Mbono District “Ifịk Ifịk Mme Anditan̄a Obio Ubọn̄” eke Mme Ntiense Jehovah eke 2002
1 “Mmọ eke ẹdọhọde mi, ẹte, ‘Nnyịn iyaka ke ufọk Jehovah,’ ẹdat mi esịt.” (Ps. 122:1) Ke ndidụn̄ọde mme ikọ andiwet psalm, tịm fiọk (1) nte eketiede enye ke idem ke ini ẹkenọde enye ikot ndibuana ke ndituak ibuot nnọ Jehovah, (2) nti nsan̄a oro enye ekenyenede, emi ẹkenen̄erede ẹnyene udọn̄ ke utuakibuot akpanikọ, ye (3) ndutịm oro ẹkeyomde man ẹnọ ikot oro, ẹsobo ọtọkiet, ẹnyụn̄ ẹnam isan̄ ẹka ufọk Abasi.
2 Nte mme ikọ andiwet psalm emi iwụtke nte esitiede nnyịn ke idem ke ini nnyịn ikopde nte ke ẹnam ndutịm ẹnọ akamba mbono nnyịn efen? Nnyịn imesikop nduaidem nte itide idatesịt oro ikenyenede ke mme mbono oro ẹkebede, ye idotenyịn edifiak ndu ke akpan mboho ye ekemmọ mme andima Jehovah. Ẹnam ndutịm usen ita ẹnọ Mbono District “Ifịk Ifịk Mme Anditan̄a Obio Ubọn̄” ke ofụri Nigeria ke 2002/2003. Ini edi emi nnyịn ndinam ndutịm ndidụk nnyụn̄ mbọ ọyọhọ ufọn nto udia eke spirit oro anade ebet nnyịn.
3 “Akama-ukpọhọde, emi anamde akpanikọ onyụn̄ edide ọniọn̄,” ama ọtọn̄ọ nditịm ekemini udia eke spirit man ẹnọ ke akamba mbono emi. (Luke 12:42) Ẹdeme esop kiet kiet ẹsịn ke akamba mbono man owo okûwak akaha ke itie mbono kiet kiet. Ke adianade do, ediwak nditọete ẹtọn̄ọ nditịm nsio nsio itieutom mbono man “ẹnam kpukpru n̄kpọ ke nde ye ke ido nte eyede.” (1 Cor. 14:40) Sia ẹtịmde ata ediwak n̄kpọ ke ufọn ye kaban̄a ifụre nnyịn, nso ke nnyịn ikeme ndinam man itịm idem iben̄e mbono emi?
4 Diomi Idahaemi Ndidụk Kpukpru Usen Ita Oro: Ndi oyom afo eben̄e ini nduọkodudu oto eteutom fo man odụk kpukpru usen mbono oro ẹdemede ẹnọ fi? Jehovah ọfiọk ete ke ndusụk mme eteutom ‘ẹsisọn̄ ido.’ (1 Pet. 2:18) Edi mme mbono nnyịn ẹnen̄ede ẹdi akpan n̄kpọ, ndien nnyịn iyom ndisịn ifịk ifịk ukeme ndibuana ke ofụri ndutịm. San̄a kpere Jehovah ke akam ban̄a mme n̄kpọ ntre, oyomde ndausụn̄ esie kaban̄a eti utịp.—Neh. 2:4.
5 Fam Okụk Nịm nọ Mbono Oro: Ke adianade ye mme ndutịm eken, IDAHAEMI edi ini nditọn̄ọ mfam okụk nnịm nnọ mbono district emi. Ndusụk owo ẹdu oyom usụn̄ esisịt ọkpọn̄ itie mbono. N̄ko, ndusụk owo ẹnyene ikpọ ubon. Kaban̄a mmọ emi ye kpukpru nnyịn, oyom okụk kaban̄a mme etịbe, ukpeusụn̄, udia ke ini mbono, ye mme mbabuat idaha eken. Oyom mbon oro ẹnyenede akamba ubon ẹbabak ẹnam ndutịm ẹnyụn̄ ẹfam okụk oro ekemde ẹnịm man ofụri ubon ekeme ndidụk mbono. Usụn̄ kiet oro enyenede ufọn ekeme ndidi ndibiere ofụri okụk emi ẹyomde. Owụt ifiọk ndinịm ufan̄ nnọ ekọmurua n̄kpọ ndidọk ke adan̄aemi anamde ubiere fo. Ekem bahade ibatokụk oro ebierede ye ofụri ibat ọfiọn̄ oro ẹdude ọtọn̄ọde idahaemi esịm usenọfiọn̄ mbono district mbufo. Emi edi ibatokụk oro oyomde afo enịm ke ọfiọn̄ kiet kiet. Ke ọfiọn̄ kiet kiet, sịn ofụri ukeme ndibem iso nsio okụk emi nnịm nte okụk mbono. Ẹkeme ndisịn emi ke ekpri ekebe m̀mê ke efọkn̄wed. Nte ededi, ẹkeme ndibahade okụk emi ẹfamde ẹnịm ke ọfiọn̄ ke ọfiọn̄ mi ke itie inan̄ ẹnyụn̄ ẹsio ẹnịm ke urua ke urua. Akpan n̄kpọ edi nte ke ukpunyeneke ndibet tutu osụhọ ọfiọn̄ kiet m̀mê iba ndisịm ini mbono mbemiso afo ọtọn̄ọ ndifam okụk uka isan̄ ofụri ini eke isua ke isua emi.—N̄ke 21:5.
6 Item ke Ndibọ Itieidụn̄: Nnyịn iyodomo ndinọ esop kiet kiet ibat babru Room Request oro ekemde. Ewetn̄wed esop ekpenyene ndikụt nte ke ẹwet n̄kpọ nte enende ẹyọhọ babru Room Request kiet kiet oro ẹyakde ẹnọ. KÛWET sụk ibat mme asuanetop oro ẹyomde itieidụn̄, utọ nte “asuanetop 50,” ke mme ufan̄ oro ẹkpewetde enyịn̄ mbon emi. Ẹnyene ndiwet kpukpru ntọt nte eyede ye nte ẹkemede ndikot. Mbọk kụt ete ke ọmọnọ ọyọhọ ntọt kaban̄a enyịn̄, isua emana, eren m̀mê n̄wan, ye m̀mê owo oro oyomde itieidụn̄ edi asiakusụn̄ m̀mê asuanetop esop. Sịn nditọwọn̄ ke udịm enyịn̄ emi. Ke ini edem ndusụk esop ẹkesiwet enyịn̄ ikpọ owo kpọt. Emi esinam ọsọn̄ utom ndinam ndutịm nnọ itieidụn̄ oro ekemde. Edieke oyomde ufan̄ oro okponde akan se idude ke babru oro, da babru efen wet. Edieke ewetde awak akan enyịn̄ owo kiet ke babru oro, mbọk wụt itie ebuana mbon oro ẹyomde itieidụn̄ ke nnennen ufan̄ oro ẹnịmde. Ewetn̄wed esop ekpenyene ndikụt nte ke ẹwet n̄kpọ ẹyọhọ babru Room Request nte enende mbemiso enye ọnọde aka Itieutom Unọ Ufọkidụn̄ mbono. Ẹkpenyene ndibabak nnọ babru emi mbemiso mbono. MBỌK ẸKÛNỌ babru Room Request ẹsọk N̄ka. Ẹkpenyene ndinọ enye aka nnennen adres mbono oro ẹwụtde ke edem babru oro.
7 Isua kiet kiet, nnyịn imesiben̄e nditọete ndidiana kiet ye Itieutom Unọ Ufọkidụn̄ mbono. Ke nsụhọde n̄kaha nditiene ndausụn̄ emi anam ufọn iba:
8 Afam okụk ọnọ nditọete nnyịn: Ke ini nnyịn idianade kiet ye ndutịm N̄ka, okụk ufọk esisụhọde ọnọ nditọete nnyịn. Utu ke okụk nnyịn ndika mbịne mme enyene ebiet, ẹkeme ndida mmọ nnam n̄kpọ nte ọfọnde ndida n̄n̄wam mme ubon nditọete nnyịn ye utom ofụri ererimbot. Idem ọkpọkọm nnyịn ke idem nnyịn imekeme ndibọ itieidụn̄ oro ọsọn̄de urua, nnyịn ikpenyene ndinọ ukeme oro Itieutom Unọ Ufọkidụn̄ esịnde, ibetedem. Ẹtịn̄ ẹban̄a edu edikere mban̄a mbon efen emi ke 1 John 3:17, enye onyụn̄ edi edumbet emi odude ke 1 Corinth 10:24.
9 Owụt nsụkibuot ọnọ ndausụn̄ N̄ka: Emi ekpenyene ndidi kiet ke otu n̄kpọ emi ẹtịmde ẹbehe nnyịn. Mme Hebrew 13:17 ọdọhọ ete: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọ emi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdorike udori inọ mbufo.” Nte nditọete nnyịn ẹnamde ekese ndutịm ẹnọ mbono district nnyịn, nnyịn iyom ndinam mmọ ẹfiọk nte ke nnyịn imọnọ mmọ ọyọhọ ibetedem. Sia ẹyomde edidianakiet nnyịn ke n̄kpọ emi ke usen iba m̀mê ita kpọt kpukpru isua, emi edi eti usụn̄ ndinọ mme ukeme mmọ ibetedem. Idem edieke se nnyịn imekde ọkpọkpọ edide isio, eti uwụtn̄kpọ nnyịn, nte nditọete nnyịn ye ererimbot ẹkụtde, eyesịn udọn̄ ọnọ edu ima, edidianakiet, ye ibetedem.—Phil. 2:1-4.
10 San̄asan̄a Un̄wam: Ẹnam ndutịm emi ẹnọ sụk mbon oro ẹyomde san̄asan̄a un̄wam ẹto mbon en̄wen ke ndinam ndutịm mbono mmọ, akpan akpan ndutịm itieidụn̄. Mmọ ẹkeme n̄ko ndiyom un̄wam ke mme usụn̄ efen, etienede san̄asan̄a idaha mmọ. Edi mme asuanetop ye mme asiakusụn̄ emi ẹnịmde eti uwụtn̄kpọ kpọt, esịnede nditọ mmọ oro ẹdude eti uwem, emi ẹyomde san̄asan̄a un̄wam, emi Kọmiti Utom Esop onyụn̄ ọnọde unyịme, ẹdot ndibọ un̄wam ke idak ndutịm San̄asan̄a Un̄wam. Ẹkpenyene ndinam mme ndutịm eken ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbono esop, utu ke ndiyak mbiomo emi nnọ ndutịm mbono. Mbiowo ye mbon en̄wen emi ẹdiọn̄ọde ẹban̄a idaha owo oro ẹkeme ndinọ ima ima un̄wam. Emi esiwak ndiyom mme asuanetop ẹkere ẹban̄a udọn̄ mbon oro ẹdude ke utom uyọhọ ini, mbonusọn̄, mbon n̄kpọnnam, ye ndusụk mbon eken. Mme asuanetop ẹkeme ndinọ un̄wam ebe ke ndisan̄a ye mme utọ owo oro m̀mê ndise mban̄a se mmọ ẹyomde ke mme usụn̄ efen.—Jas. 2:15-17; 1 John 3:17, 18.
11 Nte ededi, Itieutom Unọ Ufọkidụn̄ oyodomo ndinọ mme asuanetop oro ẹyomde san̄asan̄a un̄wam ufọkidụn̄ oro ẹdotde edieke mbon oro ẹdude ke esop mîkemeke ndin̄wam mmọ. Mme asuanetop emi ẹkeme ndineme idaha mmọ ye ewetn̄wed esop. Ewetn̄wed ekpenyene ndineme ye Kọmiti Utom Esop man ẹse m̀mê esop eyekeme ndin̄wam mme owo emi ke ndise mban̄a edinọ mmọ itieidụn̄. Edieke esop mîkemeke ndinọ un̄wam oro ẹyomde, ewetn̄wed ekeme ndinọ utọ mbon oro babru Room Request kiet emi enye ewetde mme ikọ emi “SAN̄ASAN̄A UN̄WAM,” in̄wan̄-in̄wan̄ ke enyọn̄ akpa page oro. Mbon oro ẹyomde san̄asan̄a un̄wam kpọt ẹkpenyene ndiwet n̄kpọ nyọhọ san̄asan̄a babru emi. Owo oro esịnde eben̄e emi enyene ndiwet n̄kpọ nyọhọ enye. Ẹkpenyene ndifiak nyak enye nnọ ewetn̄wed, emi edisede m̀mê ẹwet n̄kpọ ẹyọhọ, enen, onyụn̄ odụn̄ọde mme idaha oro ẹnamde owo oro odot ndidi se ẹnọde utọ un̄wam oro. Ewetn̄wed ekpenyene ndinam mme idaha oro ẸN̄WAN̄A KE NDE KE NDE ke ufan̄ oro ẹnịmde ke edem babru emi. Ẹkpenyene ndibabak nnam kpukpru emi mbemiso mbono. Ewetn̄wed ndien ọyọnọ babru emi ẹsọk Itieutom Unọ Ufọkidụn̄. Ẹyesian owo oro esịnde eben̄e emi nnennen ẹban̄a itieidụn̄.
12 Mbon oro ẹyomde san̄asan̄a un̄wam IKPENYENEKE ndika itie mbono n̄koyom ufọkidụn̄ ke ini mmọ ẹsịmde, koro ana Itieutom Unọ Ufọkidụn̄ enyene unyịme otode Kọmiti Utom Esop.
13 Ediwak owo ẹmewụt esịtekọm ẹban̄a mme ndutịm oro ẹnamde ẹban̄a itieidụn̄ ke mme mbono. Ndi afo n̄ko omowụt esịtekọm aban̄a ediwak ndutịm oro ẹnamde ke ufọn fo? N̄ka enem esịt ndinọ mme itieidụn̄ oro ẹnemde owo ke idem ẹnyụn̄ ẹmemde urua ke mme ini mbono, ẹyakde kpukpru nnyịn iwụk ntịn̄enyịn ke mme ufọn eke spirit ke mbono ye ndutịm.
14 Ndidụk Mbono Efen: Ẹdeme esop kiet kiet ẹsịn ke mbono oro ekperede akan. N̄ka esida ibat asuanetop oro ẹdemede ẹdọn̄ ke mbono kiet kiet ebiere ibat mme andidụk man ẹnam ndutịm kaban̄a n̄kpọitie, ufọkidụn̄, mme n̄wed oro ẹkemde, ye ntre ntre eken. Nte ededi, edieke enyenede eti ntak ndidụk mbono efen ke ọwọrọde ọkpọn̄ enye oro ẹdemede fi ẹsịn onyụn̄ oyomde itieidụn̄, ewetn̄wed esop ekeme ndinọ fi idem babru Room Request kiet. Afo emekeme ndiwet n̄kpọ nyọhọ nnyụn̄ nnọ ewetn̄wed esịn ubọk mbemiso ọnọde enye ẹsọk mbono oro aduakde ndidụk.
15 Ẹnọ Idem Unyịme Unyịme nte Mme Anamutom Unyịmesịt: Ke ini mbono, mme anamutom unyịmesịt ke mme itie ikie ẹsin̄wam ke ndinam utom nte ọfọnde ke mme itieutom. Mme adaidaha ke efe mbono ye ke mme itie ubon ubomisọn̄ ẹsinọ ndausụn̄ ke itie oro ẹditiede ẹnyụn̄ ẹkpeme mme n̄kpọisan̄ nnyịn. Itieutom Unịm N̄kann̄kụk Asana enyene mbiomo ndimụm eti enyịn̄ nnyịn n̄kama kaban̄a usanaidem, anamde itie utuakibuot nnyịn asana akan nte ekedide. Nte nnyịn imekeme ndin̄wam mmọ emi m̀mê mme itieutom efen oro ẹyomde un̄wam nnyịn? Nte ọyọnọ idemfo unyịme unyịme ndinam n̄kpọ “ke esịt kiet” ye nditọete fo?—Zeph. 3:9.
16 Nte Mme Owo Ẹnen̄ede Ẹkụt Se Nnyịn Inamde? Ke mbono district isua oro osụk ebede, eren kiet emi eketrede ndikpep n̄kpọ ye Mme Ntiense Jehovah ke se ibede isua 20 akanam utom ke ufọkisen kiet. Enye ama etịn̄ ọnọ ndusụk Mme Ntiense ete ke imọ ikere idahaemi nte ikpọtọn̄ọde ukpepn̄kpọ Bible imọ ye nte ikpafiakde ika mme mbono esop. Ntak-a? Ke ntak ima ima usụn̄ oro Mme Ntiense ẹkenamde n̄kpọ ye enye ke mme usen emi mmọ ẹkedude ke ufọkisen oro.
17 Eren oro anyamde n̄kpọ ke ufọkisen kiet ama etịn̄ aban̄a nditọete nnyịn ete: “Mbufo ẹdi mfọnn̄kan otu oro ẹdan̄de ke ufọkisen nnyịn. Ikọt mbufo ẹnyene ime ẹnyụn̄ ẹfọn ido.” Mme ikọ emi ẹkenem Ete nnyịn eke heaven esịt didie ntem nte enye okụtde nte itienede item Jesus: “Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven”!—Matt. 5:16.
18 Nte ededi, nnyịn n̄ko ima ibọ ndiọi ntọt ito ndusụk mbono kaban̄a nte nditọwọn̄ ye ikpọ owo ẹkesan̄ade ẹkanade ke ini ndutịm osụk akade iso. Ẹma ẹkụt ndusụk owo ẹdede idap ẹnyụn̄ ẹfiakde ẹtie ke mme ufọkidụn̄ ye unana ntak ke adan̄aemi ndutịm osụk akade iso. Ndusụk mme andidụk mbono ẹma ẹwọrọ ẹken̄wọn̄ mmịn Efịk ke ini nduọkodudu ẹnyụn̄ ẹnyọn̄ ẹdi ndide idap ke edinam ama ọkọtọn̄ọ. Ẹma ẹtọt n̄ko ẹte ke ediwak nditọete ẹkesio ndise ke adan̄aemi ndutịm osụk akade iso. Ke otu mmọ emi ẹkedi mme ete ye eka ye nditọ ẹsiode ndise ubon. Ẹyak nnyịn ikûwụt unana esịtekọm inọ mme ndutịm Jehovah ke ndiyak mme utọ idaha emi ẹfiak ẹtịbe ke akamba mbono isua emi. Nnyịn imesịn udọn̄ inọ kpukpru owo ndinyene mfara ke idem. Ẹti mme ete ye eka n̄ko ndise mban̄a nditọ mmọ.—Phil. 1:9-11; 1 Cor. 10:31; n̄ko, men Leviticus 10:9 domo.
19 Ẹyak nnyịn iwụt ukem edu Edidem David, oro ekesitiede ekere aban̄a edika ufọk utuakibuot Jehovah ye idatesịt. Mme mbono district nnyịn ẹdi akpan ebiet emi udia eke spirit otode ye anana-mbiet ifet ndinyene ima ima itie ebuana. Mmọdo, nnyịn ke ufiopesịt imesịn udọn̄ inọ mbufo nditọn̄ọ nnam ndutịm ndidụk kpukpru ikpehe eke usen ita ke Mbono District “Ifịk Ifịk Mme Anditan̄a Obio Ubọn̄” eke isua emi!
[Ntọt Ẹnọde Otu Mbiowo: Ke ẹbọde esịne-esịt emi, mbọk ẹtọt ebiet ye mme usenọfiọn̄ emi N̄ka edemede esop mbufo esịn ke Esoputom efen ye ke Ukpepn̄kpọ Enyọn̄-Ukpeme oro etienede. Ọkpọfọn ndidụri udịm ke obio mbono ye mme usenọfiọn̄ oro ẹdemede esop mbufo ẹsịn nnyụn̄ ndian ikpehe esịne-esịt emi ke obukpọk ntọt.
Ewetn̄wed esop ekpenyene ndise mban̄a n̄kpọ ẹban̄ade mme mbono ye mme ntọt mbono ke mme mbono esop ini iso. Kpukpru mbiowo ẹnyene ndidiana kiet ọyọhọ ọyọhọ man ẹkụt ẹte ke ẹse ẹban̄a mme n̄kpọ ẹban̄ade mbono usọp usọp, ke usụn̄ emi esịnede ufiop, ifịk, ye nte ọfọnde.]
[Ekebe ke page 3]
Mme Ini Edinam
Friday: 9:20 a.m. – 4:40 p.m.
Saturday: 9:00 a.m. – 4:20 p.m.
Sunday: 9:00 a.m. – 3:20 p.m.