Job Ama Ọyọ—Nnyịn N̄ko Imekeme!
“Sese, nnyịn idọhọ ite, ọfọfọn ye mmọemi ẹma ẹbiom ukụt.”—JAMES 5:11.
1. Nso ke eyenete Christian kiet oro ama ọkọsọn̄ eketịn̄ aban̄a mme idomo esie?
‘DEVIL ọkọbọ mi! Etie mi ke idem ukem nte eketiede Job!’ A. H. Macmillan akada mme utọ ikọ oro etịn̄ nte etiede enye ke idem ọnọ n̄kpet n̄kpet ufan kiet ke ibuot itieutom eke Mme Ntiense Jehovah. Brọda Macmillan ama okụre utom esie ke isọn̄ ke edide isua 89 ke emana ke August 26, 1966. Enye ama ọfiọk ete ke ukpono oro ẹnọde utom mbuọtidem mme Christian oro ẹyetde aran nte enye “etiene mmọ ke edem.” (Ediyarade 14:13) Ke akpanikọ, mmọ ẹyekaiso ke utom Jehovah ye unana n̄kpọ ndibiọn̄ọ ebe ke ediset ke n̄kpa ndụk uwem oro mîkemeke ndikpa ke heaven. Mme ufan esie ẹma ẹdat esịt nte ke Brọda Macmillan ama ọbọ utịp oro. Nte ededi, ke mme utịt utịt isua uwem esie ke isọn̄, nsio nsio idomo ẹma ẹsịm enye, esịnede mme mfịna unana nsọn̄idem emi akanamde enye enen̄ede ọdiọn̄ọ aban̄a mme ukeme oro Satan ekesịnde ndibiat nsọn̄ọnda esie nnọ Abasi.
2, 3. Job ekedi anie?
2 Ke ini Brọda Macmillan ọkọdọhọde ke etie imọ ke idem ukem nte eketiede Job, enye eketịn̄ aban̄a eren oro ọkọyọde ikpọ idomo mbuọtidem. Job okodụn̄ ke “isọn̄ Uz,” ekemede ndidi okodu ke edere edere Arabia. Andito ubon Shem eyen Noah, enye ekedi andituak ibuot nnọ Jehovah. Etie nte idomo Job ẹketịbe ke n̄kpọ nte ini n̄kpa Joseph ye ini Moses okowụtde idemesie nte edinen. Ke ikpehe ini oro owo ndomokiet eke ebietde Job ke uten̄e Abasi ikodụhe ke isọn̄. Jehovah ekese Job nte mfọnmma, edinen, owo oro abakde Abasi.—Job 1:1, 8.
3 Nte “owo oro [okponde] akan kpukpru nditọ edem usiahautịn,” Job ama enyene ediwak asan̄autom, ndien mme ufene esie ẹma ẹsịm 11,500 ke ibat. Edi inyene eke spirit ekedi ata akpan n̄kpọ ọnọ enye. Ukem nte mme ete oro ẹten̄ede Abasi mfịn, enen̄ede etie nte Job ama ekpep nditọiren esie itiaba ye nditọiban esie ita n̄kpọ aban̄a Jehovah. Idem ke ini mmọ mîkodụn̄ke aba ke ufọk esie, enye ama anam n̄kpọ nte oku ubon ebe ke ndiwa uwa nnọ mmọ, ndusụk edi mmọ ẹma ẹnam idiọkn̄kpọ.—Job 1:2-5.
4. (a) Ntak emi mme Christian oro ẹsobode ukọbọ ẹkpekerede ẹban̄a eren oro Job? (b) Kaban̄a Job, mme mbụme ewe ke nnyịn idikere iban̄a?
4 Job edi owo oro mme Christian oro ẹsobode ukọbọ ẹkpekerede ẹban̄a man ẹsọn̄ọ idem ndiyọ ye ime. Mbet oro James ekewet ete: “Sese, nnyịn idọhọ ite, ọfọfọn ye mmọemi ẹma ẹbiom ukụt: mbufo ẹmokop ẹban̄a ime Job, ẹmenyụn̄ ẹkụt se Ọbọn̄ anamde enye ke akpatre, nte Ọbọn̄ enyenede esịtmbọm, onyụn̄ atuade owo mbọm.” (James 5:11) Ukem nte Job, oyom mme anditiene Jesus oro ẹyetde aran ye “akwa otuowo” eyomfịn ẹme ime man ẹyọ mme idomo mbuọtidem. (Ediyarade 7:1-9) Ntre, mme idomo ewe ke Job ọkọyọ? Ntak emi mmọ ẹketịbede? Ndien didie ke nnyịn ikeme ndibọ ufọn nto mme ifiọk n̄kpọntịbe esie?
Akpan Eneni
5. Ye unana Job ndifiọk, nso ikada itie ke heaven?
5 Ye unana Job ndifiọk, ẹma ẹdemede akwa eneni ke heaven. Usen kiet “nditọ Abasi ẹda idemmọ ẹdiwụt Jehovah.” (Job 1:6) Ikpọn̄îkpọn̄ edibon Eyen Abasi, kpa Ikọ, ama odu. (John 1:1-3) Ndinen angel ye mme otụt utọn̄ “nditọiren Abasi” ẹdide mme angel ẹma ẹdu n̄ko. (Genesis 6:1-3) Satan ama odu do, koro edisio enye ke heaven nduọk akadade itie ke ẹma ẹkewụk Obio Ubọn̄ ke 1914. (Ediyarade 12:1-12) Ke eyo Job, Satan ama edemede akpan eneni. Enye ama edemede eyịghe aban̄a unen itie edikara Jehovah ke idem ofụri edibotn̄kpọ Esie.
6. Nso ke Satan okodomo ndinam, ndien didie ke enye ọkọdọk Jehovah edidọk?
6 Jehovah ama obụp ete, “Afo oto m̀mọ̀n̄?” Satan ama ọbọrọ ete: “Nto ndiyọrọ ke ererimbot, ye ke ndiyo ke esịt.” (Job 1:7) Enye ke okoyom owo eke editade. (1 Peter 5:8, 9) Ebede ke ndibiat nsọn̄ọnda mmọ oro ẹnamde n̄kpọ Jehovah, Satan okodomo ndiwụt nte ke baba owo kiet idikopke uyo Abasi ọyọhọ ọyọhọ ke ntak ima. Ke ndibọrọ eneni emi, Jehovah ama obụp Satan ete: “Nte afo emetịm ese owo mi Job? koro owo eke ebietde enye mîdụhe ke ererimbot, ọfọn ama, onyụn̄ enen, onyụn̄ abak Abasi, onyụn̄ afara ke idiọk.” (Job 1:8) Job ama osịm mme idaha Abasi oro akayakde ufan̄ odu ọnọ mme unana mfọnmma esie. (Psalm 103:10-14) Edi Satan ama ọsọsọp ọbọrọ ete: “Nte Job abak Abasi ke ikpîkpu? Nte afo usịnke ọkọ ukan enye, ye ufọk esie, ye kpukpru se enye enyenede, ukụk? Afo ọmọdiọn̄ se ubọk esie anamde, inyene esie omonyụn̄ ọtọt ke isọn̄?” (Job 1:9, 10) Devil ke ntem ama ọdọk Jehovah edidọk ke ndidọhọ nte ke baba owo kiet imaha inyụn̄ ituakke ibuot inọ Enye ke se Enye edide edi nte ke Enye ọnọ mme edibotn̄kpọ ubọkedem man ẹnam n̄kpọ Esie. Satan ọkọdọhọ ete ke Job akanam n̄kpọ Abasi ke ntak udọn̄ ibụk, idịghe ke ntak ima.
Satan Ọtọn̄ọ En̄wan!
7. Ke nso usụn̄ ke Devil akamia ata ye Abasi, ndien didie ke Jehovah ọkọbọrọ?
7 Satan ama ọdọhọ ete: “Edi kam nyan ubọk fo, tụk kpukpru se enye enyenede; enye iditreke ndikpọn̄ fi an̄wan̄wa.” Didie ke Abasi akanam n̄kpọ aban̄a utọ ata usọn̄enyịn oro? Jehovah ama ọdọhọ ete: “Sese, kpukpru se inyenede enye odu fi ke ubọk; edi kûnyan ubọk fo utụk enye ke idemesie.” Devil ọkọdọhọ ke ẹma ẹdiọn̄, ẹnam kpukpru inyene Job ẹtọt, ẹnyụn̄ ẹsịn ọkọ ẹkan ẹkụk. Abasi ama ayak Job okụt ndutụhọ, okposụkedi mîkanaha ẹtụk ikpọkidem esie. Ke ebierede ndinam idiọk, Satan ama ọkpọn̄ mbono oro.—Job 1:11, 12.
8. (a) Nso ntakurua n̄kpọ obụkidem ke Job okosobo? (b) Nso ikedi akpanikọ aban̄ade “ikan̄ Abasi”?
8 Ikebịghike, en̄wan Satan ama ọtọn̄ọ. Kiet ke otu mme asan̄autom Job ama ọnọ enye idiọk etop emi: “Mme enan̄ ẹkefụn̄ isọn̄, mme ass ẹnyụn̄ ẹta mbiet ẹkpere mmọ; ndien nditọ Sabea ẹdibuat, ẹnyụn̄ ẹmụm mmọ; ẹnyụn̄ ẹwot n̄kparawa fo ke iso ofụt.” (Job 1:13-15) Ẹma ẹmen ọkọ oro ẹkesịnke ẹkan inyene Job ẹkụk ẹfep. Ke ekperede ndidi ke ebe oro, ẹma ẹda nnennen odudu demon ẹnam n̄kpọ, koro asan̄autom efen ọkọtọtde ete: “Ikan̄ Abasi omoto ke enyọn̄ ọduọ edifọp n̄kpri ufene, ye n̄kparawa fo, onyụn̄ ata mmọ.” (Job 1:16) Ọkọdiọk didie ntem ndinam etie nte Abasi ekedi ntak utọ afanikọn̄ oro eketienede idem asan̄autom esie! Sia emịnen̄mịnen̄ esitode heaven, ẹkpekeme ndiduọhọ Jehovah ata mmemmem mmemmem, edi ke akpanikọ ikan̄ oro okoto mme demon.
9. Didie ke ntakurua n̄kpọ obụkidem okotụk itie ebuana Job ye Abasi?
9 Nte Satan akakade iso ke en̄wan emi, asan̄autom efen ama ọtọt ete ke mme Chaldean ẹma ẹbụme mme camel Job ẹnyụn̄ ẹwot kpukpru n̄kparawa eken. (Job 1:17) Okposụkedi Job ke ntem okokụtde n̄wụre ke n̄kan̄ ndutịm uforo, emi ikabiatke itie ebuana esie ye Abasi. Nte afo emekeme ndiyọ editaba uwak inyene obụkidem ye unana edibiat nsọn̄ọnda fo nnọ Jehovah?
N̄kponn̄kan N̄kpọ Mmọn̄eyet Otịbe
10, 11. (a) Nso ikotịbe inọ nditọ Job duop? (b) Ke n̄kpọ mmọn̄eyet eke n̄kpa nditọ Job ama ekebe, didie ke enye ekese Jehovah?
10 Devil ikokụreke ye Job. N̄ko asan̄autom efen ama ọtọt ete: “Nditọiren fo ye nditọiban fo ẹkedia n̄kpọ, ẹnyụn̄ ẹn̄wọn̄ wine ke ufọk akpan mmọ: ndien, sese, akamba oyobio oto ke edem wilderness, onyụn̄ eberi inụk ufọk oro mbinan̄, ndien ufọk ọduọ nditọ oro ke idem owot; ndien sụk ami ikpọn̄îkpọn̄ mbọhọ nditịn̄ nnọ fi.” (Job 1:18, 19) Owo emi ẹnọde ukwan̄ etop ekeme ndidọhọ ke nsobo oro oyobio emi ekesịnde ekedi ‘edinam Abasi.’ Nte ededi, odudu demon ama otụk Job ke ata idiọk itie.
11 Ke mfụhọ, Job ‘ama awai ekụra esie, onyụn̄ okporo ibuot esie, ndien ọduọ ke isọn̄, atuak ibuot.’ Edi, kpan̄ utọn̄ ke mme ikọ esie. “Edi Jehovah ọkọnọ, Jehovah onyụn̄ ọbọ; ẹkọm enyịn̄ Jehovah.” Mbụk oro adian ete: “Ke ofụri n̄kpọ emi Job inamke idiọk, inyụn̄ idorike Abasi se mînenke.” (Job 1:20-22) Ẹma ẹtọn̄ọ ntak ẹkan Satan. Nso edieke owo nnyịn akpade inyụn̄ ifụhọde nte mme asan̄autom Abasi? Uten̄e unana ibụk oro inyenede inọ Jehovah ye mbuọtidem oro inyenede ke enye ekeme ndin̄wam nnyịn ndiyọ nte mbon nsọn̄ọnda, kpasụk nte Job ọkọyọde. Mmọ oro ẹyetde aran ye mme nsan̄a mmọ oro ẹnyenede idotenyịn eke isọn̄ ke akpanikọ ẹkeme ndibọ ndọn̄esịt ye ukeme nto mbụk ediyọ emi Job ọkọyọde.
Eneni Ototịm Ọsọn̄ Ubọk
12, 13. Ke mbono efen ke heaven, nso ke Satan okoyom, ndien didie ke Abasi ọkọbọrọ?
12 Ikebịghike Jehovah ama okot mbono efen ke n̄kan̄ eke heaven. Job ama akabade edi owo emi ananade nditọ, oro ebuenede, emi etiede nte Abasi amia ufen, edi nsọn̄ọnda esie ikesehekede. Nte ededi, Satan ikonyịmeke nte ke mme edori ikọ esie oro enye okodoride Abasi ye Job ẹkedi nsu. Idahaemi “nditọ Abasi” ẹma ẹdu ke idaha ndikop eneni ye ibọrọ nte Jehovah ekesịnde Devil anam n̄kpọ man ẹda eneni emi ẹsịm akpatre ubiere.
13 Ke okotde Satan edinam ibat, Jehovah ama obụp ete: “Afo oto m̀mọ̀n̄?” Nso ikedi ibọrọ? “Nto ndiyọrọ ke ererimbot, ye ke ndiyo ke esịt.” Jehovah ama ọtọn̄ọ ntak odụri ntịn̄enyịn owụt mfọnmma, edinen, abak-Abasi asan̄autom esie Job, emi okosụk ọsọn̄ọde omụm nsọn̄ọnda esie akama. Devil ama ọbọrọ ete: “Ikpa ke ibuot ikpa, ye kpukpru se owo enyenede ke owo edinọ ke ibuot uwem esie. Edi kam nyan ubọk fo tụk ọkpọ esie, ye obụkidem esie: enye iditreke ndikpọn̄ fi an̄wan̄wa.” Ntre Abasi ama ọdọhọ ete: “Sese, enye odu fi ke ubọk; edi kpeme uwem esie ikpọn̄îkpọn̄.” (Job 2:2-6) Ke ọnọde ekikere nte ke Jehovah ikemenke kan̄a kpukpru ọkọ ukpeme ifep, Satan ama oyom ẹtụk ọkpọ ye obụkidem Job. Owo ikenyịmeke Devil owot Job; edi Satan ama ọfiọk ete ke udọn̄ọ ikpọkidem eyebiak enye onyụn̄ anam etie nte ke enye ọkọbọ ufen otode Abasi ke ntak ndedịbe idiọkn̄kpọ.
14. Satan akada nso otịm Job, ndien ntak emi owo ndomokiet mîkekemeke ndinọ owo emi ọkọbọde ufen mi ubọhọ?
14 Ke ọkpọn̄de mbono oro, Satan ama akaiso ke ibak ibak edinam. Enye ama ada “idiọk oyo otịm Job, ọtọn̄ọde ke ikpatukot esie, tutu osịm ke etịn̄ibuot esie.” Nso akwa ubiak ke Job ọkọyọ ntem nte enye eketiede ke ntọn̄ onyụn̄ adade mbai usiọn̄ akwat idemesie! (Job 2:7, 8) Abiausọbọ edide owo ndomokiet ikekemeke ndisọbọ enye enyene-ndịk ubiak ubiak, akama itekesịt, ye esuene esuene udọn̄ọ emi, koro odudu Satan ekedi ntak. Jehovah ikpọn̄îkpọn̄ ekekeme ndikọk Job. Edieke afo edide asan̄autom Abasi oro ọdọn̄ọde, kûdede ufre ete ke Abasi ekeme ndin̄wam fi ọyọ onyụn̄ ekeme ndinọ fi uwem ke obufa ererimbot oro ọbọhọde udọn̄ọ.—Psalm 41:1-3; Isaiah 33:24.
15. Nso ke n̄wan Job akakpak enye anam, ndien nso ikedi ibọrọ esie?
15 Ke akpatre, n̄wan Job ama ọdọhọ ete: “Nte afo osụk omụm mfọnmma fo akama? Kpọn̄ Abasi, ndien kpa n̄kpa.” “Mfọnmma” owụt uten̄e Abasi oro mînyeneke nduduọhọ, ndien ekeme ndidi n̄wan emi eketịn̄ ikọ ke ido emiom man anam Job osụn̄i Abasi. Edi enye ama ọbọrọ ete: “Afo ọdọhọ nte ndisịme n̄wan ọdọhọde; nte nnyịn ibọ Abasi eti n̄kpọ, ndien idibọhọ idiọkn̄kpọ n̄ko?” Idem usụn̄ edinam Satan enyeemi ikekwe unen, koro ẹsian nnyịn ẹte: “Ke ofụri n̄kpọ emi Job inamke idiọk ke n̄kpọkinua esie.” (Job 2:9, 10) Ndusụk mbon ubon oro ẹbiọn̄ọde ẹdọhọ ẹte ke nnyịn ke unana ibuot ida mfịna inọ idem nnyịn ke mme edinam Christian ẹnyụn̄ ẹkpak nnyịn ẹte ikpọn̄ Jehovah Abasi. Ukem nte Job, nnyịn imekeme ndiyọ utọ idomo oro koro imade Jehovah inyụn̄ iyomde nditoro edisana enyịn̄ esie.—Psalm 145:1, 2; Mme Hebrew 13:15.
Mme Abian̄a Abian̄a Mbon N̄wụtidem Ita
16. Mmanie ẹkedi, ẹdọhọde ke idi ndidọn̄ Job esịt, edi didie ke Satan akada mmọ anam n̄kpọ?
16 Ke se ikakabarede itie nte edinam Satan efen, “mme ufan” ita ẹma ẹdi, ẹdọhọde ke idi ndidọn̄ Job esịt. Kiet ekedi Eliphaz, anade edi ekedi andito ubon Abraham ebe ke Esau. Sia Eliphaz akadade iso ke nditịn̄ ikọ, anaedi enye ekedi andikpon n̄kan. Owo oro okodude n̄ko ekedi Bildad, andito ubon Shuah, kiet ke otu nditọiren Abraham ebe ke Keturah. Ọyọhọ owo ita ekedi Zophar, emi ẹkekotde Naamathite man ẹdiọn̄ọ ubon m̀mê ebietidụn̄ esie, ndusụk ke ufọt edem edere ye edem usoputịn Arabia. (Job 2:11; Genesis 25:1, 2; 36:4, 11) Ukem nte mbon oro ẹdomode ndinam Mme Ntiense Jehovah ẹkpọn̄ Abasi mfịn, Satan ama ada owo ita ẹmi anam n̄kpọ ke ukeme ndinam Job onyịme ke imedue ke mme nsunsu edori ikọ oro onyụn̄ abiat nsọn̄ọnda esie.
17. Nso ke owo ita ẹmi ẹkekade isen do ẹkenam, ndien nso ke mmọ mîkanamke ke usen itiaba ye okoneyo itiaba?
17 Owo ita ẹmi ẹma ẹwụt ke imenen̄ede ikop mbọm ebe ke nditua eyet, ndiwak ekụra mmọ, nnyụn̄ nduọk ntan ke ibuot mmọ. Edi ekem mmọ ẹma ẹsụhọde ẹtie ye Job usen itiaba ye okoneyo itiaba ye unana editịn̄ ikọ ndọn̄esịt ndomokiet! (Job 2:12, 13; Luke 18:10-14) Abian̄a abian̄a mbon n̄wụtidem ita ẹmi ẹma ẹnen̄ede ẹnana ifiọk ke n̄kan̄ eke spirit tutu mmọ ikenyeneke ikọ ndọn̄esịt ndomokiet nditịn̄ mban̄a Jehovah ye mme un̄wọn̄ọ esie. Edi, mmọ ke ẹkesịm ukwan̄ ubiere ẹnyụn̄ ẹben̄e idem ndida mmọ n̄n̄wana ye Job ndondo oro mmọ ẹkụrede ye ido mfụhọ mbio obio. Nte enemde, mbemiso usen itiaba oro mmọ ẹkedude ke ndopuyo ẹkụrede, akparawa oro Elihu ama osụhọde etie ke ebiet emi ekemede ndikop se ẹtịn̄de.
18. Ntak emi Job okoyomde emem ebe ke n̄kpa?
18 Job ke akpatre ama etịn̄ ikọ. Sia mîbọhọ ndọn̄esịt ndomokiet ito owo ita ẹmi ẹkekade isen mi, enye ama osụn̄i usen emana esie onyụn̄ eyịk ntak emi uwem unana inemesịt esie ebịghide. Enye ama oyom emem ebe ke n̄kpa, ikam ikereke ke imọ imekeme ndifiak n̄kop ata idatesịt mbemiso imọ ikpade, idahaemi imọ idide ubuene, itabade mme owo ke n̄kpa, inyụn̄ idọn̄ọde n̄kpa n̄kpa. Edi Abasi ikayakke ẹtụk Job ẹkosịm udomo n̄kpa.—Job 3:1-26.
Mme Andidori Job Ikọ Ẹn̄wana
19. Ke mme afan̄ ewe ke Eliphaz ke nsu okodori Job ikọ?
19 Eliphaz ekebem iso etịn̄ ikọ ke mme ikpehe eneni ita ẹmi ẹkekade iso ndidomo nsọn̄ọnda Job. Ke akpa utịn̄ikọ esie, Eliphaz okobụp ete: “Ke ebiet ewe ke ẹkesobo edinen owo?” Enye ama ebiere nte ke anaedi Job ama anam idiọkn̄kpọ oro odotde ndibọ ufen Abasi. (Job, ibuot 4, 5) Ke udiana utịn̄ikọ esie, Eliphaz ama asak eti ibuot Job nsahi onyụn̄ obụp ete: “Afo ọfiọk nso eke nnyịn mîfiọkke?” Ikọ Eliphaz ọkọwọrọ ete ke Job okodomo ndiwụt ke imokon̄ ikan Ata Ọkpọsọn̄. Ke nditre udiana ikọ en̄wan esie, enye ama ọdọhọ ke Job enyene ubiomikpe nsọn̄ibuot, ubọkedem, ye abian̄a. (Job, ibuot 15) Ke akpatre utịn̄ikọ esie, Eliphaz ke nsu ama odori Job ikọ ediwak ubiatibet—n̄kanubọk, editre ndinọ mbon oro ẹdude ke unana udia ye mmọn̄, ye edifịk mme ebeakpa ye nditọ akpa.—Job, ibuot 22.
20. En̄wan oro Bildad akan̄wanade ye Job eketie didie?
20 Ke edide udiana owo nditịn̄ ikọ ke ini kiet kiet ke otu ikpehe eneni ita ẹmi, Bildad ekesiwak nditiene ukem ibuotikọ oro Eliphaz ọkọtọn̄ọde. Mme utịn̄ikọ Bildad ẹkedi mbio mbio edi ẹnen̄ede ẹbiak owo. Enye ama akam odori nditọ Job ikọ edinam idiọkn̄kpọ ndien ke ntem ẹdotde n̄kpa. Ye ukwan̄ ekikere, enye ama ọnọ uwụtn̄kpọ emi: Nte n̄kukop ye nnyanyan̄a isantem ẹsatde ẹnyụn̄ ẹkpade ke mmọn̄ mîdụhe, ntre ke edi ye “kpukpru mmọ eke ẹfrede Abasi.” Ikọ oro edi akpanikọ, edi enye ikenyeneke n̄kpọ ndinam ye Job. (Job, ibuot 8) Bildad akabat mme afanikọn̄ Job nte enyeoro osịmde mme idiọkowo. (Job, ibuot 18) Ke ibio ibio utịn̄ikọ esie ọyọhọ ita, Bildad ama afan̄a ete ke owo edi “ndọn̄” ye “utụn̄” ndien ke ntre isanake ke enyịn Abasi.—Job, ibuot 25.
21. Zophar okodori Job ikọ aban̄a nso?
21 Zophar ekedi ọyọhọ owo ita nditịn̄ ikọ ke eneni emi. Ke ofụri ofụri, usụn̄ ukere n̄kpọ esie ekebiet eke Eliphaz ye Bildad. Zophar ama odori Job ikọ idiọkido onyụn̄ akpak enye ete ọkpọn̄ mme idiọk edinam esie. (Job, ibuot 11, 20) Ke ọyọhọ ikpehe iba ama okokụre Zophar ama etre nditịn̄ ikọ. Enye ikenyeneke n̄kpọ ndidian ke ọyọhọ ikpehe ita. Nte ededi, ke ofụri ini emi, Job ama ọbọrọ mme andidori enye ikọ uko uko. Ke uwụtn̄kpọ, ini kiet enye ama ọdọhọ ete: “Mbufo kpukpru ẹdi ukụt ukụt mbon ndọn̄esịt. Nte ofụm ofụm ikọ ẹnyene utịt?”—Job 16:2, 3.
Nnyịn Imekeme Ndiyọ
22, 23. (a) Nte ekedide ye Job, didie ke Devil odomo ukeme ndiyom ndibiat nsọn̄ọnda nnyịn nnọ Jehovah Abasi? (b) Okposụkedi Job ọkọyọde nsio nsio idomo, nso ke nnyịn ikeme ndibụp mban̄a edu esie?
22 Ukem nte Job, nnyịn imekeme ndisobo se iwakde ikan idomo kiet ke ini kiet, ndien Satan ekeme ndida unana nsịnudọn̄ m̀mê mme n̄kpọ eken ke mme ukeme esie ndibiat nsọn̄ọnda nnyịn. Enye ekeme ndidomo ndinam nnyịn in̄wana ye Jehovah edieke nnyịn isobode mme mfịna ndutịm uforo. Edieke owo ima akpade m̀mê ikopde unana nsọn̄idem, Satan ekeme ndidomo ndinam nnyịn iduọhọ Abasi. Ukem nte mme ufan Job, owo akam ekeme ndidori nnyịn ikọ ke nsu. Nte Brọda Macmillan okowụtde, Satan ekeme ‘ndikọbọ nnyịn,’ edi nnyịn imekeme ndiyọ.
23 Nte nnyịn ikụtde kan̄a, Job ama ọyọ nsio nsio idomo esie. Nte ededi, nte enye ọkọyọyọ ikpọn̄îkpọn̄? Nte enye ama enen̄ede enyene spirit eke obụn̄ọde? Ẹyak nnyịn ise m̀mê Job ama enen̄ede anana idotenyịn ofụri ofụri.
Didie ke Afo Ọkpọbọrọ?
◻ Nso akwa eneni ke Satan ekedemede ke eyo Job?
◻ Ke nso usụn̄ ke ẹkedomo Job ẹsịm akpatre?
◻ “Mme ufan” Job ita ẹkedori enye ikọ ẹban̄a nso?
◻ Nte ekedide ye Job, didie ke Satan ekeme ndidomo ndibiat nsọn̄ọnda nnyịn nnọ Jehovah?
[Ndise ke page 10]
A. H. Macmillan