Nathan—Owo Oro Ọkọsọn̄ọde Ada Ọnọ Utuakibuot Akpanikọ
Imemke utom ndinam okopodudu andikara enịm ke ukara imọ ifọnke ye nte ke oyom imọ inam ukpụhọde. Ndi afo ekpekeme ndika n̄kasian utọ owo oro ke ini ọdiọn̄ọde ke enye ama owot owo mbak ẹdifiọk se enye akanamde?
Edidem David ke Israel eset ama esịn efịbe ye Bath-sheba, n̄wan oro onyụn̄ oyomo. Man edịp idiọkn̄kpọ oro, David ama anam ẹwot ebe Bath-sheba onyụn̄ emen enye ọdọ. Ediwak ọfiọn̄ ẹma ẹbe ke adan̄aemi David okodude uwem esịt iba, onyụn̄ akade iso anam utom esie nte edidem. Edi Jehovah ikayakke idiọkn̄kpọ edidem emi ebe efep ntre. Enye ama ọdọn̄ Nathan prọfet esie aka ebịne David.
Utom emi ikefereke! Kere nte afo ekpekedide Nathan. Nathan ndisọn̄ọ nda ye Jehovah nnyụn̄ nsọn̄ọ nyịre ke mme edumbet Esie ama anam enye aka eketi David idiọkn̄kpọ esie. Prọfet emi akpasan̄a didie anam emi onyụn̄ owụt Edidem David ke oyom enye akabade esịt?
ANDIKPEP ORO ENYENEDE USỌ
Da minit ifan̄ kot 2 Samuel 12:1-25. Kere nte afo ekpekedide Nathan ke ini enye ọkọnọde David mbụk emi: “Owo iba ẹkedu ke obio kiet, kiet edi imọ owo, enye eken edi ubuene. Ndien imọ owo oro enyene ata ediwak erọn̄ ye enan̄; edi ubuene oro inyeneke baba n̄kpọ kiet ke mîbọhọke ekpri uman erọn̄ kiet emi enye ekedepde. Enye okonyụn̄ ọbọbọk erọn̄ emi akama, erọn̄ emi onyụn̄ ọkọri enye ke ubọk ọtọkiet ye nditọiren esie. Erọn̄ emi onyụn̄ adia udia emi enye adiade onyụn̄ ọn̄wọn̄ mmọn̄ emi enye ọn̄wọn̄de, onyụn̄ ana enye ke ikpanesịt, onyụn̄ akabade etie nte eyen esie an̄wan. Ekem esenowo edi ke ọtọ imọ owo oro, edi enye imaha ndisio erọn̄ ke otuerọn̄ esie m̀mê enan̄ ke otu enan̄ esie ntem nnọ owo-isan̄ oro. Ntre enye omụm uman erọn̄ ubuene oro etem ọnọ owo oro ekedide ke ọtọ esie.”—2 Sam. 12:1-4.
Etie nte David—emi ke idem esiemmọ ekedide ekpemerọn̄—ama enịm ke n̄kpọ emi ama enen̄ede etịbe. Owo kiet emi esinamde n̄kpọ an̄wan̄a ọdọhọ ete: “Etie nte Nathan ama esiwak ndidi ndikpe David ubọk mban̄a mbon emi ẹkefiomode, emi mîkenyeneke owo emi an̄wamde mmọ. Ndien etie nte David ekekere ke enye emi osụk edi ntre.” Idem edieke ekpedide ntre, ama osụk oyom Nathan ọsọn̄ọ ada ye Jehovah onyụn̄ enyene uko man etịn̄ se enye eketịn̄de oro ye edidem. Mbụk Nathan ama anam esịt ayat David. Enye ama ofiori ete: “Ma uwem Jehovah, owo emi anamde utọ n̄kpọ oro odot n̄kpa!” Do ndien ke Nathan ọkọdọhọ ete: “Afo edi owo oro!”—2 Sam. 12:5-7.
Kere ban̄a ntak emi Nathan eketịn̄de aban̄a n̄kpọ oro ntre. Isimemke utom owo emi amade owo ntre ndise n̄kpọ nte ekpesede. Kpukpru nnyịn imesidomo nditịn̄ ikọ nnyan̄a idem man iwụt ke se inamde idiọkke. Edi uwụtn̄kpọ oro Nathan ọkọnọde ama anam David obiom idem ikpe, edi ifiọkke. Edidem David ama okụt ata in̄wan̄-in̄wan̄ ke se Nathan eketịn̄de ama ọdiọk ebe nde. Ekedi ke David ama eketịn̄ nte n̄kpọ oro ọdiọkde ke Nathan eketịn̄ ke uwụtn̄kpọ oro akakam aban̄a enye edidem. Do ndien ke David okokụt nte idiọkn̄kpọ esie ọkọdiọkde eketre. Emi ama anam enye ekeme ndibọ nsuannọ oro ẹkenọde. Enye ama enyịme ke imọ ima ise Jehovah “ke ndek” ke ntak n̄kpọ emi imọ ikanamde ye Bath-sheba, ndien enye ama ọbọ nsuannọ oro okodotde ye edinam oro.—2 Sam. 12:9-14; Ps. 51, ikọ enyọn̄ ibuotn̄wed.
Nso ke nnyịn ikeme ndikpep nto emi? Owo emi ekpepde owo Bible esiyom mme andikpan̄ utọn̄ nnọ enye ẹsịm nnennen ubiere. Nathan ama okpono David onyụn̄ etịn̄ ikọ ye enye ke usọ. Nathan ama ọfiọk ke David ama edinen ido ye unenikpe ke ọwọn̄esịt esie. Prọfet oro ama ọdiọn̄ọ ke uwụtn̄kpọ imọ oyotụk Edidem David emi enyenede nti edu emi. Nnyịn n̄ko imekeme ndin̄wam mbon oro ẹnyenede esịt akpanikọ ẹdiọn̄ọ nte Jehovah esede n̄kpọ. Didie ke ikeme ndinam oro? Ke ndisịn udọn̄ nnọ mmọ ẹda ifiọk oro mmọ ẹnyenede ẹban̄a se idide eti ye idiọk ẹnam n̄kpọ, edi inamke nte ke nnyịn imọfọn ikan mmọ m̀mê ke imama n̄kpọ Abasi ikan mmọ. Bible ke ida ibiere se idide eti ye se idide idiọk, idịghe ekikere idem nnyịn.
Nathan ndikọsọn̄ọ nda ye Abasi edi akpan n̄kpọ oro akanamde enye ọnọ okopodudu edidem nsuannọ. (2 Sam. 12:1) Ukem nsọn̄ọnda oro ọyọnọ nnyịn uko ndika iso nda nnọ ndinen edumbet Jehovah.
ANDIDA NNỌ UTUAKIBUOT AKPANIKỌ
Etie nte Nathan ye David ẹkedi itai ye aban̄, sia David ama osio eyen esie kiet Nathan. (1 Chron. 3:1, 5) Akpa ini emi ẹsiakde Nathan ke Bible, enye odu ye David. Mmọ mbiba ẹma ẹma Jehovah. Onyụn̄ etie nte ke David ama esiberi edem ke ikọ Nathan, sia enye ama etịn̄ ọnọ Nathan nte ke ọdọn̄ imọ ndibọp temple nnọ Jehovah. Enye ọkọdọhọ ete: “‘Sese, ami ndụn̄ ke ufọk emi ẹdade cedar ẹbọp ke adan̄aemi ekebe ata Abasi odude ke tent.’ Ntem Nathan ọbọrọ edidem ete: ‘Ka kanam kpukpru se idude fi ke esịt koro Jehovah odude ye afo.’”—2 Sam. 7:2, 3.
Sia Nathan ekedide anam-akpanikọ andituak ibuot nnọ Jehovah, enye ama ọsọsọp enyịme ekikere David ndibọp akpa ata ufọk ndida ntuak ibuot nnọ Jehovah ke isọn̄. Edi ke ini oro, Nathan akakam etịn̄ ekikere idemesie utu ke nditịn̄ ekikere Jehovah. Okoneyo oro, Abasi ama ọdọhọ prọfet Nathan afiak ada isio isio etop ọsọk edidem: ke idịghe David edibọp temple Jehovah. Ke kiet ke otu nditọ David edibọp. Edi Nathan ama etịn̄ ete ke Abasi anam ediomi ye David ete ke imọ iyanam ebekpo esie “ọsọn̄ọ owụhọ ke nsinsi.”—2 Sam. 7:4-16.
Se Nathan ekekerede ikasan̄ake ikekem ye se Abasi akaduakde aban̄a edibọp temple. Edi prọfet emi osụhọrede idem mi ikokụnike, edi ama enyịme onyụn̄ anam se Jehovah ọkọdọhọde. Emi edi eti uwụtn̄kpọ ọnọ nnyịn ndikpebe edieke Abasi enen̄erede nnyịn ke usụn̄ ekededi. Mme n̄kpọ eken emi Nathan akanamde ke ukperedem ẹwụt ke Abasi okosụk amama enye. Ke akpanikọ, akam etie nte ke Jehovah ama ọnọ Nathan ye Gad emi ekedide okụt-n̄kukụt edisana spirit man ẹn̄wam David etịm mme ọkwọikwọ 4,000 emi ẹdinamde utom ke temple.—1 Chron. 23:1-5; 2 Chron. 29:25.
ANDIDA NNỌ EDIDEM
Nathan ama ọdiọn̄ọ ke Solomon edida itie Edidem David oro ama ọkọsọn̄. Emi ama anam Nathan anam n̄kpọ ye iwụk ke ini Adonijah okoyomde ndida ubọn̄ ke odudu ke ini idem ekememde David. Isan̄ emi n̄ko, Nathan ama ọsọn̄ọ ada onyụn̄ anam n̄kpọ ke usọ. Akpa, enye ama ọdọhọ Bath-sheba eketi David ete ke enye ama ọn̄wọn̄ọ ete ke idinam Solomon eyen imọ edi edidem. Ekem Nathan ama odụk ebịne David okobụp m̀mê enye ama emek Adonijah edidem. Sia David ọkọfiọkde se ikemede nditịbe, enye ama ọdọhọ Nathan ye mme anam-akpanikọ asan̄autom esie eken ete ẹkeyet Solomon aran ẹnyụn̄ ẹfiori ẹte ke enye edi edidem. Ẹma ẹbiat odu Adonijah.—1 Ndi. 1:5-53.
OSỤHỌDE-IDEM EWETMBỤK
Ẹdọhọ ke Nathan ye Gad ẹkewet 1 Samuel ibuot 25 esịm 31 ye 2 Samuel. Kop se ẹtịn̄de mi ẹban̄a mbụk emi ẹkedade odudu spirit Abasi ẹwet ke mme n̄wed oro: “Amaedi mme n̄kpọ emi ẹban̄ade Edidem David, akpa ye akpatre, ẹwet mmọ ẹsịn ke n̄wed ikọ Samuel okụt-n̄kukụt ye eke ikọ prọfet Nathan ye eke ikọ Gad okụt-n̄kukụt.” (1 Chron. 29:29) Ẹdọhọ ke Nathan n̄ko ama ewet mme n̄kpọ “emi ẹban̄ade Solomon.” (2 Chron. 9:29) Emi ọwọrọ ke Nathan ama aka iso anam utom ke esa ọbọn̄, idem ke David ama akakpa.
Etie nte Nathan ke idemesie ekewet ekese n̄kpọ emi ifiọkde iban̄a enye. Edi enye nditre ndiwet ndusụk n̄kpọ anam ifiọk orụk owo emi enye ekedide. Nte an̄wan̄ade, Nathan ekedi ewetmbụk emi mîkohokede idem. Enye ikedịghe owo emi amade ikpọ n̄kpọ, emi okoyomde ndinam akwa enyịn̄ nnọ idemesie. N̄wed ukabadeikọ Bible kiet ọdọhọ ke enye odu ntre ke Bible, “owo itịn̄ke owo emi enye edide m̀mê ndisiak ubon” esie. Nnyịn ifiọkke n̄kpọ ndomokiet iban̄a ubon emi enye okotode m̀mê ọkpọkpọ uwem esie.
NDISỌN̄Ọ NDA YE JEHOVAH AKAN̄WAM ENYE
Ekpri se N̄wed Abasi asiande nnyịn aban̄a Nathan owụt ke andida nnọ mme ndutịm Abasi emi ama osụhọde idem onyụn̄ okop odudu. Jehovah Abasi ama ọnọ enye ikpọ ifetutom. Tie kere ban̄a mme edu Nathan, utọ nte enye ndisọn̄ọ nda nnọ Abasi ye edinen̄ede mma mme edumbet Abasi. Domo ndikpebe utọ nti edu oro.
Ekeme ndidi owo ididọhọke fi aka akasua ọnọ ndidem oro ẹsịnde efịbe m̀mê akabiat odu emi ẹdụkde ndida ubọn̄ ke odudu. Edi Abasi ekeme ndin̄wam fi ọsọn̄ọ ada anam n̄kpọ esie onyụn̄ enịm ndinen edumbet esie. Afo n̄ko emekeme ndidi owo emi adade uko ye usọ ekpep akpanikọ onyụn̄ adade ọnọ utuakibuot akpanikọ.
[Ndise ke page 25]
Nathan emi ekedide andida nnọ edidem ama ada usọ etịn̄ ikọ ọnọ Bath-sheba