Jehovah Otịm Ọdiọn̄ọ Nnyịn!

JEHOVAH ke akpanikọ ọdiọn̄ọ nnyịn, akpan akpan edieke nnyịn idide mme anam-akpanikọ ikọt esie. Mme ata ufan nnyịn, iman, idem mme ete ye eka nnyịn, itịmke idiọn̄ọ nnyịn nte enye ọdiọn̄ọde. Kamse, Abasi ọdiọn̄ọ nnyịn ọfọn akan nte nnyịn idiọn̄ọde idem nnyịn!

Mfọnmma ifiọk oro Jehovah enyenede aban̄a ikọt esie edi se ẹkewụtde mfọn mfọn ke Psalm 139. Nso ke David eketịn̄ ke Psalm oro? Ndien nso ke ifiọk oro Abasi enyenede aban̄a nnyịn okpotụk ikọ ye edinam nnyịn?

Adan̄a Nte Jehovah Ọdiọn̄ọde!

Sia Abasi edide Andibot nnyịn, nnyịn ikpenyene ndidori enyịn enye ndinyene ọyọhọ ifiọk mban̄a nnyịn. (Utom 17:24-28) Ntre, David ama ekeme ndidọhọ ete: “O Jehovah, afo ọmọdụn̄ọde mi, omonyụn̄ ọfiọk [mi].” (Psalm 139:1) Ifiọk oro Abasi ekenyenede aban̄a David ekebiet enye oro ẹnyenede ẹto ọyọhọ ndụn̄ọde. Ke okopde inemesịt ke Jehovah ndidụn̄ọde enye, andiwet Psalm ama osụk ibuot ọyọhọ ọyọhọ ọnọ ukara ye ndausụn̄ Abasi. Ukem ntre, Mme Ntiense Jehovah ‘ẹsikpat usụn̄ mmọ ẹnọ Jehovah, ẹnyụn̄ ẹbuọt idem ye enye,’ ẹnịmde ke akpanikọ ẹte ke enye kpukpru ini eyenam se inende. (Psalm 37:5) Ekikere edidu ke ifụre ke n̄kan̄ spirit odu nnyịn ke esịt koro iyomde uten̄e Abasi ada nnyịn usụn̄, ndien nnyịn ye unyịmesịt imosụk ibuot inọ ndausụn̄ Abasi. (Mme N̄ke 3:19-26) Ukem nte David, nnyịn imekeme ndibọ ndọn̄esịt nto ifiọk oro nte ke Abasi okụt nnyịn, ọdiọn̄ọ mme mfịna nnyịn, onyụn̄ odu ke mben̄eidem kpukpru ini ndin̄wam nnyịn.

“Afo ọmọfiọk nte nsụhọrede ntie, ye nte ndahade nda,” ntre ke andiwet Psalm ekewet. (Psalm 139:2a) Abasi ama ọdiọn̄ọ kpukpru n̄kpọ aban̄a mme edinam David, utọ nte enye ndisụhọde ntetie ke usen kiet kiet oro utom okụrede ye enye ndidaha nda ke ama ekede idap okoneyo. Edieke nnyịn idide Mme Ntiense Jehovah, ẹnịm ke akpanikọ ẹte ke Abasi otịm ọfiọk nnyịn n̄ko.

David ama onyịme ete: “Afo omotịm ọfiọk ekikere mi nsannsan.” (Psalm 139:2b) Okposụkedi Abasi odụn̄de ke mme heaven oro otịmde oyom usụn̄ ọkpọn̄ iso isọn̄, enye ama ọdiọn̄ọ se David ekekerede. (1 Ndidem 8:43) Utọ ikike ntre ikpakpaha nnyịn idem, koro Jehovah “ese esịt.” (1 Samuel 16:7; Mme N̄ke 21:2) Sia Abasi otịmde ọfiọk ekikere nnyịn, emi ekpenyene ndinụk nnyịn ndiwụk ekikere ke mme n̄kpọ oro ẹdide edisana, oro eti ido odude, itoro onyụn̄ odude. Ndien odot didie ntem nte nnyịn kpukpru ini isiyarade ekikere nnyịn iwụt ke akam ofụri esịt man nnyịn ikeme ndinyene ndausụn̄ Abasi ye “emem Abasi”!​—Philippi 4:6-9.

Andiwet Psalm ama adian do ete: “Afo otịm onyụn̄ọ [ese] isan̄ mi ye ebiet eke nnade, onyụn̄ ọfiọk kpukpru usụn̄ mi.” (Psalm 139:3) Ndinyụn̄ọ nse isan̄ David ke ebiet kiet sịm eken ye ebiet eke enye anade ke adan̄aemi ọduọkde odudu, nte an̄wan̄ade ọwọrọ nte ke Jehovah ama otịm ese kpukpru se andiwet Psalm akanamde. Ata Edikon̄ okodomo kpukpru edinam David man ọdiọn̄ọ ata ido unam n̄kpọ esie. Abasi ama enyene ọyọhọ ifiọk aban̄a mme usụn̄ David, ye mme afan̄ oro enye eketienede ke uwem. Ke ini Ete nnyịn eke heaven odụn̄ọrede nnyịn ke ukem usụn̄ oro, enye akpakam okụt ete ke nnyịn ke inam n̄kpọ esie ke edinam akpanikọ ke inyụn̄ ikaiso idu ke “usụn̄ edinen ido” oro adade osịm nsinsi uwem.​—Mme N̄ke 12:28.

Sia n̄kpọ ndomokiet oro enye ekpetịn̄de mîkpedịbeke Abasi, David ọkọdọhọ ete: “Koro baba ikọ kiet mîdụhe mi ke edeme; sese, Jehovah, afo ọmọfiọk mmọ kpukpru.” (Psalm 139:4) Edieke mfịghe otịmde efịk nnyịn tutu eyedi se nnyịn mîfiọkke se nnyịn ikpetịn̄de ke akam, spirit Jehovah “[eye]nam n̄kpeubọk ọnọ nnyịn ye mmụm eke owo mîkemeke nditịn̄.” (Rome 8:26) Ke nneme oro inemede, Abasi ọdiọn̄ọ mme se ikoyomde nditịn̄ edi oro nnyịn mîtịn̄ke, koro enye ọdiọn̄ọ mme ata ntụk nnyịn. Ndien edieke nnyịn inyenede ima oro ọkọn̄ọde ke ‘mbuọtidem oro mîsan̄ake ye mbubịk,’ nnyịn tutu amama ididomoke ndida “nneminua“ mbian̄a mmọ en̄wen.​—1 Timothy 1:5; Rome 16:17, 18.

David ama adian do ete: “Afo amakan mi okụk ke iso ye ke edem; omonyụn̄ ada ubọk fo odori mi ke idem.” (Psalm 139:5) Ke nditịm ntịn̄, Jehovah ama akan David okụk nte obio oro ẹkande ẹkụk ke ekọn̄. Nte an̄wan̄ade, andiwet Psalm ama ọdiọn̄ọ ete ke adan̄a odu ke se imọ ikemede ndinam ke eyouwem imọ. Enye n̄ko ama ọdiọn̄ọ ete ke owo ikemeke-keme ndifehe nsop ke enyịn ye ubọk Abasi. Nte ededi, David ikodomoke ndifehe nsop ntre, nnyịn n̄ko inyụn̄ inamke. Edi ẹyak nnyịn kpukpru ini ikama idem nnyịn ekekem ye ifiọk oro inyenede nte ke ubọk Jehovah odoro nnyịn ke idem nte Mme Ntiense esie.

Ifiọk oro Abasi ekenyenede aban̄a David ama anam David ọyọhọ ye uten̄e. Ntre enye eketịn̄ ete: “Ifiọk emi edi utịbe akan mi; enye omokon̄, n̄kemeke ndisịm enye.” (Psalm 139:6) Ifiọk oro Abasi enyenede aban̄a nnyịn nte owo kiet kiet edi ata ọyọhọ ọyọhọ tutu eyedi se nnyịn mîkemeke ndidụn̄ọde, inamke n̄kpọ m̀mê nso ifiọk eyouwem m̀mê ukpep ke ibọ. Sia enye okponde akan ifiọk owo, nnyịn imekeme ndinịm ke akpanikọ nte ke Jehovah ọmọfiọk se idide mfọn n̄kan n̄kpo inọ nnyịn. Ntre, edieke nnyịn ibọn̄de akam iben̄e n̄kpọ ndien ibọrọ edi baba, ẹyak nnyịn isụk ibuot inọ uduak Abasi. Nte apostle John ekewetde ete: “Edieke nnyịn iben̄ede n̄kpo ekededi nte ekemde ye uduak Esie, Enye ọbiọn̄ utọn̄ ke eben̄e nnyịn.”​—1 John 5:14.

Owo Ifeheke Ibọhọ Spirit Abasi

Ikụreke ke Jehovah ndibọrọ akam mme anam-akpanikọ ikọt esie edi spirit esie n̄ko anam utom kaban̄a mmọ onyụn̄ an̄wam mmọ ndinam uduak esie. Ke akpanikọ, David okobụp ete: “Ami n̄keme ndika m̀mọ̀n̄ n̄kpọn̄ spirit fo? Ndifehe n̄ka m̀mọ̀n̄ mbọhọ iso fo? (Psalm 139:7) Andiwet Psalm ama ọdiọn̄ọ ete ke imọ ikemeke ndifehe mbọhọ spirit Jehovah, m̀mê anamutom odudu, emi ekemede ndisịm idem akpatre ikpehe ekondo. Ndien owo ndomokiet ikemeke ndifehe mbọhọ iso Abasi, oro edi, ndisop enye ke enyịn. Edi akpanikọ, “Jonah [ama] adaha ke enyọn̄ ete ifehe ika Tarshish, ikpọn̄ iso Jehovah,” edi prọfet oro ikekemeke ndifehe mbọhọ akamba iyak oro Abasi ekemekde ndimen enye mmen m̀mê ndinam ibat ke utom oro Abasi ọkọdọn̄de enye. (Jonah 1:3, 17; 2:10–3:4) Ntre eyak nnyịn iberi edem ke spirit Jehovah ndin̄wam nnyịn inam utom oro Abasi ọnọde nnyịn.​—Zechariah 4:6.

Sia David ọkọdiọn̄ọde ete ke owo ikemeke ndifehe mbọhọ Abasi, enye ọkọdọhọ ete: “Mma ndọk ke enyọn̄, afo odu do: mma mbri mbri mi ke obio ekpo [Sheol], sese, afo odu do.” (Psalm 139:8) Ke eyo andiwet Psalm, ‘ndidọk ke enyọn̄’ ọkọwọrọ ndidọk ikpọ obot, emi idiọk enyọn̄ esiwakde ndifụk etịn̄e. Kpa ye oro, edieke ekpedide nnyịn idoro ke etịn̄e n̄kon̄ n̄kan enyọn̄ obot, spirit Abasi ikpetreke ndisịm nnyịn. Akande oro, enye ikpetreke ndikụt nnyịn edieke nnyịn ikpebride mbri nnyịn ke Sheol, emi ke ndamban̄a usụn̄ adade aban̄a ata akpatre esịt isọn̄.​—Men Deuteronomy 30:11-14; Amos 9:2, 3 domo.

“Nyemen mba usiere; nyedụn̄ ke ufọt mmọn̄ ibiba,” ntre ke David ọkọdọhọ, “do n̄ko ke ubọk fo ada mi usụn̄, nnasia fo omụm mi akama.” (139:9, 10) Nso ke “mba usiere” ọwọrọ? Ikọ emi edi ikọ uto oro asiakde nte un̄wana usiere etiede, nte n̄kpọ eke enyenede mba, atarade usọp usọp oto edem usiahautịn okosịm edem usoputịn. Edi nso edieke David ekpekemede ndida mba usiere nnyụn̄ n̄kosịm ata utịt inyan̄ibom m̀mê isuo ke edem usoputịn? Enye okposụk esesịne ke ubọk, m̀mê ukara ye ndausụn̄ Abasi. Ebede ke spirit Esie, Jehovah okpodu do ndikpeme andiwet Psalm ke mbom.​— Psalm 51:11.

Ekịm Idịghe Mfịna inọ Abasi

Anyan usụn̄ m̀mê ekịm ikemeke ndinam Abasi okûsan̄a ekpere owo. Ntre David adian do ete: “Ndien ndọhọ, nte, ‘N̄kọm ekịm ofụk mi,’ kpa okoneyo akabade edi un̄wana akan mi okụk. Kpasụk ekịm inamke okịm ọnọ fi; edi okoneyo ayama nte uwemeyo; ekịm ebiet un̄wana.” (Psalm 139:11, 12) ọkpọsọn̄ ekịm ekeme ndifụk owo ofụri ofụri, nte n̄kpọ eke owo obụhọde ke enye. Edi ye Jehovah, owo eyewọrọ ọbiọn̄ọde nte n̄kpọ eke enye adade ke un̄wana uwemeyo. Owo ndomokiet ikemeke ndidịp Abasi idiọkn̄kpọ ekededi oro enye akanamde ke ekịm.​—Isaiah 29:15, 16.

Ekịm ikemeke ndikpan Andibot nnyịn ndikụt n̄kpọ. Kaban̄a emi David ọkọdọhọ ete: “Koro afo emenyene ekpụt mi: omofụk mi ke idịbi eka mi. Nyekọm fi, koro nnyenede ndyọ ye ndịk; se afo anamde edi utịbe; ukpọn̄ mi onyụn̄ ọfiọk enene. Idem mi ikedịbeke fi, ke ini ẹkenamde mi ke ndịbe ebiet, ẹnyụn̄ ẹbanade mi ke idak isọn̄. Enyịn fo ẹkekụt mi ke mîtịmke inam mi ima; ndien ẹkewet mmọ kpukpru ẹsịn ke n̄wed fo, mmọ [mme mbak idem] ẹsiak mi usen, ke ini baba mmọ [akpan mbak idem] kiet mîka-idụhe kan̄a.”—Psalm 139: 13-16.

Jehovah Abasi, emi ọdiọn̄ọde mme ntotụn̄ọ ekikere nnyịn, akanam ekpụt David. Sia odude ke ata esịt idem, ekpụt ẹdu ke otu ndido idem ẹmi ẹtịmde ẹdịbe mînyụn̄ idịghe se ẹkụtde, edi Abasi ekeme ndikụt mmọ. Enye ekeme ndikam nda n̄kụt esịt idịbi eka-eyen. Kamse, Jehovah ekeme ndikụt ọbọn̄ oro ọkọride! Ndikekere mban̄a utịbe utịbe usụn̄ emi ẹkenamde enye ke idịbi ama onụk David nditoro Andinam enye. Andiwet Psalm nte an̄wan̄ade eketịn̄ otụk idịbi eka esie nte “idak isọn̄.” Do, sia odịbede owo ke enyịn edi Abasi ekemede ndikụt, ọkpọ, osịp, obụk, ye usan̄a-iyịp nsekeyen, ẹdi se ẹbanade ọtọkiet.

Mbemiso mbak idem David ẹkekabarede ẹda atai atai ke idịbi eka esie, Abasi ama ọdiọn̄ọ nte enye editiede. Ntak-a? Koro n̄kọri ọbọn̄ esitiene akpan ndutịm, nte n̄kpọ eke etienede item” oro ẹkewetde ke n̄wed. Didie ke emi owụt ifiọk ye ukeme Abasi ntem ndikụt idem mme n̄kpọ eke ẹdịbede! Emi n̄ko ekpenyene ndinam nnyịn idiọn̄ọ nte ke Abasi okobot kpukpru orụk owo onyụn̄ edi enye akanam utịbe utịbe usụn̄ usion̄o nditọ ndi oro osụn̄ọde ke nnyịn ndidi ndidu nte mme owo kiet kiet.

Mme Ekikere Abasi Ẹsọn̄ Urua Didie!

Ndikere nte nsekeyen ọkọride ke idịbi ama anam David ekere aban̄a ọniọn̄ Abasi. Ntem, andiwet Psalm ama ofiori ete: “Ndien, O Abasi, mme ekikere fo ẹsọn̄ mi urua didie! Ibat mmọ okpon didie!” (Psalm 139: 17, 18a) David ama abat mme ekikere Jehovah Abasi ke ọsọn̄urua n̄kpọ, ndien mmọ ẹwak ata etieti tutu eyedi se ‘uwak ibat mmọ’ otụkde enye ke idem. Edieke mme ekikere Abasi edide ọsọn̄urua n̄kpọ ọnọ nnyịn, nnyịn iyedi ifịk ifịk nditọ ukpepn̄kpọ N̄wed Abasi. (1 Timothy 4:15, 16) Mme ekikere esie oro ẹwetde-wet “ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido; man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.”​—2 Timothy 3:16, 17.

Kaban̄a mme ekikere Jehovah, David ọkọdọhọ ete: “Nyebat mmọ, edi mmọ ẹwak ẹkan ntan: ndemede, ndien nsụk ndodu ye afo.” (Psalm 139:18b) Sia mme ekikere Abasi ẹwakde ata etieti ẹkan idem ntan, edieke David ọkpọtọn̄ọde ndibat mmọ ke usiere usenubọk, enye ikpokụreke ke ini udụk idap. Ke edemerede ke usenubọk, enye okposụk ododu ye Jehovah. Oro edi, enye okposụk ababat mme ekikere Abasi. Ke akpanikọ, sia nnyịn iyomde ndausụn̄ Jehovah, editie n̄kere mme ekikere ye uduak esie ke akam ekpedi se itịmde iyọhọ esịt nnyịn nte akpatre n̄kpọ ke okoneyo ye nte akpa n̄kpọ ke usenubọk.​—Psalm 25:8-10.

Usiene Enyenede Mme Idiọkowo

Sia Abasi ọnọde ọniọn̄ ọniọn̄ ndausụn̄, didie ke David ekese mbon oro ẹsịnde ndausụn̄ Abasi? Enye ọkọbọn̄ akam ete: “O Abasi, n̄kọm afo eyewot oburobụt owo! Mbufo, mbon afai, ẹdaha mi ndien ke usụn̄; kpa mme asua fo ẹmi ẹdọhọde idiọk ẹban̄a fi, ẹnyụn̄ ẹtomode fi ẹsịn ke nsu.” (Psalm 139:19, 20) David ikodomoke ndiwot mme idiọkowo edi ọkọbọn̄ akam man mmọ ẹkpebọ usiene ke ubọk Jehovah. Nnyịn ikpenyene ukem edu oro. Ke uwụtn̄kpọ, nnyịn imekeme ndibọn̄ akam nyom uko man itịn̄ ikọ Abasi ke ini mme asua ẹkọbọde nnyịn. (Utom 4:18-31) Edi nnyịn iyomke usụn̄ ndiwot mme asua nnyịn, koro nnyịn imọdiọn̄ọ ite ke Jehovah ọkọdọhọ ete: “Usiene edi okịm, nyesio usiene.” -Mme Hebrew 10:30; Deuteronomy 32:35.

Edieke Abasi okpowotde mme idiọkowo, uto mbon afai oro ẹkpedaha David ke usụn̄. Mmọ ẹma ẹnyene ubiomikpe ke ndiduọk iyịp owo, ẹnyụn̄ ẹtịn̄ n̄kpọ ẹdian Jehovah nte ekemde ye ekikere mmọ, idịghe nte ekemde ye ekikere Abasi. Akande oro, mmọ ẹma ẹdot n̄kpa ke ntak ẹdade esuene ẹsọk enyịn̄ Abasi ke nditomo enyịn̄ oro ke usụn̄ oro mîdotke, eyedi ẹketomo enye nte mmọ ẹmenerede ndiọi uduak mmọ ke enyọn̄. (Exodus 20:7) Ẹyak nnyịn ikûdedei inyene ubiomikpe ke mbiet idiọkn̄kpọ oro!

Koro mme idiọkowo ẹkenyenede ubiomikpe uduọkiyịp ye edida esuene nsọk enyịn̄ Abasi, David eketịn̄ ete: “O Jehovah, nte ndisuaha mmọ eke ẹsuade fi? Nte mmọ eke ẹnenide fi inyụn̄ itekke mi esịt? Mmada ofụri usua nsua mmọ: mmọ ẹtie nte mme asua mi.” (Psalm 139:21, 22) David ama okop itekesịt aban̄a mme owo ẹmi sia mmọ ẹkesuade Jehovah ẹnyụn̄ ẹn̄wanade ye Enye. Mmọ ẹkedi mme asua andiwet Psalm koro enye akasuade ukwan̄ido, ido unana uten̄e Abasi, ye nsọn̄ibuot mmọ ye Ata Edikon̄.

Yak Abasi Odụn̄ọde Fi

David ikoyomke ndibiet mme idiọkowo, edi enye ama ọfiọk ete ke ikpanaha imọ inyene esịtusua iban̄a mmọ. Ntre enye ama ekpe ubọk ete: “O Abasi, dụn̄ọde mi, nyụn̄ fiọk esịt mi: domo mi, nyụn̄ fiọk ekikere mi: Nyụn̄ se m̀mê usụn̄ ukwan̄ odu mi ke esịt, nyụn̄ da mi usụn̄ nsinsi uwem.” (Psalm 139:23, 24) Ukem nte andiwet Psalm, nnyịn ikpoyom Abasi odụn̄ọrede esịt nnyịn ọfiọk m̀mê nnyịn imenyene ukwan̄ ukwan̄ uduakesịt. (1 Chronicles 28:9) Nnyịn ikpenyene ndidọhọ Jehovah odụn̄ọde nnyịn, ọfiọk mme mfịna mfịna ekikere nnyịn, onyụn̄ ese m̀mê ubiak ubiak n̄kpọ ekededi odu nnyịn ke esịt. Edieke edide editịmede esịt ọnọmọ nnyịn ke ntak ndudue nnyịn m̀mê uyat uyat n̄kpọ odu nnyịn ke esịt m̀mê n̄kpọ oro afịnade uduakesịt nnyịn, ẹyak nnyịn ibọn̄ akam ke nsụhọdeidem inyụn̄ isụk ibuot ọyọhọ ọyọhọ inọ ndausụn̄ spirit Abasi ye item eke Ikọ esie. (Psalm 40:11-13) Ke utọ usụn̄ ntre, ata Ufan nnyịn, Jehovah, ekeme ndida nnyịn usụn̄ nsinsi uwem, an̄wamde nnyịn nditiene usụn̄ edinen ido oro adade osịm nsinsi uwem.

Psalm 139 ke ntre ọnọ ata nsịnudọn̄. Enye owụt ete, sia n̄kpọ ndomokiet mîdịbeke Ete nnyịn eke heaven ke enyịn, enye ekeme ndin̄wam nnyịn ke kpukpru ini nnanenyịn. (Mme Hebrew 4:16) Akande oro, sia Jehovah ọdiọn̄ọde nnyịn ọfọn akan nte nnyịn idọn̄ọde idem nnyịn, nnyịn imenyene ifụre ke ima ima ukpeme esie. (Deuteronomy 33:27) Edieke nnyịn ke nsụhọdeidem idọhọde enye odụn̄ọde nnyịn onyụn̄ anam nnyịn idiọn̄ọ ndudue nnyịn, ye un̄wam esie nnyịn imekeme ndinen̄ede n̄kpọ nnịm. Ke akpanikọ, ndien, ifiọk oro Abasi enyenede aban̄a nnyịn nte owo kiet kiet ekpenyene nditụk uwem nnyịn ke eti usụn̄. Enye ekpenyene ndinụk nnyịn ndidi mme anam-akpanikọ owo oro idade inọ utuakibuot akpanikọ, ndinyụn̄ nsan̄a ke nsụhọdeidem ke iso Jehovah, emi otịmde ọdiọn̄ọ nnyịn.