Nsọn̄ọnda Fo Adat Jehovah Esịt
“Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.”—N̄KE 27:11.
1, 2. (a) Ewe ata oro Satan akamiade ke n̄wed Job etịn̄ aban̄a? (b) Nso iwụt ke Satan ke amamia ata ye Jehovah idem ke Job ama akakpa?
JEHOVAH ama ayak Satan odomo Job emi ekedide anam-akpanikọ asan̄autom Esie. Satan ama osobo ufene Job, owot nditọ esie, onyụn̄ ọtọ enye ata idiọk udọn̄ọ. Edi ke ini Satan okodomode Job, idịghe Job ikpọn̄ ke enye ekenyene ke ekikere. Enye ọkọdọhọ ete: “Ikpa ke ibuot ikpa, ye kpukpru se owo enyenede ke owo edinọ ke ibuot uwem esie.” Ata emi Satan akamiade mi ikaban̄ake Job ikpọn̄, edi ama ebe esịm mbon en̄wen, ndien ke akaka iso idem ke Job ama akakpa ata anyan ini ko.—Job 2:4.
2 Ke n̄kpọ nte isua 600 ẹma ẹkebe tọn̄ọ Satan okodomo Job, spirit Abasi ama ada Solomon usụn̄ ndiwet ete: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.” (N̄ke 27:11) Ana in̄wan̄-in̄wan̄ nte ke Satan okosụk amamia ata ye Jehovah ini oro. Ke adianade do, John ama okụt ke n̄kukụt nte Satan odoride ikọt Abasi ikọ idem ke ẹma ẹkesio enye ke heaven ẹduọk ke isọn̄ ke 1914, kpa ini oro Obio Ubọn̄ Abasi ọkọtọn̄ọde ndikara. Ke akpanikọ, kpa ye oro idiọk editịm n̄kpọ emi enen̄erede ekpere utịt, Satan osụk ododomo mme asan̄autom Abasi!—Edi. 12:10.
3. Ewe akpan n̄kpọ ita ke nnyịn ikpep ito n̄wed Job?
3 Kere ban̄a akpan n̄kpọ ita oro ikpepde ito n̄wed Job. Akpa, idomo oro ẹkesịmde Job anam nnyịn idiọn̄ọ owo emi edide ata asua nnyịn ye owo emi esinamde ẹbiọn̄ọ ikọt Abasi. Asua oro edi Satan kpa Devil. Anam iba, inamke n̄kpọ m̀mê idomo oro nnyịn isobode ọsọn̄ didie, edieke inen̄erede ikpere Jehovah, oro ayanam nnyịn isọn̄ọ ida. Anam ita, Abasi esinọ nnyịn ukeme ndiyọ idomo kpa nte enye ọkọnọde Job. Mfịn, Jehovah ada Ikọ esie, esop esie, ye edisana spirit esie anam emi.
Kûdedei Ufre Owo Emi Edide Asua Nnyịn
4. Anie anam ererimbot emi ọdiọk ntem?
4 Ediwak owo inịmke ke Satan mmọdo. Ke ntre, okposụkedi emi mmọ ẹkụtde nte ererimbot ọdiọkde ntem, mmọ ifiọkke ke Satan kpa Devil esịn ofụri editịm emi. Ke akpanikọ, ediwak ini, mme owo ẹsikam ẹsịn edịm ẹbọn̄ idem. Adam ye Eve emi ẹkedide akpa ete ye eka nnyịn ikenyịmeke ndisụk ibuot nnọ Abasi emi okobotde mmọ. Ndien toto ke ini oro, ubonowo ẹdinam n̄kpọ ntịme ntịme. Kpa Devil emi isụk itịn̄de iban̄a mi akabian̄a Eve anam ọsọn̄ ibuot ye Abasi. Enye n̄ko akara ererimbot emi. Enye edi “abasi editịm n̄kpọ emi,” ntak edi oro mbon ererimbot ẹbietde enye—ẹtan̄ idem, ẹdomo idem, ẹfịbe ufụp, ẹdiọk itọn̄, ẹbian̄a abian̄a, ẹnyụn̄ ẹsọn̄ ibuot. (2 Cor. 4:4; 1 Tim. 2:14; 3:6; kot James 3:14, 15.) Mme utọ edu emi ẹnam ndutịme odu ke ukara ye ke ido ukpono, anam mme owo ẹsua kiet eken, ẹdia inọ, ẹnyụn̄ ẹsịn ntịme. Ndien kpukpru emi anam ubonowo ẹnen̄ede ẹkụt ukụt.
5. Nso ke ikpada ọsọn̄urua ifiọk oro inyenede inam?
5 Nnyịn emi idide mme asan̄autom Jehovah imenyene ata ọsọn̄urua ifiọk. Nnyịn imọfiọk owo emi anamde ererimbot emi ọdiọk ntem. Ndi emi ikpanamke nnyịn isitiene iwọrọ an̄wautom man inam mme owo ẹdiọn̄ọ owo emi esịnde ofụri ntịme emi? N̄ko, ndi esịt ikpakam inemke-nem nnyịn ndida nnọ Jehovah emi edide ata Abasi nnyụn̄ nsian mme owo nte enye edisobode Satan onyụn̄ anyan̄a ubonowo?
6, 7. (a) Anie esinam ẹkọbọ ata mme Christian? (b) Didie ke nnyịn ikeme ndikpebe uwụtn̄kpọ Elihu?
6 Idịghe ntịme kpọt ke Satan esịn ke ererimbot, enye n̄ko esinam ẹkọbọ ikọt Abasi. Enye enen̄ede eben̄e idem ndidomo nnyịn. Jesus Christ ọkọdọhọ apostle Peter ete: “Simon, Simon, sese! Satan ekeben̄e oyom mbufo man asak mbufo nte wheat.” (Luke 22:31) Ukem ntre n̄ko, kpukpru nnyịn emi itienede nde ikpat Jesus iyosobo idomo ke nsio nsio usụn̄. Peter ọkọdọhọ ke Devil ebiet “ekpe eke okụnide, oyom owo eke enye editade.” Paul okonyụn̄ ọdọhọ ete: “Kpukpru owo eke ẹyomde ndidu uwem uten̄e Abasi ke ebuana ye Christ Jesus ẹyesobo ukọbọ n̄ko.”—1 Pet. 5:8; 2 Tim. 3:12.
7 Didie ke ikeme ndiwụt ke nnyịn imọfiọk owo emi edide ata asua nnyịn ke ini afanikọn̄ esịmde eyenete nnyịn? Se ikpanamde ekpedi ndisịk n̄kpere enye nnyụn̄ ntịn̄ ikọ ye enye nte ufan kpa nte Elihu akanamde ye Job. Ọyọfọn idiana ye enye in̄wana ye asua nnyịn kpa Satan. (N̄ke 3:27; 1 Thess. 5:25) Uduak nnyịn ekpedi ndin̄wam eyenete nnyịn ọsọn̄ọ ada, inamke n̄kpọ m̀mê nso ke oro edikpa nnyịn, man inam esịt Jehovah adat.
8. Ntak emi Satan mîkekemeke ndinam Job etre ndikpono Jehovah?
8 Satan ekebem iso osobo ufene Job. Ata ọsọn̄urua n̄kpọ ekedi oro, akam etie nte mme ufene oro ke Job ekesida odu uwem. Edi Job ama esinyụn̄ ada mmọ anam uwa ọnọ Abasi. Ke Job ama akanam nditọ esie ẹsana, “ke eyo esierede, enye adaha ke enyọn̄ awa edifọp uwa ke adan̄a ibat kpukpru [nditọ esie]: koro Job ọdọhọde, ete, M̀mê nditọ mi ẹkenam idiọk ẹnyụn̄ ẹkpọn̄ Abasi ke esịt mmọ. Ntem ke Job akam esinam kpukpru ini.” (Job 1:4, 5) Emi ọwọrọ ke Job ama esiwa uwa ọnọ Abasi kpukpru ini. Edi enye ikekemeke aba ndinam emi ke ini idomo esie ọkọtọn̄ọde. Enye ikenyeneke “inyene” ndomokiet aba ndida n̄kpono Jehovah. (N̄ke 3:9) Edi enye ama ada inua esie okpono Jehovah.
Nen̄ede San̄a Kpere Jehovah
9. Nso ọsọn̄urua n̄kpọ ke nnyịn inyene?
9 Kpukpru nnyịn imekeme ndisan̄a n̄kpere Jehovah edide idi imọ m̀mê ubuene, n̄kparawa m̀mê n̄kaniren, edide imokop nsọn̄idem m̀mê idọdọn̄ọ. Inamke n̄kpọ m̀mê nso utọ idomo isịm nnyịn, edieke inen̄erede isan̄a ikpere Abasi, oro ayan̄wam nnyịn isọn̄ọ ida inyụn̄ idat Jehovah esịt. Idem mbon oro mînen̄ekede ifiọk akpanikọ ẹsisọn̄ọ ẹda uko uko.
10, 11. (a) Didie ke eyenete nnyịn an̄wan kiet akanam n̄kpọ ke ini ẹkedomode enye? (b) Didie ke eyenete emi okowụt ke Satan edi osu nsu?
10 Kere ban̄a uwụtn̄kpọ eyenete an̄wan emi ekerede Valentina Garnovskaya. Enye edi kiet ke otu nditọete oro ẹkesọn̄ọde ẹda kpa ye ikan̄ ikan̄ ukọbọ oro mmọ ẹkesobode ke Russia. Ke 1945, eyenete kiet ama ọkwọrọ ikọ ọnọ enye ke ini enye ekedide isua 20. Eyenete oro ama afiak ọkwọrọ ikọ ọnọ enye ikaba, edi tọn̄ọ oro, eyenan̄wan emi ikekwe aba eyenete oro. Edi eyenan̄wan emi ama ọtọn̄ọ ndikwọrọ ikọ nnọ mme mbọhọidụn̄ esie. Emi ama anam ẹmụm enye ẹnyụn̄ ẹbiere n̄kpọkọbi isua itiaita ẹnọ enye. Ẹma ẹsio enye ke ufọk n̄kpọkọbi ke 1953, ndien enye afiak ọtọn̄ọ ndikwọrọ ikọ ye unana ubiatini. Ẹma ẹfiak ẹmụm enye, ndien isan̄ enye emi ẹkebiere n̄kpọkọbi isua duop ẹnọ enye. Enye ama odu ke ufọk-n̄kpọkọbi kiet ediwak isua, ekem ẹsio enye ẹka ufọk-n̄kpọkọbi en̄wen. Do ke enye okosobo ndusụk nditọete iban oro ẹkenyenede Bible kiet. Usen kiet, eyenete an̄wan ama owụt enye Bible oro. Esịt ama enem enye ebe nde! Kere ise, n̄kukụre Bible oro akanam Valentina okokụtde ekedi enye oro eyenete oro akadade edikwọrọ ikọ ọnọ enye ke 1945!
11 Valentina ama ana baptism ke ẹma ẹkesio enye ke ufọk-n̄kpọkọbi ke 1967. Enye ama esịn idem ọkwọrọ eti mbụk ke ini oro enye okodude ke ifụre tutu 1969. Edi ẹma ẹfiak ẹmụm enye isua oro, ẹnyụn̄ ẹbiere n̄kpọkọbi isua ita ẹnọ enye. Kpa ye oro, Valentina ama aka iso ọkwọrọ ikọ. Enye ama an̄wam owo 44 ẹdifiọk akpanikọ mbemiso enye akakpade ke 2001. Enye akabiat ofụri isua 21 ke ufọk-n̄kpọkọbi. Enye ama ayak kpukpru n̄kpọ atak, enyịme ndidu ke ufọk-n̄kpọkọbi man aka iso ọsọn̄ọ ada. Enye ọkọdọhọ ke ini enye okoyomde ndikpa ete: “N̄kenyeneke ebiet idụn̄. Kpukpru n̄kpọ mi ọkọdọn̄ọ ke ekebe isan̄, edi ama enen̄ede enem mi ndinam n̄kpọ Jehovah.” Se Valentina akanamde emi ama enen̄ede owụt ke Satan okososu ndidọhọ ke mme owo idinamke akpanikọ inọ Abasi edieke ẹsobode idomo. (Job 1:9-11) Valentina ama anam esịt Jehovah adat, ndien Jehovah ke ebet ini emi enye edinamde Valentina ye kpukpru mbon oro ẹkenamde akpanikọ ẹnọ enye tutu esịm n̄kpa, ẹset.—Job 14:15.
12. Didie ke ima ekeme ndinam nnyịn isọn̄ọ ida ye Jehovah?
12 Nnyịn inam ufan ye Jehovah ke ntak emi imade enye. Nnyịn imama mme edu Abasi imesinyụn̄ idomo ukeme ndinam uduak esie. Nnyịn ima Jehovah ke ofụri esịt, idịghe ke ntak n̄kpọ ndomokiet nte Satan ọdọhọde. Ntak imade enye ke ofụri esịt anam nnyịn isọn̄ọ ida ke ini isobode idomo. Jehovah eyenịm “ukpọn̄ mbon ima esie.”—N̄ke 2:8; Ps. 97:10.
13. Didie ke Jehovah esise se nnyịn inamde inọ enye?
13 Ima esinam nnyịn ikpono enyịn̄ Jehovah, idem ọkpọkọm nnyịn ikere ke se inamde inọ enye ikemke. Enye esikụt se isịnede nnyịn ke esịt, isinyụn̄ itọhọke edieke nnyịn mîkemeke ndinam ofụri se ikpamade ndinam. Abasi abat se ededi oro inamde inọ enye ye ntak emi inamde n̄kpọ esie ke akpan n̄kpọ. Okposụkedi emi ata n̄kpọ mmọn̄eyet ọkọwọrọde Job, enye okonyụn̄ osobode ata n̄kpọsọn̄ idomo, enye okosụk etetịn̄ nte imọ imade mme usụn̄ Jehovah ọnọ mbon oro ẹkedoride enye ikọ. (Kot Job 10:12; 28:28.) Akpatre ibuot ke n̄wed Job etịn̄ nte Abasi akayatde esịt ye Eliphaz, Bildad, ye Zophar ke ntak emi mmọ mîketịn̄ke se inende. Jehovah ama ama Job onyụn̄ okot enye “owo mi” utịm ikanan̄, onyụn̄ ọdọhọ enye anam n̄kpeubọk ọnọ ufan esie mbita oro mîketịn̄ke se inende. (Job 42:7-9) Nnyịn n̄ko ikpakam ikpebe uwụtn̄kpọ Job man Jehovah ama nnyịn!
Jehovah An̄wam Mme Anam-Akpanikọ Asan̄autom Esie
14. Didie ke Jehovah akan̄wam Job okpụhọde ekikere esie?
14 Job ama ọsọn̄ọ ada anam akpanikọ ọnọ Abasi kpa ye oro enye mîkedịghe mfọnmma owo. Ndusụk ini, nnanenyịn ama anam enye edue etịn̄ se mîkpetịn̄ke. Ke uwụtn̄kpọ, enye ama ọdọhọ Jehovah ete: “Nseme n̄kot fi, ndien afo uyereke mi: . . . Ada ọkpọsọn̄ ubọk fo ọkọbọ mi.” Akan oro, enye ama enen̄ede okụt idem ke edinen ke ini enye ọkọdọhọde ete: “Nnyeneke se nduede,” n̄ko “afai [idụhe] mi ke ubọk: ndien akam mi onyụn̄ asana.” (Job 10:7; 16:17; 30:20, 21) Edi Jehovah ama an̄wam Job ke ndibụp enye ediwak mbụme oro akanamde enye etre ndikụt idem ke edinen. Mme mbụme oro ẹma ẹnam Job ọfiọk ke Abasi enen̄ede okpon akan owo, n̄ko ke owo ndomokiet ikemeke ndidomo idem ye Abasi. Job ama enyịme nnen̄ede oro onyụn̄ okpụhọde ekikere esie.—Kot Job 40:8; 42:1, 2, 6.
15, 16. Didie ke Jehovah an̄wam mme asan̄autom esie mfịn?
15 Jehovah esinyụn̄ ọnọ nnyịn ndausụn̄ ye item, ye mme ọsọn̄urua n̄kpọ efen n̄ko. Kiet ke otu emi edi uwa ufak Jesus Christ, emi anamde ẹfen mme idiọkn̄kpọ nnyịn. Uwa ufak oro n̄ko anam nnyịn ikeme ndisan̄a n̄kpere Abasi kpa ye oro nnyịn mîfọnke ima. (Jas. 4:8; 1 John 2:1) N̄kpọ efen edi nte ke imesibọn̄ akam iben̄e Abasi ada edisana spirit esie an̄wam nnyịn onyụn̄ ọsọn̄ọ nnyịn idem ke ini isobode idomo. Ke adianade do, nnyịn imenyene ofụri Bible, ndien edieke ikotde inyụn̄ itiede ikere se ikotde ke Bible, oro eyetịm nnyịn idem ndiyọ idomo. Ndikpep n̄kpọ ayanam ifiọk eneni oro Satan ekedemerede aban̄a enye emi enyenede unen ndikara ekondo, onyụn̄ anam nnyịn ibiere ndisọn̄ọ nda.
16 N̄ko-n̄ko, nnyịn imenen̄ede ibọ ufọn ke ndisịne ke otu mbon oro Jehovah adade “ofụn emi anamde akpanikọ onyụn̄ enyenede ọniọn̄” ọnọ udia eke spirit ke ofụri ererimbot. (Matt. 24:45-47) Ẹsinịm mme mbono esop ke esop Mme Ntiense Jehovah emi awakde ebe 100,000, ndien mi ke ẹsinọ nnyịn item ẹnyụn̄ ẹsọn̄ọ nnyịn idem ndiyọ idomo ekededi oro isobode. Ikụt emi ke se iketịbede inọ Sheila, kpa ekpri Ntiense emi odụn̄de ke Germany.
17. Tịn̄ ifiọkutom oro owụtde ufọn edidụk mme mbono esop.
17 Ke ini andikpep mîkodụhe ke ubet ukpepn̄kpọ usen kiet, nditọ ubet ukpepn̄kpọ mme Sheila ẹma ẹbiere ndida obukpọk ndomo nse se iditịbede ke ini iso. Sheila ama ọsọsọp ọwọrọ ke ubet ukpepn̄kpọ oro, ndien se enye ekedide edikop ke akpatre ama anam esịt enem enye nte enye ọkọwọrọde. Ke ini nditọ oro ẹkesụk ẹdade obukpọk oro ẹdomo ndomo, ndusụk mmọ ẹma ẹfen̄e ẹwọn̄ọ ke ẹma ẹkekop ke mme demon ẹdi. Edi nso ikanam Sheila ebem iso ọwọrọ ke ubet ukpepn̄kpọ oro? Enye ọdọhọ ete: “Ke ndondo oro ke ikekpep ke Ufọkmbono Obio Ubọn̄ nte ke ifọnke ndidomo ndomo. Ntre mma mfiọk se n̄kpanamde. N̄koyom ndidat Jehovah esịt nte n̄wed Mme N̄ke 27:11 ọdọhọde.” Ama enen̄ede ọfọn nte Sheila okodụkde mbono esop usen oro onyụn̄ akpan̄ utọn̄ okop se ẹkekpepde.
18. Nso ke afo ebiere ndinam?
18 Ẹyak kpukpru nnyịn ibiere nditiene ndausụn̄ oro ẹnọde nnyịn ke esop Abasi. Edieke idụkde mme mbono esop kpukpru ini, ikot Bible ye mme n̄wed ukpepn̄kpọ Bible, ibọn̄ akam, inyụn̄ isan̄a ikpere nditọete oro ẹnyenede mbufiọk, emi ọyọsọn̄ọ nnyịn idem onyụn̄ anam ifiọk se ikpanamde. Jehovah iyomke nnyịn iduọ, enye n̄ko enyene mbuọtidem ke nnyịn iyaka iso isọn̄ọ ida. Edi ata n̄kpọ ukpono ndinọ enyịn̄ Jehovah ubọn̄, n̄ka iso nsọn̄ọ nda, nnyụn̄ nnam esịt esie adat!
Nte Afo Emeti?
• Nso editịm ke Satan esịn ke ererimbot emi?
• Nso ọsọn̄urua n̄kpọ ke nnyịn inyene?
• Ntak emi nnyịn inamde ufan ye Jehovah?
• Didie ke Jehovah ọsọn̄ọ nnyịn idem mfịn?
[Ndise ke page 8]
Ndi esidọn̄ fi ndibuana ọsọn̄urua ifiọk oro enyenede ye mbon en̄wen?
[Ndise ke page 9]
Nnyịn imekeme ndin̄wam nditọete nnyịn ẹka iso ẹsọn̄ọ ẹda
[Ndise ke page 10]
Valentina ama ayak kpukpru n̄kpọ atak man enye ọsọn̄ọ ada