Ndi Hell Odu? Nso ke Bible Etịn̄ Aban̄a Hell?

Se Bible etịn̄de

Ediwak Bible oro ẹkekabarede ke Ikọmbakara, utọ nte Bible King James, esịn ikọ oro “hell” ke ediwak itie. (Psalm 16:10; Utom 2:27 a) Nte ndise emi odude ke ibuotikọ emi owụtde, ediwak owo ẹnịm ke hell edi ebiet emi ẹdidade ikan̄ ifọp mme idiọkowo ke nsinsi. Edi, ndi se Bible ekpepde edi oro?

Ke ibuotikọ emi

Ndi hell edi ebiet emi ẹditụhọrede mme owo ke nsinsi?

Ihlh. Ndusụk edikabade Bible esịn ikọ emi “hell” ke itie ikọ Hebrew emi “Sheol” m̀mê ikọ Greek emi “Hades” emi ẹwọrọde “Udi,” m̀mê ebiet emi ẹsibụkde mme owo. Bible owụt ke mbon oro ẹdude ke “Udi” ikopke ubiak aba.

Mme akpa n̄kpa idiọn̄ọke n̄kpọ ndomokiet inyụn̄ ikemeke ndikop ubiak. “Koro baba utom, baba uduak, baba ifiọk, baba ọniọn̄ mîdụhe ke Udi m̀mê [hell].” (Ecclesiastes 9:10, Bible Douay-Rheims) Owo isikopke nte mbon emi ẹdọn̄ọde ke udi ẹfioride n̄kpo. Utu ke oro, Bible ọdọhọ ete: “Bụt akpakam anam mme idiọkowo, mmọ ẹkpekam ẹdobo ke Udi m̀mê [hell, Bible Douay-Rheims].”—Psalm 31:17; Psalm 115:17.
Abasi ọkọdọhọ ke utịp idiọkn̄kpọ edidi n̄kpa, idịghe mmọ ndibọ ufen ke hell. Abasi ọkọdọhọ Adam ke enye ama abiat ibet imọ ke enye ayakpa. (Genesis 2:17) Abasi ikọdọhọke ke mmọ ẹyebọ ufen ke hell ke nsinsi. Ke Adam ama akanam idiọkn̄kpọ Abasi ama etịn̄ utịp idiọkn̄kpọ esie ọnọ enye, ete: “Koro afo edide ntan, oyonyụn̄ afiak ke ntan.” (Genesis 3:19) Enye ayakpa. Ekpedi abasi okoyom Adam ọbọ ufen ke hell, Enye ekpeketịn̄. Abasi ikpụhọkede utịp idiọkn̄kpọ tutu emi. Ke ediwak isua ama ekebe tọn̄ọ Adam akanam idiọkn̄kpọ, Abasi ama ọnọ owo kiet emi eketienede ewet Bible spirit esie, ewet ete: “N̄kpọ eyenutom idiọkn̄kpọ edi n̄kpa.” (Rome 6:23) Ufen idiọkn̄kpọ en̄wen idụhe, sia Bible ọdọhọ ete: “Ikpe idiọkn̄kpọ etebe owo emi ama akakpa.”—Rome 6:7.
Abasi enen̄ede asua nte mme owo ẹdọhọde ke Enye editọtụhọde mme owo ke nsinsi. (Jeremiah 7:31; 32:35) Utọ ikọ oro ikemke ye se Bible ekpepde. Bible ọdọhọ ete: “Abasi edi ima.” (1 John 4:8) Abasi oyom ikpono Enye ke ntak emi imade Enye, idịghe ke ntak emi ikopde ndịk Enye nditụhọde nnyịn ke nsinsi.—Matthew 22:36-38.
Nti owo ẹma ẹka hell. Mme edikabade Bible emi ikọ oro “hell” esịnede owụt ke nti owo utọ nte Jacob ye Job, ẹma ẹdiọn̄ọ ke iyaka hell usen kiet. (Genesis 37:35; Job 14:13) Bible akam ọdọhọ ke Jesus Christ ama odu ke hell ini emi enye akakpade tutu ẹnam enye eset. (Utom 2:31, 32) Oro ọwọrọ ke ikọ oro “hell” ke mme Bible emi, esida aban̄a Udi.

Nso ke uwutn̄kpọ Jesus oro aban̄ade owo inyene ye Lazarus ọwọrọ?

Jesus ọkọnọ uwụtn̄kpọ emi, ndien enye odu ke Luke 16:19-31. Uwụtn̄kpọ edi mbụk oro ẹsinọde ndida n̄kpep mme owo n̄kpọ, nnyụn̄ nnam mmọ ẹkụt nte Abasi adade n̄kpọ. Ntre, uwụtn̄kpọ owo inyene ye Lazarus idịghe n̄kpọ emi eketịbede. (Matthew 13:34) Edieke oyomde ndinen̄ede ndiọn̄ọ n̄kpọ mban̄a mbụk emi, kot ibuotikọ emi “Who Were the Rich Man and Lazarus?”

Ndi owo ndika hell ọwọrọ ke enye adian̄ade ọkpọn̄ Abasi?

IhIh. Ndikpep ke mbon oro ẹkpade ẹsidiọn̄ọ ke mmimọ imadian̄ade ikpọn̄ Abasi ikemke ye se Bible ekpepde, sia Bible ekpep ke mbon oro ẹkpan̄ade idiọn̄ọke n̄kpọ ndomokiet.—Psalm 146:3, 4; Ecclesiastes 9:5.

Ndi akanam owo oto hell edi?

Ih. Bible anam nnyịn idiọn̄ọ mbụk owo usụkkiet emi ẹkekade Udi, emi ẹkabarede nte “hell” ke ndusụk Bible, ekem ẹnam mmọ ẹset.b Ekpedi mmọ ẹma ẹdiọn̄ọ n̄kpọ ini mmọ ẹkedude ke hell, mmọ ẹkpeketịn̄ se iketịbede inọ mmọ dọ ini ẹkenamde mmọ ẹset. Idụhe owo ndomokiet ke otu mmọ oro eketịn̄de ke ẹma ẹtụhọde imọ m̀mê ke imọ ima idiọn̄ọ n̄kpọ ndomokiet. Ntak-a? Nte Bible esisụk etịn̄de, mmọ ikọdiọn̄ọke n̄kpọ ndomokiet, eketie nte mmọ ẹde ọkpọsọn̄ “idap.”—John 11:11-14; 1 Corinth 15:3-6.

a Ediwak edikabade Bible ikọ Efịk isịnke ikọ emi “hell”, utu ke oro, mmọ ẹsịn utọ ikọ nte “udi,” m̀mê “obio ekpo.”

b Kot 1 Ndidem 17:17-24; 2 Ndidem 4:32-37; 13:20, 21; Matthew 28:5, 6; Luke 7:11-17; 8:40-56; John 11:38-44; Utom 9:36-42; Utom 20:7-12.

Mme itie Bible oro ẹtịn̄de ẹban̄a hell m̀mê Udi

Job 14:13: “Afo akpakam edịp mi ke Udi m̀mê [“hell,” Bible Douay-Rheims], . . . ndien afo enịm ini ọnọ mi onyụn̄ eti mi!”

Se Ọwọrọde: Eti owo oro Job ama ọdiọn̄ọ ke hell m̀mê Udi ayanam ubiak esie etre ndien ke Abasi ayanam enye afiak edidu uwem.

Psalm 145:20: “Jehovah ekpeme kpukpru mbon oro ẹmade enye, edi enye oyosobo kpukpru mme idiọkowo.”

Se Ọwọrọde: Abasi oyosobo mme idiọkowo efep. Enye idiyakke mmọ ẹka iso ẹdu uwem ke hell man otụhọde mmọ.

Ecclesiastes 9:10: “Koro baba utom, baba uduak, baba ifiọk, baba ọniọn̄ mîdụhe ke Udi m̀mê [“hell,” Bible Douay-Rheims], kpa ebiet emi afo akade.”

Se Ọwọrọde: Mbon oro ẹdude ke Udi m̀mê hell, idiọn̄ọke n̄kpọ ndomokiet inyụn̄ ikemeke ndibọ ufen. Edi, mbon oro andiwet Bible emi eketịn̄de aban̄a esịne nti owo n̄kọ.

Utom 2:31: “Enye ama ebem iso okụt onyụn̄ etịn̄ aban̄a ediset ke n̄kpa Christ, ete ke Abasi ikọkpọn̄ke enye ke Udi.”

Se Ọwọrọde: Jesus Christ ama odu ke hell m̀mê Udi ini enye akakpade.

Rome 6:23: “Koro n̄kpọ eyenutom idiọkn̄kpọ edi n̄kpa.”

Se Ọwọrọde: Utịp emi owo edibọde enye ama anam idiọkn̄klpọ edi n̄kpa, idịghe nditụhọde enye ke hell.

Ediyarade 20:13: “N̄kpa ye Udi ẹnyụn̄ ẹsana mme akpan̄kpa emi ẹdude mmọ ke esịt ẹyak.”

Se Ọwọrọde: Mbon oro ẹkpan̄ade ẹdu ke hell. Ẹyenam mmọ ẹset ẹfiak ẹdidu uwem.

Ediyarade 20:14: “Ẹtop n̄kpa ye Udi ẹdọn̄ ke n̄kpọdiọhọ ikan̄.”

Se Ọwọrọde: Ke ẹma ẹkenam mme akpan̄kpa ẹset, ẹyesobo hell m̀mê Udi ẹfep ke nsinsi, nte n̄kpọ eke ẹdade ikan̄ ẹfọp enye. Ekem, n̄kpa oro idiọkn̄kpọ Adam akadade edi ididụhe aba.—Rome 5:12.

Nte ukpepn̄kpọ ikan̄ hell ọkọtọn̄ọde

Mbon oro mîkponoke Abasi ẹketọn̄ọ: Mbon Egypt eset ẹma ẹnịm ke hell emi ẹdidade ikan̄ ita mme owo odu. N̄wed emi ẹkotde Ȧm-Ṭuat (Amduat), emi mme ewetbụk eset ẹdọhọde ke ẹkesio n̄kpọ nte isua 3,600 etịn̄ aban̄a mbon oro “ẹditomode idọn̄ ke obube ikan̄ . . . Ndien ke mmọ idikemeke ndibọhọ mfehe.”—The Egyptian Heaven and Hell.

Mme Christian ke eyo mme apostle ikekpepke utọ n̄kpọ oro: N̄wed A Dictionary of Christian Theology ọdọhọ ete: “Enen̄ede ọfọn, sia ke O[bufa] T[estament] imokụt ke mme Christian ke eyo mme apostle ikesikwọrọke iban̄a ikan̄ hell.”

Ukpepn̄kpọ mbon Greek ama ọtọn̄ọ ndikịm mme owo enyịn: Encyclopædia Britannica ọdọhọ ete: “Ke n̄kpọ nte isua 1,900 emi ebede, mme Christian emi ẹkesitienede ẹbọ ukpep mbon Greek ẹma ẹtọn̄ọ ndimen se mmọ ẹkekpepde mbuak ye se Bible ekpepde . . . Ukpepn̄kpọ emi mmọ ẹkesimade ẹkan ekedi ukpepn̄kpọ Plato.” Enye ekesikpep ke ẹditọtụhọde mme owo ẹma ẹkpa. N̄wed The History of Hell ọdọhọ ete: “Ke otu mbon akwaifiọk Greek owo emi akanamde mme owo ẹnen̄ede ẹnịm ukpepn̄kpọ Hell ekedi Plato.”

Ẹma ẹdinam hell etie nte ebiet emi edidade itụhọde mme owo: Ke eyo emi ẹkesikotde Spanish Inquisition, oro edi ini mbon Spain ẹkesinọde mbon oro mîkamaha ndinịm se ufọkabasi ẹkpepde ufen, mmọ ẹma ẹsikọn̄ mme owo ke eto ẹfọp ẹwot. Ndien mmọ ẹkedọhọ ke ndinam emi ekedi “nditabi nse nte hell editiede.” Mmọ ẹkekere ke ndinam emi ayanam mbon oro mîkamaha ndinịm se mme ufọkabasi ẹkpepde ẹkpụhọpde mbemiso mmọ ẹkpade. (The Spanish Inquisition, emi Jean Plaidy ewetde.) Ukem se Ọbọn̄ An̄wan Mary I, ke England akanamde edi oro. Enye ama ọkọn̄ mbon Protestant 300 ke eto ọfọp owot. Enye ekenịm ke sia “ukpọn̄ mbon oro mîmaha ndinịm se ufọkabasi ẹkpepde ẹdibọde ufen ke hell, ke n̄kukụre se imọ ikemede ndinam man ikeme ndinọ mmọ ukem ufen oro Abasi edinọde mmọ edi nditọn̄ọ ke isọn̄ mfọp mmọ n̄wot mbemiso mmọ ẹkade hell.”—Universal History, emi Alexander Tytler ewetde.

Mme ukpụhọde oro ẹnamde mfịn: Mfịn, ndusụk ufọkabasi ẹnam ukpepn̄kpọ hell afiak efere. Mmọ inamke emi ke ntak emi ẹnịmde ke ukpepn̄kpọ hell isịneke ke Bible, edi mmọ ẹnam emi man afiak efere mbon ufọkabasi mmọ ke idem. (2 Timothy 4:3) Professor Jackson W. Carroll ọdọhọ ete: “Mme owo ẹyom ndikpono Abasi emi ọfọnde ido, onyụn̄ edide se ẹsan̄ade ẹkpere . . . Mme owo inen̄ekede itịn̄ iban̄a idiọkn̄kpọ ye ufen oro enye akamade aba mfịn.”