Mme Mbụme Ẹtode Mme Andikot
Nte nnyịn ikpenyene ndidiọn̄ọ nto Job 1:8 nte ke ini oro Job okodude uwem, enye ekedi n̄kukụre owo oro akanamde akpanikọ ọnọ Jehovah?
Baba. Ubiere oro inenke kaban̄a Job 1:8, emi ọdọhọde ete:
“Jehovah ọdọhọ Satan, ete, Nte afo emetịm ese owo mi Job? koro owo eke ebietde enye mîdụhe ke ererimbot, ọfọn ama, onyụn̄ enen, onyụn̄ abak Abasi, onyụn̄ afara ke idiọk.” Abasi ama anam ukem ndụn̄ọde oro ke Job 2:3, obụpde Satan ete: “Nte afo omotịm ese owo mi Job? Koro owo eke ebietde enye mîdụhe ke ererimbot, ọfọn ama, onyụn̄ enen, onyụn̄ abak Abasi, onyụn̄ afara ke idiọk.”
N̄wed Job ke idemesie owụt ete ke Job ikedịghe n̄kukụre owo oro odude uwem emi Abasi okonyịmede nte anam-akpanikọ. Ọtọn̄ọde ke ibuot 32, nnyin imokot iban̄a Elihu. Okposụkedi edide akparawa owo, Elihu ama enen̄ede ndudue kaban̄a nte Job ekesede n̄kpọ onyụn̄ otoro Abasi akpanikọ.—Job 32:6-33:6, 31-33; Job 35:1-36:2.
Mmọdo, ikọ oro Abasi eketịn̄de ete ke ‘owo eke ebietde Job ikodụhe ke ererimbot’ anaedi ọwọrọ ete ke Job ekenen̄ede edi n̄wọrọnda nte ednen owo. Eyedi Job okodu uwem ke ufọt ini n̄kpa Joseph ke Egypt ye ntọn̄ọ utom Moses nte prọfet Abasi. Ke ini oro ediwak nditọ Israel ẹkedụn̄ ke Egypt. Ntak ndomokiet idụhe ndikere nte ke kpukpru mmọ ikanamke akpanikọ ndien ke Abasi ikonyịmeke mmọ; anaedi ama odu ediwak owo oro ẹkebuọtde idem ke Jehovah. (Exodus 2:1-10; Mme Hebrew 11:23) Edi, baba mmọ kiet ikenyeneke akpan udeme, nte Joseph ekenyenede, m̀mê mme andituak ibuot ẹmi ndikedi n̄wọrọnda ke utuakibuot akpanikọ, nte Moses ekedide ke ndida idụt Israel usụn̄ n̄wọrọ ke Egypt.
Ke ẹdụn̄de ke ebiet efen, nte ededi, ama odu owo oro nsọn̄ọnda esie ekedide n̄wọrọnda. “Owo kiet, ekere Job, okodu ke isọn̄ Uz: ndien owo oro ọfọn ama, onyụn̄ enen, onyụn̄ abak Abasi, onyụn̄ afara ke idiọk.”—Job 1:1.
Jehovah ama ekeme ke ntre ndisiak Job nte in̄wan̄în̄wan̄ m̀mê n̄wọrọnda uwụtn̄kpọ mbuọtidem ye uten̄e Abasi. Kpasụk ntre, Ezekiel ye James ẹmi ẹkedide mme andiwet Bible ẹma ẹtịn̄ san̄asan̄a ẹban̄a Job nte onịmde uwụtn̄kpọ edinen ido ye ime.—Ezekiel 14:14; James 5:11.