Idatesịt Jehovah Edi Ọkpọsọn̄ Ebiet Nnyịn
“Mfịn emi [edi] edisana usen Ọbọn̄ nnyịn: mbufo ẹkûfụhọ ndien; koro idatesịt Jehovah edide odudu [“ọkpọsọn̄ ebiet,” NW] mbufo.”—NEHEMIAH 8:10.
1, 2. (a) Nso idi ọkpọsọn̄ ebiet? (b) Didie ke David okowụt ke inyene ubọhọ ke Jehovah?
JEHOVAH edi ọkpọsọn̄ ebiet oro mînyeneke mbiet. Ndien nso idi ọkpọsọn̄ ebiet? Enye edi ebiet ukpeme, ebiet ifụre m̀mê ubọhọ. David eke Israel eset akada Abasi nte ebiet odudu esie. Ke uwụtn̄kpọ, kere ban̄a ikwọ oro David ọkọkwọde ọnọ Ata Edikon̄ “ke usen oro Jehovah anyan̄ade enye osio kpukpru mme asua esie ke ubọk, ye ke ubọk Saul,” edidem Israel.—Psalm 18, se ewetde ke enyọn̄.
2 David ọkọtọn̄ọ edemede-owo udọn̄ ikwọ oro ye mme ikọ ẹmi: “Mmama fi, O Jehovah, odudu mi! Jehovah edi akwa itiat mi, ye ufọk ekọn̄ mi ye andinyan̄a mi; Abasi mi edi akwa itiat mi; nyebuọt idemmi ye enye; otuekọn̄ mi, ye nnụk edinyan̄a mi, ye edikon̄ ebiet mi.” (Psalm 18:1, 2) Ke Edidem Saul anamde enye ataba unen esie onyụn̄ ebịnede enye nte mîdotke, edinen David ama enyene ubọhọ ke Jehovah, kpa nte owo ekemede ndifehe ndụk ebiet ukpeme man ọbọhọ ndusụk afanikọn̄.
3. Ntak emi mme Jew eke eyo Ezra ẹkenyenede “akamba idara”?
3 Idatesịt oro Jehovah ọnọde edi ọkpọsọn̄ ebiet emi mîkpụho ọnọ mbon oro ẹsan̄ade ke usụn̄ esie nte mbon nsọn̄ọnda. (Mme N̄ke 2:6-8; 10:29) Nte ededi, man ẹnyene idatesịt oro Abasi ọnọde, ana mme owo ẹnam uduak Abasi. Kaban̄a emi, kere ban̄a se ikotịbede ke Jerusalem ke 468 M.E.N. Ezra osion̄o n̄wed ye mbon en̄wen ẹma ẹnam mme owo ẹnyene ifiọk ebe ke ndikot n̄wed Mbet ke usụn̄ enyenede ufọn. Ekem ẹma ẹkpak mme owo ẹte: “Mbufo ẹka ẹketa isek, ẹnyụn̄ ẹn̄wọn̄ inịn̄e, ẹnyụn̄ ẹnọ enọ ẹsọk owo eke mîtịmke baba n̄kpọ kiet iben̄e enye: koro mfịn emi edide edisana usen Ọbọn̄ nnyịn: mbufo ẹkûfụhọ ndien; koro idatesịt Jehovah edide odudu mbufo.” “Akamba idara” ama odu nte mme Jew ẹkedade ifiọk oro mmọ ẹkenyenede ẹnam n̄kpọ ẹnyụn̄ ẹnịmde idara idara Usọrọ Mme Ataya. (Nehemiah 8:1-12) Mbon oro ẹkenyenede ‘idatesịt Jehovah nte ọkpọsọn̄ ebiet mmọ’ ẹma ẹnyene odudu ẹnọ utuakibuot ye utom esie. Sia idatesịt Jehovah ekedide odudu mmọ, nnyịn ikpenyene ndidori enyịn ikọt Abasi mfịn ndikop idatesịt n̄ko. Nso, ndien, idi ndusụk ntak idatesịt eke eyomfịn oro mmọ ẹnyenede?
“Kûtre Ndien Ndidat Esịt”
4. Nso idi n̄wọrọnda ntak idatesịt kiet inọ ikọt Jehovah?
4 N̄wọrọnda ntak kiet ndikop idatesịt edi ndutịm oro Jehovah anamde ndisop idem ọtọkiet. Ikpọ ye n̄kpri mbono Mme Ntiense Jehovah ẹsida idatesịt ọsọk mmọ mfịn, kpa nte mme usọrọ oro nditọ Israel ẹkesinịmde ke isua ke isua ẹkesidade idatesịt ọsọk mmọ. Ẹma ẹsian mbon Israel ẹte: “Ke usen itiaba ke afo edinịm usọrọ [mme ataya] ọnọ Jehovah Abasi fo ke ebiet emi Jehovah edimekde: koro Jehovah Abasi fo eyediọn̄ fi ke kpukpru mbun̄wụm n̄kpọ fo, ye ke kpukpru utom ubọk fo, kûtre ndien ndidat esịt.” (Deuteronomy 16:13-15) Ih, Abasi okoyom mmọ ‘ẹkûtre ndidat esịt.’ Kpasụk ntre ke edi ye mme Christian, koro apostle Paul ama akpak ekemmọ mme andinịm ke akpanikọ ete: “Ẹdat esịt ke Ọbọn̄ kpukpru ini; nyetọn̄ọ ntak ndọhọ, Ẹdat esịt.”—Philippi 4:4.
5. (a) Nso idi idatesịt, ndien didie ke mme Christian ẹnyene enye? (b) Didie ke nnyịn ikeme ndikop idatesịt kpa ye mme idomo?
5 Sia Jehovah oyomde nnyịn idat esịt, enye ọmọnọ nnyịn idatesịt nte kiet ke otu mbun̄wụm edisana spirit esie. (Galatia 5:22, 23) Ndien nso idi idatesịt? Edi idara idara ntụk emi otode edidori enyịn mban̄a m̀mê edinyene eti n̄kpọ. Idatesịt edi idaha ata inemesịt, kpa ye idara. Mbun̄wụm edisana spirit Abasi emi esimụm nnyịn akama ke idak idomo. “Ke ntak idatesịt oro akanade enye ke iso [Jesus] ama ọyọ eto ndutụhọ, ikereke bụt, ama onyụn̄ osụhọde etetie ke ubọk nnasia ebekpo Abasi.” (Mme Hebrew 12:2, NW) Mbet oro James ekewet ete: “Ẹnịm ẹte edi n̄kpọ ọyọhọ idatesịt, nditọete mi, ke ini nsio nsio idomo ẹsịmde mbufo; ke ẹfiọkde ẹte mbuọtidem mbufo ẹmi ẹma ẹdomo ẹwụt anam ime ọwọrọ.” Edi nso edieke nnyịn mîfiọkke se ikpanamde iban̄a ndusụk idomo? Do nnyịn ye mbuọtidem imekeme ndibọn̄ akam nyom eti ibuot ndise mban̄a enye. Ndinam n̄kpọ ke n̄kemuyo ye eti ibuot otode enyọn̄ an̄wam nnyịn ndibiere mme mfịna m̀mê ndiyọ mme uyịre uyịre idomo ye unana editaba idatesịt Jehovah.—James 1:2-8.
6. Nso ebuana idu ke ufọt idatesịt ye utuakibuot akpanikọ?
6 Idatesịt oro Jehovah ọnọde ọsọn̄ọ nnyịn idem ndimenede utuakibuot akpanikọ ke enyọn̄. Oro edi se ikotịbede ke eyo Nehemiah ye Ezra. Mme Jew eke ini oro ẹmi ẹkenyenede idatesịt Jehovah nte ọkpọsọn̄ ebiet mmọ ẹma ẹbọ nsịnudọn̄ ndinam mme udọn̄ utuakibuot akpanikọ osụk akaiso. Ndien nte mmọ ẹkenamde utuakibuot Jehovah akaiso, idatesịt mmọ ama okpon. Edi kpasụk ntre mfịn. Nte mme andituak ibuot nnọ Jehovah, nnyịn imenyene mme ntak akamba idara. Ẹyak nnyịn idahaemi ikere iban̄a mme ntak ifan̄ en̄wen ke otu ediwak ntak oro nnyịn inyenede ndidat esịt.
Itie Ebuana ye Abasi Ebe ke Christ
7. Kaban̄a Jehovah, nso ntak ke mme Christian ẹnyene ndidat esịt?
7 N̄kpet n̄kpet itie ebuana nnyịn ye Jehovah anam nnyịn idi mbon oro ẹkopde inemesịt ẹkan ke isọn̄. Mbemiso ikakabarede idi mme Christian, nnyịn ikedi ubak idiọk n̄ka ubonowo oro ‘enyịn esịt okịmde ẹnyụn̄ ẹdianarede ẹkpọn̄ uwem Abasi.’ (Ephesus 4:18) Nnyịn ikop inemesịt didie ntem nte ke nnyịn idianakede aba ikpọn̄ Jehovah! Nte ededi, oyom ukeme ndika iso nnyene mfọn esie. Ana nnyịn “[ikaiso] ke mbuọtidem, isọn̄ọ iwụhọ ke itiat idakisọn̄ oro inyụn̄ isọn̄ọ ida ikûnyụn̄ iwọn̄ọde ikpọn̄ idotenyịn eti mbụk oro.” (Colossae 1:21-23, NW) Nnyịn imekeme ndidat esịt nte ke Jehovah ama odụri nnyịn ọsọk Eyen esie ke n̄kemuyo ye mme ikọ Jesus ẹmi: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi.” (John 6:44) Edieke nnyịn itịmde idara ọsọn̄urua itie ebuana nnyịn ye Abasi ebe ke Christ, nnyịn iyekpeme ibiọn̄ọ n̄kpọ ekededi oro ekemede ndibiat enye.
8. Didie ke Jesus etịp n̄kpọ esịn ke idara idara idaha nnyịn?
8 Edifen mme idiọkn̄kpọ ebe ke edinyene mbuọtidem ke uwa ufak Jesus edi akwa n̄kpọ idatesịt koro emi edi se inamde nnyịn inyene itie ebuana ye Abasi. Ebede ke enye ndikokoi nnam idiọkn̄kpọ, eteete nnyịn Adam ama ada n̄kpa ọsọk ofụri ubonowo. Nte ededi, apostle Paul ama anam an̄wan̄a ete: “Abasi otịm ayarade ima eke amade nnyịn, ke emi Christ akpade ke ibuot nnyịn ke adan̄aemi nnyịn isụk idide mme idiọkowo kan̄a.” Paul ama ewet n̄ko ete: “Nte otode ke ndudue kiet ke ẹbiom kpukpru owo ikpe; kpa ntre n̄ko oto ke utom edinen ido kiet ke ẹnọ mfọn osịm kpukpru owo, ẹtebe mmọ ikpe ke uwem. Koro nte ẹkedade nsọn̄ibuot owo kiet ẹnam ediwak owo ẹkabade ẹdi mme idiọkowo, kpa ntre ke ẹyeda nsụkibuot owo kiet ẹnam ediwak owo ẹkabade ẹdi ndinen owo.” (Rome 5:8, 18, 19) Nnyịn ikeme ndidat esịt didie ntem nte ke Jehovah Abasi okop inemesịt ndinyan̄a nditọ Adam ẹmi ẹbọde ufọn ẹto utọ ima ima ndutịm emi!
Ndiwọrọ ke Ufụn Ido Ukpono Nnyụn̄ Nnyene Ifiọk
9. Ntak emi nnyịn idatde esịt ke n̄kan̄ ido ukpono?
9 Ndiwọrọ ke ufụn Akwa Babylon, kpa ukara ererimbot eke nsunsu ido ukpono, edi ntak efen ndidat esịt. Edi akpanikọ otode Abasi anam nnyịn iwọrọ ufụn. (John 8:32) Ndien ndiwọrọ ke ufụn akpara ido ukpono emi ọwọrọ ete ke nnyịn itieneke ibuana ke mme idiọkn̄kpọ esie, ibọhọ mme ufen esie, inyụn̄ isan̄ake ye enye isụhọde ke nsobo. (Ediyarade 18:1-8) N̄kpọ mfụhọ ndomokiet idụhe ke ndibọhọ kpukpru oro!
10. Nso ifiọk ke nnyịn inyene nte ikọt Jehovah?
10 Ndifiọk nnyụn̄ nda Ikọ Abasi nsịn ke edinam ke uwem ẹdi mme ntak akamba idara. Ke ndibọhọ odudu nsunsu ido ukpono, nnyịn imenyene ikike eke spirit oro osụk akade-kaiso ndin̄wan̄a emi Ete nnyịn eke heaven ọnọde ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Ye kpukpru owo oro ẹdụn̄de ke isọn̄, edi sụk mbon oro ẹyakde idem ẹnọ Jehovah ẹnyene edisana spirit esie ye eti ifiọk kaban̄a Ikọ ye uduak esie. Edi nte Paul ọkọdọhọde ete: “Edi Abasi akayarade mme n̄kpọ emi [mme n̄kpọ ẹmi enye okodiomide ọnọ mbon oro ẹmade enye] ọnọ nnyịn ke Spirit Esie; koro Spirit ododụn̄ọde kpukpru n̄kpọ, kpa nditụn̄ọ n̄kpọ Abasi.” (1 Corinth 2:9, 10) Nnyịn imekeme ndinem esịt inyụn̄ idara nte ke nnyịn ke inyene ifiọk oro akade-kaiso nte ẹwụtde ke mme ikọ eke Mme N̄ke 4:18: “Usụn̄ nti owo ebiet un̄wana eke asiahade, akaiso ayama, tutu osịm ufọt uwemeyo.”
Idotenyịn Obio Ubọn̄ ye Uwem Nsinsi
11. Didie ke ẹbuana idara idara idotenyịn Obio Ubọn̄ ye mbon en̄wen?
11 Idotenyịn Obio Ubọn̄ nnyịn n̄ko anam nnyịn ikop idatesịt. (Matthew 6:9, 10) Nte Mme Ntiense Jehovah, nnyịn ke anyanini imatan̄a nte ke Obio Ubọn̄ Abasi edi n̄kukụre idotenyịn ọnọ ofụri ubonowo. Ke uwụtn̄kpọ, kere ban̄a isua 1931, ke ini nnyịn ikadade enyịn̄ oro Mme Ntiense Jehovah ebe ke ubiere oro ikenyịmede ye idatesịt ke mbono 51 ke ofụri ererimbot. (Isaiah 43:10-12) Ẹma ẹmịn̄ ubiere oro ye n̄wọrọnda utịn̄ikọ mbono kiet emi J. F. Rutherford (etieibuot Watch Tower Society ini oro) ọkọnọde ke ekpri n̄wed oro The Kingdom, the Hope of the World. Ẹma ẹsịn ubiere efen oro ẹkenyịmede ke mbono oro, kpa enyeoro okobiomde Christendom ikpe ke nsọn̄ibuot esie ye ke ndimiom item Jehovah. Enye ama atan̄a n̄ko ete: “Idotenyịn ererimbot edi obio ubọn̄ Abasi, idotenyịn efen inyụn̄ idụhe.” Ke ufan̄ ọfiọn̄ ifan̄, Mme Ntiense Jehovah ẹma ẹsuan se ibede idem ekpri n̄wed emi miliọn ition ke kpukpru ikpehe isọn̄. Ọtọn̄ọde ke ini oro imesiwak ndisọn̄ọ ntịn̄ nte ke Obio Ubọn̄ edi n̄kukụre idotenyịn ubonowo.
12. Nso idara idara idotenyịn uwem ke ẹnịm mbon oro ẹnamde n̄kpọ Jehovah ke iso?
12 Nnyịn imadat esịt, n̄ko, ke idotenyịn nsinsi uwem ke idak ukara Obio Ubọn̄. “Ekpri otuerọn̄” eke mme Christian oro ẹyetde aran ẹnyene idara idara idotenyịn eke heaven. Apostle Peter ekewet ete: “Itoro enyene Abasi ye Ete Ọbọn̄ nnyịn Jesus Christ, emi, nte asan̄ade ekekem ye akwa mbọm Esie, okobonde nnyịn obufa ada esịn ke oduuwem idotenyịn oto ke ediset Jesus Christ ke n̄kpa; ete nnyịn idida udeme eke mîkemeke ndibiara, eke n̄kpọ mîsabakede, eke mînyụn̄ ikemeke ndibe mfep, inyene [ke heaven].” (Luke 12:32; 1 Peter 1:3, 4) Mfịn, akwa udịm Mme Ntiense Jehovah ẹdori enyịn ke uwem nsinsi ke Paradise ke ikpehe ukara Obio Ubọn̄. (Luke 23:43; John 17:3) Idụhe mbon en̄wen ke isọn̄ oro ẹnyenede n̄kpọ ndomokiet ndimen ndomo ye idara idara idotenyịn nnyịn. Nnyịn ikpada mmọ didie ntem ke ọsọn̄urua n̄kpọ!
Otu Nditọete Oro Ẹdiọn̄de
13. Didie ke nnyịn ikpese otu nditọete ofụri ererimbot nnyịn?
13 Ndidi ubak n̄kukụre otu nditọete ofụri ererimbot oro Abasi onyịmede edi n̄ko ntak akwa idatesịt. Ke inemesịt, nnyịn inyene ata nti nsan̄a ikan ke isọn̄. Jehovah Abasi ke idemesie ama ọwọn̄ọde ntịn̄enyịn san̄asan̄a ọnọ usen nnyịn onyụn̄ ọdọhọ ete: “Nyenyụn̄ nnyen̄e kpukpru mme idụt, ndien [ndiye n̄kpọ kpukpru mme idụt, NW] ẹyedi: ndien nyesịn ubọn̄ ke ufọk emi nyọhọ.” (Haggai 2:7) Edi akpanikọ, kpukpru mme Christian ẹdi mme anana mfọnmma owo. Nte ededi, Jehovah omodụri mme utọ owo oro ọnọ idemesie ebe ke Jesus Christ. (John 14:6) Sia Jehovah ama okodụri mme owo oro enye adade nte ndiye n̄kpọ ọnọ idemesie, idatesịt nnyịn eyekpon edieke nnyịn iwụtde mmọ ima nditọete, idade mmọ ke ọsọn̄urua n̄kpọ, idianade kiet ye mmọ ke mme edinam uten̄e Abasi, iberede ye mmọ ke mme idomo mmọ, inyụn̄ ibọn̄de akam ke ibuot mmọ.
14. Nso nsịnudọn̄ ke nnyịn ikeme ndinyene nto 1 Peter 5:5-11?
14 Kpukpru emi eyetịp n̄kpọ esịn ke idatesịt nnyịn. Ke akpanikọ, idatesịt Jehovah edi ọkpọsọn̄ ebiet otu nditọete nnyịn eke spirit ke ofụri isọn̄. Ih, kpukpru nnyịn imesisobo ukọbọ ye mme nsọn̄ọn̄kpọ eken. Edi emi ekpenyene ndidụri nnyịn ndian ọtọkiet nnyụn̄ nnam nnyịn inyene ekikere edidianakiet nte ubak ata esop kiet emi Abasi enyenede ke isọn̄. Nte Peter ọkọdọhọde, nnyịn ikpenyene ndisụhọde idem nnyịn ke idak ọkpọsọn̄ ubọk Abasi, itopde kpukpru editịmede esịt nnyịn idori enye, ifiọkde ite ke enye ke ekere aban̄a nnyịn. Oyom nnyịn ikpeme koro Devil ke oyom ndita nnyịn, edi ke emi nnyịn idụhe ikpọn̄, koro Peter adian ete: “Ẹsọn̄ọ ẹda ke mbuọtidem ẹn̄wana ye enye, ke ẹfiọkde ẹte kpa utọ ndutụhọ emi ke ọyọyọhọ ke otu nditọete mbufo ẹmi ẹdude ke ererimbot.” Ndien idara idara otu nditọete ofụri ererimbot emi iditreke tutu amama, koro nnyịn imenyene nsọn̄ọ nte ‘ke ima ikokụt ukụt ke ekpri ibio ini, Abasi eyenam ukpep oro nnyịn ibọde osịm utịt eyenyụn̄ anam nnyịn isọn̄ọ ida inyụn̄ ikop idem.’ (1 Peter 5:5-11) Kere ban̄a oro. Idara idara otu nditọete nnyịn eyedu ke nsinsi!
Uwem Oro Enyenede Uduak
15. Ntak ẹkemede ndidọhọ ke Mme Ntiense Jehovah ẹnyene uwem oro enyenede uduak?
15 Nnyịn imenyene idatesịt ke ntịme ntịme ererimbot emi koro nnyịn imenyene uwem oro enyenede uduak. Ẹyak utom ukwọrọikọ oro anamde nnyịn ye mbon en̄wen ikop inemesịt ẹsịn nnyịn ke ubọk. (Rome 10:10) Enye ke akpanikọ edi idara idara ifetutom ndidi ekemmọ mme anamutom ye Abasi. Kaban̄a emi, Paul ọkọdọhọ ete: “Apollos edi nso? Paul onyụn̄ edi nso? Mmọ ẹdi mme isụn̄utom, emi okotode mmọ mbufo ẹnịm ke akpanikọ, nte Ọbọn̄ ọnọde mmọ kiet kiet. Ami n̄kọtọ, Apollos ọkọbọk ke mmọn̄; edi n̄kọri oto Abasi. Ntre ndien idịghe anditọ edi n̄kpọ, inyụn̄ idịghe andibọk ke mmọn̄, edi Abasi emi ọnọde n̄kọri. Ntem ke anditọ ye andibọk ke mmọn̄ ẹdi ukem ukem: mmọ kiet kiet ẹyenyụn̄ ẹbọ utịp mmọ, nte ekemde ye utom mmọ. Koro nnyịn isan̄a ikpat kiet idi mme anamutom Abasi; mbufo ẹdi in̄wan̄ eke Abasi ọkọtọde, ẹdi ufọk eke Abasi ọkọbọpde.”—1 Corinth 3:5-9.
16, 17. Mme uwụtn̄kpọ ewe ke ẹkeme ndinọ ndiwụt ke ikọt Jehovah ẹnyene idara idara uwem oro enyenede uduak?
16 Ẹkeme ndinọ ediwak uwụtn̄kpọ ndiwụt ke ndinam n̄kpọ Jehovah ke edinam akpanikọ esisụn̄ọ ke uwem oro enyenede uduak oro anamde nnyịn iyọhọ ye idatesịt. N̄wọrọnda edi ikọ emi: “Mma nse n̄kanade Ufọkmbono Obio Ubọn̄ oro ama ọkọyọhọ ye mme owo [ke usen edinam ediyak nnọ esie] nnyụn̄ n̄keme ndikụt owo itiaita ke ubon mi, esịnede mi ye n̄wan mi ye ita ke otu nditọ mi ye mme nsan̄andọ mmọ. . . . Ami ye n̄wan mi imenen̄ede inyene uwem oro ọyọhọde ye inemesịt ye uduak ke utom Abasi.”
17 Edi n̄kpọ idatesịt n̄ko ndifiọk nte ke isua emana ekededi owo ekeme nditọn̄ọ idara idara uwem oro enyenede ata uduak ke utom Jehovah. Ke uwụtn̄kpọ, n̄wan kiet emi ekekpepde akpanikọ Bible ke ufọk ukpeme mbonusọn̄ ama ana baptism nte kiet ke otu Mme Ntiense Jehovah ke edide isua 102 ke emana. Enye ke ntre ama ada uwem esie ye idara idara uduak okosịm utịt, ‘abakde Abasi akpanikọ onyụn̄ onịmde mme mbet esie.’—Ecclesiastes 12:13.
Ọkpọsọn̄ Ebiet Oro Mîkpụho
18. Nso ke ikeme ndinam man ikan mfụhọ inyụn̄ inam idara nnyịn okpon?
18 Idatesịt Jehovah edi ọkpọsọn̄ ebiet oro mîkpụho ọnọ mme anam-akpanikọ. Edi, ndinyene idatesịt emi iwọrọke ke idinyeneke mme ini oro ikopde mfụhọ nte mmọ oro ẹkenụkde Jesus ndidọhọ ke Gethsemane ete: “Ukpọn̄ Mi ofụhọ etieti tutu ekpere n̄kpa.” (Mark 14:32-34) Eyedi mfụhọ oro ikopde osụn̄ọ oto nnyịn ndiyak idem nnọ mme ibụk ibụk edinam. Do ẹyak nnyịn ikpụhọde usụn̄uwem nnyịn. Edieke idatesịt nnyịn osụhọrede ke ntak emi nnyịn ke usụn̄ unana ibụk ibiomde ndodobi mbiomo N̄wed Abasi, eyedi iyenam edinen̄ede oro ẹdibiomorede nnyịn mfịghe ifep onyụn̄ anam nnyịn ifiak inyene edu idatesịt. Akan oro, Jehovah eyenam nnyịn ikop idatesịt edieke nnyịn iyomde usụn̄ ndinem enye esịt ebe ke ndisịn ọkpọsọn̄ ukeme ndibiọn̄ọ ikpọkidem idiọkn̄kpọ, idiọk ererimbot, ye Devil.—Galatia 5:24; 6:14; James 4:7.
19. Didie ke nnyịn ikpese ifetutom ekededi oro nnyịn inyenede ke esop Abasi?
19 Ke mme ntak oro nnyịn inemede mi, ye ediwak mmọ eken, nnyịn imenyene akwa idatesịt. Edide nnyịn idi mme asuanetop esop m̀mê ibuana ke ndusụk orụk utom uyọhọ ini, kpukpru nnyịn imekeme ndinyene ekese ndinam ke utom Ọbọn̄, ndien emi ke akpanikọ eyetịp n̄kpọ esịn ke idatesịt nnyịn. (1 Corinth 15:58) Se ededi ifetutom oro nnyịn inyenede ke esop Jehovah, ẹyak nnyịn iwụt esịtekọm iban̄a mmọ inyụn̄ ikaiso ye idatesịt ndinam edisana utom nnọ ima ima, Abasi inemesịt nnyịn.—1 Timothy 1:11.
20. Nso idi n̄kponn̄kan ifetutom oro nnyịn inyenede, ndien nso ke nnyịn ikeme ndinyene nsọn̄ọ mban̄a?
20 Nnyịn imenen̄ede inyene ntak ndidat esịt ke ifet oro nnyịn inyenede ndikere akwa enyịn̄ Jehovah nte Mme Ntiense esie. Ih, nnyịn idi mme anana mfọnmma owo inyụn̄ isobo ediwak idomo, edi ẹyak nnyịn iti mme utịbe utịbe edidiọn̄ oro nnyịn inyenede nte Mme Ntiense Jehovah. Nyụn̄ ti ete, ima ima Ete nnyịn eke heaven idikpụho nnyịn tutu amama. Nnyịn imekeme ndinịm ke akpanikọ nte ke ẹyediọn̄ nnyịn kpukpru ini edieke idatesịt Jehovah edide ọkpọsọn̄ ebiet nnyịn.
Didie ke Afo Ọkpọbọrọ?
◻ Nso idi “idatesịt Jehovah”?
◻ Didie ke mme Christian ẹnyene ata idatesịt?
◻ Nso idi ndusụk ntak ẹmi Mme Ntiense Jehovah ẹkopde idatesịt?
◻ Ntak emi idatesịt Jehovah edide ọkpọsọn̄ ebiet oro mîkpụho?