Mmọ Ẹma Ẹnam Uduak Jehovah

Uwụtn̄kpọ N̄waidem ye Ima Nsọn̄ọnda

YE UYEN kiet edide ọtọin̄wan̄ emi ẹkotde Elisha, edifụn̄ isọn̄ oro ọkọtọn̄ọde nte ekpri edinam eke usen ama akabade edi ata akpan usen ke uwem esie. Ke adan̄aemi enye akanamde utom ke in̄wan̄, Elisha ama enyene mbabuat edika n̄kese oto Elijah, kpa ata akpan prọfet Israel. ‘Enye okpoyom mi ọnọ nso?’ Ekeme ndidi Elisha ama ekere ntre. Enye ikenyeneke ndibet ebịghi akaha mbemiso enyenede ibọrọ. Elijah ama otop mantle esie ofụk Elisha, owụtde ete ke usen kiet Elisha eyedi andida itie esie. Elisha ikadaha ikot emi mfefere mfefere. Ke ndondo oro, enye ama ọkpọn̄ in̄wan̄ esie man akabade edi asan̄autom Elijah.—1 Ndidem 19:19-21.

N̄kpọ nte isua itiokiet ke ukperedem, ini ama ekem ọnọ Elijah ndidaha. Ẹkot mbụk edidaha esie “kiet ke otu mbụk ẹnọde oro enen̄erede otụk owo” ke N̄wed Abasi Usem Hebrew.

Elijah Etịm Idem Ndidaha

Ama ọdọn̄ Elijah ndika n̄kese Bethel, Jericho, ye Jordan akpatre. Emi ayabuana edisan̄a ediwak kilomita ke ukot, ndusụk ikpehe ke obot oro etiede n̄kpotụk n̄kpotụk. Ke ikpehe kiet kiet ke isan̄ oro, Elijah ama esịn udọn̄ ọnọ Elisha ndibet. Edi Elisha ama eyịre oyom ndidu ye eteufọk esie tutu esịm ata utịt.—2 Ndidem 2:1, 2, 4, 6.

Ke adan̄aemi odude ke Bethel ye ke Jericho, “nditọ mme prọfet” ẹma ẹka ẹbịne Elisha.a “Nte afo ọmọfiọk ete ke Jehovah eyemen usọ ọbọ fi mfịn emi?” ntre ke mmọ ẹkebụp enye. Enye ama ọbọrọ ete: “Ih, ami mmọfiọk; mbufo ẹdop uyo.”—2 Ndidem 2:3, 5.

Ekem Elijah ye Elisha ẹma ẹdaha ẹka Akpa Jordan. Ke ini mmọ ẹkesịmde Jordan, Elijah ama anam utịben̄kpọ ke adan̄aemi n̄kpọ nte nditọ mme prọfet 50 ẹkedade nsannsan ẹse. “Elijah emen mantle esie, onyụn̄ akpan̄ enye, ada eyịbi mmọn̄, ndien mmọn̄ asiaha edem mbiba, ndien mmọ mbiba ẹsan̄a ke nsatisọn̄ ẹbe.”—2 Ndidem 2:8.

Ke ndondo oro mmọ ẹsan̄ade ẹbe, Elijah ọdọhọ Elisha ete: “Siak se ndinamde nnọ fi, ke mîka-imenke mi kan̄a ibọ fi.” Elisha ama eben̄e ‘udeme spirit Elijah iba’—oro edi, udeme n̄kpọ iba oro nte ido edide ẹkpenyenede akpan. Ke akpanikọ, Elisha ama okpono Elijah ukem nte emi akpan okpokponode ete esie. N̄ko-n̄ko, ẹma ẹyet enye aran ndikabade ndi andida itie Elijah nte prọfet Jehovah ke Israel. Ntre eben̄e esie ikedịghe eke ibụk m̀mê se mîdotke. Kpa ye oro, ke ọfiọkde ete ke Jehovah ikpọn̄ ekeme ndinọ eben̄e emi, Elijah ke nsụhọdeidem ama ọbọrọ ete: “Afo emeben̄e ọkpọsọn̄ n̄kpọ.” Ekem enye ama adian do ete: “Ama okụt nte ẹmende mi ẹbọ fi, oyosu ntre ọnọ fi: edi mûkwe, idisụho.”—2 Ndidem 2:9, 10; Deuteronomy 21:17.

Elisha nte eyịghe mîdụhe ama etetịm ebiere ndisọn̄ọ nyịre ye eteufọk esie. Ekem, “chariot ikan̄ ye horse ikan̄” ẹbiọn̄ọde. Ke ata iso Elisha ye enyịn in̄wan̄, idio ama emen Elijah ọdọk—adade enye ke utịbe utịbe usụn̄ aka ebiet efen.b Elisha ama emen mantle Elijah afiak asan̄a aka mben Akpa Jordan. Enye ama eyịbi mmọn̄ oro, ọdọhọde ete: “Enye Jehovah Abasi Elijah?” Mmọn̄ oro ama abahade, ọnọde uyarade nte ke Elisha ama enyene ibetedem Abasi nte andida itie Elijah.—2 Ndidem 2:11-14.

Ukpepn̄kpọ Odude ọnọ Nnyịn

Ke ini ẹkenọde ikot ndinam san̄asan̄a utom ye Elijah, Elisha ama ọkpọn̄ in̄wan̄ esie ke ndondo oro ndinam utom nnọ ata akpan prọfet ke Israel. Nte an̄wan̄ade, ndusụk ke otu utom esie ẹkedi ata usụhọde, koro ẹkediọn̄ọ enye nte owo oro “ọkọtọhọde Elijah mmọn̄ ke ubọk.”c (2 Ndidem 3:11) Kpa ye oro, Elisha akada utom esie nte akwa ifet, ndien enye ama ọsọn̄ọ ada ke edinam akpanikọ ke n̄kan̄ Elijah.

Ediwak mme asan̄autom Abasi mfịn ẹwụt ukem edu n̄waidem oro. Ndusụk owo ẹkpọn̄ “mme in̄wan̄” mmọ, kpa mme n̄kpọ udu uwem mmọ, man ẹkekwọrọ eti mbụk ke mme nsannsan efakutom mîdịghe man ẹkenam utom nte mbon ubon Bethel. Ediwak owo ẹnam isan̄ ẹka isen idụt man ẹkenam utom ke mme itie ubọpn̄kpọ N̄ka. Ediwak owo ẹnyịme ndinam se ẹkpekotde usụhọde utom. Edi, idụhe owo ndomokiet emi anamde utom ọnọ Jehovah oro anamde utom eke mînyeneke se ọwọrọde. Jehovah ama kpukpru owo ẹmi ẹnamde n̄kpọ ẹnọ enye ke unyịmesịt, ndien enye ọyọdiọn̄ edu n̄waidem mmọ.—Mark 10:29, 30.

Elisha ama ọsọn̄ọ ada ye Elijah tutu esịm utịt. Enye ama esịn ndifehe n̄kpọn̄ akani prọfet oro idem ke ini ẹkenọde enye ifet. Nte eyịghe mîdụhe, n̄kpet n̄kpet itie ebuana oro enye ekenyenede ye Elijah ama anam utọ ima akpanikọ oro edi n̄kpọ inemesịt. Mfịn, ikọt Abasi ẹdomo ndisọn̄ọ itie ebuana mmọ ye Abasi nnyụn̄ nsịk n̄kpere mme ekemmọ andinịm ke akpanikọ. Ẹyediọn̄ n̄kpet n̄kpet mbọbọ edidianakiet, koro Bible ọdọhọ aban̄a Jehovah ete: “Afo anam ke ima ye mbon ima.”—2 Samuel 22:26.

[Mme Ikọ idakisọn̄]