Ọniọn̄ ‘Edibem Iso Nda N̄kụt Se Iditịbede’
“MMỌ ẹdi mme owo ẹmi ẹma ẹkeduọk eti ibuot mmọ mînyụn̄ inyeneke ifiọk ndomokiet. Edieke mmọ ẹkpenyenede ọniọn̄, mmọ ẹkpefiọk emi ẹnyụn̄ ẹbem iso ẹda ẹkụt se iditịbede inọ mmọ.”—Deuteronomy 32:28, 29, Beck.
Moses eketịn̄ mme ikọ ẹmi ọnọ nditọ Israel nte mmọ ẹkedade ke mben Isọn̄ Un̄wọn̄ọ. Moses ekebem iso etịn̄ aban̄a ini emi mmọ ẹdifụmide Jehovah ẹnyụn̄ ẹkere esisịt ẹban̄a mme utịp edinam mmọ. Ke ediwak isua ikie oro ẹketienede, mbon Israel—esịnede ediwak ndidem—ẹma ẹfụmi mme ntọt Abasi.
Ke uwụtn̄kpọ, Solomon ama ọfiọk ewụhọ Abasi nte ẹkûdọ mme andituak ibuot nnọ mme abasi oro mîdịghe Jehovah. (Deuteronomy 7:1-4) Nte ededi, enye ama edinyene “ediwak isen iban.” Nso ikedi utịp? Mbụk Bible ọdọhọ ete: “Edikem ke ini usọn̄ Solomon, iban esie ẹyụt enye esịt, esịn enye akabade etiene abasi efen; ndien ofụri esịt esie isan̄ake ye Jehovah Abasi esie, nte esịt David ete esie.” (1 Ndidem 11:1, 4) Okposụkedi ekedide owo ọniọn̄, Solomon ama anana eti ibuot ‘ndibem iso nda n̄kụt se iditịbede’ edieke enye mînịmke ewụhọ Abasi.
Nso kaban̄a nnyịn? Nnyịn imekeme ndifep ekese ubiak edieke nnyịn inen̄erede itie ikere ke mbemiso iban̄a mme ubiere ke uwem. Ke uwụtn̄kpọ, ẹteme mme Christian ẹte “[ẹyet] kpukpru se isabarede obụkidem ye spirit [ẹfep].” (2 Corinth 7:1) Emi owụt ọniọn̄, edi ediwak owo inyeneke eti ibuot ndibem iso nda n̄kụt se ikemeke nditịbe edieke mmọ ẹfụmide item Paul. Ke uwụtn̄kpọ, ediwak n̄kparawa owo ẹsabade idem mmọ ebe ke ndin̄wọn̄ sika, ẹkerede ke emi anam mmimọ itie ifiọk ifiọk inyụn̄ itie nte ikpọ owo. Edi n̄kpọ mmọn̄eyet didie ntem ke ini, ke ukperedem ke uwem, ediwak mmọ ẹnyenede mme mfịna esịt, kansa obufre, m̀mê mbufụt obufre nte utịp!
Edi akpan n̄kpọ ndinen̄ede n̄kere mban̄a mme utịp ubiere ye edinam nnyịn. Ye eti ntak, Paul ekewet ete: “Se ededi owo ọtọde, oro ke enye edinyụn̄ ọdọk. Owo eke ọtọde ọnọ obụkidem ọyọdọk mbiara oto obụkidem; edi owo eke ọtọde ọnọ Spirit, oto ke Spirit ke enye ọyọdọk nsinsi uwem.”—Galatia 6:7, 8.