Nte Afo Emeti?

Nte afo ọmọnọ ntịn̄enyịn ke mme nsiondi Enyọn̄-Ukpeme eke ndondo emi? Ke edide ntre, afo oyokụt nte edide inem n̄kpọ nditi se itienede mi:

◻ Ntak emi ukpepn̄kpọ akan̄a mîwụtke eti ibuot?

Edieke Abasi ekebemde iso ọfiọk onyụn̄ owụkde ete Adam ọduọ odụk idiọkn̄kpọ, do Jehovah akpakakabade edi anditọn̄ọ idiọkn̄kpọ ke ini enye akanamde owo ndien enye ekpedi ntak idiọkn̄kpọ ye ndutụhọ ofụri owo. Owo ikemeke ndinam emi odu ke n̄kemuyo ye akpanikọ oro nte ke Jehovah edi Abasi ima emi asuade ukwan̄ido. (Psalm 33:5; Mme N̄ke 15:9; 1 John 4:8)—4/15, page 7, 8.

◻ Ke ndisu Isaiah 2:2-4, nso ke mme owo ẹtode ediwak idụt ẹnam?

Nte mmọ ẹbụn̄ọde ẹka ufọk utuakibuot Jehovah, mmọ n̄ko ẹtre ‘ndikpep ekọn̄’ koro mmọ ẹkọn̄ mbuọtidem mmọ ke ukpeme eke mme udịmekọn̄ Abasi eke heaven, ẹmi odude ke mben̄eidem ndisobo kpukpru mme asua emem.—4/15, page 30.

◻ Mmanie ẹdi mbon uko Abasi ẹmi ẹtịn̄de ẹban̄a ke Joel 3:10, 11?

N̄kpọ nte utịm ike 280 ke Bible, ẹkot ata Abasi “Jehovah mme udịm.” (2 Ndidem 3:14) Mme udịm ẹmi ẹdi mme okopodudu udịm angel eke heaven, ẹmi ẹdude ke mben̄eidem ndinam se Jehovah ọdọhọde.—5/1, page 23.

◻ Nso ukpepn̄kpọ ke nnyịn ikeme ndikpep nto Jehovah ndikọdọhọ Job ọbọn̄ akam ọnọ mbon oro ẹkeduede enye? (Job 42:8)

Mbemiso ẹkenamde Job afiak enyene nsọn̄idem, Jehovah ama oyom ete enye ọbọn̄ akam ke ibuot mbon oro ẹkeduede enye. Emi owụt ete ke Jehovah oyom nnyịn ifen inọ mbon oro ẹnamde nnyịn idiọkn̄kpọ mbemiso ẹkemede ndifen mme idiọkn̄kpọ nnyịn. (Matthew 6:12; Ephesus 4:32)—5/1, page 31.

◻ Nso ke ikọ James ọkọwọrọ ke ini enye ọkọdọhọde ete: “Yak ime anam utom esie ama”? (James 1:4)

Ime enyene n̄kpọ ndinam, “utom.” Utom esie edi ndinam nnyịn ikem ke kpukpru nde. Ntem, ebede ke ndiyak mme idomo ẹsịm utịt ye unana edidomo ndida mme usụn̄ oro mîkemke ye N̄wed Abasi ntre enye usọp usọp, ẹdomo mbuọtidem nnyịn ẹnyụn̄ ẹnam ọfọn.—5/15, page 16.

◻ Ntak emi Abasi ebetde ebịghi ntre ndikọk mme mfịna ubonowo?

Nte Jehovah esede ini okpụhọde ye nte nnyịn isede. Ye nsinsi Abasi, ọtọn̄ọde ke ini ẹkebotde Adam tutu esịm idahaemi ikam iyọhọke urua kiet. (2 Peter 3:8) Edi se ededi ekikere oro nnyịn inyenede kaban̄a ini, usen kiet kiet oro ebede ada nnyịn esịk ekpere usen emi Jehovah ediwụtde unen esie.—6/1, page 5, 6.

◻ Nso inụk Mme Ntiense Jehovah?

Ukpep oro Jehovah ọnọde osion̄o mme n̄wọrọnda owo edi, ẹmi ẹkpepde ndima kiet eken ye mbọhọidụn̄ mmọ nte idemmọ. (Isaiah 54:13) Ima onụk Mme Ntiense Jehovah ndika iso n̄kwọrọ ikọ kpa ye unana udọn̄ ye ukọbọ. (Matthew 22:36-40; 1 Corinth 13:1-8)—6/15, page 20.

◻ Ikọ Jesus oro: “Mbufo ẹn̄wana eti-eti ndibe ke mfafaha inua-otop ndụk” ẹwọrọ nso? (Luke 13:24)

Ikọ Jesus ẹwọrọ ndisịn̄ede idem, ndinyanade idem nnyịn. Ikọ esie ẹwụt n̄ko nte ke ndusụk owo ẹkeme ndidomo ‘ndibe ndụk inuaotop’ sụk ke ini oro ọfọnde mmọ ke idem, ẹsan̄ade sụn̄sụn̄ nte mmọ ẹmade. Ntre nnyịn owo kiet kiet imekeme ndibụp, ‘Nte ami ke ntịn̄ enyịn nnyụn̄ nsịn ifịk?’—6/15, page 31.

◻ Didie ke ‘ẹdida se ẹwetde ẹsịn ke n̄wed ẹkpe ikpe mmọ ẹmi ẹnamde ẹset nte ekemde ye se mmọ ẹkenamde’? (Ediyarade 20:12)

Mme n̄wed ẹmi idịghe n̄wetnnịm n̄kpọ ẹban̄ade mme n̄kpọ ẹmi mmọ ẹkenamde ke edem; ke ini mmọ ẹkekpan̄ade ikpe idiọkn̄kpọ ẹmi mmọ ẹkenamde ke ini uwem mmọ etebe mmọ. (Rome 6:7, 23) Nte ededi, mbon oro ẹnamde ẹset ẹdisụk ẹdu ke idak idiọkn̄kpọ Adam. Do, ana edi mme n̄wed ẹmi ẹdiwụt mme item Abasi ẹmi anade kpukpru owo ẹtiene man ẹbọ ufọn ọyọhọ ọyọhọ ẹto uwa Jesus Christ.—7/1, page 22.

◻ Nso ukpepn̄kpọ ẹdu ẹnọ nnyịn ke n̄ke Jesus aban̄ade mbọhọidụn̄ owo Samaria? (Luke 10:30-37)

N̄ke Jesus owụt ete ke owo oro enen̄erede edi edinen edi enye oro mînịmke mme ibet Abasi kpọt edi ekpebede mme edu esie n̄ko. (Ephesus 5:1) Enye owụt n̄ko ete ke ima mbọhọidụn̄ ekpenyene ndikan mme n̄kpọ ubiọn̄ọ eke idụt, orụk, ye ido ukpono. (Galatia 6:10)—7/1, page 31.

◻ Nso idi usụn̄ ita emi afo ekemede ndidiọn̄ọ nditọ fo nnyụn̄ nnọ ndausụn̄ nte eka m̀mê ete?

(1) N̄wam nditọ fo ndimek utom idịbi udia oro odotde; (2) tịm mmọ idem ndiyọ mme mfịghe eke ntụk ke ufọkn̄wed ye ke itie utom; (3) wụt mmọ nte ẹkpeyụhọde mme udọn̄ eke spirit mmọ.—7/15, page 4.

◻ Kaban̄a nso uduak ke Abasi ọkọduọk odudu ke “ọyọhọ usen itiaba”? (Genesis 2:1-3)

Abasi ikọduọkke odudu ke ntak akakpade mba. Utu ke oro, enye eketre utom eke isọn̄ man otodo utom ubọk esie ẹkọri ẹnyụn̄ ẹsịm ọyọhọ ubọn̄, ẹnọde enye itoro ye ukpono.—7/15, page 18.

◻ Nso idi usụn̄ ita emi nnyịn ikemede ndinam unenikpe?

Akpa, ana nnyịn idu uwem ekekem ye mme idaha ido uwem Abasi. (Isaiah 1:17) Ọyọhọ iba, nnyịn iwụt unenikpe ke ini inamde n̄kpọ ye mbon en̄wen ke usụn̄ oro nnyịn iyomde Jehovah anam n̄kpọ ye nnyịn. (Psalm 130:3, 4) Ọyọhọ ita, nnyịn iwụt unenikpe Abasi ke ini nnyịn ibuanade ifịk ifịk ke utom ukwọrọikọ. (Mme N̄ke 3:27)—8/1, page 14, 15.