Mmọ Ẹma Ẹnam Uduak Jehovah

Ndiyom N̄wan nnọ Isaac

AKANIEREN oro eketiede ke mben obube mmọn̄ ama akpa mba. Enye ye ikọt esie ye camel mmọ duop ẹma ẹsan̄a anyanusụn̄ ọtọn̄ọde ke obio Beer-sheba ẹka edere edere Mesopotamia—usụn̄ emi ọniọn̄de akan kilomita 800.a Kemi mmọ ẹma ẹkesịm ebiet mmọ ẹkekade, akaisan̄ emi okopde mmemidem mi ama atuak ada ndikere mban̄a ọkpọsọn̄ utom esie. Eren emi ekedi anie, ndien ntak emi enye akanamde utọ ata ọkpọsọn̄ isan̄ emi?

Eren oro ekedi eyenufọk Abraham, “ebiowo ufọk esie.” (Genesis 24:2) Okposụkedi owo mîsiakke enyịn̄ esie ke mbụk emi, etie nte owo emi ekedi Eliezer, emi Abraham inikiet eketịn̄de aban̄a nte ‘eyen ufọk esie’ emi enye okonyụn̄ etịn̄de aban̄a nte enyeemi ‘edidiade akpa esie.’ (Genesis 15:2, 3) Nte ededi, oro ekedi ke ini Abraham ye Sarah mîkenyeneke eyen. Idahaemi eyen mmọ, Isaac, ekedi isua 40 ke emana, ndien okposụkedi Eliezer mîkedịghe aba akpan adiakpa Abraham, enye okosụk ededi eyenufọk esie. Ntre enye ama anam n̄kpọ nte ekemde ke ini Abraham akanamde eben̄e oro ọkọsọn̄de. Nso ikedi oro?

Utom Oro Akamade N̄kpọ-Ata

Ke eyo Abraham ndọ ikesitụkke ubon oro owo otode kpọt edi n̄ko ama esitụk ofụri ekpụk, m̀mê obio ete-ekpụk. Ke ntre ekedi ido mme ete ye eka ndimek nsan̄andọ nnọ nditọ mmọ. Nte ededi, ke ndiyom n̄wan nnọ eyen esie Isaac, Abraham akasak iso ese ọkpọsọn̄ mfịna. Mme usụn̄ unana uten̄e Abasi mbon Canaan ama anam ndidọ owo kiet ke otu mmọ owụt unana eti ibuot. (Deuteronomy 18:9-12) Ndien ke adan̄aemi ekedide ido owo ndidọ n̄wan ke ekpụk esie, mme iman Abraham ẹkedụn̄ ke ebiet oyomde usụn̄ ke ediwak kilomita ke edere edere Mesopotamia. Enye ikakam ikemeke ndiyak Isaac afiak okodụn̄ do, koro Jehovah ama ọn̄wọn̄ọ ọnọ Abraham ete: “Nyenọ ubon fo idụt emi,” kpa idụt Canaan. (Genesis 24:7, sịghisịghi ubọkn̄wed edi eke nnyịn.) Ntem, Abraham ama ọdọhọ Eliezer ete: “Afo eyeka ke isọn̄ oro n̄kotode, ye idụt emana mi, akada n̄wan ọnọ Isaac eyen mi.”—Genesis 24:4.

Ke okụrede anyan isan̄ oro, Eliezer ama ọduọk odudu ke mben obube mmọn̄ nte enye ekekerede aban̄a utom esie. Enye ama ọfiọk ete ke mîbịghike iban ẹyedi obube mmọn̄ ndikoi mmọn̄ mbubịteyo oro. Ntre enye ama eben̄e Jehovah ete: “Ama edi eyen-an̄wan emi ndidọhọde enye nte, Biomode aban̄ fo, mbọk, man n̄n̄wọn̄; emi edinyụn̄ ọdọhọde, ete, n̄wọn̄, ndien nyenọ mme camel fo mmọn̄ ẹn̄wọn̄ n̄ko, yak edi enye ke afo onịm ọnọ eyen fo Isaac: ndien ke ntre ke ndifiọk nte afo ọmọfọn ido ye ete mi.”—Genesis 24:14.

Ke adan̄aemi enye osụk ọbọn̄de akam, ediye eyenan̄wan kiet ekerede Rebekah ama asan̄a edisịm. Eliezer ama ọdọhọ enye ete: “Mbọk, yak n̄n̄wọn̄ mmọn̄ esịt ke aban̄ fo.” Rebekah ama anam ntre, ndien ekem enye ama ọdọhọ ete: “Nyenyụn̄ n̄koi mmọn̄ nnọ mme camel fo, tutu mmọ ẹn̄wọn̄ ẹma.” Emi ekedi akwa mfọnido, sia camel kiet oro itọn̄ asatde ekeme ndin̄wọn̄ mmọn̄ awakde esịm lita 95 ke minit duop kpọt! Edide itọn̄ ama enen̄ede asat mme camel Eliezer m̀mê ikasatke, anaedi Rebekah ama ọfiọk ete ke utom oro imọ ikenyịmede ndinam ekedi ọkpọsọn̄ utom. Ke akpanikọ, enye ama “awara an̄wan̄a mmọn̄ ke aban̄ esie esịn ke akwa, ndien efehe afiak aka ke obube, okokoi, onyụn̄ okoi ọnọ mme camel esie kpukpru.”—Genesis 24:15-20.

Ke okụtde nte Jehovah ọnọde ndausụn̄, Eliezer ama ọnọ Rebekah n̄kpanuen gold eke ibuo ye okpoho ubọk gold iba, ẹmi ekọmurua ẹdide n̄kpọ nte $1,400 ke ekọmurua eyomfịn. Ke ini Rebekah akasiande enye ete ke imọ idi eyeyen Nahor, eyeneka Abraham, Eliezer ama ọbọn̄ akam ọkọm Abasi. Enye ọkọdọhọ ete: “Jehovah ada mi edi ufọk nditọ-eka ete mi.” (Genesis 24:22-27) Ẹma ẹda Eliezer ẹka ubon Rebekah. Nte ini akakade, Rebekah ama akabade edi n̄wan Isaac, ndien enye ama enyene ifet ndikabade ndi ekaeka Messiah, kpa Jesus.

Ukpepn̄kpọ Ẹdude ẹnọ Nnyịn

Jehovah ama ọdiọn̄ ukeme oro Eliezer ekesịnde ye akam ndikụt nsan̄andọ oro abakde Abasi nnọ Isaac. Nte ededi, ti ete ke ndọ Isaac ama enyene ebuana nnennen ye uduak Abasi ndisio mfri ndi ebe ke Abraham. Ntre mbụk emi ikpenyeneke ndinam nnyịn ibiere nte ke ẹyenọ kpukpru owo oro ẹbọn̄de akam ẹyom nsan̄andọ nsan̄a ke utịbe utịbe usụn̄. Kpa ye oro, edieke nnyịn isọn̄ọde iyịre ke mme edumbet Jehovah, enye ọyọnọ nnyịn ukeme ndiyọ mme mfịna oro ẹsan̄ade ye ekededi ke otu mme idaha ẹmi ke uwem—ndọ m̀mê itie unana ndọ.—1 Corinth 7:8, 9, 28; men Philippi 4:11-13 domo.

Eliezer ekenyene ndisịn ekese ukeme ndinam n̄kpọ ke usụn̄ Jehovah. Nnyịn n̄ko imekeme ndikụt nte ke ndinam n̄kpọ ekekem ye mme idaha Jehovah isidịghe mmemmem n̄kpọ kpukpru ini. Ke uwụtn̄kpọ, ekeme ndidi ọkpọsọn̄ n̄kpọ ndikụt utom oro mîbiọn̄ọke n̄kọri utom ukara Abasi, nsan̄andọ oro abakde Abasi, mme nsan̄a oro ẹbọpde-bọp, unọ idem inemesịt oro mîsabakede owo. (Matthew 6:33; 1 Corinth 7:39; 15:33; Ephesus 4:17-19) Kpa ye oro, Jehovah ekeme ndimụm mbon oro ẹsịnde ndibiat mme edumbet Bible n̄kama. Bible ọn̄wọn̄ọ ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo onịm.”—Mme N̄ke 3:5, 6.

[Ikọ idakisọn̄]