Nso Idi Akakan N̄kpọ Ke Uwem Fo?

“Wụt mi usụn̄ eke n̄kpasan̄ade.”—PSALM 143:8.

1. Nso ke Edidem Solomon ekebiere aban̄a se mme owo ẹbịnede ẹnyụn̄ ẹnamde?

EKEME ndidi afo ọmọfiọk ukem nte owo efen ekededi nte ke uwem ọyọhọ ye edinam ye mme udọn̄. Ke ini afo ekerede aban̄a emi, afo emekeme ndifiọk ndusụk ke otu ẹmi nte ẹdide akpan n̄kpọ. Mme edinam ye mme udọn̄ eken inen̄ekede idi akpan n̄kpọ mîdịghe ikam inyeneke-nyene ufọn. Afo ndifiọk emi ọwọrọ ke afo enyene ukem ekikere ye kiet ke otu mme ọfiọkn̄kpọ n̄kan oro akanam odude, kpa Edidem Solomon. Ke ama eketịn̄ enyịn odụn̄ọde mme edinam eke uwem, enye ama eberi ete: “Bak Abasi, nyụn̄ nịm mbet esie: koro emi edi eke kpukpru owo.” (Ecclesiastes 2:4-9, 11; 12:13) Nso ke emi ọwọrọ ọnọ nnyịn mfịn?

2. Ewe akpan mbụme ke mbon oro ẹbakde Abasi ẹkpebụp idemmọ, adade ekesịm ewe mme mbụme oro ẹnyenede ebuana?

² Edieke afo oyomde ‘ndibak Abasi nnyụn̄ nnịm mbet esie,’ bụp idemfo mbụme emi odoride ata mi, ‘Nso idi akakan n̄kpọ ke uwem mi?’ Edi akpanikọ, ekeme ndidi afo usukereke mbụme emi kpukpru usen, edi ntak mûkereke enye idahaemi? Ke akpanikọ, enye edemede ndusụk mbụme ẹmi ẹnyenede ebuana ye emi, uto nte, ‘Nte ekeme ndidi ami mmada utom mi m̀mê ubọkọkọ m̀mê inyene obụkidem ke akpan n̄kpọ n̄kaha? Ufọk, ubon, ye mbonima mi ẹdi akpan n̄kpọ adan̄a didie? Uyen ekeme ndibụp, ‘Ke nso udomo ke ubọ ukpep ada ntịn̄enyịn ye ini mi? Ke nditịm ntịn̄, nte edinam ini nduọkodudu, mbre mbuba, m̀mê ndusụk orụk unọ idem inemesịt m̀mê ifiọk ubotn̄kpọ edi akpan n̄kpọ udọn̄ ọnọ mi?’ Ndien inamke n̄kpọ m̀mê nso idi isua emana m̀mê idaha nnyịn, nnyịn nte enende ikpenyene ndibụp, ‘Nso itie ke edinam n̄kpọ Abasi enyene ke uwem mi?’ Eyedi afo eyenyịme nte ke oyom ẹnyene mme ebeiso n̄kpọ. Edi didie ndien ke m̀mọ̀n̄ ke nnyịn ikeme ndinyene un̄wam ndimek mmọ ọniọn̄ ọniọn̄?

3. Nso ke ndinịm mme n̄kpọ oro ẹdide ebeiso akpa esịne ọnọ mme Christian?

³ “Akakan” enyene akpan ekikere aban̄ade n̄kpọ oro ebemde kpukpru n̄kpọ efen iso m̀mê n̄kpọ oro oyomde ẹbem iso ẹkere. Edide afo edi kiet ke otu Mme Ntiense Jehovah m̀mê edi kiet ke otu ediwak miliọn mme enyene esịt akpanikọ nditọ ukpepn̄kpọ Ikọ Abasi ẹmi ẹbuanade ye mmọ, kere ban̄a akpanikọ emi: “Ẹmenịm ini ẹnọ kpukpru n̄kpọ: kpukpru utom ke idak enyọn̄ ẹnyụn̄ ẹnyene ekem ini mmọ.” (Ecclesiastes 3:1) Nte enende, oro esịne afo ndiwụt ima ima edikere mban̄a nnọ mme itie ebuana ubon. (Colossae 3:18-21) Emi abuana ndinam eti ndutịm nnọ mbonufọk fo ebe ke ndinam utom idịbi udia. (2 Thessalonica 3:10-12; 1 Timothy 5:8) Ndien ke ndinam ukpụhọde, afo emekeme ndisio ini nnịm nnọ edinam ini nduọkodudu m̀mê unọ idem inemesịt ye unọ idem nduọkodudu. (Men Mark 6:31 domo.) Nte ededi, edieke etịmde ekere, nte afo ukwe nte ke baba kiet ke otu ẹmi idịghe akakan n̄kpọ ke uwem? Odu n̄kpọ efen emi edide akpan n̄kpọ akan.

4. Didie ke Philippi 1:9, 10 enyene ebuana ye nnyịn ndinịm mme n̄kpọ oro ẹdide ebeiso n̄kpọ?

⁴ Nte eyịghe mîdụhe afo ọmọfiọk ete ke mme edumbet Bible ẹmi ẹnọde ndausụn̄ ẹdi nti n̄kpọ un̄wam ke ndimek mme ebeiso n̄kpọ nnyụn̄ nnam mme ubiere oro ẹwụtde ọniọn̄. Ke uwụtn̄kpọ, ke Philippi 1:9, 10, ẹkpak mme Christian ẹte ‘ẹdọdiọn̄ ẹkọri ke ifiọk ye kpukpru ikike.’ Kaban̄a nso ntak? Apostle Paul adian do ete: “Man mbufo ẹkeme ndidomo mfiọk se ifọnde ikan.” (Sịghisịghi ubọkn̄wed edi eke nnyịn.) Nte oro iwụtke ifiọk? Ọkọn̄ọde ke nnennen ifiọk, Christian oro enyenede mbufiọk ekeme ndibiere n̄kpọ oro ekpenyenede ndidi akpa n̄kpọ udọn̄—akakan n̄kpọ—ke uwem.

Uwụtn̄kpọ Kaban̄a Se Idide Akakan

5. Ke etịn̄de aban̄a uwụtn̄kpọ oro ẹnịmde ẹnọ mme Christian, didie ke N̄wed Abasi owụt se ikedide akakan n̄kpọ ke uwem Jesus?

⁵ Nnyịn imokụt akpan ifiọk oro ọsọn̄de urua ke mme ikọ apostle Peter emi: “Ẹkekot mbufo ẹte ẹdinam oro; koro Christ ke Idem Esie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ.” (1 Peter 2:21) Ih, kaban̄a ndausụn̄ ke se idide akakan n̄kpọ ke uwem, nnyịn imekeme ndidụn̄ọde se Jesus Christ ekekerede aban̄a emi. Psalm 40:8 etịn̄ ke prọfesi aban̄a enye ete: “Mmama ndinam se afo amade, O Abasi mi, mbet fo ẹnyụn̄ ẹdu mi ke esịt.” Enye ama etịn̄ ukem ekikere oro ke usụn̄ emi: “Udia Mi edi ndinam uduak Andidọn̄ Mi, nnyụn̄ mma utom Esie.”—John 4:34; Mme Hebrew 12:2.

6. Didie ke nnyịn ikeme ndinyene mme ukem utịp oro Jesus ekenyenede ke ndinịm edinam uduak Abasi akpa?

⁶ Tịm fiọk se idide akpan n̄kpọ—ndinam uduak Abasi. Uwụtn̄kpọ Jesus enen̄ede owụt se mme mbet esie nte enende ẹkpedade nte akakan n̄kpọ ke uwem mmọ, koro enye ọkọdọhọ ete ke “kpukpru eyen ukpep-n̄kpọ eyetie nte andikpep enye ke ini ẹtịmde ẹkpep enye n̄kpọ ẹma.” (Luke 6:40) Ndien nte Jesus akasan̄ade ke usụn̄ emi Ete esie akaduakde ọnọ enye, enye ama owụt ete ke “uyụhọ idatesịt” odu ke ndinịm uduak Abasi nte akakan n̄kpọ. (Psalm 16:11; Utom 2:28) Nte afo omokụt se oro abuanade? Nte mme anditiene Jesus ẹmekde edinam uduak Abasi nte akakan n̄kpọ ke uwem mmọ, mmọ ẹyenyene “uyụhọ idatesịt” ye ata uwem. (1 Timothy 6:19) Ntre se iwakde ikan ntak kiet odu ndinam uduak Abasi edi ebeiso n̄kpọ ke uwem nnyịn.

7, 8. Nso mme idomo ke Jesus okosobo, ndien nso ke nnyịn ikeme ndikpep nto emi?

⁷ Ke ndondo oro Jesus akayararede ediyak oro enye akayakde idemesie ọnọ ndinam uduak Abasi, Devil ama odomo ndiwọn̄ọde enye n̄kpọn̄ usụn̄. Didie? Ye idomo ke ikpehe ita. Ke ini kiet kiet Jesus ama ada in̄wan̄în̄wan̄ ikọ N̄wed Abasi ọbọrọ. (Matthew 4:1-10) Edi mme idomo efen efen ke ẹkebet enye—ukọbọ, nsahi, Judas nditap nnọ, mme nsunsu edori ikọ, ndien ekem n̄kpa ke eto ndutụhọ. Kpa ye oro, mme idomo ẹmi ndomokiet ikanamke anam-akpanikọ Eyen Abasi ọduọ ọkpọn̄ usụn̄ esie. Ke ọkpọsọn̄ idaha kiet, Jesus ama ọbọn̄ akam ete: “Yak okûdi nte Ami nnyịmede; edi yak edi nte Afo onyịmede. . . . Yak edi nte afo onyịmede.” (Matthew 26:39, 42) Nte ikpehe uwụtn̄kpọ enyeemi ẹkekpọn̄de mi ẹnọ nnyịn ikpenen̄ekede inụk nnyịn owo kiet kiet, anamde nnyịn ‘ikọbọ ke edibọn̄ akam’?—Rome 12:12.

⁸ Ih, ke ini nnyịn inịmde mme n̄kpọ oro ẹdide ebeiso n̄kpọ ẹnọ nnyịn ke uwem, ndausụn̄ otode Abasi enen̄ede edi n̄kpọ un̄wam, akpan akpan edieke nnyịn isobode mme asua akpanikọ ye mme andibiọn̄ọ uduak Abasi. Ti n̄kpeubọk oro Edidem David akanamde oyom ndausụn̄ ke ini enye okosobode ubiọn̄ọ otode asua. Nnyịn iyokụt emi nte nnyịn idụn̄ọrede ikpehe kiet ke Psalm 143. Emi ekpenyene ndin̄wam nnyịn ifiọk nte ikpanamde ọkpọkpọ itie ebuana nnyịn ye Jehovah ọsọn̄ idem onyụn̄ ọsọn̄ọ nnyịn idem ndinịm edinam uduak Abasi nte ata akpa n̄kpọ ke uwem nnyịn.

Jehovah Okop Onyụn̄ Ọbọrọ Mme Akam Nnyịn

9. (a) Okposụkedi David ekedide anamidiọk, nso ke mme ikọ ye mme edinam esie ẹwụt? (b) Ntak emi nnyịn mîkpakpaha mba ke ndinam se inende?

⁹ Okposụkedi ekedide anam idiọkn̄kpọ emi ekemede ndikpa, David ama enyene mbuọtidem nte ke Jehovah ayakpan̄ utọn̄ ke eben̄e imọ. Enye ke nsụhọdeidem ama eben̄e ete: “O Jehovah, kop akam mi, kpan̄ utọn̄ ke n̄kpeubọk mi: yere mi ke akpanikọ fo, ye ke edinen ido fo. Kûnyụn̄ ukot owo fo ikpe: koro ikpe mîsanake baba andidu uwem kiet ke iso fo.” (Psalm 143:1, 2) David ama ọfiọk aban̄a unana mfọnmma esie, edi esịt esie ama ekem ye Abasi. Ntem, enye ama enyene mbuọtidem nte imọ iyọbọ ibọrọ ke edinen ido. Nte emi inọhọ nnyịn nsịnudọn̄? Idem okposụkedi nnyịn iduọde ikpọn̄ edinen ido Abasi, nnyịn imekeme ndinyene mbuọtidem nte ke enye akpan̄ utọn̄ ọnọ nnyịn edieke esịt nnyịn ekemde ye enye. (Ecclesiastes 7:20; 1 John 5:14) Ke adan̄aemi ikọbọde ke edibọn̄ akam, ana nnyịn isịn ifịk ‘ida eti edinam ikan idiọk ubọk’ ke ndiọkeyo emi.—Rome 12:20, 21; James 4:7.

10. Ntak emi David ekenyenede mme ini editịmede esịt?

¹⁰ David ama enyene mme asua, kpa nte nnyịn inyenede. Edide nte owo emi efehede man ọbọhọ Saul, emi ẹnyịkde ndiyom ubọhọ ke ndobo ndobo ebiet emi owo mîkemeke ndidụk, m̀mê nte edidem emi mme asua ẹfịnade, David ama enyene mme ini editịmede esịt esie. Enye ama etịn̄ nte emi okotụkde enye ete: “Asua [ebịne] mi . . . anam mi ntie ke edikịm ebiet. . . . Ndien spirit mi ọmọfụhọ mi ke idem; esịt akpa mi ke idem.” (Psalm 143:3, 4) Nte afo emenyene ntak ndikere ukem ntre?

11. Ewe mme ini editịmede esịt ke mme asan̄autom Abasi eyomfịn ẹsiyọ?

¹¹ Mfịghe otode asua, idomo otode nsọn̄ọn̄kpọ ndutịm uforo, ọkpọsọn̄ udọn̄ọ, m̀mê mme akama-mfụhọ mfịna eken ẹnam ndusụk ikọt Abasi ẹduọk idotenyịn. Ke ndusụk idaha esitie nte n̄kpọ eke esịt akpade mmọ ke idem. Etie nte n̄kpọ emi mmọ owo kiet kiet ẹfioride ẹte: “Afo emi anamde nnyịn ikụt ikpọ ye mme idiọk ukụt, eyenam nnyịn itọn̄ọ ntak idu uwem . . . Onyụn̄ afiak edidọn̄ nnyịn esịt.” (Psalm 71:20, 21) Didie ke ẹn̄wam mmọ?

Nte Ẹkemede Ndiyọ Ukeme Mme Asua

12. Didie ke Edidem David ekekeme ndiyọ n̄kpọndịk ye mme idomo?

¹² Psalm 143:5 owụt se David akanamde ke ini okosobode n̄kpọndịk ye ikpọ idomo: “Mmeti eyo oko; mmese ofụri utom fo; mmetie n̄kere se ubọk fo ẹkenamde.” David ama eti nte Abasi akanamde n̄kpọ ye mme asan̄autom Esie ye nte enye ke idemesie okokụtde edinyan̄a. Enye ama etie ekere se Jehovah akanamde ke ntak akwa enyịn̄ Esie. Ih, David ke idemesie ama ekere aban̄a mme utom Abasi.

13. Ke ini nnyịn isobode mme idomo, didie ke nnyịn ndikere mban̄a mme uwụtn̄kpọ mme anam-akpanikọ asan̄autom eke eset ye eke eyomfịn edin̄wam nnyịn ndiyọ?

¹³ Nte nnyịn isiwakke nditi nte Abasi anamde n̄kpọ ye ikọt esie? Ke akpanikọ imesiti! Emi esịne n̄wetnnịm n̄kpọ aban̄ade ‘otu ntiense eke ẹwakde’ ẹmi ẹkedude mbemiso ini mme Christian. (Mme Hebrew 11:32-38; 12:1) Ẹma ẹsịn udọn̄ n̄ko ẹnọ mme Christian ẹkeyetde aran ke akpa isua ikie ‘nditi mme usen ini oko’ ye se mmọ ẹkeyọde. (Mme Hebrew 10:32-34) Nso kaban̄a mme ifiọk n̄kpọntịbe mme asan̄autom Abasi ke eyomfịn, utọ nte mbon oro ẹbụkde ke Jehovah’s Witnesses—Proclaimers of God’s Kingdom?a Mme mbụk ẹwetde do ye ke mme n̄wed eken ẹn̄wam nnyịn nditi nte Jehovah an̄wamde ikọt esie ndiyọ mme ukpan, n̄kpọkọbi, edinam mbon ntịme, itienna ekikere, ye itienna ufen. Mme idomo ẹdu ke mme idụt oro ẹn̄wanade ekọn̄, utọ nte Burundi, Liberia, Rwanda, ye akani Yugoslavia. Ke ini ubiọn̄ọ etịbede, mme asan̄autom Abasi ẹsiyọ ke ntak ẹmụmde ọsọn̄idem itie ebuana ẹkama ye Jehovah. Ubọk esie omụm mbon oro edinam uduak esie edide akakan n̄kpọ ke uwem mmọ akama.

14. (a) Ewe uwụtn̄kpọ kiet odu kaban̄a nte Abasi ekpemede owo ke idaha oro ekemede ndibiet eke nnyịn? (b) Nso ke afo ekpep oto uwụtn̄kpọ oro?

¹⁴ Nte ededi, afo emekeme ndidọhọ ke imọ isoboke utọ ibak ibak esuene oro, ndien afo emekeme ndikere nte ke ekeme ndidi tutu amama enye idisịmke fi. Ibetedem oro Abasi ọnọde ikọt esie, nte ededi, isidịghe kpukpru ini ke usụn̄ oro ndusụk owo ẹkemede ndida nte edide mme utịbe utịbe idaha. Enye aman̄wam ediwak “usụhọde” owo ke mme “ukeuke” idaha. Kiet kpọt ke otu ediwak uwụtn̄kpọ edi emi: Ndi emeti ndise eke enyọn̄ emi, ndien nte enye an̄wam fi nditi nte Abasi anamde n̄kpọ ye ikọt esie? Enye ama esịne ke Enyọn̄-Ukpeme eke December 1, 1996. Ndi afo ama okot mbụk oro Penelope Makris ọnọde? Nso ata eti uwụtn̄kpọ nsọn̄ọnda Christian ke emi edi ntem! Ndi emekeme nditi se enye ọkọyọde ke ubọk mme mbọhọidụn̄, nte enye akan̄wanade ye ikpọ udọn̄ọ, ye orụk ukeme oro enye ekesịnde man aka iso odu ke utom ukwọrọikọ uyọhọ ini? Nso kaban̄a inem inem ifiọkutom esie ke Mytilene? Akpan n̄kpọ edi-o, Ndi omokụt mme utọ uwụtn̄kpọ oro nte ẹdide un̄wam ẹnọ kpukpru nnyịn ndinịm mme n̄kpọ oro ẹdide ebeiso ke akpa, inịmde edinam uduak Abasi akpa ke uwem nnyịn?

15. Nso idi ndusụk edinam Jehovah ẹmi nnyịn ikemede nditie n̄kere?

¹⁵ Enye ọsọn̄ọ nnyịn idem nditie n̄kere mme edinam Jehovah, nte David akanamde. Ke ndinam uduak esie osu, Jehovah anam ndutịm ọnọ edinyan̄a ebe ke n̄kpa, ediset, ye edinọ Eyen esie ubọn̄. (1 Timothy 3:16) Enye owụk Obio Ubọn̄ esie eke heaven, osio Satan ye mme demon esie efep ke heaven, onyụn̄ afiak owụk utuakibuot akpanikọ mi ke isọn̄. (Ediyarade 12:7-12) Enye owụk paradise eke spirit onyụn̄ ọdiọn̄ ikọt esie ye n̄kọri. (Isaiah 35:1-10; 60:22) Ikọt esie ke ẹnọ akpatre ikọ ntiense idahaemi mbemiso akwa ukụt ọtọn̄ọde. (Ediyarade 14:6, 7) Ih, nnyịn imenyene ekese n̄kpọ nditie n̄kere.

16. Nso ke ẹsịn udọn̄ ẹnọ nnyịn ndikere mban̄a, ndien nso ke emi edinam nnyịn ikere?

¹⁶ Nnyịn ndisịn idem n̄kere mban̄a utom ubọk Abasi utu ke ndiyak mme ukeme oro owo esịnde ẹkara ekikere nnyịn ayanam nnyịn inyene ke ekikere nte ke owo ikemeke ndibiọn̄ọ odudu oro Jehovah adade anam utom. Mme utom oro, nte ededi, itreke ke mme utịbe utịbe utom obot ke heaven ye mi ke isọn̄. (Job 37:14; Psalm 19:1; 104:24) Mme utịbe utịbe utom esie ẹsịne mme edinam edinyan̄a ikọt esie nsio ke ubọk mme asua oro ẹfịkde, nte ẹwụtde ke mme ifiọk n̄kpọntịbe ndimek ikọt esie eke eset.—Exodus 14:31; 15:6.

Ndifiọk Usụn̄ Emi Ikpasan̄ade

17. Adan̄a didie ke Jehovah ekedi ata owo ọnọ David, ndien didie ke emi ekeme ndinọ nnyịn ndọn̄esịt?

¹⁷ David ama ọbọn̄ akam oyom un̄wam mbak mmọn̄ uwem edisat enye ke idem: “Mmenede ubọk mi nnọ fi: ukpọn̄ mi etie nte isọn̄ mmemidem oyom fi. O Jehovah, wawara yere mi: spirit akpa mi: kûdịp mi iso fo, mbak ndibiet mmọ eke ẹsụhọrede ke obube.” (Psalm 143:6, 7) David, anamidiọk, ama ọfiọk ete ke Abasi ọfiọk idaha imọ. (Psalm 31:7) Ndusụk ini nnyịn n̄ko imekeme ndikere ke idaha eke spirit nnyịn enen̄ede osụhọde. Edi idotenyịn osụk odudu. Jehovah, emi okopde akam, ekeme ndinam nsọn̄idem nnyịn awara ebe ke ndida mme ima ima mbiowo, mme ibuotikọ ke Enyọn̄-Ukpeme, m̀mê mme ikpehe mbonoesop oro ẹtiede nte ẹkekam ẹtịm ẹnọ nnyịn mfiak ndemede nnyịn.—Isaiah 32:1, 2.

18, 19. (a) Nso n̄kpeubọk esịt akpanikọ ke nnyịn ikpanam inọ Jehovah? (b) Nnyịn ikeme ndinyene mbuọtidem ke nso?

¹⁸ Mbuọtidem oro nnyịn inyenede ke Jehovah onụk nnyịn ndiben̄e enye: “Nam n̄kop ima fo . . . koro mbuọtde idem mi ye afo: wụt mi usụn̄ eke n̄kpasan̄ade.” (Psalm 143:8) Ndi enye ama okpu Sista Makris, emi okodude nsannsan ke isuo Greece? Ntre ndi enye oyokpu fi nte afo anamde edinam uduak esie edi akakan n̄kpọ ke uwem fo? Devil ye mme asan̄autom esie ẹyema ndibiọn̄ọ m̀mê nditre utom nnyịn nditan̄a Obio Ubọn̄ Abasi ofụri ofụri. Edide nnyịn inam utom ke mme idụt oro ẹnyịmede utuakibuot akpanikọ m̀mê inam ke mme ikpehe oro ẹbiọn̄ọde, akam oro idianade kiet ibọn̄ edi ukem ye eben̄e David emi: “O Jehovah, nyan̄a mi sio mme asua ke ubọk: nnyọn̄ ndi ke ọtọ fo ndidịbe.” (Psalm 143:9) Nnyịn ndinyene ukpeme mbọhọ afanikọn̄ eke spirit ọkọn̄ọ ke nnyịn nditie ke ndịbe ebiet Ata Edikon̄.—Psalm 91:1.

¹⁹ Uko nnyịn kaban̄a se idide akakan n̄kpọ enyene ata nsọn̄ọ. (Rome 12:1, 2) Do, n̄wana ye ukeme oro ererimbot esịnde ndinyịk se enye ekerede nte edide akpan n̄kpọ ke ndutịm owo ndori fi. Ka iso ndinam kpukpru ikpehe uwem fo owụt se afo ọfiọkde nte edide akakan n̄kpọ—edinam uduak Abasi.—Matthew 6:10; 7:21.

20. (a) Nso ke nnyịn ikpep iban̄a David ke Psalm 143:1-9? (b) Didie ke mme Christian mfịn ẹwụt edu David?

²⁰ Akpa ufan̄ikọ usụkkiet eke Psalm 143:1-9 ẹdori nsọn̄uyo ke ọkpọkpọ n̄kpet n̄kpet itie ebuana oro David ekenyenede ye Jehovah. Ke ini mme asua ẹkekande enye ẹkụk, enye ama eben̄e Abasi un̄wam an̄wan̄wa. Enye ama an̄wan̄a esịt esie ọnọ, oyomde un̄wam ke nnennen usụn̄ eke akpasan̄ade. Ukem oro ke edi ye nsụhọ mbon oro ẹyetde aran ke spirit ẹdude ke isọn̄ ye mme nsan̄a mmọ. Mmọ ẹda itie ebuana mmọ ye Jehovah ke ọsọn̄urua n̄kpọ nte mmọ ẹben̄ede enye ndausụn̄. Mmọ ẹnịm edinam uduak Abasi ke ata akpa, kpa ye mme mfịghe ẹtode Devil ye ererimbot.

21. Ntak emi edide akpan n̄kpọ nnyịn ndinịm eti uwụtn̄kpọ edieke anade nnyịn ikpep mbon en̄wen se ikpenyenede ndidi akakan n̄kpọ ke uwem mmọ?

²¹ Oyom ediwak miliọn owo ẹmi ẹkpepde Bible ye Mme Ntiense Jehovah ẹfiọk ẹte ke edinam uduak Abasi edi akakan n̄kpọ. Nnyịn imekeme ndin̄wam mmọ ndifiọk emi ke ini inemede ibuot 13 ke n̄wed Ifiọk Oro Adade Osịm Nsinsi Uwem, emi ọsọn̄ọde owụt mme edumbet oro ẹbuanade ke ndidi mbon ẹmi ẹnamde Ikọ.b Nte ededi, mmọ ẹkpenyene ndikụt nte nnyịn inamde-nam mme n̄kpọ oro nnyịn ikpepde mmọ. Ke esisịt ini ebede, mmọ n̄ko ẹyedi ẹdifiọk usụn̄ oro mmọ ẹkpesan̄ade. Nte ediwak miliọn owo ẹmi ke idemmọ ẹdide ẹdifiọk se ikpenyenede ndidi ata akpan n̄kpọ ke uwem mmọ, oyonụk ediwak owo ndinam n̄kpọ mban̄a uyakidem ye baptism. Ke oro ebede, esop ekeme ndin̄wam mmọ ndika iso nsan̄a ke usụn̄uwem.

22. Mme mbụme ewe ke ẹdise ẹban̄a ke ibuotikọ emi etienede?

²² Ediwak owo ẹkam ẹnyenyịme nte ke uduak Abasi ekpenyene ndidi ata akpan n̄kpọ ke uwem mmimọ. Nte ededi, didie ke Jehovah ekpep mme asan̄autom esie sụn̄sụn̄ ndinam uduak esie? Nso mme ufọn ke emi ada ọsọk mmọ? Ẹyekere ẹban̄a mme mbụme ẹmi, ọkọrọ ye edineme akpan ufan̄ikọ, Psalm 143:10, ke ibuotikọ emi etienede.

[Mme Ikọ idakisọn̄]

Nso Idi Ibọrọ Fo?

◻ Ke ndida Philippi 1:9, 10 nsịn ke edinam, didie ke nnyịn ikeme ndinịm mme n̄kpọ oro ẹdide ebeiso n̄kpọ ke akpa?

◻ Didie ke Jesus okowụt se idide akakan n̄kpọ ke uwem esie?

◻ Nso ke nnyịn ikeme ndikpep nto mme edinam David ke ini emi enye okosobode idomo?

◻ Ke ewe usụn̄ ke Psalm 143:1-9 an̄wam nnyịn mfịn?

◻ Nso ikpenyene ndidi akakan n̄kpọ ke uwem nnyịn?

[Ndise ke page 10]

Mme edinam David ẹma ẹwụt ibetedem esie ke Jehovah

[Ebiet Ẹdade N̄kpọ Ẹto]

Ẹfiak ẹmịn̄ ẹto Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s