Se N̄kpọ nte Abasi Esede
KE New York, U.S.A., eyo ama ada ke September 14, 2002. Usen oro owo 6,521 emi ẹketode nsio nsio idụt ẹma ẹsop idem ke Itie Unọ Ukpep Patterson ye ke okụre iba efen oro Mme Ntiense Jehovah ẹnyenede ke ikpehe oro. Otuowo oro ẹkesop idem man ẹtiene ẹbuana ke edinam ukụre ukpep ọyọhọ otu 113 eke Ufọkn̄wed Enyọn̄-Ukpeme Ukpep Bible eke Gilead. Nditọ ufọkn̄wed oro ẹketo idụt 14 ndien akada mmọ ọfiọn̄ ition nditịm idem nnọ utom isụn̄utom ke idụt 19 emi ẹkenọde mmọ ẹka.
Carey Barber, emi edide isua 98 onyụn̄ edide owo Otu Ukara eke Mme Ntiense Jehovah, ekedi etieibuot okpokoro edinam oro. Enye ama odụri ntịn̄enyịn owụt nte ukpepn̄kpọ Ufọkn̄wed Gilead, emi etịmde ediwak tọsịn owo idem ndika an̄wautom isụn̄utom, ekperede ndiyọhọ isua 60 tọn̄ọ nte ẹketọn̄ọ enye. Brọda Barber ọkọdọhọ ete: “Idịghe ikọ n̄kponinua ndidọhọ nte ke akwa utịp oro ẹnyenede oto edika iso nnọ mmọ ukpep. Ata ediwak tọsịn mbon nsụhọdeidem ke ofụri isọn̄ ẹyak uwem mmọ ẹnọ Jehovah, ẹnyịme utuakibuot akpanikọ, ẹnyụn̄ ẹnam edisana utom ke ntak un̄wam oro mmọ ẹbọde ẹto mme isụn̄utom.”
Mbemiso ẹkekade Gilead, ediwak nditọ ufọkn̄wed oro ẹma ẹwụt udọn̄ mmọ nditat utom ukwọrọikọ mmọ. Odu ebe ye n̄wan oro ẹkedade se ibede isua kiet ndikpep usem Mandarin man mmọ ẹkeme ndikwọrọ ikọ nnọ ata ediwak mbon China oro ẹdụn̄de ke Canada emi edide obio emana mmọ. Ebe ye n̄wan efen ẹma ẹtọn̄ọ ndikpep usem Albanian ke idemmọ ndien nte ini akakade ẹma ẹwọrọ ẹka Albania man ẹkese ẹban̄a akwa udọn̄ oro ẹnyenede ke Bible do. Mbon en̄wen ke otu oro ẹketo Hungary, Guatemala, ye Dominican Republic, kpa mme idụt oro ẹnen̄erede ẹyom mme andikpep Ikọ Abasi oro mmọ ẹkewọrọde ẹka ndinam utom, ẹdi Gilead.
Idahaemi, mbemiso ẹkade mme efakutom mmọ ke Africa, Edem Usụk ye Ufọt Ufọt America, Nsannsan Edem Usiahautịn, ye N̄kan̄ Edem Usiahautịn Europe, ẹma ẹsịn udọn̄ ẹnọ kpukpru nditọ ufọkn̄wed oro ẹkekụrede ukpep do ndinyene Abasi ke ekikere ke kpukpru se mmọ ẹnamde.
Se N̄kpọ nte Abasi Esede
Ke ama okokụre ntọn̄ọikọ esie, Brọda Barber ama okot Maxwell Lloyd, andibuana ke Kọmiti N̄kọk Itieutom United States. Enye eketịn̄ ikọ ke ibuotikọ oro ọkọdọhọde: “Se Kpukpru N̄kpọ nte Abasi Esede.” Brọda Lloyd ama odụri ntịn̄enyịn aka uwụtn̄kpọ David ye Jesus, Eyen Abasi. (1 Samuel 24:6, NW; 26:11, NW; Luke 22:42) Ke ama eketi nditọ ufọkn̄wed oro ete ke ukpepn̄kpọ Bible ọfiọn̄ ition oro mmọ ẹbọde ekpep mmọ ndise n̄kpọ nte Abasi esede, etịn̄ikọ ama obụp ete: “Ke ini ẹnịmde ukpepn̄kpọ Bible ye mme owo ke obufa efakutom mbufo, nte mbufo ẹyen̄wam mmọ ndikere n̄kpọ nte Abasi ekerede?” Ndien kaban̄a ndinọ mbon en̄wen item, enye ama ọnọ nditọ ufọkn̄wed oro item ete: “Ẹkûdọhọ, ‘Nte ami nsede, ami n̄kere . . . ’ Utu ke oro, ẹn̄wam mmọ ẹkụt se idide ekikere Abasi. Ke ẹnamde n̄kpọ ke usụn̄ emi, mbufo ẹyenen̄ede ẹdi edidiọn̄ ẹnọ mbon oro mbufo ẹdidụkde nsan̄a ke efakutom mbufo.”
Owo efen ke ndutịm oro ekedi Gerrit Lösch, owo Otu Ukara. Ke etịn̄de ikọ ke ibuotikọ oro: “Ami Ndodu ye Afo,” enye ama odụri ntịn̄enyịn owụt ediwak ini oro Jehovah ọkọdọhọde mme anam-akpanikọ asan̄autom esie ete, ‘Ami ndodu ye afo.’ (Genesis 26:23, 24; 28:15; Joshua 1:5; Jeremiah 1:7, 8) Ke eyo nnyịn, edieke nnyịn ikade iso inam akpanikọ, nnyịn imekeme ndinyene ukem mbuọtidem oro ke Jehovah. Brọda Lösch ama ọdọhọ ete: “Ndi emetịmede esịt m̀mê oyokụt mme owo ekpep Bible? Ti ke Jehovah ọkọdọhọ ete, ‘Ami ndodu ye afo.’ Ndi emetịmede esịt m̀mê eyenyene se ikemde ke n̄kan̄ eke obụk? Jehovah ama ọdọhọ ete: ‘Ndikpụhu fi, ndinyụn̄ n̄kpọn̄ke fi.’” (Mme Hebrew 13:5) Brọda Lösch ama eberi utịn̄ikọ esie ke nditi nditọ ufọkn̄wed oro nte ke Jesus ama ọn̄wọn̄ọ ndidu ye mme anditiene imọ oro ẹnamde akpanikọ ke utom edinam mbet.—Matthew 28:20.
Ibuotikọ Lawrence Bowen, andikpep ke Gilead, ekedi “Nte Afo Ọyọbọhọ Ikan̄?” Enye ama etịn̄ ete ke ntak mme eneni oro ẹkedemerede ke Eden, kpukpru mbon oro ẹyomde ndinọ Jehovah san̄asan̄a utuakibuot ẹsobo n̄kpọsọn̄ idaha ndien, ke ndusụk ini, mme ikan̄-ikan̄ idomo. Enye ama esịn udọn̄ ọnọ nditọ ufọkn̄wed oro ẹkụrede ukpep do ete ẹkpebe uwụtn̄kpọ Jesus, oro ọkọbọhọde idomo ke ndiberi edem ọyọhọ ọyọhọ ke Jehovah nnyụn̄ nnyịme ndiyọ mme ikan̄-ikan̄ idomo oro Jehovah akayakde man anam nsụkibuot Eyen esie ọfọn ama. (Mme Hebrew 5:8, 9) Ẹkeme ndimen Jehovah ndomo ye etem o-gold emi esịnde nnennen udomo ikan̄ man osion̄o ndek. Mbuọtidem oro ẹma ẹkedomo esinọ ukpeme oro okponde akan enye oro gold oro ẹtemde asana ọnọde. Ntak-a? Brọda Bowen ọkọdọhọ ete: “Koro mbuọtidem oro ẹma ẹkedomo ekeme ndiyọ mfịghe ekededi, ndien enye etịm nnyịn idem ndime ime ‘tutu esịm akpatre.’”—Matthew 24:13.
Mark Noumair, andikpep en̄wen ke Gilead ama obụp ete: “Ndi Ẹyema Mbufo?” Ibuotikọ esie ọkọkọn̄ọ ke mme ikọ eke 1 Samuel 2:26, emi etịn̄de nte ‘Jehovah ye mme owo ẹkemade’ Samuel. Ke ama okodụn̄ọde uwụtn̄kpọ Samuel, Brọda Noumair, emi akanamde utom isụn̄utom ke se iwakde ibe isua duop ke Africa, ama ọdọhọ ete: “Abasi ekeme ndinen̄ede mma mbufo nde edieke ẹsọn̄ọde ẹda ẹka iso ẹnam utom oro Enye ọnọde mbufo ẹnam. Enye ọnọ mbufo ọsọn̄urua utom isụn̄utom.” Ekem Brọda Noumair ama esịn udọn̄ ọnọ nditọ ufọkn̄wed oro ẹkụrede ukpep ndise utom mmọ nte edisana utom oro Abasi ọnọde nnyụn̄ nnyene ekikere Abasi nte mmọ ẹnamde utom mmọ.
Ke ini ufọkn̄wed oro, nditọ ufọkn̄wed ẹma ẹnyene ediwak ifet ke mme utịturua nditịn̄ nnọ mbon n̄kann̄kụk oro mban̄a “n̄kpọsọn̄ utom Abasi” oro ẹwụtde ke Bible. (Utom 2:11) Ke akpanikọ, mmọ ẹma ẹkeme nditịn̄ mban̄a mme n̄kpọ emi ke usem duop. Wallace Liverance, andikpep en̄wen ke Gilead, ama anam ndụn̄ọde ye otu nditọ ufọkn̄wed oro ẹkebụkde ifiọkutom mmọ ke ibuotikọ oro “‘N̄kpọsọn̄ Utom Abasi’ Ẹnụk Mme Owo Ndinam N̄kpọ.” Enye ama ọdọhọ ete: “Spirit ama onụk mbon oro ẹkedude ke ubet enyọn̄ ke Pentecost nditịn̄ mban̄a ‘n̄kpọsọn̄ utom Abasi.’ Kpa spirit oro anam utom mfịn ke idem kpukpru mme asan̄autom Abasi.” Amakam onụk ndusụk owo ndikpep mbufa usem man mmọ ẹkpekeme ndinọ ediwak owo ikọ ntiense.
Nti Item Ẹnọde Man Ẹse N̄kpọ nte Abasi Esede
Ke ẹma ẹkekụre mme utịn̄ikọ oro ẹkedade ẹtọn̄ọ, Gary Breaux ye William Young, mme anamutom ke n̄kọk itieutom United States, ẹma ẹnam ndụn̄ọde ye mme andibuana ke nsio nsio kọmiti n̄kọk itieutom ke mme idụt oro mme isụn̄utom ẹsụk ẹnamde utom idahaemi ye ebe ye n̄wan oro ẹma ẹkenam utom isụn̄utom ke isua 41. Kiet ke otu se ẹketịn̄de ekedi: “Mbon oro mînen̄ekede iyom ufọn idemmọ ẹsidu ẹbịghi. Mmọ ẹsiwụk ntịn̄enyịn ke se ikadade mmọ idi. Mmọ ẹdiọn̄ọ ẹte ke mmimọ ikedi ndikwọrọ eti mbụk nnyụn̄ n̄n̄wam mme owo ẹdi ẹdifiọk Jehovah.”
David Splane, owo Otu Ukara efen, ama ada edinam oro ekeberi ye utịn̄ikọ oro ibuotikọ ọkọdọhọde “Mbufo Idụhe Oyom Usụn̄!” Nso ke ikọ esie ọkọwọrọ, sia edide ẹkenọ mme andikụre ukpep 46 oro ẹka nsio nsio idụt ke ofụri ererimbot? Enye ama anam an̄wan̄a ete: “Inamke n̄kpọ m̀mê mbufo ẹdu ke m̀mọ̀n̄ ke isọn̄, kpukpru ini mbufo ẹdidu ke ufọk Abasi adan̄a nte mbufo ẹnamde akpanikọ.” Ih, kpukpru mme anam-akpanikọ Christian, inamke n̄kpọ m̀mê mmọ ẹdu ke m̀mọ̀n̄, ẹnam utom ke ubak ikpehe akwa temple eke spirit m̀mê ufọk Abasi, emi ọkọtọn̄ọde ke ini baptism Jesus ke akpa isua ikie. (Mme Hebrew 9:9) Mme andidụk ẹkebọ ndọn̄esịt didie ntem ndifiọk nte ke Jehovah ekpekpere kpukpru mme anam-akpanikọ asan̄autom esie ke isọn̄! Kpa nte Jehovah ekenyenede udọn̄ ke idem Jesus ke ini enye okodude ke isọn̄, ntre ke Enye enyene udọn̄ ke idem kpukpru nnyịn ye utom nnyịn, inamke n̄kpọ m̀mê nnyịn idu ke m̀mọ̀n̄. Ntre ke n̄kpọ aban̄ade utuakibuot, akananam nnyịn idụhe oyom usụn̄ ọkpọn̄ kiet eken inyụn̄ idụhe oyom usụn̄ ọkpọn̄ Jehovah ye Jesus.
Ke ẹma ẹkekot ekọm otode nsio nsio itie ke ofụri ererimbot, ẹtọt efakutom, ẹnyụn̄ ẹkot leta oro nditọ ufọkn̄wed oro ẹkewetde ndiwụt esịtekọm mban̄a ukpep oro ẹbọde ke Gilead, etieibuot okpokoro ama ada edinam oro ekeberi uforo uforo. Enye ama esịn udọn̄ ọnọ mbufa isụn̄utom oro ete ẹka iso ke nti utom mmọ ẹnyụn̄ ẹdat esịt ke utom Jehovah.—Philippi 3:1.
[Ekebe ke page 23]
IDAHA OTU
Ibat idụt ẹtode: 14
Ibat idụt ẹnọde ẹka: 19
Ibat nditọ ufọkn̄wed: 46
Isua emana ke ẹbaharede ukem ukem: 35.0
Isua ẹdude ke akpanikọ ke ẹbaharede ukem ukem: 17.2
Isua ẹdude ke utom uyọhọ ini ke ẹbaharede ukem ukem: 13.7
[Ndise ke page 24]
Ọyọhọ Otu 113 Oro Okụrede Ukpep ke Ufọkn̄wed Enyọn̄-Ukpeme Ukpep Bible eke Gilead
Ke udịm enyịn̄ ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.
(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.