“Abasi Emem” Ekere Aban̄a Mbon Ukụt

BIBLE anam an̄wan̄a ete ke David eke eset ikedịghe owo oro mînyeneke ifiọk iban̄a ukụt. Ke ediwak isua enye okodu uwem nte owo nyon̄, oro idiọk ye ọsọn̄ibuot edidem ekebịnede enye uyịre uyịre oyom ndiwot. Ke ini ukụt emi, David ama edịbe ke mme nsannsan ebiet. Edi enye ama anam se ikande oro. Enye ama ọbọn̄ akam ifịk ifịk ọnọ Jehovah aban̄a afanikọn̄ esie. Enye ke ukperedem ama ewet aban̄a afanikọn̄ esie ete: “Mfiori n̄kot Jehovah ke uyo mi; nda uyo mi n̄kpe Jehovah ubọk. N̄wan̄a ekikere mi ke iso esie; mbụk ukụt mi ke iso esie.”—Psalm 142:1, 2.

Mfịn, ndusụk owo ẹkeme ndida ibetedem oro David ekenyenede ke Abasi ẹnam n̄kpọ nsahi. Mmọ ẹkeme ndidọhọ ke akam edi sụk n̄kpọ un̄wam eke ekikere ye nte ke enye ke ataata usụn̄ edi ubiatini. Edi, mbuọtidem oro David ekenyenede ke Abasi ikokpụhe, koro ẹma ẹkan mme asua esie ke akpatre. Ke afiakde eti ifiọk n̄kpọntịbe esie, David ama ewet ete: “Eyen ukụt emi ekeseme, ndien Jehovah okop, onyụn̄ anyan̄a enye osio ke kpukpru nnanenyịn esie.” (Psalm 34:6) Ke ebiet efen ẹkot Abasi akpanikọ emi David ọkọwọn̄ọrede ebịne “Abasi emem.” (Philippi 4:9; Mme Hebrew 13:20) Nte enye ayanam ibọhọ ukụt, adade emem ọsọk nnyịn?

Jehovah Ekere Aban̄a Fi

Jehovah inanake udọn̄ ke mme afanikọn̄ ikọt esie. (Psalm 34:15) Enye isinọhọ ntịn̄enyịn ke mme n̄kpọ oro mme asan̄autom esie ẹyomde nte otu kpọt edi n̄ko ke eke owo kiet kiet emi eten̄ede enye. Ke ini akayakde temple ọnọ ke Jerusalem eset, Solomon ama eben̄e Jehovah ete okop ‘kpukpru akam, ye kpukpru n̄kpeubọk eke kpukpru owo, ye eke ofụri ikọt esie Israel, eke ẹdifiọkde ufen mmọ, ye ndutụhọ mmọ.’ (2 Chronicles 6:29) Nte Solomon ọkọfiọkde, owo kiet kiet enyene ọkpọkpọ ukụt ndiyọ. Emi ekeme ndidi udọn̄ọ ikpọkidem ọnọ owo kiet. Ye owo efen, edi mfụhọ eke ntụk. N̄kpa owo ima ekeme ndinam ndusụk owo ẹkụt ukụt. Unana utom, nsọn̄ọn̄kpọ ndutịm uforo, ye mme mfịna ubon ẹdi n̄ko mme ọsọ mfịna ke n̄kpọsọn̄ ini ẹmi.

Tuak da esisịt nyụn̄ kere ban̄a ‘ufen fo ye ukụt fo.’ Ndusụk ini ekeme ndidi esitie fi ke idem nte eketiede David, andiwet psalm, emi ekewetde ete: “Mmonyụn̄ ntie mbet owo eke atuade mi mbọm, edi idụhe; nnyụn̄ mbet mme ọdọn̄ esịt, edi n̄kwe.” Edi, afo emekeme ndinịm ete ke Abasi ekere aban̄a itie fo, koro ke ukperedem kpa ke psalm oro, David ama ewet ete: “Jehovah [okop] ọnọ mme ubuene, ndien isịnke mbon n̄kpọkọbi esie ke ndek.”—Psalm 69:20, 33.

Ke ndida mme ikọ David oro ntịn̄ ikọ ke ntatara usụn̄ ifiọk, nnyịn imekeme nditịm nnịm nte ke Andibot ubonowo esikop akam mbon oro ukụt mmọ, yak idọhọ, esịnde mmọ ke n̄kpọkọbi. Ke akande oro, enye esinam n̄kpọ aban̄a nnanenyịn mmọ. Kere ban̄a mme utịn̄ikọ oro ẹtienede mi ẹmi ẹwụtde mbọm oro Jehovah owụtde mbon ukụt.

“Ẹkûfịk baba ebeakpa, ye eyenakpa. Edieke afo efịkde enye, enye onyụn̄ eseme ọnọ mi, nditreke ndikop eseme esie; iyatesịt mi oyonyụn̄ obụbede.”—Exodus 22:22-24.

“Nte Abasi idinyụn̄ isioho usiene inọ ndimek ikọt Esie, ẹmi ẹsemede ẹnọ Enye uwemeyo ye okoneyo, okposụkedi Enye emede anyan ime ke ikọ mmọ?”—Luke 18:7.

“Enye ayanyan̄a ubuene ke ini enye esemede; ye owo ukụt, ye owo eke mînyeneke andinyan̄a. Enye ayatua eyen unana ye ubuene mbọm, onyụn̄ anyan̄a ukpọn̄ mme ubuene. Enye ayafak ukpọn̄ mi osio ke ukụt ye nnama: onyụn̄ ese iyịp mmọ ke n̄kpọuto.”—Psalm 72:12-14.

“Enyeemi otụkde mbufo [ikọt Abasi ke isọn̄] otụk eyen enyịn esie.”—Zechariah 2:8.

Uwụtn̄kpọ ifan̄ ẹmi ẹwụt ntotụn̄ọ udọn̄ oro Andibot nnyịn enyenede ke mfọnọn̄kpọ ikọt esie. Ntem, nnyịn imenyene eti ntak ndinam item apostle Peter emi: “Ẹtop kpukpru ọkpọsọn̄ ekikere eke ẹtịmerede mbufo esịt ẹduọk ẹdori Enye, koro Enye ke ekere mbufo.” (1 Peter 5:7) Edi didie ke Abasi edin̄wam nnyịn ke mme ini ukụt?

Nte Abasi An̄wamde Mbon Ukụt

Nte nnyịn ima ikokụt, ke ini David okokụtde ukụt, enye ama ọbọn̄ akam ifịk ifịk ọnọ Abasi oyom ndausụn̄. Ke ukem ini oro, enye ama anam usio-ukot ndisụhọde idaha oro okodude, anamde n̄kpọ ye ikike ndibọhọ mbon oro ẹkebịnede enye. Ntem, mbuọtidem ke Jehovah ọkọrọ ye ọkpọkpọ ukeme ama an̄wam David ndiyọ afanikọn̄ esie. Nso ke nnyịn ikeme ndikpep nto emi?

Ke ini nnyịn isobode ukụt, idiọkke nnyịn ndinam usio-ukot oro owụtde eti ibuot ndikọk mfịna oro. Ke uwụtn̄kpọ, edieke Christian mînyeneke utom, nte enye idisịnke ukeme ndiyom utom? Mîdịghe edieke enye ọdọn̄ọde ke ikpọkidem, nte enye idiyomke un̄wam ibọkusọbọ? Kamse, idem Jesus, emi ekenyenede odudu ndikọk kpukpru orụk udọn̄ọ, ama ọfiọk ete ke ‘owo udọn̄ọ oyom abiausọbọ.’ (Matthew 9:12; men 1 Timothy 5:23 domo.) Nte ededi, owo ikemeke ndisio ndusụk afanikọn̄ mfep; ẹkam ẹnyene ndiyọyọ mmọ. Edi, ata Christian idaha ukụt ke idemesie nte ido uwem, nte ndusụk owo ẹdade. (Men 1 Ndidem 18:28 domo.) Utu ke oro, enye anam ofụri se enye ekekeme ndiyọ ukụt esie.

Nte ededi, ke ukem ini oro, owụt eti ibuot ndimen n̄kpọ emi mbịne Jehovah ke akam. Ntak-a? Akpa, ke ndiberi edem ke Andibot nnyịn, ẹn̄wam nnyịn ‘ndidomo mfiọk se ifọnde ikan.’ (Philippi 1:10) Ke uwụtn̄kpọ, ke ini iyomde utom, ndiberi edem ke Abasi ke akam ayan̄wam nnyịn nditre ndinam utom oro atuahade ye mme edumbet Bible. Nnyịn n̄ko iyefep ndiyak ima okụk anam nnyịn ‘iyo ikpọn̄ mbuọtidem.’ (1 Timothy 6:10) Ke akpanikọ, ke ini inamde n̄kpọsọn̄ ubiere—ẹban̄ade utom m̀mê ikpehe efen ekededi ke uwem—oyom nnyịn itiene item David: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.”—Psalm 55:22.

Akam n̄ko esin̄wam nnyịn ndida ukem ukem ke ekikere, man ukụt nnyịn edikan nnyịn ubọk. Apostle Paul ekewet ete: “Ke kpukpru n̄kpọ, ẹsan̄a ye akam ye n̄kpeubọk ye ekọm, ẹsian Abasi se mbufo ẹyomde.” Ye nso utịp? “Emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” (Philippi 4:6, 7) Ih, emem, kpa emem Abasi. Emem oro ‘ayan̄a ifiọk owo,’ ntre enye ekeme ndinam nnyịn isọn̄ọ ida ke ini mme ntụk oro ẹkamade mfụhọ ẹfịkde nnyịn. Enye ‘eyekpeme esịt ye ekikere nnyịn,’ ntem an̄wamde nnyịn ndifep ndinam n̄kpọ ibụmede ibụmede ye nte mîwụtke ọniọn̄, emi ekemede ndinam ukụt nnyịn etetịm ọsọn̄ ubọk.—Ecclesiastes 7:7.

Akam ekeme ndinam n̄kpọ efen efen. Enye ekeme ndinam ukpụhọde odu ke nte idaha etiede. Kere ban̄a uwụtn̄kpọ Bible kiet. Ke ini apostle Paul okodude ke ufọk-n̄kpọkọbi ke Rome, enye ama esịn udọn̄ ọnọ mme ekemmọ Christian ete ẹbọn̄ akam ẹban̄a imọ. Ntak-a? Enye ekewet ọnọ mmọ ete: “Nsọn̄ọ mben̄e mbufo nte ẹdọdiọn̄ ẹnam ntem, man ẹkpenam n̄wara mfiak ntiene mbufo.” (Mme Hebrew 13:19) Paul ama ọfiọk ete ke uyịre uyịre akam mme ekemmọ andinịm ke akpanikọ ekeme ndinam ukpụhọde odu kaban̄a ini oro ẹdisanade enye ẹyak.—Philemon 22.

Nte akam oyokpụhọde utịp oro ukụt fo enyenede? Enye ekeme. Nte ededi, nnyịn ikpenyene ndifiọk nte ke Jehovah isibọrọke mme akam nnyịn kpukpru ini ke usụn̄ oro nnyịn ikemede ndidori enyịn. Paul, ke uwụtn̄kpọ, ama ọbọn̄ akam ndien ndien aban̄a “n̄kukịm ke obụkidem” esie—eyedi mfịna ikpọkidem oro ekenyenede n̄kpọ ndinam ye enye ndikụt n̄kpọ ọfọn. Utu ke ndikemen ukụt esie mfep, Abasi ama asian Paul ete: “Mfọn Mi ke ekekem fi; koro ẹnamde odudu Mi ọfọn ama ke mmemidem.”—2 Corinth 12:7-9.

Ntre ndusụk ini owo idimenke ukụt nnyịn ifep. Utu ke oro, nnyịn iyenyene ifet ndiwụt ibetedem oro inyenede ke Andibot nnyịn. (Utom 14:22) N̄ko-n̄ko, nnyịn imekeme ndikụt nte ke idem ọkpọkọm Jehovah imenke ukụt ifep, enye ‘ayasiak usụn̄ ubọhọ ọnọ nnyịn ke ufọt idomo, man nnyịn ikeme ndibiom enye.’ (1 Corinth 10:13) Ih, edi ye eti ntak ke ẹkot Jehovah “Abasi kpukpru ndọn̄esịt: emi ọdọn̄de nnyịn esịt ke kpukpru ukụt nnyịn.” (2 Corinth 1:3, 4) Enye esinọ nnyịn se nnyịn iyomde man iyọ ye ndusụk udomo emem.

Ibịghike—Ererimbot Oro Ukụt Mîdụhe Oyodu!

Andibot ọn̄wọn̄ọ ete ke ebede ke Obio Ubọn̄ esie, enye ọyọsọp ndisio ukụt ubonowo mfep. Didie ke enye edinam emi? Ebe ke ndisio Satan kpa Devil mfep, akwa esịn nsọk nnọ ukụt ye akakan asua emem, emi Bible owụtde nte edide “abasi eyo emi.” (2 Corinth 4:4) Edi ibịghike odudu esie ke idem ubonowo eyesịm utịt. Edisio enye mfep eyeberede usụn̄ ọnọ akpakịp edidiọn̄ ndidi mbịne mbon oro ẹten̄ede Abasi. Bible ọn̄wọn̄ọ ete ke Jehovah “ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Ediyarade 21:1-4.

Nte etie nte ke ererimbot oro ukụt mîdụhe ididụhe? Ndidu uwem ke ukụt etịm emehe nnyịn tutu ọsọn̄ nnyịn ndikere ke ukụt ekeme nditre. Edi ndibọhọ ndịk, editịmede esịt, ye afanikọn̄ akam edi se Abasi akaduakde ọnọ ubonowo ke editọn̄ọ, ndien uduak esie oyokụt unen.—Isaiah 55:10, 11.

Emi edi idotenyịn oro Sonia, Fabiana, ye Ana, ẹmi ẹkesiakde ke akpa ibuotikọ, ẹkekụtde. Sonia, emi AIDS okowotde nditọiren esie iba, ama enyene ekese emem oto idotenyịn oro Bible ọnọde—ediset ke n̄kpa nti owo ye mme idiọkowo. (Utom 24:15) Enye ọdọhọ ete: “N̄kpọ kiet edi akpanikọ, idotenyịn nnyịn okpon akan ubiak ekededi.”

Ke adan̄aemi okosụk odude ke itie ubọk nditọakpa, kiet ke otu Mme Ntiense Jehovah ama osobo ye Ana. Ana ọdọhọ ete: “Enye ama owụt mi enyịn̄ Jehovah ke Bible, ndien mma mfiori ke idatesịt. Mma nyom un̄wam etieti, ndien mma mfiọk nte ke odu Abasi emi ekerede aban̄a nnyịn.” Ke ama ọkọkpọn̄ itie ubọk nditọakpa, Ana ama enyịme ukpepn̄kpọ Bible onyụn̄ ekpep n̄kpọ efen efen aban̄a mme un̄wọn̄ọ Jehovah. Ekem enye ama ayak uwem esie ọnọ Jehovah onyụn̄ ayarade emi ke baptism. “Ọtọn̄ọde ke ini oro mmaka iso ndiberi edem ke Jehovah ebe ke akam, ndien mmọbọ ndọn̄esịt nto un̄wọn̄ọ oro nte ke enye ayan̄wam mi.”

Fabiana n̄ko enyene ekese ndọn̄esịt ye emem eke ekikere ke ukụt esie ebe ke ndikpep mban̄a mme un̄wọn̄ọ Abasi kaban̄a ini iso. “Ndikpep akpanikọ otode Bible etie nte ediwọrọ ke ata n̄kịmn̄kịm ebiet nnyụn̄ ndụk n̄wan̄a n̄wan̄a, nyayama, ye inem inem ubet.”—Psalm 118:5.

Edi didie ndien ini ewe ke ataata emem edidu ke ofụri ererimbot? Ẹyak nnyịn ise mme ibuotikọ oro ẹtienede mi.

[Ekebe ke page 6]

EDIWAK IKPEHE UKỤT

▪N̄kpọ nte mbahade kiet ke itie inan̄ ke otu mme andidụn̄ ererimbot ẹdu uwem nte ata ọkpọikpọi ubuene, ndien ediwak miliọn efen ẹdu uwem ke usụhọde idaha oro ẹdịghede uwem mmọ.

▪Se iwakde ikan nditọwọn̄ miliọn 200 idiaha udia oro ọnọde nsọn̄idem.

▪Ke isua kiet kiet udọn̄ọ utọrọ esiwot nditọwọn̄ miliọn ita ẹmi mîsịmke kan̄a isua ition ke emana.

▪Mme udọn̄ọ ẹmi ẹsibede owo ẹma ẹwot owo miliọn 16.5 ke 1993 ikpọn̄. Sia ndusụk idụt ẹnyenede nsio nsio ekikere ẹban̄a udọn̄ọ, ekeme ndidi ata nnennen ibat awak akan oro.

▪Ibat owo oro ẹkerede nte edide miliọn 500 ẹnyene ndusụk orụk udọn̄ọ ibuot.

▪Ibat uwotidem ke etetịm ọdọk ke otu mme uyen akan nte edide ke otu mbon iduọk isua emana efen ekededi.

▪“Biọn̄ ye unana utom ẹmekabade ẹdi ndo ke ererimbot,” ntre ke The Unesco Courier ọdọhọ. “Owo miliọn 35 ẹdu ẹmi mînyeneke utom ke idụt itiaba ẹmi ẹnyenede uforo ẹkan ke ererimbot, ndien ke Brazil ikpọn̄ mme anamutom miliọn 20 ẹdu ẹmi edinyene utom nnam mîwọrọke ke mmọ ẹyekeme ndinyene udia oro ekemde ndidia.”

[Ndise ke page 7]

Akam ekeme ndin̄wam nnyịn iwụk ntịn̄enyịn ke un̄wọn̄ọ Abasi aban̄ade ererimbot oro ukụt mîdidụhe