“Ndiwọrọ Akpa ke Ini Oyobio”

NDI afo ukpusehe utọ akama-ndịk edinam oro nte se ẹnamde ke idiọk ini, unana eti ibuot, ye se ikemede ndida afanikọn̄ ndi? Nte ededi, ndusụk owo ẹtop idemmọ ẹsịn ke utọ idaha oro ke ndamban̄a usụn̄. Didie ke edi ntre? Ewetn̄wed Ikọmbakara eke ọyọhọ isua ikie 17 oro Thomas Fuller ọkọdọhọ ete: “Kûnam n̄kpọ ndomokiet ke iyatesịt. Edi ndiwọrọ akpa ke ini oyobio.”

Ndinam n̄kpọ ke ini owo odude ke ọkpọsọn̄ iyatesịt ekeme ndida mme utịp oro ẹkamade mfụhọ ndi. N̄kpọntịbe oro ẹwetde ke Bible ọsọn̄ọ emi. Simeon ye Levi, nditọiren ete-ekpụk eke eset oro Jacob, ẹma ẹnam n̄kpọ ke ibụmede ke ini ẹkesabarede eyeneka mmọ an̄wan Dinah ebe ke ndisio usiene ke ifụtesịt. Utịp ekedi ntatara uwotowo ye edibụme n̄kpọ. Eyịghe idụhe nte ke Jacob ama obiom idiọk edinam mmọ ikpe, ọdọhọde ete: “Mbufo ẹmesịn mi ke afanikọn̄ ke edinam mi n̄waha ke otu mme andidụn̄ isọn̄ emi.”—Genesis 34:25-30.

Ke ọniọn̄, Ikọ Abasi, kpa Bible, esịn udọn̄ ọnọ edinam oro edide isio. Enye ọdọhọ ete: “Tre ifụtesịt, nyụn̄ kpọn̄ ifiopesịt: kûyat esịt kûnyụn̄ unam idiọk baba.” (Psalm 37:8) Nditiene item oro ekeme ndikpan ndinam ikpọ idiọkn̄kpọ.—Ecclesiastes 10:4; se n̄ko Mme N̄ke 22:24, 25.