Elijah ama adaha ebịne Ahab ọkọdọhọ enye ete: “Dọk ka dia n̄kpọ nyụn̄ n̄wọn̄, koro uyom ediwak edịm odude.” (Ufan̄ikọ 41) Nte se iketịbede usen emi ama ekpep idiọk edidem emi n̄kpọ ndomokiet? Itien̄wed emi itịn̄ke, n̄kpọ ndomokiet inyụn̄ idụhe ndiwụt ke enye ama akabade esịt, enye ikonyụn̄ iben̄eke prọfet Elijah ekpe Jehovah ubọk man efen ọnọ imọ. N̄kukụre se ikodụkde Ahab ibuot ekedi ndidọk n̄kadia “n̄kpọ nnyụn̄ n̄n̄wọn̄.” (Ufan̄ikọ 42) Nso kaban̄a Elijah?

Elijah ama enen̄ede oyom idiọn̄ọ oro owụtde ke Jehovah ọmọn̄ anam edịm edep, ntre enye ama ọdọhọ akparawa esie ọdọk aka edem inyan̄ ekese ikpaenyọn̄ m̀mê oyokụt idiọn̄ọ oro owụtde ke edịm ọmọn̄ edep. Se akparawa esie eketịn̄de ke ama ọkọnyọn̄ edi ikenemke. Enye ọkọdọhọ ete: “N̄kpọ baba kiet idụhe.” Enyọn̄ ama enen̄ede an̄wan̄a. Ndi emeti ke ikebịghike Elijah ọkọdọhọ Edidem Ahab ke imokop ‘uyom ediwak edịm.’ Prọfet emi akpasasan̄a didie etịn̄ orụk ikọ oro ke ini idiọn̄ọ ndomokiet mîkodụhe ndiwụt ke edịm ọmọn̄ edep?

Elijah ama ọfiọk se Jehovah ọkọn̄wọn̄ọde. Sia enye ekedide prọfet ye andida ke ibuot Jehovah, enye ama enen̄ede ọfiọk ke ikọ Abasi iditreke ndisu. Mbuọtidem Elijah ama enen̄ede okpon tutu etie nte n̄kpọ eke enye okokopde uyom edịm. Emi ekeme nditi nnyịn se Bible etịn̄de aban̄a Moses, ete: “Enye ama aka iso ọsọn̄ọ ada nte n̄kpọ eke okụtde Enye emi enyịn owo mîkwe.” Nte emenyene orụk mbuọtidem oro ke Abasi? Abasi ọmọnọ nnyịn ekese ntak ndinyene orụk mbuọtidem oro ke imọ ye ke mme un̄wọn̄ọ imọ.—Mme Hebrew 11:1, 27.