Mmọ Ẹma Ẹnam Uduak Jehovah

Moses ye Aaron—Mme Uko Uko Anditan̄a Ikọ Abasi

KERE ban̄a n̄kpọntịbe emi ise: Moses emi ọsọn̄de ke isua 80 ke emana ye Aaron, eyeneka esie, ke ẹda ke iso owo emi okopde odudu akan ke isọn̄—Pharaoh Egypt. Ye nditọ Egypt owo emi akan andida ke ibuot mme abasi. Mmọ ẹnịm ke akpanikọ ẹte ke enye ke idemesie edi abasi. Ẹse enye nte Horus emi afiakde edimana, abasi emi enyenede ibuot mbukpo. Adianade ye Isis ye Osiris, Horus ekedi akpan Abasi-Ita-ke-Kiet ke otu mme abasi ye mme abasi-an̄wan Egypt.

Owo ekededi emi asan̄ade ekpere Pharaoh ekeme ndinen̄ede n̄kụt mbuka mbuka mbiet ibuot ebre ke ufọt anyanya esie. Nte ẹdọhọde, urụkikọt emi ekeme ndinam ikan̄ ye nsobo ọwọrọ ke inua esie osịm ekededi ke otu mme asua Pharaoh. Idahaemi Moses ye Aaron ẹmen anana-mbiet eben̄e ẹdi ke iso edidem emi edide abasi mi—ẹte enye ayak nditọ Israel ẹmi ẹkedude ke ufụn ẹka man otodo mmọ ẹkeme ndinam usọrọ nnọ Abasi mmọ, Jehovah.—Exodus 5:1.

Jehovah ama ebebem iso etịn̄ nte ke Pharaoh ọyọsọn̄ esịt. Ke ntre, Moses ye Aaron ikokopke n̄kpaidem iban̄a emiom emiom ibọrọ esie: “Jehovah edi anie, eke n̄kopde uyo esie, nnyụn̄ nyak Israel ẹka? Mfiọkke Jehovah, ndinyụn̄ nyakke Israel ẹka.” (Exodus 4:21; 5:2, 3) Ntem, ẹma ẹnam ntịmidem ẹnọ n̄wọrọnda eneni. Ke ini ẹkefiakde ẹsobo, Moses ye Aaron ẹma ẹnọ akama-n̄kpaidem uyarade nte ke mmimọ ikada ke ibuot Abasi akpanikọ ye ata ọkpọsọn̄.

Utịben̄kpọ Otịbe

Kpa nte Jehovah eketemede, Aaron ama anam utịben̄kpọ oro okowụtde nte ke Jehovah edi akakan ke otu mme abasi Egypt. Enye ama ọduọk esan̄ esie ke isọn̄ ke iso Pharaoh, ndien kpa idahaoro enye ama akabade edi urụkikọt! Ke ekikere etịmerede oto utịben̄kpọ emi, Pharaoh ama okot mbia-idiọn̄ esie.a Ye un̄wam odudu demon, iren ẹmi ẹma ẹkeme ndida esan̄ mmọ ẹnam ukem n̄kpọ oro.

Ke edide Pharaoh ye mbia-idiọn̄ esie ẹma ẹkop inemesịt, emi ekedi n̄kukụre ke esisịt ini. Kere nte iso mmọ eketiede ke ini urụkikọt Aaron ekemende urụkikọt mmọ emen, ke adiana ke adiana! Kpukpru mbon ẹmi ẹkedude ẹma ẹkeme ndikụt nte ke mme abasi Egypt ikemenke udomo ye Abasi akpanikọ, Jehovah.—Exodus 7:8-13.

Nte ededi, idem ke emi ama ekebe, Pharaoh okosụk ọsọsọn̄ esịt. Ekedi n̄kukụre ke ini Abasi ama akada akama-nsobo ufen ọsọk Egypt ke Pharaoh ke akpatre ọkọdọhọ Moses ye Aaron ete: “Mbufo ye nditọ Israel ẹdaha ke enyọn̄, ẹwọn̄ọ ke otu mbio-obio mi; ẹnyụn̄ ẹka ẹkenam n̄kpọ ẹnọ Jehovah, nte emi mbufo ẹkedọhọde.”—Exodus 12:31.

Ukpepn̄kpọ Ẹmi Ẹdude Ẹnọ Nnyịn

Nso ikan̄wam Moses ye Aaron ndika mbịne okopodudu Pharaoh Egypt? Ke akpa, Moses ikenyeneke mbuọtidem ke ukeme esie, ọdọhọde nte ‘idobide inua inyụn̄ idobide edeme.’ Idem ke Jehovah ama ọkọsọn̄ọ etịn̄ nte ke iyenọ enye un̄wam, enye ama ekpe ubọk ete: “Mbọk, Ọbọn̄ mi, da ubọk owo eke afo edidọn̄de, dọn̄ utom.” Ke nditịn̄ ke usụn̄ en̄wen, Moses ekeben̄e ete Abasi ọdọn̄ owo en̄wen. (Exodus 4:10, 13) Kpa ye oro, Jehovah akada Moses emi okosụhọrede idem, ọnọde enye ọniọn̄ ye odudu oro ẹyomde man anam utom oro ẹkenọde enye.—Numbers 12:3.

Mfịn, mme asan̄autom Jehovah Abasi ye Jesus Christ ke ẹnam ewụhọ edinam “kpukpru mme idụt ẹdi mbet.” (Matthew 28:19, 20) Man inam udeme nnyịn ke ndinam utom emi, nnyịn ikpenyene ndida ifiọk N̄wed Abasi ye mme ukeme ekededi oro ekemede ndidi nnyịn imenyene, inam n̄kpọ ke mfọnn̄kan usụn̄. (1 Timothy 4:13-16) Utu ke ndiwụk ntịn̄enyịn ke mme unana ukeme nnyịn, ẹyak nnyịn ibọ utom ekededi oro Abasi ọnọde nnyịn inam ye mbuọtidem. Enye ekeme ndinam nnyịn idot onyụn̄ ọsọn̄ọ nnyịn idem man inam uduak esie.—2 Corinth 3:5, 6; Philippi 4:13.

Sia Moses okodude ke idaha ndibiọn̄ọ owo ye mme demon, enye ke akpanikọ ama oyom un̄wam oro akande eke owo. Mmọdo, Jehovah ama ọsọn̄ọ ọdọhọ enye ete: “Sese, mmonịm fi ke Abasi nnọ Pharaoh.” (Exodus 7:1) Ih, Moses ama enyene un̄wam ye odudu Abasi. Ke enyenede spirit Jehovah, Moses ikenyeneke ntak ndomokiet ndifehe Pharaoh m̀mê udịmekọn̄ atan̄idem andikara oro.

Ana nnyịn n̄ko iberi edem ke edisana spirit, m̀mê anamutom odudu Jehovah, man inam utom nnyịn ima. (John 14:26; 15:26, 27) Ye un̄wam Abasi nnyịn imekeme nditiene ntịn̄ mme ikọ David, emi ọkọkwọde ete: “Mmọbuọt idem mi ke Abasi: ndịk idinamke mi. Nso ke owo ekeme ndinam mi?”—Psalm 56:11.

Ke mbọm esie Jehovah ikọkpọn̄ke Moses ikpọn̄ ke utom esie. Utu ke oro, Abasi ama ọdọhọ ete: “Aaron eyen uka eyedi prophet fo. Afo editịn̄ kpukpru se ntemede fi: ndien Aaron eyen uka etịn̄ ọnọ Pharaoh.” (Exodus 7:1, 2) Edi ima ima n̄kpọ didie ntem ke n̄kan̄ Jehovah ndinam n̄kpọ ke udomo oro Moses ekekemede ndise mban̄a!

Abasi anam nnyịn inyene itie ebuana ye ekemmọ mme Christian ẹmi ẹnyịmede n̄kpọ-ata edidi Mme Ntiense nnọ Jehovah, kpa Ata Edikon̄. (1 Peter 5:9) Ke ntre, kpa ye mme ubiọn̄ọ ẹmi nnyịn ikemede ndisobo, ẹyak nnyịn itie nte Moses ye Aaron—mme uko uko anditan̄a ikọ Abasi.

[Ikọ idakisọn̄]

[Ndise ke page 25]

Moses ye Aaron ẹma ẹda ke ibuot Jehovah uko uko ke iso Pharaoh