okokpụhọde enye itie, NW]; koro ke ini [mîkpụhọke enye itie, NW] kan̄a, ẹkedi ntiense ẹban̄a enye ete, enye enem Abasi esịt.”—Mme Hebrew 11:5.

Didie ke ‘ẹkekpụhọ Enoch itie man enye okûkụt n̄kpa’? Mîdịghe nte ẹsịnde ke edikabade eke R. A. Knox, didie ke “ẹkemen [Enoch] ẹfep ye unana edikụt n̄kpa”? Abasi ama etre uwem Enoch emem emem, anamde enye okûkop ubiak n̄kpa oto udọn̄ọ m̀mê afai ke ubọk mme asua esie. Ih, Jehovah ama esịbe uwem Enoch efep ke edide isua 365 ke emana—ekpri akparawa owo ke ẹmende ẹdomo ye mbon eyo esie.

Didie ke ẹkenọ Enoch “ntiense . . . ete, enye enem Abasi esịt”? Nso uyarade ke enye ekenyene? Etie nte Abasi ama anam Enoch okụt n̄kukụt, kpa nte ‘ẹkekpobide apostle Paul ẹdọk,’ m̀mê ẹkekpụhọde enye itie, emi nte an̄wan̄ade okokụtde n̄kukụt aban̄ade paradise ini iso eke esop Christian. (2 Corinth 12:3, 4) Ntiense, m̀mê uyarade, oro nte ke Enoch ama enem Abasi esịt ekeme ndidi ama esịne n̄kukụt Paradise isọn̄ ini iso emi kpukpru mbon oro ẹdude uwem ẹdinyịmede itie edikara Abasi. Ekeme ndidi ke adan̄aemi Enoch okosụk okụtde aduai-owo-idem n̄kukụt emi ke Abasi ekemen enye ke n̄kpa oro ubiak mîdụhe man ede tutu esịm usen ediset ke n̄kpa esie. Nte ekedide ye Moses, etie nte Jehovah ama edịp okpo Enoch, koro “owo inyụn̄ ikwe enye.”—Mme Hebrew 11:5; Deuteronomy 34:5, 6; Jude 9.

Prọfesi Oro Osude

Mfịn, Mme Ntiense Jehovah ẹtan̄a akpan n̄kpọ oro odude ke prọfesi Enoch. Ọkọn̄ọde ke N̄wed Abasi, mmọ ẹwụt nte enye edisude ke ini Abasi edisobode mmọ eke mîbakke Abasi ke n̄kpet n̄kpet ini iso. (2 Thessalonica 1:6-10) Etop mmọ anam mme owo ẹkûma mmọ, koro enye okpụhọde akamba akamba ye mme ekikere ye mme utịtmbuba ererimbot emi. Ubiọn̄ọ oro mmọ ẹsobode ikpaha mmọ idem, koro Jesus ama odụri mme anditiene enye utọn̄ ete: “Kpukpru owo ẹyesua mbufo kaban̄a enyịn̄ Mi.”—Matthew 10:22; John 17:14.

Nte ededi, ukem nte Enoch, mme Christian eyomfịn ẹnịm ẹte ke ẹyenyan̄a mmimọ ke akpatre ẹsio ke ubọk mme asua mmimọ. Apostle Peter ekewet ete: “Ọbọn̄ ọmọfiọk ndinyan̄a mmọ ẹmi ẹten̄ede Enye nsio ke idomo, ndinyụn̄ mmụm mme idiọk owo nnịm ke itie ufen, tutu esịm usen ikpe.” (2 Peter 2:9) Abasi ekeme ndikụt nte ke odot ndisio mfịna m̀mê idaha oro etiede idomo idomo mfep. Ukọbọ ekeme ndisịm utịt. Edieke mîdịghe ntre, nte ededi, enye ọfiọk nte ‘asiakde usụn̄ ubọhọ’ man ikọt esie ẹkeme ndiyọ mme idomo mmọ uforo uforo. Jehovah esikam ọnọ “akwa ubom odudu” ke ini ẹyomde.—1 Corinth 10:13; 2 Corinth 4:7.

Nte “Andinọ mmọ ẹmi ẹyomde Enye utịp,” Jehovah ọyọdiọn̄ mme anam-akpanikọ asan̄autom esie n̄ko ke ndinọ mmọ nsinsi uwem. (Mme Hebrew 11:6) Ye ata ediwak mmọ, emi edidi nsinsi uwem ke paradise isọn̄. Ukem nte Enoch, nnyịn ke ntre ikpakam itan̄a etop Abasi ye uko. Ẹyak nnyịn inam emi ke mbuọtidem kpa ye kpukpru ubiọn̄ọ.

[Mme Ikọ idakisọn̄]

[Ekebe ke page 30]

Ẹsabade Enyịn̄ Abasi

N̄kpọ nte isua ikie inan̄ mbemiso Enoch, Enosh eyeyen Adam ama amana. Genesis 4:26 ọdọhọ ete: “Ke ini oro ẹtọn̄ọ ndikot Jehovah ke enyịn̄ esie.” Ndusụk nditọ ukpepn̄kpọ usem Hebrew ẹnịm ẹte ke ẹkpenyene ndikot ufan̄ikọ emi nte “ẹtọn̄ọ ke usụn̄ oro asabarede” ndikot enyịn̄ Abasi mîdịghe, “ekem edisabade ọtọn̄ọ.” Kaban̄a ini oro ke mbụk, Targum eke Jerusalem ọdọhọ ete: “Oro ekedi emana emi ẹketọn̄ọde ndinam idiọkn̄kpọ ke eyo mmọ, nnyụn̄ nnam ndisọi n̄kpọ nnọ idemmọ, nnyụn̄ nda enyịn̄ Ikọ Ọbọn̄ n̄kot ndisọi n̄kpọ mmọ.”

Ke ini Enosh ke ẹkeda enyịn̄ Jehovah ẹnam n̄kpọ ke idiọk usụn̄ ntatara ntatara. Ekeme ndidi mme owo ẹma ẹsida enyịn̄ Abasi ẹkot idemmọ m̀mê ẹda ẹkot ndusụk owo ẹmi ekebede ke mmọ ẹnam nte ituak ibuot inọ Jehovah Abasi. Mîdịghe ekeme ndidi mmọ ẹkenọ ndisọi mbiet enyịn̄ Abasi. Ke usụn̄ ekededi, Satan kpa Devil ama anam ekpụk ubonowo enen̄ede ọkọmọ ke afia ukpono ndem. Etisịm ini emi Enoch akamanade, utuakibuot akpanikọ ama osụhọde ubọk. Owo ikamaha owo ekededi ekebietde Enoch, emi akadade akpanikọ odu uwem onyụn̄ ọkwọrọde enye, ndien ke ntre ekedi owo oro ẹsuade.—Men Matthew 5:11, 12 domo.

[Ekebe ke page 31]

Nte Enoch Ama Aka Heaven?

“Oto mbuọtidem [ẹkpụhọ Enoch itie, NW], man enye okûkụt n̄kpa.” Ke nte mmọ ẹkabarede ikpehe eke Mme Hebrew 11:5 emi, ndusụk edikabade Bible ẹwụt nte ke Enoch ke akpanikọ ikakpaha. Ke uwụtn̄kpọ, A New Translation of the Bible, eke James Moffatt, ọdọhọ ete: “Okoto mbuọtidem ẹmen Enoch ẹdọk ke heaven man enye okûkpa tutu amama.”

N̄kpọ nte isua 3,000 ke eyo Enoch ama ekebe, nte ededi, Jesus Christ ama ọdọhọ ete: “Baba owo kiet ikọdọkke ikodụk ke heaven, ke mîbọhọke Enye emi okotode ke heaven osụhọde edi, kpa Eyen Owo emi odude ke heaven.” (John 3:13) The New English Bible okot ete: “Akananam baba owo kiet ikọdọkke ikodụk ke heaven ke mîbọhọke enyeemi okotode ke heaven osụhọde edi, kpa Eyen Owo.” Ke ini Jesus eketịn̄de ikọ oro, enye ikakam idọkke ikodụk ke heaven.—Men Luke 7:28 domo.

Apostle Paul ọdọhọ ete ke Enoch ye mbon eken oro ẹnamde akwa otu mme ntiense oro ẹkedude mbemiso eyo mme Christian ‘kpukpru ẹma ẹkpan̄a’ inyụn̄ ‘ibọhọ se Abasi ọkọn̄wọn̄ọde.’ (Mme Hebrew 11:13, 39) Ntak-a? Koro kpukpru owo, esịnede Enoch, ẹma ẹda idiọkn̄kpọ ẹmana ẹto Adam. (Psalm 51:5; Rome 5:12) N̄kukụre usụn̄ edinyan̄a edi uwa ufak Christ Jesus. (Utom 4:12; 1 John 2:1, 2) Ke eyo Enoch owo ikekpehe ekọmurua ufak oro kan̄a. Ke ntre, Enoch ikakaha heaven, edi enye ke ede ke n̄kpa ebetde ediset ke n̄kpa ke isọn̄.—John 5:28, 29.

[Ebiet Ẹdade Ndise Ẹto ke page 29]

Ẹfiak ẹsio ẹto Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s