Iyatesịt Mi m̀mê Nsọn̄idem Mi?
ANIE mîsiyatke esịt? Enye ototịbe ọnọ kpukpru nnyịn. Ke ndusụk idaha ndusụk udomo iyatesịt ekeme ndinen. Edi, ke nditịn̄ akpanikọ, nte isidịghe akpanikọ nte ke ediwak ini iyatesịt nnyịn (m̀mê udomo esie) isinenke?
Bible asian nnyịn ete: “Tre ifụtesịt, nyụn̄ kpọn̄ ifiopesịt: kûyat esịt kûnyụn̄ unam idiọk baba.” (Psalm 37:8) Utọ item oro owụt ọniọn̄ adan̄a didie? Ndi enye ekeme nditụk nsọn̄idem anyanini fo?
Ke ikpehe “Nsọn̄idem” esie, The New York Times ọkọdọhọ ete:
“Mme owo oro ẹsisọpde ẹwụt idiọk ifụtesịt m̀mê oro ẹsiyatde esịt ke kpukpru n̄kpri n̄kpọ oro ẹduede mmọ ẹkeme ndinọ idemmọ se ikande idiọkesịt. Mmọ ẹkeme ndiwot idemmọ.
“Mme anam ndụn̄ọde ẹmekọ ediwak ntọt ke ndondo emi oro ẹnọde ekikere nte ke ọkpọsọn̄ iyatesịt enen̄ede abiat ikpọkidem owo tutu ẹmen enye ẹkedomo ye, mîdịghe akam ọdiọk akan, edin̄wọn̄ sika, ọkpọsọn̄ ubom ye udia oro enyenede uwak isek nte okopodudu akama n̄kpọndịk oro otịpde esịn ke owo ndibak n̄kpa.
“Dr. Redford Williams, anam ndụn̄ọde kaban̄a edu ibọkusọbọ ke Duke University Medical Center ọkọdọhọ ete, ‘Mme ndụn̄ọde nnyịn ẹwụt ẹte ke ediwụt ọkpọsọn̄ usua, idiọk iyatesịt edi ukem n̄kpọ ye n̄kpọndịk nsọn̄idem eken ekededi oro nnyịn idiọn̄ọde iban̄a.’”
Mme ndụn̄ọde ẹwụt ẹte ke mbon oro ẹnamde n̄kpọ ẹbe ubọk ke mfịna oro ẹdide ọsọ n̄kpọ ke uwem ofụri usen ẹnyene uwak mmọn̄ibọk oro ẹkotde hormone eke mfịghe. Mmọ ndiwụt iyatesịt ndien ndien ekeme ndinam unana edida ukem ukem odu ke ufọt orụk mmọn̄ibọk ke idem owo eke ekpemede-kpeme ye eke edide idiọk, anamde mmọ ẹdu ke itiendịk edinyene udọn̄ọ esịt.
Ndusụk owo ẹkeme ndidọhọ ẹte, ‘Edi edu mi edi oro’ m̀mê, ‘Nte n̄kọkọride n̄kpon edi oro.’ Edi, oro iwọrọke ite ke afo ukemeke ndikpụhọde, ebe ke ndidomo ke ofụri esịt ndida item Abasi nsịn ke edinam. Ke Bible fo, se item esie aban̄ade iyatesịt ye ifụtesịt nte ẹwetde ke Mme N̄ke 14:29, 30; 22:24, 25; Ephesus 4:26; James 1:19, 20.
Ndida ọniọn̄ Abasi oro nsịn ke edinam ekeme ndinam fi okop nsọn̄idem onyụn̄ anam uwem fo ọniọn̄. Times ọkọdọhọ ete: “Ediwak mme anam ndụn̄ọde ẹdọhọ ke mbon oro ẹmade iyatesịt ẹkeme ndisụhọde n̄kpọndịk eke edibak n̄kpa ebe ke ndikpụhọde mme ibụmede ibụmede, idiọk ediwụt ntụk.”