Ẹdat Esịt ke Jehovah!
“Ẹdat esịt ke Ọbọn̄ kpukpru ini; nyetọn̄ọ ntak ndọhọ, Ẹdat esịt.” —PHILIPPI 4:4.
1. Ntak emi nnyịn ikpekerede se ikọ Paul ọkọwọrọde ke ini enye ọkọdọhọde ke mme Christian ẹkpenyene ndidat esịt kpukpru ini?
IDAHAEMI, mme ntak kaban̄a idatesịt ẹkeme nditie nte ẹdi ibat ibat ẹnyụn̄ ẹtetịm ẹnana. Mme owo ẹdide ntan, idem mme ata Christian, ẹsisobo mme idaha oro ẹdade mfụhọ ẹdi—unana utom, unana nsọn̄idem, n̄kpa mbonima, mme mfịna edu owo, mîdịghe ubiọn̄ọ otode mbonubon oro mînịmke ke akpanikọ m̀mê n̄kani ufan. Ntre didie ke item Paul oro, “Ẹdat esịt . . . kpukpru ini” akpan̄wan̄a nnyịn? Ke ikerede iban̄a mme idiọk ye mme idomo idomo idaha oro anade kpukpru nnyịn in̄wana ibiọn̄ọ, ndi emi akam ekeme nditịbe? Ndineme ikọ ẹmi eyen̄wam ndinam n̄kpọ emi an̄wan̄a.
Ẹdat Esịt—Ntak-a Ndien Didie?
2, 3. Nso idi ufọn idatesịt, nte ẹnamde an̄wan̄a ke se iban̄ade Jesus ye nditọ Israel eset?
2 “Ẹdat esịt ke Ọbọn̄ kpukpru ini; nyetọn̄ọ ntak ndọhọ, Ẹdat esịt.” Emi ekeme ndinam nnyịn iti mme ikọ oro ẹketịn̄de ẹnọ nditọ Israel ke n̄kpọ nte isua ikie 24 ẹmi ẹkebede: “Idatesịt Jehovah [edi] odudu mbufo,” mîdịghe nte ekemde ye edikabade eke Moffatt: “Ndidat esịt ke Nsinsi edi ukeme mbufo.” (Nehemiah 8:10) Idatesịt esinọ odudu onyụn̄ etie nte ebiet ubọhọ emi owo ekemede ndika n̄kọbọ ndọn̄esịt ye ukpeme. Idatesịt ekedi akpan n̄kpọ ke ndin̄wam idem mfọnmma owo oro Jesus ndiyọ. “[Enye ama ọyọ eto ndutụhọ, NW], onyụn̄ [abat] bụt ke ekpri n̄kpọ, kaban̄a idatesịt eke anade Enye ke iso; okonyụn̄ osụhọrede etetie ke ubọk nnasia ebekpo Abasi.” (Mme Hebrew 12:2) Nte an̄wan̄ade, ndikeme ndidat esịt ke isobode nsọn̄ọn̄kpọ edi akpan n̄kpọ kaban̄a edinyan̄a.
3 Mbemiso ẹkedụkde Isọn̄ Un̄wọn̄ọ, ẹma ẹwụk nditọ Israel ẹte: “Dat esịt ke kpukpru ufọn emi Jehovah Abasi fo ọnọde fi, ye ufọk fo, afo, ye mme Levite, ye esenowo eke odude ke otu fo.” Mme utịp edikpu ndinam n̄kpọ Jehovah ye idatesịt ẹma ẹnyene ndịk. “Kpukpru mme idiọkn̄kpọ ẹmi ẹyedoro fi, ẹnyụn̄ ẹbịne fi, ẹnyụn̄ ẹsịm fi, tutu afo atak . . . Koro mûkanamke n̄kpọ Jehovah Abasi fo ke idara, ye ke inemesịt, ke ini kpukpru n̄kpọ ẹwakde.”—Deuteronomy 26:11; 28:45-47.
4. Ntak emi nnyịn ikemede ndikpu ndidat esịt?
4 Ke ntre, edi akpan n̄kpọ nte nsụhọ oro ẹyetde aran mfịn ye “mme erọn̄ en̄wen” nsan̄a mmọ ẹdat esịt! (John 10:16) Paul, ke ndikafiak ntịn̄ item esie, “nyetọn̄ọ ntak ndọhọ,” ọkọsọn̄ọ etịn̄ nte edide akpan n̄kpọ ndidat esịt ke kpukpru nti n̄kpọ oro Jehovah anamde ọnọ nnyịn. Nte nnyịn imadat? Mîdịghe nte nnyịn imesịn idem ikaha ke mme edinam ofụri usen ke uwem tutu nnyịn ndusụk ini isifre ediwak ntak oro nnyịn inyenede ndidat esịt? Ndi mme mfịna ẹsiwak tutu iyakke nnyịn ida ikụt Obio Ubọn̄ ye mme edidiọn̄ esie? Nte nnyịn imayak mme n̄kpọ efen—editre ndinịm mme ibet Abasi, edifụmi mme edumbet Abasi, m̀mê edifụmi mme utom Christian—ẹtre idatesịt nnyịn?
5. Ntak emi edide ọkpọsọn̄ n̄kpọ ọnọ owo emi mîwụtke eti ibuot ndidat esịt?
5 “Ẹyak kpukpru owo ẹkụt [eti ibuot, “NW”] mbufo. Ọbọn̄ ke ekpere.” (Philippi 4:5) Owo eke mîwụtke eti ibuot isidaha ukem ukem. Enye ekeme ndikpu ndise mban̄a nsọn̄idem esie nte odotde, ayakde idem ọnọ nsịn̄ede ye editịmede esịt oro mînyeneke ufọn. Eyedi enye ikpepke ndinyịme unana ukeme esie nnyụn̄ ndu uwem nte asan̄ade ekekem. Enye ekeme ndinịm mme utịtmbuba oro ẹkon̄de ẹkaha ndien ekem odomo ndisịm mmọ inamke n̄kpọ m̀mê nso ke oro edikpa. Mîdịghe enye ekeme ndida unana ukeme esie nte ntak nditek ke ifịk m̀mê ndisụhọde ubọk. Ke mîdaha ukem ukem onyụn̄ ananade eti ibuot, edidi ọkpọsọn̄ n̄kpọ ọnọ enye ndidat esịt.
6. (a) Nso ke ekemmọ mme Christian ẹkpekụt ke idem nnyịn, ndien ini ewe kpọt ke emi ekpedi ntre? (b) Didie ke mme ikọ Paul ke 2 Corinth 1:24 ye N̄wed Mbon Rome 14:4 ẹn̄wam nnyịn ndiwụt eti ibuot?
6 Idem edieke mme andibiọn̄ọ ẹdade nnyịn nte mbon idiọk ifiopesịt, ekemmọ Christian ẹkpenyene ndikeme ndikụt eti ibuot nnyịn kpukpru ini. Ndien mmọ ẹyekụt edieke nnyịn idade ukem ukem mînyụn̄ idorike enyịn nnyịn m̀mê mmọ en̄wen ndidi mfọnmma. Ke akande kpukpru, ana nnyịn ifep ndidori mbon en̄wen mme mbiomo oro ẹdobide ẹkan se Ikọ Abasi oyomde. Apostle Paul ọkọdọhọ ete: “Idịghe nte nnyịn idedi mme andikara mbufo ke n̄kpọ mbuọtidem, edi nte idedi mme andin̄wam mbufo ndinyene idatesịt.” (2 Corinth 1:24) Nte akani owo Pharisee, Paul ama otịm ọfiọk ete ke n̄kpọsọn̄ ibet ẹmi mbon oro ẹkamade ukara ẹnịmde ẹnyụn̄ ẹfịkde ẹdori owo ẹbọbiọn̄ọ idatesịt, ke adan̄aemi nti ekikere ẹmi ekemmọ mbonutom ẹnọde ẹnamde enye ọkọri. Akpanikọ oro nte ke “Ọbọn̄ ke ekpere” ekpenyene nditi owo eti ibuot nte ke nnyịn ‘inyeneke ndikpe ikpe ye owo ete en̄wen. Enyeoro ọsọn̄ọde ada, enye ada ọnọ ete esiemmọ; enye onyụn̄ ọduọde, ọduọ ọnọ ete esiemmọ.’—Rome 14:4.
7, 8. Ntak anade mme Christian ẹdori enyịn ndisobo mme mfịna, edi didie ke mmọ ẹkeme ndikaiso ndat esịt?
7 “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpeubọk ye ekọm, ẹsian Abasi se mbufo ẹyomde.” (Philippi 4:6) Mfịn nnyịn imokụt “ndiọkeyo” oro Paul ekewetde aban̄a. (2 Timothy 3:1-5) Ntre ana mme Christian ẹdori enyịn ndisobo mme mfịna. Mme ikọ Paul oro “ẹdat esịt . . . kpukpru ini” imenke akpanikọ oro nte ke Christian oro anamde akpanikọ ke ini ke ekeme ndikop mfụhọ m̀mê mmemidem ke ini ke ini ifep. Ke idaha Paul, enye ama onyịme nnennen nnennen ete: “Nnyịn ikop mfịghe ke kpukpru edem, edi idụhe ke mbaba; ẹfịna nnyịn ekikere, edi itiehe ke n̄kịmenyịn; ẹsịn nnyịn enyịn, edi Abasi ikpọn̄ke nnyịn; ẹyịbi nnyịn ẹduọk ke isọn̄, edi ibiatke nnyịn uwem.” (2 Corinth 4:8, 9) Nte ededi, idatesịt Christian esisụhọde ndien ke akpatre akan editịmede esịt ye mfụhọ ekpri ibio ini. Emi esinọ ukeme oro ẹyomde man ẹka iso iso, man ẹkûdede ẹfre ediwak ntak ndidat esịt.
8 Ke ini mme mfịna ẹdemerede, se ededi oro uduot mmọ ẹdide, Christian oro okopde idatesịt ke nsụhọdeidem esiben̄e un̄wam Jehovah ke akam. Enye iyakke ekikak editịmede esịt akan enye ubọk. Ke ama akanam se enye ke idemesie ekemede ndinam nte owụtde eti ibuot ndikọk mfịna oro, enye ayak utịp esịn Jehovah ke ubọk nte ekemde ye ikot emi: “Top mbiomo fo nọ Jehovah, ndien enye eyekama fi.” Kan̄a kemi, Christian oro akaiso ndikọm Jehovah kaban̄a kpukpru mfọn Esie.—Psalm 55:22; se n̄ko Matthew 6:25-34.
9. Didie ke ifiọk akpanikọ ọnọ ifụre ekikere, ndien nso eti utịp ke emi enyene ke idem Christian?
9 “Emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” (Philippi 4:7) Ifiọk akpanikọ Bible anam ekikere Christian ọbọhọ nsu onyụn̄ an̄wam enye ndikọri mme edu nti ekikere. (2 Timothy 1:13) Ẹn̄wam enye ke ntem ndibọhọ ndiọi m̀mê eduuwem oro mîwụtke ifiọk emi ekpekemede ndisịn emem emem itie ebuana esie ye mmọ en̄wen ke itiendịk. Utu ke ndikụt edikpu ke ntak ukwan̄ikpe ye idiọkido, enye ọbuọt idem ye Jehovah ndikọk mme mfịna ubonowo ebe ke Obio Ubọn̄. Utọ ifụre ekikere oro ekpeme esịt esie, anam enye enyene ndisana uduakesịt, onyụn̄ ekpeme mme ekikere esie ke usụn̄ edinen ido. Ke n̄kan̄ eken, ndisana uduakesịt ye nnennen ekikere ẹnọ anana-ibat ntak ndidat esịt, kpa ye mme mfịna ye mme mfịghe emi ntịme ntịme ererimbot adade edi.
10. Ẹkeme ndinyene ata idatesịt n̄kukụre ke nditịn̄ m̀mê ndikere mban̄a nso?
10 “Ke akpatre item, nditọete, n̄kpọ ekededi eke edide akpanikọ, ye n̄kpọ ekededi eke enyenede ukpono, ye n̄kpọ ekededi eke enende, ye n̄kpọ ekededi eke edide edisana, ye n̄kpọ ekededi eke odotde ete ẹma, ye n̄kpọ ekededi eke ọwọrọde eti etop; edieke eti ido odude ke n̄kpọ, edieke itoro onyụn̄ odude, ẹkere n̄kpọ oro.” (Philippi 4:8) Idịghe n̄kpọ inemesịt inọ Christian nditịn̄ m̀mê ndikere mban̄a ndiọi n̄kpọ. Emi ke ntre abiat ata ekese unọ idem inemesịt ẹmi ererimbot ọnọde efep. Baba owo kiet ikemeke ndikaiso nnyene idatesịt Christian edieke enye ọyọhọde esịt ye ekikere esie ye nsu, idiọk mbubru, ye mme n̄kpọ oro mînenke, oburobụt, mînyeneke eti ido, usua, ẹnyụn̄ ẹdide mbubiam. Ke nditịn̄ in̄wan̄în̄wan̄, baba owo kiet ikemeke ndinyene ata idatesịt ke ndida ndek nyọhọ ekikere ye esịt esie. Ke mbiara ererimbot Satan, edi se ibọpde-bọp didie ntem ndifiọk nte ke mme Christian ẹnyene ata ediwak nti n̄kpọ ndikere mban̄a nnyụn̄ nneme!
Anana-Ibat Ntak Ndidat Esịt
11. (a) Nso ke owo mîkpedehede ida mfefere mfefere, ndien ntak-a? (b) Nso utịp ke edidụk mbono ofụri ererimbot ekenyene ke idem andidụk kiet ye n̄wan esie?
11 Ke ini itịn̄de iban̄a mme ntak ndidat esịt, ẹyak nnyịn ikûfre otu nditọete nnyịn ofụri ererimbot. (1 Peter 2:17) Ke adan̄aemi mme idụt ye ekpụk ererimbot ẹwụtde ata ọkpọsọn̄ usua ẹnọ kiet eken, ikọt Abasi ẹtịm ẹsịk ẹkpere kiet eken ke ima. Ẹsikụt edidianakiet mmọ akpan akpan ke mme mbono ofụri ererimbot mmọ. Kaban̄a kiet oro ẹkenịmde ke 1993 ke Kiev, Ukraine, owo kiet otode United States emi okodụkde ekewet ete: “Mmọn̄eyet idatesịt, iso imam, mfari ofụri ini ebietde eke mbonubon, ye ekọm oro mme otu ẹmi ẹfụn̄de ndiye uduot ufụkeyo ye ukwọhọdeinua ẹnọde ke ofụri an̄wambre oro ẹwụt in̄wan̄în̄wan̄ edidianakiet eke ukara Abasi. Esịt nnyịn ọyọhọ ye idatesịt ke se Jehovah anamde ke utịbe utịbe usụn̄ ke otu nditọete ofụri ererimbot. Emi omotụk mi ye n̄wan mi ntotụn̄ọ ntotụn̄ọ ndien amadian mbufa n̄kpọ efen ke mbuọtidem nnyịn.”
12. Didie ke Isaiah 60:22 osu ke enyịn nnyịn?
12 Edi n̄kpọ oro ọsọn̄ọde mbuọtidem didie ntem ọnọ mme Christian mfịn ndikụt mme prọfesi Bible ẹsude ke enyịn mmọ! Ke uwụtn̄kpọ, kere ban̄a mme ikọ Isaiah 60:22: “Ekpri eyekabade edi tọsịn, esisịt eyenyụn̄ akabade edi ọkpọsọn̄ idụt: ami Jehovah nyenam enye awara ke ekemini esie.” Ke ini emana Obio Ubọn̄ ke 1914, owo 5,100 kpọt—ekpri—ẹkekwọrọ ikọ ifịk ifịk. Edi ke isua ition ẹmi ẹkebede, udomo itie nditọete eke ofụri ererimbot ọkọkọri ke udomo mbufa Ntiense 5,628 oro ẹkenade baptism ke urua kiet kiet ke ẹbaharede ukem ukem! Ke 1993, ẹma ẹsịm n̄wakn̄kan ibat ifịk ifịk mme asan̄autom 4,709,889. Kere ban̄a oro! Emi ọwọrọ ete ke “ekpri” eke 1914 ke ataata usụn̄ ke ekpere ndikabade ndi “tọsịn”!
13. (a) Nso ida itie toto ke 1914? (b) Didie ke Mme Ntiense Jehovah ẹnam edumbet ikọ Paul ke 2 Corinth 9:7?
13 Toto ke 1914 Edidem Messiah ama ọwọrọ aka ndikan ke otu mme asua esie. Mbon unyịmesịt mme anditiene enye ẹmi ẹtịpde ini, ukeme, ye okụk ẹsịn ke ukwọrọikọ ofụri ererimbot ọkọrọ ye ubịnikọt ubọpn̄kpọ ofụri ererimbot ẹnọ ukara esie ibetedem. (Psalm 110:2, 3) Mme Ntiense Jehovah ẹsikop idatesịt nte ke ẹnọ mme etịbe okụk man ẹkụt ẹte ke ẹkụre mme utom ẹmi, idem okposụkedi owo mîsiwakke nditịn̄ mban̄a okụk ke mme mbonoesop mmọ.a (Men 1 Chronicles 29:9 domo.) Iyomke ẹkpakpak mme ata Christian ndinọ enọ; mmọ ẹbat ke edi ifet ndinọ Edidem mmọ ibetedem ke udomo oro mme idaha mmọ ẹyakde, owo kiet kiet “nte enye akaduakde ke esịt esie: okûnọ ye mfụhọesịt, okûnyụn̄ ọnọ oto ke edinyenyịk.”—2 Corinth 9:7.
14. Nso idaha ke otu ikọt Abasi akabade ana in̄wan̄în̄wan̄ toto ke 1919, ọnọde mmọ nso ntak ndidat esịt?
14 Edifiak n̄wụk utuakibuot akpanikọ ke otu ikọt Abasi oro ẹkebemde iso ẹtịn̄ ẹban̄a osụn̄ọ ke edibot paradise eke spirit. Toto ke 1914 enye amatat mme adan̄a esie sụn̄sụn̄. (Psalm 14:7; Isaiah 52:9, 10) Nso idi utịp? “Mbre ye idatesịt” ẹsịm mme ata Christian. (Isaiah 51:11) Eti mbun̄wụm oro osụn̄ọde oto oro edi uyarade ke se edisana spirit Abasi ekemede ndiyọhọ ebe ke mme anana mfọnmma owo. Kpukpru itoro ye ukpono ẹka ẹbịne Jehovah, edi nso ifet okpokpon akan edidi ekemmọ anamutom ye Abasi? (1 Corinth 3:9) Jehovah enyene odudu ekem ndinam mme itiat, ke oyomde, ẹtan̄a etop akpanikọ. Edi, enye inamke n̄kpọ ke usụn̄ emi edi, utu ke oro, edemede mme edibotn̄kpọ oro ẹnyịmede ẹmi ẹnamde ke ntan ndinam mme uduak esie.—Luke 19:40.
15. (a) Ewe n̄kpọntịbe eyomfịn ke nnyịn itiene ye udọn̄? (b) Nnyịn ye idatesịt isak iso ise n̄kpọntịbe ewe?
15 Ke uten̄e omụmde, mme asan̄autom Jehovah kemi ẹkpeme mme n̄kpọntịbe ererimbot nte mmọemi ẹnyenede n̄kpọ ndinam ye mme n̄wọrọnda prọfesi Bible. Mme idụt ke ẹdomo ọkpọsọn̄—edi ke ikpîkpu—ndinyene emem oro enyenede iwụk. Mme n̄kpọntịbe ke ẹnyịk mmọ ndikot esop Edidiana M’idụt ndinam n̄kpọ ke mme ikpehe oro mfịna odude ke ererimbot. (Ediyarade 13:15-17) Kan̄a kemi, ikọt Abasi ẹmesasak iso ye akwa idotenyịn ẹse kiet ke otu edinam ẹmi ẹtịmde ẹkama idatesịt ẹkan oro akanam adade itie, kiet oro usen otịmde ekpere. “Ẹyak nnyịn idara inyụn̄ idat esịt, inyụn̄ inọ Enye ubọn̄; koro ekem ini ndọ Eyenerọn̄, n̄wan Esie otịm idem eben̄e Enye.”—Ediyarade 19:7.
Ukwọrọikọ—Mbiomo m̀mê Idatesịt?
16. Nam an̄wan̄a nte edikpu ndinam se enye ekpepde ekemede ndibọ Christian idatesịt esie nduọk.
16 “Se mbufo ẹkekpepde ẹkenyụn̄ ẹbọde mi ke ubọk, ẹnyụn̄ ẹkopde ẹnyụn̄ ẹkụtde ẹte nnanam, mbufo ẹtiene ẹnam; ndien Abasi emem eyedu ye mbufo.” (Philippi 4:9) Ebede ke ndinam se mmọ ẹkekpepde, mme Christian ẹkeme ndidori enyịn ndibọ edidiọn̄ Abasi. Kiet ke otu ata akpan n̄kpọ oro mmọ ẹkpepde edi ufọn edikwọrọ eti mbụk nnọ mmọ en̄wen. Ke akpanikọ, anie ekpekeme ndinyene ifụre ekikere m̀mê ndikop idatesịt edieke enye mînọhọ mbon esịt akpanikọ ntọt emi uwem mmọ ọkọn̄ọde ke enye?—Ezekiel 3:17-21; 1 Corinth 9:16; 1 Timothy 4:16.
17. Ntak emi utom ukwọrọikọ nnyịn kpukpru ini ekpenyenede ndidi ntak idatesịt?
17 Edi n̄kpọ idatesịt didie ntem ndikụt mbon mbieterọn̄ ẹmi ẹnyịmede ndikpep n̄kpọ mban̄a Jehovah! Ke akpanikọ, mbon oro ẹnamde utom ye eti uduakesịt ẹyekụt nte utom Obio Ubọn̄ edide ntak idatesịt kpukpru ini. Emi edi koro ata akpan ntak ndidi Ntiense Jehovah edi man itoro enyịn̄ Esie inyụn̄ isọn̄ọ iwụt itie Esie nte Ọbọn̄ Andikara. (1 Chronicles 16:31) Owo emi ọfiọkde akpanikọ emi eyedat esịt idem ke ini mme owo nte mîwụtke eti ibuot ẹsịnde eti mbụk oro enye adade edi. Enye ọfiọk ete ke ndikwọrọ ikọ nnọ mbon oro mînịmke ke akpanikọ eyetre usen kiet; nditoro enyịn̄ Jehovah eyeka iso ke nsinsi.
18. Nso inụk Christian ndinam uduak Jehovah?
18 Ido ukpono akpanikọ onụk mmọ oro ẹnamde enye ndinam mme n̄kpọ oro Jehovah oyomde, idịghe koro mmọ ẹnyenede ndinam, edi koro mmọ ẹyomde ndinam. (Psalm 40:8; John 4:34) Ọsọsọn̄ emi ndin̄wan̄a ediwak owo. N̄wan kiet ama asian Ntiense kiet emi akawahade etiene enye ete: “Omokụt, nnyene nditoro fi. Ke akpanikọ n̄kpekemeke ndisan̄a ke ufọk ke ufọk n̄kwọrọ mban̄a ido ukpono mi nte afo anamde.” Ye inua imam Ntiense oro ama ọbọrọ ete: “An̄wan̄a mi nte etiede fi ke idem. Mbemiso n̄kakabarede ndi kiet ke otu Mme Ntiense Jehovah, owo ikpekemeke ndinam mi n̄ka mbịne mbon en̄wen n̄keneme mban̄a ido ukpono. Edi idahaemi ami mmoyom ndinam.” N̄wan oro ama ekere ke esisịt ini ndien ekem eberi ete: “Nte an̄wan̄ade ido ukpono fo enyene n̄kpọ ndinọ akan okịm. Eyedi nnyene ndinam ndụn̄ọde.”
19. Ntak edide ini edi emi ndidat esịt n̄kan nte akanam edide?
19 Ibuotikọ isua 1994, oro ẹwụtde ata in̄wan̄în̄wan̄ ke Mme Ufọkmbono Obio Ubọn̄ nnyịn, eti nnyịn kpukpru ini ete: “Buọt idemfo ye Jehovah ke ofụri esịt fo.” (Mme N̄ke 3:5) Nte ntak efen oro okponde akan odu ndikop idatesịt akan edikeme ndibuọt idem ye Jehovah, kpa ebiet ubọhọ nnyịn emi ikemede ndinyene ubọhọ? Psalm 64:10 anam an̄wan̄a ete: “Edinen owo eyedara Jehovah, onyụn̄ ọbuọt idem ye enye.” Emi idịghe ini ndiyok m̀mê ndikpa mba. Ọfiọn̄ kiet kiet oro ebede anam nnyịn itịm ikpere ata idem n̄kpọ oro mme asan̄autom Jehovah ẹdoride enyịn ndikụt toto ke eyo Abel. Ini edi emi ndibuọt idem ye Jehovah ke ofụri esịt nnyịn, ifiọkde ite ke akananam nnyịn inyeneke ediwak ntak ntem ndidat esịt!
[Mme Ikọ idakisọn̄]
a Ke ikpọ mbono ye ini kiet ke ọfiọn̄ ke mme esop, ẹsikot ibio ibio ntọt ẹban̄a mme etịbe unyịmesịt oro ẹbọde ọkọrọ ye okụk oro ẹkebiatde. Ke ini ke ini ẹsinọ mme leta oro owụtde nte ẹdade mme utọ enọ oro ẹnam n̄kpọ. Ẹsiti kpukpru owo ke ntem ẹban̄a idaha okụk utom ofụri ererimbot eke Mme Ntiense Jehovah.
Didie ke Afo Ọkpọbọrọ?
◻ Nte ekemde ye Nehemiah 8:10, ntak emi nnyịn ikpadatde esịt?
◻ Didie ke Deuteronomy 26:11 ye De 28:45-47 ẹwụt nte edidat esịt edide akpan n̄kpọ?
◻ Didie ke N̄wed Mbon Philippi 4:4-9 ekeme ndin̄wam nnyịn ndidat esịt kpukpru ini?
◻ Nso ntak ke ibuotikọ isua 1994 ọnọ nnyịn ndidat esịt?
[Ndise ke page 16]
Mme Ntiense ẹtode Russia ye Germany ẹdat esịt ndidi ubak otu nditọete ofụri ererimbot
[Ndise ke page 17]
Ndibuana akpanikọ ye mmọ en̄wen edi ntak ndidat esịt