Ini Iso Fo Esịne Fi ke Ubọk
NDI EMEKEME NDIBIERE NTE INI ISO FO EDITIEDE? Ndusụk owo ẹdọhọ ke ẹma ẹbebiere kpukpru se iditịbede inọ mmimọ, ke inyeneke se mmimọ ikemede ndinam mban̄a oro. Edieke mmọ mîkemeke ndinam se mmọ ẹkeduakde, mmọ ẹsidọhọ ke ikanaha inọ mmimọ ndinam n̄kpọ oro. Ntre, mmọ isikpaha-kpa idem ndisịn ukeme aba.
Ke ini ndusụk owo ẹkụtde nte ufịk ye utụk okponde ke ererimbot emi, mmọ ẹsikere ke inyeneke se ẹkemede ndinam man ini iso ọfọn. Ekeme ndidi mmọ ẹma ẹnam se ẹkemede man uwem enem mmọ, edi ekọn̄, ubiatibet, oto-obot afanikọn̄, ye udọn̄ọ ọtọ kpukpru n̄kpọ etịmede, ndien ofụri se mmọ ẹkekpade utom ẹnam atak. Oro esinam mmọ ẹkere ke ufọn idụhe aba.
Imọdiọn̄ọ ke nte n̄kpọ etiede ke ererimbot emi ekeme ndinam afo ukemeke aba ndinam se akaduakde. (Ecclesiastes 9:11) Edi oro iwọrọke ke inyeneke se ekemede ndinam mban̄a ini iso fo. Bible owụt ke afo enyene ndibiere m̀mê ayanam n̄kpọ emi edinamde odu uwem ke nsinsi. Yak ineme ndusụk se Bible etịn̄de.
Mbemiso nditọ Israel ẹkedụkde Isọn̄ Un̄wọn̄ọ, Moses emi akadade mmọ usụn̄ ọkọdọhọ mmọ ete: “Mmada uwem ye n̄kpa, edidiọn̄ ye isụn̄i, nnịm fi ke iso; mek uwem man afo ye nditọ fo ẹkpedu uwem, ebe ke ndima Jehovah Abasi fo, ke ndikop uyo esie, ye ke ndiyịre ye enye.”—Deuteronomy 30:15, 19, 20.
“Mmada uwem ye n̄kpa, edidiọn̄ ye isụn̄i, nnịm fi ke iso; mek uwem man afo ye nditọ fo ẹkpedu uwem.”—Deuteronomy 30:19
Abasi ama anyan̄a nditọ Israel osio ke ufụn ke Egypt onyụn̄ ọn̄wọn̄ọ ke iyanam mmọ ẹkedụn̄ ke Isọn̄ Un̄wọn̄ọ. Edi akana mmọ ẹnam n̄kpọ man ẹdot ndidụk Isọn̄ Un̄wọn̄ọ oro. Abasi ọkọdọhọ ke ana mmọ ‘ẹmek uwem.’ Didie ke mmọ ẹkenyene ndinam emi? Mmọ ẹkenyene ‘ndima Abasi, n̄kop uyo esie, nnyụn̄ nyịre ye enye.’
Kpasụk ntre ke edi mfịn. Afo enyene ndimek se edinamde, ndien se afo anamde edibiere nte ini iso fo editiede. Edieke emekde ndima Abasi, ndikop uyo esie, ndinyụn̄ nyịre ye enye, ọwọrọ ememek uwem—nsinsi uwem ke Paradise ke isọn̄. Edi nso ke ndima Abasi, ndikop uyo esie, nnyụn̄ nyịre ye enye ọwọrọ?
NDIMA ABASI
Ima edi ata akpan edu Abasi. Spirit Abasi akanam apostle John ewet ete: “Abasi edi ima.” (1 John 4:8) Ntre, ke ini ẹkebụpde Jesus m̀mê ewe edi n̄kponn̄kan ke otu ibet, enye ọkọdọhọ ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” (Matthew 22:37) Ndima Jehovah edinam idi ufan esie, idịghe ndikop uyo esie nnan nnan m̀mê ndifefehe enye. Edi ntak emi ikpamade Jehovah?
Jehovah ama nnyịn nte ete ye eka ẹsimade nditọ mmọ. Kpa ye oro mme ete ye eka mîfọnke ima, mmọ ẹsikpep nditọ mmọ n̄kpọ, ẹtịn̄ ikọ ẹsọn̄ọ mmọ idem, ẹn̄wam mmọ, ẹnyụn̄ ẹtụnọ mmọ man mmọ ẹwọrọ n̄kpọ ẹnyụn̄ ẹkop inemesịt. Nso ke ete ye eka ẹsiyom nditọ mmọ ẹnam ẹnọ mmimọ ke usiene? Mmọ ẹsiyom nditọ mmọ ẹma mmimọ ẹnyụn̄ ẹnam se mmimọ ikpepde mmọ, sia ẹdiọn̄ọde ke inam oro ke ufọn mmọ. Kpasụk ntre, Ete nnyịn eke heaven emi ọfọnde ama, anam ata ediwak nti n̄kpọ ọnọ nnyịn. Ntre, enye oyom nnyịn ima imọ.
NDIKOP UYO ESIE
Ke Bible, ‘ndikop uyo owo’ esiwak ndiwọrọ ndinam se owo oro ọdọhọde. Ntre, ke ini ẹdọhọde eyenọwọn̄ okop uyo ete ye eka esie, esiwọrọ yak enye anam se ete ye eka esie ẹdọhọde. Kpasụk ntre, ndikop uyo Abasi ọwọrọ ndinam se enye ọdọhọde. Sia nnyịn mîkemeke ndikop ata ata uyo Abasi, ana ikpep Bible inyụn̄ inam se ikpepde man iwụt ke imokop uyo Abasi.—1 John 5:3.
Jesus ama owụt ke enen̄ede oyom ikop uyo Abasi, ntak edi oro enye ọkọdọhọde ete: “Idịghe uyo ikpọn̄ ke owo edida odu uwem, edi edida kpukpru ikọ eke ẹwọrọde Jehovah ke inua odu.” (Matthew 4:4) Ndidia udia edi akpan n̄kpọ, edi ndikpep Ikọ Abasi akam edi akpan n̄kpọ akan. Ntak idọhọde ntre? Edidem Solomon emi ekenen̄erede enyene ọniọn̄ ọkọdọhọ ete: “Ọniọn̄ [ekpeme] owo kpa nte okụk ekpemede; edi ufọn ifiọk edi nte ke ọniọn̄ enịm mbon oro ẹnyenede enye uwem.” (Ecclesiastes 7:12) Ifiọk ye ọniọn̄ emi Abasi ọnọde nnyịn ekeme ndikpeme nnyịn onyụn̄ an̄wam nnyịn ibiere ndinam n̄kpọ emi edinamde idu uwem ke nsinsi.
NDIYỊRE YE ENYE
N̄kọ emeti uwụtn̄kpọ Jesus oro iketịn̄de ke ibuotikọ oro okụrede do. Enye ọkọdọhọ ete: “Inuaotop emi adade esịm uwem afafaha usụn̄ onyụn̄ esịre, ndien mme andikụt enye iwakke.” (Matthew 7:13, 14) Edieke isan̄ade ke utọ usụn̄ oro, ọyọfọn isan̄a ikpat kiet ye owo emi adade nnyịn usụn̄ man enye ada nnyịn ekesịm ebiet emi ikade, oro edi, nsinsi uwem. Emi owụt ke enen̄ede ọfọn ikpere Abasi. (Psalm 16:8) Edi, didie ke ikeme ndinam emi?
Enyene ediwak n̄kpọ emi isinamde kpukpru usen, onyụn̄ enyene ediwak n̄kpọ en̄wen emi ikpamade ndisinam. Mme n̄kpọ emi ẹkeme ndida ini nnyịn tutu nnyịn inyeneke aba ini nditie n̄kere se Abasi oyomde nnyịn inam. Ntak edi oro Bible ọdọhọde ete: “Ẹtịm ẹkpeme nte mbufo ẹsan̄ade, mbak ẹdisan̄a nte mbon ndisịme edi ẹsan̄a nte mbon ọniọn̄, ẹdedep ifet ẹnọ idem mbufo, koro mme usen ẹdiọkde.” (Ephesus 5:15, 16) Edieke iyomde ndika iso ndi ufan Abasi, inaha iyak n̄kpọ ndomokiet adian̄ade nnyịn ọkpọn̄ enye.—Matthew 6:33.
ESỊNE FI KE UBỌK!
Kpa ye oro mûkemeke ndikpụhọde se ima iketetịbe, enyene mme n̄kpọ emi akpanamde man n̄kpọ ọfọn ye afo ye ubon mbufo ke ini iso. Bible anam ifiọk ke Jehovah, edima Ete nnyịn eke heaven, enen̄ede ama nnyịn, onyụn̄ anam nnyịn ifiọk se enye oyomde nnyịn inam. Kop se prọfet Micah eketịn̄de mi:
“O owo, enye amasian fi se ifọnde. Ndien nso ke Jehovah oyom oto fi ke mîbọhọke ndinam se inende nnyụn̄ mma mfọnido nnyụn̄ nsụk idem nsan̄a ye Abasi fo?”—Micah 6:8.
Ndi eyenyịme ndisan̄a ye Jehovah nte enye ọdọhọde man etiene adia ufọn kpukpru n̄kpọ oro enye ọn̄wọn̄ọde ndinam nnọ mbon oro ẹsan̄ade ye enye? Esịne fi ke ubọk!