“Anie Obon Ntọi Mbara?”

ỌKỌMBỤK n̄kpọntịbe kiet eke ọyọhọ isua ikie 19 eketịn̄ aban̄a ntọi mbara nte “mmọn̄ mmọn̄ n̄kpọuto isọn̄, emi ofụm anamde.” Andibot nnyịn ama obụp ete-ekpụk eset oro Job ete: “Anie obon ntọi mbara?” (Job 38:28) Abasi akanam Job eti nte ke ọsọn̄urua mbara ọkọtọn̄ọ oto enye.

Ke osiode nsem nsem uyai esie emi ebietde n̄kpọuto efep, ke Bible ẹbuan mbara ye edidiọn̄, nsehe, eduek, ye edinyan̄a uwem. (Genesis 27:28; Deuteronomy 33:13, 28; Zechariah 8:12) Ke ufiop ufiop ini unana edịm ke Israel, “mbara Hermon” akanam mme ikọn̄ ye mme owo ke idụt oro ẹka iso ẹdu uwem. Etịn̄e obot Hermon oro akai ye snow ẹfụkde ke osụk ososion̄o uye oro esibohode man akabade akpakịp mbara. David andiwet psalm ekemen nsọn̄idem oro mbara emi esinọde okodomo ye inem inem ifiọk n̄kpọntịbe eke edidụn̄ ọtọkiet ye mme ekemmọ andituak ibuot nnọ Jehovah.—Psalm 133:3.

Item oro prọfet Moses ọkọnọde Israel ẹketie sụn̄sụn̄ ẹnyụn̄ ẹnọ nsọn̄idem, nte ntọi mbara. Enye ọkọdọhọ ete: “Item mi eyedep nte edịm, uyo mi ọyọtọi nte mbara, nte asak-asak edịm ke mbiet, ye nte ọkpọsọn̄ edịm ke ikọn̄.” (Deuteronomy 32:2) Mfịn, Mme Ntiense Jehovah ke ẹkwọrọ ọnọ-uwem eti mbụk aban̄ade Obio Ubọn̄ Abasi ke ofụri isọn̄. (Matthew 24:14) Abasi ke ọnọ ikot ete: “Di. Owo eke itọn̄ asatde, yak enye edi. Owo eke amade, yak edi edibọ mmọn̄ uwem ke ikpîkpu.” (Ediyarade 22:17) Ediwak miliọn owo ke kpukpru idụt ke ẹnyịme ikot emi ndibọ nsọn̄idem eke spirit nto Abasi, emi ekemede ndikama uwem ke nsinsi.