Ndibọp Mme Edu Christian ke Esịt Nditọ Nnyịn

EKA Wanda, emi ebe ama ọkọkpọn̄ enye, ama anam utom ọkpoṣọn̄ ndibọp mme edu Christian ke esịt adiaha esie. Ke ini Wanda ekedide isua 12, ẹma ẹsịn ukpep emi ke udomo. Ke ini oro, ẹma ẹnyịk Wanda, ọkọrọ ye ekpri eyeneka esie eren ye n̄wan, ndikpọn̄ eka esie nnyụn̄ n̄kodu ye ete esie esisịt ini. Ete esie ikedịghe andinịm ke akpanikọ, ntre didie ke Wanda edinam n̄kpọ ke ini eka esie mîdụhe ndikpeme?

N̄kpọntịbe oro esisịmde kpukpru ete ye eka ẹdide Christian edi ini emi nditọ mmọ ẹnyenede ndinam mme ubiere ke idemmọ, ẹdomode mbuọtidem mmọ. Ẹkeme ndidianade nditọn̄wọn̄ n̄kpọn̄ mme ete ye eka mmọ ẹdide Christian, nte ẹkedianarede Wanda. Mmọ ẹkeme ndisobo mfịghe otode ubọkn̄ka ke ufọkn̄wed ndinam se idiọkde. Mîdịghe mmo ẹkeme ndisobo n̄kpọsọn̄ idomo. Mme ete ye eka ẹdide Christian ẹdori enyịn ẹnyụn̄ ẹbọn̄ akam ẹte ke ini oro otibede, nditọ mmmiọ ẹnyene mme edu Christian oro ọsọn̄de ekem ndikan idomo oro.

Didie ke mme ete ye eka ẹkeme ndibọp mme edu Christian oro ẹsọn̄de idem nsịn ke esịt nditọ mmọ? Mbemiso ikụtde se ikotịbede inọ Wanda, ẹyak nnyịn ise nte Bible an̄wamde nnyịn ndibọrọ mbụme oro. Ẹkụt isọn̄ oro ẹnyenede ẹnọ ibọrọ ke ikọ ẹmi apostle Paul ekewetde ọnọ mme Christian ke Corinth: “Baba owo kiet ikemeke ndinịm itiat ukotufọk efen mbe se ẹma ẹkenịm, emi edide Jesus Christ. Edi edieke owo adade gold, m̀mê silver, m̀mê ọsọn̄urua itiat, m̀mê obukpọk, m̀mê nyanyan̄a, m̀mê mbio, ọbọp odori ke enyọn̄ itiat ukotufọk oro; utom kpukpru owo kiet kiet eyeyarade; koro usen oro eyewụt enye, koro usen oro edisierede ke ikan̄; ikan̄ eyenyụn̄ odomo se kpukpru owo ẹkanamde owụt orụk utom eke edide.”—1 Corinth 3:11-13.

Itiat Idaksọn̄

Ntak emi Paul ekewetde ikọ ẹmi? Enye ama ọtọn̄ọ ndutịm edibọp mme edu Christian ke Corinth, edi ndutịm oro ama odụk afanikọn̄. Nte ededi, ndutịm edibọp oro Paul akanamde ikabuanake nditọ esie eke obụk. Enye akabuana mbon oro ẹkekabarede ẹdi mme Christian ebe ke ukwọrọikọ esie. Edi enye ama ekere aban̄a mmọemi nte nditọ eke spirit, ndien se enye eketịn̄de enyene ufọn ọnọ ete ye eka n̄ko.—1 Corinth 4:15.

Paul ama edi Corinth ndusụk ini ke mbemiso onyụn̄ ọtọn̄ọ esop Christian do. Mmọ oro ẹkenyịmede ukwọrọikọ esie ẹma ẹnam ikpọ ukpụhọde ke mme edu mmọ. Ndusụk mmọ ke akpa ẹkedi mbon oburobụt ido idan̄, mme inọ, mme okpono ndem, ye mme akpammịn. (1 Corinth 6:9-11) Edi mmọ ẹma ẹkeme ndikpụhọ nnyene ekikere Christian koro, yak idọhọ Paul ama esịn eti itiat idakisọn̄. Nso ikedi itiat idakisọn̄ oro? “Baba owo kiet ikemeke ndinịm itiat ukotufọk efen mbe se ẹma ẹkenịm, emi edide Jesus Christ.”—1 Corinth 3:11.

Didie ke Paul ekesịn itiat idakisọn̄ emi nte enye ekekpepde mbufa mme andinịm ke akpanikọ ẹmi n̄kpọ ke Corinth? Enye asian nnyịn ete: “Ami, ke ini n̄kedide ke ọtọ mbufo, nditọete, n̄kasan̄ake ye akan ikọ m̀mê ifiọk n̄kwọrọ edisana ndiben̄kpọ Abasi nnọ mbufo. Koro mma mbiere nte ndifiọkke baba n̄kpọ kiet ke otu mbufo ke mîbọhọke Jesus Christ, emi ẹkewotde ke eto.” (1 Corinth 2:1, 2, NW; Utom 18:5) Enye ikọwọn̄ọkede ntịn̄enyịn inọ idemesie m̀mê ndikama akpanikọ nnọ enye enyọn̄ enyọn̄ ifiọk n̄wụtidem. Utu ke oro, enye ọkọwọn̄ọde ntịn̄enyịn ọnọ Jesus Christ ye usụn̄ nte Abasi akadade enye anam n̄kpọ.

Ke akpanikọ, Jesus edi ubọn̄ ubọn̄ ọkpọsọn̄ itiat idakisọn̄ ọnọ utom edibọp Christian. Enye ama ọnọ uwa ufak. Enye idahaemi edi Edidem eke heaven ndien ke ntre eyesọp ndisobo mme asua Abasi ke Armageddon. Adan̄aoro enye eyenam edinen ido Abasi ke ini ukara ọ-tọsịn isua, ndien nte Akwa Oku Abasi, enye sụn̄sụn̄ eyemenede ekpụk ubonowo osịm mfọnmma. Nso itiat idakisọn̄ efen ke owo okpoyom?

Ntem, ke ndibọp mme edu Christian nsịn ke esịt nditọ nnyịn, nnyịn inam ọfọn ke ndikpebe Paul nnyụn̄ n̄kụt nte ke mmọ ẹwụt esịtekọm ẹnọ mme akpan n̄kpọ ẹmi. Toto ke uyen mmọ, nnyịn ikpenyene ndikpep nditọ nnyịn ndima Jesus ke se enye akanamde ye se enye osụk anamde ọnọ nnyịn.—1 Peter 1:8.

Edibọp

Nte ededi, ke adan̄aemi Paul ama ekesịn eti itiat idakisọn̄, utom edibọp oro ama osobo ndusụk mfịna ke enye ama ọkọnyọn̄. (1 Corinth 3:10) Mfịna oro ikedịghe isio ye se ediwak ete ye eka ẹsisobode mfịn. Mmọ ẹsibọk nditọ mmọ ke mbuọtidem Christian ẹnyụn̄ ẹnịm ke akpanikọ ẹte ke nditọn̄wọn̄ oro ẹdiọn̄ọ se akpanikọ edide. Edi ke ini mmọ ẹkponide, nditọn̄wọn̄ oro ẹfiọrọ ẹkpọn̄ mîdịghe ẹkan̄ mbuọtidem. Ntak emi oro esitịbede-e? Ediwak ini edi ntak n̄kpọ oro ẹkedade ẹbọp.

Paul ọkọdọhọ ete ke ẹkeme ndibọp mme edu ye mme ọsọn̄urua n̄kpọ: gold, silver, ye mme ọsọn̄urua itiat. Mîdịghe ẹkeme ndida mme mmemurua n̄kpọ mbọp: obukpọk, nyanyan̄a, ye mbio. (1 Corinth 3:12) Idahaemi, edieke andibọp akamade gold, silver, ye ọsọn̄urua itiat, enye eyebọp orụk eti ufọk, kiet oro enyenede n̄wọrọnda ufọn. Edi andibọp oro akamade obukpọk, nyanyan̄a, ye mbio ọbọp sụk n̄kpọ oro enyenede ibio ibio ufọn, n̄kpọ ibio ini, ye mmemurua n̄kpọ.

Etie nte ẹma ẹkama mfefere n̄kpọutom eke spirit ke Corinth. Ndusụk mbon oro ẹkekade iso ke itiat idakisọn̄ oro apostle Paul ekesịnde ẹkebọp mmemurua n̄kpọ, ibọpke ọkpọsọn̄ ufọk oro ebịghide. Mbon Corinth ẹma ẹtọn̄ọ ndise mme owo, ndien unana edidiana kiet, ufụp, ye utọk ẹma ẹdu ke otu mmọ. (1 Corinth 1:10-12; 3:1-4) Didie ke ẹkpekekpan emi nditịbe? Ke mmọ ndikama eti-uduot n̄kpọutom oro ebịghide.

Mmọemi ẹda ẹban̄a mme ọsọn̄urua edu oro ẹdide akpan ubak edu Christian. Nso edu? Apostle Peter ama asiak kiet ete: “Mbuọtidem mbufo emi ẹma ẹdomo ẹwụt, emi ọsọn̄de urua akan mbiara gold.” (1 Peter 1:6, 7) Edidem Solomon ama asiak iba efen efen: eti ibuot ye asian, emi edinyene mmọ “ọfọnde akan udori silver.” (Mme N̄ke 3:13-15) Ndien Edidem David ama eti nnyịn ete ke uten̄e Jehovah ye ediwụt esịtekọm nnọ mme mbet esie “ẹdi se owo ẹkpeyomde ẹkan gold.”—Psalm 19:9, 10.

Ẹkeme ndibọp mmọemi ye mme ọsọn̄urua n̄kpọutom eken nsịn ke mme edu Christian man an̄wam nditọ nnyịn ẹbọhọ mme idomo. Nte ededi, didie ke nnyịn ikeme ndifiọk nte ke nnyịn ida mme utọ n̄kpọutom ẹmi ibọp? Ke ndinọ ntịn̄enyịn ke esịt, ke eke nditọ nnyịn ye eke nnyịn.

Utom Edibọp oro Okụtde Unen

Udeme oro esịt ete m̀mê eka enyenede ke utom edibọp emi edi se ẹkụtde ke ewụhọ oro Jehovah ọkọnọde mme ete ye eka ke idụt Israel eset ete: “Yak mme ikọ ẹmi ami ntemede fi mfịn emi, ẹdu fi ke esịt.” Ekem enye ama akaiso ọdọhọ ete: “Nyụn̄ dọdiọn̄ siak mmọ nnọ nditọ fo.” (Deuteronomy 6:6, 7) Ntre, mbemiso nnyịn ikemede ndibọp mmọ en̄wen, nnyịn inyene ndibọp idem nnyịn. Nditọ nnyịn ẹkpenyene ndikụt ke mme n̄kpọ oro nnyịn itịn̄de inyụn̄ inamde nte ke edu nnyịn edi se ẹdade nnennen n̄kpọutom ẹnam.—Colossae 3:9, 10.

Ndien, ukpep nnyịn enyene ndisịm esịt mmọ. Jesus, andibọp mme edu Christian emi okụtde unen akan, ama osịm esịt ke ndida mme uwụtn̄kpọ ye mme mbụme. (Matthew 17:24-27; Mark 13:34) Mme ete ye eka ẹkụt ẹte ke ukem usụn̄ unọ ukpep ẹmi ẹtịm ẹkụt unen. Mmọ ẹsida mme uwụtn̄kpọ ndinam akpanikọ Christian ẹnyene inem ke esịt n̄kpri nditọ mmọ, ndien mmọ ẹsida mme mbụme oro ẹtịmde mfọn mfọn ndidiọn̄ọ se nditọ mmọ oro ẹkponide ẹnen̄erede ẹkere, nte mmọ ẹkerede n̄kpọ ke esịt mmo.—Mme N̄ke 20:5.

Ke ini Moses okodomode ndibọp udọn̄ edisọn̄ọ nnam akpanikọ ke esịt nditọ Israel, enye ama ọdọhọ ete: “Nịm mbet Jehovah, ye mme ewụhọ esie . . . man ofọn fi.” (Deuteronomy 10:13) Kpasụk ntre, mme ete ye eka ẹyenam ọfọn idịghe ndinam an̄wan̄a nditọ mmọ se mme idaha Abasi edide ikpọn̄îkpọn̄ edi n̄ko ndiwụt ke usụn̄ anamde owo onịm ntak mme utọ n̄kpọ nte edinam akpanikọ, edisana ido uwem, ye eti ebuana ẹdide ke ufọn mmọ.

Ke akpatre, Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Ke ini nditọn̄wọn̄ ẹdiọn̄ọde Jehovah ọkpọkpọ ke ntọn̄ọ ntọn̄ọ isua emana, ẹkpep ndineme mban̄a mfịna mmọ ye enye, ẹnyụn̄ ẹnyene ifiọk ke enye ke ọbọrọ akam mmimọ, mmọ ẹyekọri ata akpan ikpehe edu Christian: ọkpọkpọ itie ebuana ye Andibot mmọ.

Ikan̄

Paul ama okụt ete ke ini owo mîkanamke utom edibọp ke Corinth nnennen nnennen, mme edu eke ererimbot, utọ nte isio n̄ka ye ubahade, ama ọtọn̄ọ. Emi ekedi n̄kpọndịk koro, nte enye akanamde an̄wan̄a, “ikan̄ eyenyụn̄ odomo kpukpru se owo ẹkanamde owụt orụk utom eke edide”—1 Corinth 3:13.

Nso idi ikan̄ oro? Enye ekeme ndidi idomo ekededi oro Satan adade etiene Christian. Enye ekeme ndidi mfịghe otode ubọkn̄ka, idomo eke ikpọkidem, uma-inyene, ukọbọ, idem idiọk odudu eyịghe. Mme utọ idomo oro ẹnyene ndidi. “Utom owo kiet kiet eyeyarade; koro usen oro eyewụt enye, koro usen oro edisierede ke ikan̄.” Mme ete ye eka oro ẹnyenede eti ibuot ẹbọp mme edu nditọ mmọ ke ekikere nte ke ẹyedomo nditọ oro. Edi mmọ ẹnịm ke akpanikọ ẹte ke ebede ke un̄wam Jehovah, nditọ mmimọ ẹkeme ndibọhọ idomo oro. Edieke mme ete ye eka ẹnyenede edu emi, ẹyediọn̄ mmọ uwak uwak.

Utịp

Paul ama ọdọhọ ete: “Edieke utom eke owo ọkọbọpde odori ke esịt osụk edidu, owo oro eyebọ utịp.” (1 Corinth 3:14) Apostle Paul ama ọbọ utịp. Enye ekewet ọnọ mme Christian ke obio Thessalonica, emi enye n̄ko akanamde utom edibọp, ete: “Koro nso idi idotenyịn nnyịn, ye idatesịt nnyịn, ye anyanya eke idade ibụre mbụre? Nte idịghe mbufo ke nnyịn idida inam mbụre ke iso Ọbọn̄ nnyịn Jesus ke adan̄aemi Enye edidide? Koro mbufo ẹdi ubọn̄ nnyịn ye idatesịt nnyịn.”—1 Thessalonica 2:19, 20.

Eka Wanda ama enyene utịp emi. Ke ini ẹkedianarede Wanda emi ọsọn̄de isua-12 ke emana ẹkpọn̄ eka esie, enye ama atua tutu idap emen enye ke akpa. Ekem enye ama eti item oro eka esie ọkọnọde enye ndineme mme mfịna esie ye Jehovah ke akam. Enye ama ọbọn̄ akam ndien ibịghike ama enyene ekikere ndise n̄wed unọ owo ikot ke urụk ukopikọ man ese m̀mê Mme Ntiense Jehovah ekededi ẹdu ẹkpere. Enye ama osobo ye mmọ onyụn̄ ọfiọk ete ke ubon kiet odụn̄ ke usụn̄ oro ufọk ete esie odude. Wanda ọdọhọ ete, “Ami mma n̄kop inemesịt!”

Ye nsịnudọn̄ otode ubon emi, Wanda ama otịm ekpri eyeneka esie eren ye n̄wan idem ndifiak ntọn̄ọ utom Christian. Enye anam an̄wan̄a ete, “Ami n̄kenyene mbiomo ndinam nnyịn itịm idem inọ mme mbonoesop. Ami n̄kenyene ndiyet mme ọfọn̄ nnyịn, ndisara idet nnyịn, nnyụn̄ n̄kụt nte ke nnyịn imasana inyụn̄ iye.” Emi ekedi ọkpọsọn̄ utom ọnọ ekpri eyenan̄wan, edi enye ama anam oro. Inikiet ete esie ama odomo nditre mmọ ndidụk mme mbonoesop, edi nditọn̄wọn̄ ẹmi ẹma ẹkpe enye ubọk, ndien enye ama ayak mmọ ẹka.

Ke ukperedem, nditọn̄wọn̄ oro ẹma ẹfiak ẹkediana ye eka mmọ. Ke ini Wanda ọkọsọn̄de ke isua 15, enye ama akabade edi Christian oro anade baptism, ndien ke akpatre ama owụt udọn̄ esie ndidi isụn̄utom. Ih, utom eka Wanda ama ebe udomo. Enye ama enyene utịp edikụt adiaha esie ọsọn̄ọde ada ke idemesie ọnọ akpanikọ. Kpukpru ete ye eka ẹdide Christian ẹkpekam ẹnyene ukem uforo oro nte mmọ ẹnamde utom ndibọp mme edu Christian ke esịt nditọ mmọ.

[Ekebe ke page 27]

Ke adan̄aemi, nte ibuotikọ emi owụtde, mme ete ye eka ẹdomode ọkpọsọn̄ ndibọp mme edu Christian ke esịt nditọ mmọ, nditọn̄wọn̄ ke idemmọ n̄ko ẹnyene mbiomo. Mmọ, ukem nte kpukpru mme Christian, ana ẹnam utom edibọp ke idemmọ. (Ephesus 4:22-24) Ọkposụkedi mme ete ye eka ẹnyenede utịbe utịbe ifet ndin̄wam ke ndinam emi, ke akpatre owo kiet kiet enyene ndinam ubiere idemesie ndinam n̄kpọ Jehovah.