ITIE BIBLE ẸNAMDE AN̄WAN̄A
Genesis 1:1—“Ke Editọn̄ọ, Abasi Okobot Enyọn̄ ye Isọn̄”
“Ke editọn̄ọ, Abasi okobot enyọn̄ ye isọn̄.”—Genesis 1:1, Edikabade Eke Obufa Ererimbot.
“Ke eritọŋọ Abasi okobot enyọŋ ye isọŋ.”—Genesis 1:1, Edisana Ŋwed Abasi Ibom.
Se Genesis 1:1 Ọwọrọde
Ata akpa ufan̄ikọ Bible emi anam idiọn̄ọ akpan n̄kpọ iba. Akpa edi ke “enyọn̄ ye isọn̄” enyene ntọn̄ọ. Ọyọhọ iba edi ke Abasi okobot mmọ.—Ediyarade 4:11.
Bible isiakke m̀mê ebịghi didie Abasi okobot ererimbot emi, inyụn̄ itịn̄ke nte Abasi akasan̄ade obot enye. Edi Bible etịn̄ ke Abasi akada ‘ọkpọsọn̄ ukeme ye akwa odudu esie’ obot ofụri ekondo.—Isaiah 40:26.
Ikọ Hebrew oro ẹkabarede nte “okobot,” ọwọrọ ke se ẹtịn̄de ẹban̄a edi n̄kpọ emi Abasi ikpọn̄ ekemede ndinam.a Ke Bible, Jehovahb Abasi ikpọn̄ ke ẹkot Andibot.—Isaiah 42:5; 45:18.
Se Iban̄ade Genesis 1:1
Akpa ufan̄ikọ ke Genesis ọtọn̄ọ etịn̄ ke Abasi okobot se ẹtịn̄de ẹban̄a ke Genesis ibuot 1 ye 2. Ọtọn̄ọde ke Genesis 1:1 esịm ibuot 2:4, Bible etịn̄ aban̄a nte Abasi okobotde isọn̄ ye kpukpru mme odu-uwem n̄kpọ ke isọn̄ emi, ke adiana ke adiana, esịnede akpa eren ye n̄wan. Ekem enye enen̄ede etịn̄ se Abasi akanamde ke ini m̀mê usen emi enye okobotde akpa eren ye n̄wan.—Genesis 2:7-25
Genesis ọdọhọ ke Abasi akada “usen” itiokiet obot mme n̄kpọ. Edi idịghe ata ata usen emi usen kiet kiet enyenede hour 24 ke enye etịn̄ aban̄a, enye etịn̄ aban̄a ata an̄yan ini emi owo mîdiọn̄ọke. Ke Bible, “usen” ekeme ndida mban̄a ata an̄yan ini, idịghe hour 24 kpọt. Okpokot Genesis 2:4, oyokụt ke ikọ oro “ini” ye “usen” edi ukem n̄kpọ. Itie oro ọtọ ofụri ini, m̀mê usen itiokiet, emi Abasi akadade obot mme n̄kpọ ọdọn̄ kiet okot “usen.”
Se Mme Owo Ẹtịn̄de Eban̄a Genesis 1:1
Se Mme Owo Ẹtịn̄de: Abasi okobot ekondo ke tosịn isua ifan̄ emi ebede.
Akpanikọ: Bible itịn̄ke ini ẹkebotde ekondo. Se Genesis 1:1 etịn̄de ituahake ye se ntaifiọk ẹtịn̄de. Mmọ ẹdọhọ ke ediwak biliọn isua edi emi tọn̄ọ ekondo okodu.c
Se Mme Owo Ẹtịn̄de: Genesis 1:1 owụt ke Abasi edi ita-ke-kiet, sia ikọ Hebrew oro ẹkabarede nte “Abasi” ada aban̄a ediwak.
Akpanikọ: Ẹda udori-enyịn̄ oro “Abasi” ẹto ikọ Hebrew oro ‘Elo·himʹ, emi adade aban̄a ediwak. Ikọ Hebrew oro owụt ubọn̄ ye uten̄e emi ata Abasi enyenede, idịghe nte ke ata Abasi ebe kiet. N̄wed emi, The New Catholic Encyclopedia ọdọhọ ke ‘Elo·himʹ oro ẹtịn̄de ke Genesis 1:1 “esisan̄a ye n̄kpọ emi owo kiet anamde, ke onyụn̄ etie nte edidem ndidọhọ nnyịn; iwọrọke ke enye awak, edi owụt uku esie.”—Second Edition, Volume 6, page 272.
Kot Genesis ibuot 1 ye ikọ idakisọn̄ ekededi emi anamde ndusụk n̄kpọ an̄wan̄a ye mme itie Bible eken emi ẹtịn̄de ukem n̄kpọ oro.
a Bible emi ekọtde HCSB Study Bible ọdọhọ ete: “Ikọ Hebrew emi ‘bara’, ọwọrọ ‘ndibot n̄kpọ’; ndien ke usem Hebrew owo isidọhọke ke owo obot n̄kpọ. Ntre bara’ etịn̄ aban̄a n̄kpọ emi Abasi ikpọn̄ ekemede ndibot,” m̀mê ndinam.—Page 7.
b Ata enyịn̄ Abasi ekere Jehovah.—Psalm 83:18.
c N̄wed emi ẹkotde The Expositor’s Bible Commentary etịn̄ aban̄a ikọ Hebrew oro ẹkabarede nte “ke editọn̄ọ.” N̄wed oro ọdọhọ ete: “Ikọ oro iwụtke m̀mê ini oro ọniọn̄ adan̄a didie.”—Revised Edition, Volume I, page 51.