Edinyene Nneme ye Mbọhọidụn̄ Ndi Kpukpru Nti Owo Ẹdika Heaven?

MME NTIENSE JEHOVAH ẹsima ndineme Bible ye mme mbọhọidụn̄ mmọ. Ndi enyene n̄kpọ emi mîn̄wan̄ake fi ke Bible? Ndi emenen̄ede oyom ndifiọk se Mme Ntiense Jehovah ẹkpepde m̀mê mme edinam ido ukpono mmọ? Ke edide ntre, kûmen̄e ndibụp mmọ ke ini osobode ye mmọ. Mmọ ẹyema ndineme n̄kpọ emi ye afo.

Se itienede emi edi nte nneme oro Mme Ntiense Jehovah ẹsinyenede ye mme mbọhọidụn̄ mmọ esitiede. Ẹyak ida ke Ntiense emi ekerede Marcus aka ufọk mme Robert.

Nso ke Mbon Oro Ẹkade Heaven Ẹdinam Do?

Marcus: Ndi emekere ke n̄kpọ ọyọfọn akan emi ke ini iso, m̀mê edikam idọdiọk ikan emi, m̀mê edisụk itie ntem?

Robert: N̄kere ke n̄kpọ ọyọfọn sia nduak ndika n̄kodu ke heaven ye Ọbọn̄.

Marcus: Oro ọfọn etieti. Bible etịn̄ aban̄a nte heaven etiede ye nte ke mme owo ẹyeka do. Ndi akanam emekere m̀mê nso ke mbon oro ẹkade heaven ẹdinam do?

Robert: Nnyịn idika ikodu ye Abasi inyụn̄ itoro enye ke nsinsi nsinsi.

Marcus: Ọfọn etieti. Bible itịn̄ke kpọt ke mme owo ẹyeka heaven, edi etịn̄ n̄ko akpan utom emi mmọ ẹdinamde do.

Robert: Nso ke mmọ ẹdinam?

Marcus: Bible etịn̄ se mmọ ẹdinamde mi ke Ediyarade 5:10. Itien̄wed oro ọdọhọ ete: “[Afo Jesus amanam] mmọ ẹdi obio ubọn̄ ye mme oku ẹnọ Abasi nnyịn, ndien mmọ ẹyekara isọn̄ nte ndidem.” Da, itien̄wed emi ọdọhọ ke mbon oro ẹkade heaven ẹdinam nso do?

Robert: Ọdọhọ ke mmọ ẹyekara isọn̄ emi nte ndidem.

Marcus: Sọsọn̄ọ etieti.

Mmanie ke Mmọ Ẹdikara?

Marcus: Ndi ukereke ke edieke mbon oro ẹkade heaven ẹdikarade nte ndidem, ke anaedi enyene mbon oro mmọ ẹdikarade? Ndi odu ukara emi mînyeneke mbon emi enye akarade?

Robert: Mmokụt se etịn̄de.

Marcus: Ntre se ikpakam ibụpde edi, Mmanie ke mmọ ẹdikara?

Robert: N̄kere ke nnyịn idikara mbon oro mîkpaha kan̄a idi heaven.

Marcus: Ekpedi ntre edieke kpukpru nti owo ẹdikade heaven. Edi yak ikere ise, ndi odu ndusụk nti owo emi mîdikaha heaven?

Robert: Akananam n̄kopke Christian ndomokiet etịn̄de utọ ikọ oro.

Marcus: Se idude ke Psalm 37:29 anam mbụp mbụme oro. Mbọk, kot itien̄wed oro ise.

Robert: Ọfọn, itien̄wed oro okot ke Edisana Ŋwed Abasi Ibom ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”

Marcus: Sọsọn̄ọ etieti. Itien̄wed oro ọdọhọ ke ediwak nti owo ẹdidụn̄ ke m̀mọ̀n̄?

Robert: Ọdọhọ ke ẹdidụn̄ ke isọn̄.

Marcus: Nnennen. Ọdọhọ n̄ko ke mmọ ẹdidụn̄ mi “ke nsinsi,” idịghe ke usen ifan̄ kpọt.

Robert: Ekeme ndidi oro ọwọrọ ke nti owo ẹdisụk idodu ke isọn̄ emi, oro edi ke nnyịn ima ikpa inyọn̄ọ heaven, ke nti owo en̄wen ẹyemana ke isọn̄ emi.

Marcus: Itien̄wed emi ekeme ndin̄wan̄a ndusụk owo nte an̄wan̄ade fi. Okûkam udi itien̄wed emi etịn̄ n̄kpọ en̄wen? Okûkam udi enye ọdọhọ ke nti owo ẹdidụn̄ ke isọn̄ emi ke nsinsi nsinsi-o?

Robert: N̄kereke ntre.

Isọn̄ Emi Edidi Paradise

Marcus: Yak ise se Ediyarade 21:4 etịn̄de aban̄a nte n̄kpọ ẹditiede ke isọn̄ emi. Itien̄wed oro ọdọhọ ete: “[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.” Ndi ukereke ke uwem eyenem etieti?

Robert: Eyenem. Edi n̄kere ke itien̄wed emi etịn̄ aban̄a nte n̄kpọ ẹditiede ke heaven.

Marcus: Edi akpanikọ nte ke n̄kpọ ẹdinyụn̄ itie ntem ye mbon oro ẹkade heaven. Edi fiak se itien̄wed oro ise. Nso ke enye etịn̄ aban̄a n̄kpa?

Robert: Enye ọdọhọ ke ‘n̄kpa ididụhe aba.’

Marcus: Nnennen. Kere ise, ndi ẹkeme ndidọhọ ke n̄kpọ ididụhe aba ke ini n̄kpọ oro mîkodụhe-du ke akpa ifet?

Robert: Ihih.

Marcus: Ndi akanam omokop ẹdọhọde ke ẹkpan̄a ke heaven? N̄kọ, isọn̄ emi kpọt ke mme owo ẹsikpan̄a.

Robert: Ntre ke edi.

Marcus: Bible ọdọhọ ke ndusụk nti owo ẹyeka heaven, edi ediwak nti owo ẹdidu mi ke isọn̄ ke nsinsi. Mmọdiọn̄ọ ke emesikop ọwọrọetop ikọ Jesus emi ke Matthew 5:5. Itien̄wed oro ọdọhọ ete: “Mmọ oro ẹnyenede ifụre ifụre ido ẹkop inemesịt, koro mmọ ẹyeda isọn̄ ẹnyene.”

Robert: Ih, mmesikop ẹkotde itie Bible emi ediwak ini ke ufọkabasi nnyịn.

Marcus: Edieke mbon oro ẹnyenede ifụre ifụre ido ẹdidụn̄de mi ke isọn̄, ndi oro iwụtke ke mme owo ẹyedụn̄ ke isọn̄ emi? Mbon oro ẹdidụn̄de ke isọn̄ emi ẹyebọ edidiọn̄ emi Ediyarade etịn̄de aban̄a. Mmọ ẹyekụt nte Abasi edisiode n̄kpa ifep inyụn̄ inam isọn̄ emi akabade edi Paradise.

Robert: Mmokop se etịn̄de, edi n̄kereke ke itie Bible kiet m̀mê iba emi kpọt ekeme ndinam nnịm se etịn̄de emi.

Marcus: Ediwak itie en̄wen ẹdu ke Bible emi ẹtịn̄de nte uwem editiede ke isọn̄ emi ke ini iso. Edieke enyenede ini, n̄kpama ndiwụt fi itien̄wed kiet ke otu mme itie Bible emi mmade n̄kan.

Robert: Wụt mi ise.

“Idiọkowo Ididụhe Aba”

Marcus: N̄kọ emeti ke ima ikokot Psalm 37:29. Isan̄ emi iyom ndikot Psalm 37:10, 11. Mbọk kot itien̄wed emi ise.

Robert: Itie oro okot ntem: “Ayak esisịt, idiọkowo ididụhe aba; afo oyonyụn̄ etịn̄ enyịn ke ebiet esie, ndien enye ididụhe. Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”

Marcus: Sọsọn̄ọ-o! Ufan̄ikọ 11 ọdọhọ ke “mbon nsụkidem” m̀mê nti owo ẹdidụn̄ ke m̀mọ̀n̄?

Robert: Ọdọhọ ke mmọ “ẹyeda isọn̄ ẹnyene.” Edi n̄kere ke itien̄wed emi ke osu idahaemi sia nti owo mmọmi ẹdụn̄ọ ke isọn̄ emi.

Marcus: Se afo etịn̄de edi akpanikọ. Edi ndi ufan̄ikọ emi inyụn̄ idọhọke ke “ediwak emem” eyenem mmọ esịt. Ndi emem odu mfịn ke isọn̄ emi?

Robert: Idụhe.

Marcus: Itien̄wed emi edinam didie osu? Yak nnọ fi uwụtn̄kpọ ise: Da ke ọmọbọp ufọk ọdọn̄ mme owo. Ndusụk mbon emi ẹdụn̄de ke ufọk emi ẹfọn, ẹkama ufọk mmọ ọfọn ẹnyụn̄ ẹfọn ido ye mme mbọhọidụn̄ mmọ; ndusụk ẹdiọk, ikamake ufọk ọfọn, edi ẹdiọk ido ye mbọhọidụn̄ mmọ. Nso ke akpanam edieke mmọ mîmaha ndikpụhọde?

Robert: N̄kposion̄o mmọ ke ufọk mi.

Marcus: Se Abasi onyụn̄ oyomde ndinam ye mme idiọkowo edi oro. Fiak se ufan̄ikọ 10 ise. Itie oro ọdọhọ ke “mme idiọkowo ididụhe aba.” Emi ọwọrọ ke Abasi oyosio mme idiọkowo emi ẹfịnade nti owo efep. Do ndien ke nti owo ẹdidu ke emem ke isọn̄ emi. Mmọdiọn̄ọ ke emi okpụhọde se ọdiọn̄ọde.

Robert: Akananam n̄kopke utọ n̄kpọ emi ke ufọkabasi nnyịn.

Marcus: Nte afo ama eketetịn̄, itien̄wed kiet m̀mê iba ikemke ndida nsọn̄ọ se isụk inemede emi. Ọfọn ise se ofụri Bible etịn̄de aban̄a se iditịbede inọ nti owo ke ini iso. Edi nte isụk ikụtde ke itien̄wed ifan̄ oro ikotde do, ndi ukereke ke ndusụk nti owo ẹyeka heaven ndien ediwak eken ẹdụn̄ ke isọn̄ emi ke nsinsi?

Robert: Itịmke in̄wan̄a mi, edi mme itien̄wed ifan̄ oro osụk okotde oro ẹwụt ke nti owo ẹyedụn̄ ke isọn̄ emi ke nsinsi. Mmọn̄ nda ini n̄kere mban̄a emi.

Marcus: Ekeme ndidi eyenyene mbụme en̄wen nte edikerede iban̄a emi. Ke uwụtn̄kpọ, nso iditịbe inọ nti owo emi ẹkekpan̄ade mbemiso eyo nnyịn? Ndi kpukpru mmọ ẹma ẹka heaven? Edieke mîdịghe ntre, mmọ ẹdu m̀mọ̀n̄ idahaemi?

Robert: Nti mbụme ẹdi emi-o.

Marcus: N̄kpama ndinam n̄kpọ iba nnọ fi. Akpa, mmọn̄ n̄wet itie Bible ifan̄ emi ẹsọn̄ọde se isụk inemede emi.a Ọyọhọ iba, n̄kpama ndifiak ndi ndineme mme itien̄wed emi ke afo ama akada ini okot onyụn̄ etie ekere mmọ.

Robert: Oro ọfọn etieti. Da, sọsọn̄ọ-o.

[Ikọ Idakisọn̄]