Mmọ Ẹma Ẹfiọk Enyịn̄ Abasi

AKPA n̄wed emi ẹdiọn̄ọde nte ẹkewetde ẹnyụn̄ ẹsiode ke n̄kani obio America ẹmi ẹkedude ke idak ukara England ekedi Bay Psalm Book. Edi Stephen Daye ekemịn̄ akpa nsiondi esie ke Massachusetts Bay Colony ke isua 1640. N̄wed eset oro ama esịne mme n̄wed Psalm eke Bible, ẹmi ẹkekabarede ẹto usem Hebrew ẹsịn ke Ikọmbakara nte ẹkesemde ẹnyụn̄ ẹwetde ke ini oro.

N̄wọrọnda ikpehe eke Bay Psalm Book oro ekedi edida oro enye akadade enyịn Abasi ke ndusụk ufan̄ikọ. Ntre, owo ekededi oro okokotde n̄wed oro ke ata edem ko ke n̄kpọ nte isua 350 ẹmi ẹkebede okodu ke idaha ndidiọn̄ọ enyịn̄ Andibot nnyịn. Ke nsiondi oro, ke uwụtn̄kpọ, Psalm 83:17, 18 okot ete: “Yak bụt anam mmọ ke nsinsi, ye ọkpọsọn̄ mfịna: ih, yak bụt anam mmọ, ẹnyụn̄ ẹtak. Man mme owo ẹfiọk ete; ke afo emi enyịn̄ fo ikpọn̄ ekerede IEHOVAH, edi ata edikon̄ ke ofụri isọn̄.”

Nte ededi, ata edikon̄ Abasi oyom se ikande nnyịn ndifiọk nte ke enyịn̄ imọ edi Jehovah (Iehovah). Ke Bay Psalm Book, Psalm 1:1, 2 ọdọhọ ete “eti owo” isan̄ake ke item mme idiọkowo, “edi ke mbet Iehovah, enye okop idatesịt.” New England Psalms eke 1648 oro ẹfiakde ẹwet ọdọhọ ete: “Edi ke mbet Jehovah ke ofụri inemesịt esie odu.”

Mi New World Translation of the Holy Scriptures eke ọyọhọ isua ikie-20 ọdọhọ ete: “Inemesịt odu ọnọ owo eke mîsan̄ake ke item mme idiọkowo, mînyụn̄ idaha ke usụn̄ mme anamidiọk, mînyụn̄ itiehe ke itie mbon nsahi. Edi mbet Jehovah enem enye esịt, enye onyụn̄ osụk ekere mbet esie ke uwemeyo ye okoneyo.”

Man enen̄ede okop inemesịt, ana owo esịn item mme idiọkowo. Inaha enye etiene uwụtn̄kpọ mme idiọkowo inyụn̄ ikemeke ndidụk nsan̄a ye mbon nsahi mme anana-uten̄e Abasi. Ke otu mme n̄kpọ eken, oyom enye efep ndidụk nsan̄a ye mbon oro item ye eduuwem mmọ ekemede nditap enye n̄kesịn ke oburobụt ido idan̄, uda n̄kpọsọn̄ ibọk ke idiọk usụn̄, ye mme edinam eken oro ẹdude ke ntuaha ye ibet Abasi. Ih, ata inemesịt ọkọn̄ọ ke ndikpep n̄kpọ mban̄a ata Abasi, emi enyịn̄ esie ekerede Jehovah, nnyụn̄ nnịm ibet esie nte Bible owụtde.