Nam Nsinsi Ubọk Jehovah Edi Ibetedem Fo

“Nsinsi Abasi edi ebietidụn̄ fo, ndien nsinsi ubọk ẹdu ke idak.” —DEUTERONOMY 33:27, American Standard Version.

1, 2. Ntak emi ikọt Jehovah ẹkemede ndinyene mbuọtidem ke ibetedem esie?

JEHOVAH esikere aban̄a ikọt esie. Ke uwụtn̄kpọ, ke ofụri ukụt nditọ Israel, “enye ekedi n̄kpọ mfụhọ ọnọ enye”! Ke ima ye mbọm, enye “ama emenede mmọ onyụn̄ emen mmọ akama.” (Isaiah 63:7-9, NW) Ntre edieke nnyịn inamde akpanikọ inọ Abasi, nnyịn imekeme ndinyene mbuọtidem ke ibetedem esie.

² Prọfet Moses ọkọdọhọ ete: “Nsinsi Abasi edi ebietidụn̄, nsinsi ubọk ẹnyụn̄ ẹdu ke idak.” (Deuteronomy 33:27) Edikabade efen ọdọhọ ete: “Nsinsi Abasi edi ebietidụn̄ fo, ndien nsinsi ubọk ẹdu ke idak.” (American Standard Version) Edi didie ke ubọk Abasi ọnọ mme asan̄autom esie ibetedem?

Ntak Emi Ekese Nsọn̄ọn̄kpọ Ẹdude?

3. Ini ewe ke okopitem ubonowo edidara “itie eyenisọn̄ emi enyenede ubọn̄ eke nditọ Abasi”?

³ Ndinam n̄kpọ Jehovah ikpanke nnyịn ndisobo nsọn̄ọn̄kpọ emi edide ọsọ n̄kpọ ọnọ mme anana mfọnmma owo. Job, asan̄autom Abasi ọkọdọhọ ete: “Owo eke n̄wan amande omụhọ usen, onyụn̄ oyụhọ ukụt.” (Job 14:1) Kaban̄a “eyo uwem nnyịn,” andiwet psalm ọkọdọhọ ete: “Uwem mmọ ọyọhọ ye ukụt ye mfiomo.” (Psalm 90:10, NW) Uwem edisụk odu ke usụn̄ oro tutu ‘ẹnyan̄a ekondo ẹsio ke itieufụn mbiara ẹsịn ke itie eyenisọn̄ emi enyenede ubọn̄ eke nditọ Abasi.’ (Rome 8:19-22) Oro editịbe ke ini Tọsịn Isua Ukara Christ. Ke isọn̄ uwa ufak Jesus, ẹyenyan̄a mbon oro ẹdidude ke idak Obio Ubọn̄ adan̄aoro ẹsio ke idiọkn̄kpọ ye n̄kpa. Etisịm utịt Tọsịn Isua, Christ ye nsan̄a ndidem-oku esie ẹyen̄wam okopitem ubonowo ndisịm mfọnmma, ndien mbon oro ẹnamde akpanikọ ẹnọ Abasi ke ini akpatre udomo ke ubọk Satan ye mme demon esie ẹyedi se ẹwetde enyịn̄ mmọ taktak ẹsịn ke “n̄wed uwem.” (Ediyarade 20:12-15) Adan̄aoro mmọ ẹyedara ubọn̄ ubọn̄ ubọhọ-ufụn nditọ Abasi ọyọhọ ọyọhọ.

4. Utu ke ndikụni mban̄a idaha nnyịn ke uwem, nso ke nnyịn ikpanam?

⁴ Mi kan̄a, utu ke ndikụni mban̄a idaha nnyịn ke uwem, ẹyak nnyịn ibuọt idem ke Jehovah. (1 Samuel 12:22; Jude 16) Ẹyak nnyịn n̄ko iwụt esịtekọm inọ Akwa Oku nnyịn, Jesus, emi ebede ke enye nnyịn ikeme ndisan̄a n̄kpere Abasi “man nnyịn ibọ mbọm, inyụn̄ ikụt mfọn eke edin̄wamde nnyịn ke ini nnanenyịn.” (Mme Hebrew 4:14-16) Nnyịn ikpedehe-de ibiet Adam. Ke akpanikọ, enye nte mînenke ama odori Abasi ikọ ke ndinọ enye idiọk n̄wan, ọdọhọde ete: “N̄wan emi afo ọkọnọde ete odu ye ami, enye ọkọnọ mi mfri eto oro, ami nnyụn̄ ndia.” (Genesis 3:12) Abasi esinọ nti n̄kpọ inyụn̄ idaha nsọn̄ọn̄kpọ isọk nnyịn. (Matthew 5:45; James 1:17) Ndiọi idaha ẹsiwak ndidi utịp unana eti ibuot nnyịn m̀mê ndudue owo en̄wen. Mmọ ẹkeme n̄ko ndisịm nnyịn ke ntak emi nnyịn idide mme anam idiọkn̄kpọ inyụn̄ idụn̄de ke ererimbot emi odude ke odudu Satan. (Mme N̄ke 19:3; 1 John 5:19) Edi, nsinsi ubọk Jehovah kpukpru ini esin̄wam mme anam-akpanikọ asan̄autom esie ẹmi ke akam ẹberide edem ke enye enyụn̄ ẹdade item Ikọ esie ẹsịn ke edinam ke idemmọ.—Psalm 37:5; 119:105.

Ẹmụm Ẹkama ke Ini Udọn̄ọ

5. Nso nsịnudọn̄ ke mbon udọn̄ọ ẹkeme ndikụt ke Psalm 41:1-3?

⁵ Udọn̄ọ esinam n̄wakn̄kan owo ke otu nnyịn ẹkụt ukụt ke ndusụk ini. Edi, David ọkọdọhọ ete: “Ọfọfọn ọnọ owo eke otịmde ndinam ye eyen ubuene: Jehovah eyenam enye ọbọhọ ke usen nnanenyịn. Jehovah eyekpeme enye, onyụn̄ onịm enye uwem; enye eyekụt unen ke isọn̄: ndien afo kûyak enye unọ se mme asua esie ẹmade. Jehovah eyemụm enye akama ke bed mmemdiem: afo okpụhọde ofụri mbri esie ke udọn̄ọ esie.”—Psalm 41:1-3.

6, 7. Didie ke Abasi akan̄wam David ke ini enye okodude ke bed udọn̄ọ, ndien didie ke emi ekeme ndisịn udọn̄ nnọ mme asan̄autom Jehovah mfịn?

⁶ Owo oro owụtde edikere mban̄a esin̄wam owo unana. “Usen nnanenyịn” ekeme ndidi idiọk idaha ekededi m̀mê anyanini nsọn̄ọn̄kpọ oro anamde owo okop mmemidem. Enye ọbuọt idem ke Abasi ndikpeme enye ke ini udọn̄ọ, ndien mmọ en̄wen ‘ẹnam enye okop inemesịt ke isọn̄’ ke ndisuan etop aban̄ade mbọm mbọm edinam Abasi ye enye. Abasi ama omụm David akama “ke bed mmemidem,” iso-ọfọn ke mfịghe mfịghe ini oro Absalom eyen David okoyomde ndibọ ebekpo Israel nda.—2 Samuel 15:1-6.

⁷ Sia David ama ekekere aban̄a mme usụhọde owo, enye ama ekere ete ke Abasi eyemụm imọ akama ke adan̄aemi enye mîkenyeneke un̄wam ke bed udọn̄ọ. (Psalm 18:24-26) Okposụkedi ọkọdọn̄ọde n̄kpa n̄kpa, enye ama enyene mbuọtidem nte ke Abasi eyekpụhọde ‘mbri esie,’ idịghe ke utịbe utịbe edisio udọn̄ọ mfep, edi ke ndisọn̄ọ enye idem ye mme ekikere ndọn̄esịt. Emi ekpetie nte n̄kpọ eke Jehovah okokpụhọrede mbri esie oto enyeemi ọdọn̄ọde esịn ke enyeemi afiakde okop nsọn̄idem. Kpasụk ntre, edieke nnyịn idọn̄ọde nte mme asan̄autom Abasi, nsinsi ubọk Jehovah eyen̄wam nnyịn.

Ndọn̄esịt Ẹnọde Mbon Oro Ẹkopde Mfụhọ

8. Didie ke owo udọn̄ọ kiet edide Christian okowụt ibetedem esie ke Abasi?

⁸ Udọn̄ọ ekeme ndikama mfụhọ ekikere. Christian kiet oro ọdọn̄ọde n̄kpa n̄kpa, emi ndusụk ini esinanade ukeme oro ekemde ndikam n̄kot n̄wed, ọdọhọ ete, “emi ama anam mi nsikop ọkpọsọn̄ mfụhọ eke ntụk, ekikere edikere ke ndotke, ye idem mmọn̄eyet.” Ke ọfiọkde ete ke Satan oyom ndida unana nsịnudọn̄ n̄kan imọ ubọk, enye ke an̄wana ọbiọn̄ọ, ọfiọkde ete ye un̄wam Jehovah imọ ikemeke ndikpu. (James 4:7) Eren emi edi n̄kpọ nsịnudọn̄ ọnọ mbon en̄wen oro ẹdiọn̄ọde ẹte ke enye ọbuọt idem ke Abasi. (Psalm 29:11) Idem ke ini okodude ke ufọkibọk, enye ama esinọ mbonudọn̄ọ ye mmọ en̄wen ikot ke urụk ukopikọ man ọbọp mmọ ke n̄kan̄ eke spirit. Enye ke idemesie esikop nsịnudọn̄ ke ndikpan̄ utọn̄ n̄kop kaset ikwọ Obio Ubọn̄ ye mme ibuotikọ ke n̄wed emi ye nsan̄a magazine esie, Awake!, n̄ko ye ke ndibuana ye ekemmọ mme Christian. Eyenete emi ọdọhọ ete: “Ami kpukpru ini mmesitịn̄ ikọ nnọ Jehovah ke akam mben̄ede enye nte ọnọ mi ukeme, ndausụn̄, ndọn̄esịt, ye un̄wam ndiyọ.” Edieke afo edide Christian emi enyenede akwa mfịna unana nsọn̄idem, buọt idem ke Jehovah kpukpru ini nnyụn̄ nnam nsinsi ubọk esie edi ibetedem fo.

9. Nso mme uwụtn̄kpọ ẹwụt nte ke mfụhọ ekikere ẹsifịna ikọt Abasi ndusụk ini?

⁹ Mfụhọ edi akani mfịna. Ke adan̄aemi odude ke idomo, Job ama etịn̄ ikọ nte owo oro ekerede ke Abasi ọkpọn̄ imọ. (Job 29:2-5) Ekikere aban̄ade n̄wụre idaha Jerusalem ye mme ibibene esie ama anam Nehemiah ofụhọ, ndien Peter ama okop mfụhọ aban̄a edikan̄ oro enye akakan̄de Christ tutu enye atua eyet ata etieti. (Nehemiah 2:1-8; Luke 22:62) Epaphroditus ama okop mfụhọ ke ntak mme Christian ke Philippi ẹkekopde ẹte ke enye ama ọduọ udọn̄ọ. (Philippi 2:25, 26) Ndusụk mme Christian ke Thessalonica ẹma ẹkop mfụhọ, ke ntak oro Paul ama akpak nditọete do ete “ẹsọn̄ọ mbon iduọesịt idem.” (1 Thessalonica 5:14) Ntre didie ke Abasi an̄wam mme utọ owo oro?

10. Nso ikeme ndidi n̄kpọ un̄wam ke ndidomo ndiyọ mfụhọ ekikere?

¹⁰ Ana ẹnam ọkpọkpọ ubiere ẹban̄a usọbọidem kaban̄a ọkpọsọn̄ mfụhọ.a (Galatia 6:5) Nduọkodudu oro ekemde ye utom oro adade ukem ukem ekeme ndin̄wam. Utu ke ndise ekese mfịna nte akpan nnanenyịn kiet, owo oro okopde mfụhọ ekeme ndikụt nte edinam utom ke ndikọk mmọ ke adiana ke adiana ọnọde un̄wam. Un̄wam ndọn̄esịt otode mbiowo esop ekeme ndinyene ata ufọn, akpan akpan edieke mfịna eke ntụk emi otụkde idaha eke spirit. (James 5:13-15) Ke akande kpukpru n̄kpọ, edi akpan n̄kpọ ndiberi edem ke Jehovah, ‘itopde kpukpru editịmede esịt nnyịn idori enye, koro enye ke ekere aban̄a nnyịn.’ Uyịre uyịre ye akam ofụri esịt ekeme ndinọ owo ‘emem Abasi oro ekpemede esịt ye ekikere ke Christ Jesus.’—1 Peter 5:6-11; Philippi 4:6, 7.

Jehovah Esin̄wam Nnyịn Ndiyọ Mfụhọ

11-13. Nso ikeme ndin̄wam ndisụhọde mfụhọ ubọk ke ntak n̄kpa owo ima?

¹¹ Mfụhọ mfụhọ n̄kpọntịbe efen edi n̄kpa owo ima. Abraham ama eseme aban̄a n̄kpa n̄wan esie, Sarah. (Genesis 23:2) Ke ini Absalom eyen esie akakpade, David ama ofụhọ. (2 Samuel 18:33) Kamse, idem mfọnmma owo oro Jesus ama “atua” aban̄a n̄kpa ufan esie Lazarus! (John 11:35) Ntre mfụhọ esidu ke ini n̄kpa adade owo ima. Edi nso ikeme ndin̄wam man ẹsụhọde utọ mfụhọ oro ubọk?

¹² Abasi esin̄wam ikọt esie ndiyọ ọkpọsọn̄ mfụhọ n̄kpa. Ikọ esie ọdọhọ ete ke ediset ke n̄ka eyedu. Ntem, nnyịn “[ifụhọke] kpa nte mmọ eken eke mînyeneke idotenyịn.” (1 Thessalonica 4:13; Utom 24:15) Spirit Jehovah esin̄wam nnyịn ndinyene emem ye mbuọtidem nnyụn̄ ntie n̄kere utịbe utịbe ini iso oro ẹn̄wọn̄ọde ke Ikọ esie, man mfụhọ mfụhọ ekikere aban̄ade n̄kpa owo ima edikan nnyịn ubọk ofụri ofụri. Ẹsinyene ndọn̄esịt n̄ko ẹto edikot N̄wed Abasi nnyụn̄ mbọn̄ akam nnọ “Abasi kpukpru ndọn̄esịt.”—2 Corinth 1:3, 4; Psalm 68:4-6.

¹³ Nnyịn imekeme ndinyene ndọn̄esịt ito idotenyịn ediset ke n̄kpa kpa nte Job owo Abasi ekenyenede, emi ọkọdọhọde ete: “Afo [Jehovah] akpakam odịp mi ke obio ekpo [“sheol,” NW], onyụn̄ onịm mi ke ndịbe ebiet, tutu iyatesịt fo ebe, onyụn̄ odori mi ini, ndien eti mi! Ke owo akpade, nte enye ediset? nyebet ke ofụri ini utom mi, tutu edikpụhọde itie mi edi. Afo okpokot, ndien ami n̄kpeyere fi, utom ubọk fo ọkpọdọn̄ fi.” (Job 14:13-15) Owo isiwakke ndikop ọkpọsọn̄ mfụhọ ke ini edima ufan akade isan̄, koro nnyịn imodori enyịn ndifiak n̄kụt enye. Imekeme ndisụhọde ọkpọsọn̄ mfụhọ oro ikopde ito editaba owo ima edieke isede n̄kpa anam-akpanikọ Christian ke ukem usụn̄ oro. Edieke enye ekenyenede idotenyịn eke isọn̄, ẹyedemede enye ke idap n̄kpa mi ke isọn̄ ke ini Tọsịn Isua Ukara Christ. (John 5:28, 29; Ediyarade 20:11-13) Ndien edieke nnyịn idoride enyịn ndidu uwem ke isọn̄ ke nsinsi, nnyịn imekeme ndidu mi ndikọm owo ima nnyịn oro ẹnamde eset mi.

14. Didie ke ebeakpa iba ẹdide Christian ẹkeyọ n̄kpa mme ebe mmọ?

¹⁴ Ke ebe esie ama akakpa, eyenete an̄wan kiet ama ọfiọk ete ke imọ inyene ndika iso ke mme edinam imọ ke utom Abasi. Ke ẹsiode ediyọhọ ye ‘ekese n̄kpọ ndinam ke utom Ọbọn̄’ ẹfep, enye ama esikịm ọfọn̄ bed emi enyenede mbai 800. (1 Corinth 15:58) Enye ọdọhọ ete: “Emi ekedi eti utom, koro kpukpru ini oro ami nkanamde utom ami mma n̄keme ndikpan̄ utọn̄ n̄kop mme ikwọ Obio Ubọn̄ ye ọkpọ umụmikọ Bible, ẹmi ẹkesinamde esịt mi enyene n̄kpọ ndikere.” Enye ke idara esiti edidi oro ebiowo kiet emi enyenede ifiọk ye n̄wan esie ẹkedide ẹdise enye. Ke akamade Bible, ebiowo oro ama owụt ke Abasi enen̄ede ekere aban̄a mme ebeakpa. (James 1:27) Christian an̄wan efen ikayakke idem inọ edikop idem mbọm ke ini ebe esie akakpade. Enye ama owụt esịtekọm aban̄a un̄wam oro mme ufan ẹkenọde onyụn̄ enyene ọkpọsọn̄ udọn̄ ke idem mmọ en̄wen. Enye ọdọhọ ete, “Ami mma nsibọn̄ akam ediwak ini nnyụn̄ n̄kọri n̄kpet n̄kpet itie ebuana ye Jehovah.” Ndien nso edidiọn̄ ke edi ntem ndinyene ibetedem nto nsinsi ubọk Abasi!

Un̄wam ke Ini Nnyịn Iduede

15. Nso idi akpan n̄kpọ oro esịnede ke mme ikọ David ke Psalm 19:7-13?

¹⁵ Okposụkedi nnyịn imade ibet Jehovah, nnyịn imesidue ke ndusụk ini. Emi nte eyịghe mîdụhe esinam nnyịn ikop mfụhọ, ukem nte David, emi akamade ibet, item, ewụhọ, ye ikpe Abasi akan gold. Enye ọkọdọhọ ete: “Ẹda mmọ ẹteme owo fo; akamba udori oto ke edinịm mmọ. Anie ekeme ndidiọn̄ọ ndudue esiemmọ? Nam mi nsana mbọhọ mmọ eke ẹdịbede. Mụm owo fo kama, mbak n̄kọinnam; kûyak mmọ ẹkan mi: ndien nyefọn mma, nnyụn̄ nsana mbọhọ ikpọ mme idiọkido.” (Psalm 19:7-13) Ẹyak nnyịn idụn̄ọde mme ikọ emi.

16. Ntak emi nnyịn ikpefepde n̄koinnam-a?

¹⁶ N̄koinnam ẹtịm ẹdiọk ẹkan ndudue. Ẹkesịn Saul nte edidem ke ntak okokoide-koi ọfọp uwa onyụn̄ onịmde Agag edidem Amalek ye mfọnn̄kan n̄kpọ mbụme uwem, kpa ye oro Abasi ama okowụk ete ẹsobo Amelek ofụri ofụri. (1 Samuel 13:8-14; 15:8-19) Ẹketọ edidem Uzziah akpamfia ke ntak okokoide-koi ọbọ utom oku anam. (2 Chronicles 26:16-21) Ke ini ẹkemende ekebe ediomi ẹka Jerusalem ndien enan̄ oro okodụride ukpatn̄kpọ okonyụn̄ oyomde ndinam ọduọ, Abasi ama amia Uzzah owot ke ntak okomụmde Ekebe oro ke unana ukpono man ediduọ. (2 Samuel 6:6, 7) Ntre, edieke nnyịn mîdiọn̄ọke se ikpanamde mîdịghe m̀mê nnyịn imenyene odudu ndinam n̄kpọ, nnyịn ikpenyene ndiwụt nsọhọdeidem inyụn̄ ibụp mbon oro ẹnyenede ifiọk. (Mme N̄ke 11:2; 13:10) Ke akpanikọ, edieke edide nnyịn ima ikokoi inam n̄kpọ, nnyịn ikpenyene ndibọn̄ akam nyom edifen nnọ nnyụn̄ mben̄e Abasi an̄wam nnyịn osio ke n̄koinnam ke ini iso.

17. Didie ke idiọkn̄kpọ oro ẹdịpde ekeme nditụk owo, ndien didie ke ẹkeme ndinyene edifen nnọ ye ubọhọ?

¹⁷ Idiọkn̄kpọ oro ẹdịpde ẹkeme ndikama mfụhọ. Nte ekemde ye Psalm 32:1-5, David ama odomo ndidịp idiọkn̄kpọ esie, edi enye ama ọdọhọ ete: “Koro n̄kodopde uyo, mme ọkpọ mi ẹyemede ke ntuan̄a mi ofụri usen. Koro ubọk fo odobide mi ke idem ke uwemeyo ye okoneyo: nsek mi asat ke ndaeyo.” Ndidomo ndifịk ubieresịt oro obiomde owo ikpe nnịm ama anam David akpa mba, ndien ọkpọsọn̄ ubiak ama osụhọde odudu esie nte eto atabade mbara oro ọnọde uwem ke ini ọkpọsọn̄ eyo m̀mê ke ufiop ndaeyo. Enye nte an̄wan̄ade ama enyene ndiọi utịp ke ekikere ye ke ikpọkidem onyụn̄ ataba idatesịt ke ntak emi enye okokpụde ndiyarade idiọkn̄kpọ. Ndiyarade idiọkn̄kpọ nnọ Abasi ikpọn̄îkpọn̄ ekeme ndida edifen nnọ ye ubọhọ ẹdi. David ọkọdọhọ ete: “Ọfọfọn ọnọ owo eke ẹfende mme idiọkido esie, ẹnyụn̄ ẹfụkde ndudue esie. . . . Nyesian fi ndudue mi, ndien n̄kofụkke mme ukwan̄n̄kpọ mi. N̄kọdọhọ nte, Nyetịn̄ mme idiọkido mi nnọ Jehovah; ndien afo eyefen ukwan̄n̄kpọ ye ndudue mi.” Ima ima un̄wam otode mbiowo Christian ekeme ndin̄wam ndinam esọp enyene nsọn̄idem eke spirit.—Mme N̄ke 28:13; James 5:13-20.

18. Nso uyarade idu nte ke idiọkn̄kpọ ekeme ndinyene mme utịp ẹmi ẹbịghide, ndien nso ikeme ndidi ebiet ndọn̄esịt ke mme utọ idaha oro?

¹⁸ Idiọkn̄kpọ ekeme ndinyene utịp oro ebịghide. Enye ama enyene ọnọ David, emi ekesịnde efịbe ye Bath-sheba, anamde ẹwot ebe esie, onyụn̄ ọdọde ebeakpa emi okoyomode mi. (2 Samuel 11:1-27) Okposụkedi oro Abasi okowụtde mbọm ke ntak ediomi Obio Ubọn̄, edikabade esịt David, ye edinam n̄kpọ ye mbon en̄wen ke mbọm, David ama enyene ‘afanikọn̄ ke ufọk esie.’ (2 Samuel 12:1-12) Eyen efịbe oro ama akpa. Amnon, eyen David ama adan̄ Tamar, eyenete esie an̄wan ke n̄kanubọk ẹma ẹnyụn̄ ẹwot enye ke ewụhọ Absalom, eyeneka esie eren. (2 Samuel 12:15-23; 13:1-33) Absalom ama esuene David ke ndinyene ebuana idan̄ ye ibanesa David. Enye ama odomo ndibọ ebekpo ubọn̄ nda edi ẹma ẹwot enye. (2 Samuel 15:1–18:33) Idiọkn̄kpọ osụk enyenyene utịp. Ke uwụtn̄kpọ, anamidiọk oro ẹma ẹkesio ẹfep ekeme ndikabade esịt ndien ẹfiak ẹda ke esop, edi ediwak isua ẹyebe mbemiso ọbọhọ idiọk enyịn̄ ye mfịghe eke ntụk ẹmi ẹsụn̄ọde ẹto idiọkn̄kpọ. Mi kan̄a, edi n̄kpọ ndọn̄esịt didie ntem ndinyene edifen nnọ otode Jehovah ye ibetedem nsinsi ubọk esie!

Ẹnyan̄a Ẹsio ke Mfịghe Oro Ẹsịmde Nnyịn

19. Didie ke spirit Abasi ekeme ndin̄wam ke ini isobode ọkpọsọn̄ idomo?

¹⁹ Ke ini ẹdomode nnyịn ọkpọsọn̄ ọkpọsọn̄, nnyịn imekeme ndinana eti ibuot ye ukeme oro ekemde ndinam ubiere nnyụn̄ nnam enye. Ke utọ idaha oro, spirit Abasi “anyan̄a mmemidem nnyịn: koro nnyịn mîfiọkke ndibọn̄ akam nte nnyịn ikpọbọn̄de: edi spirit ke idemesie anam n̄kpeubọk ọnọ nnyịn ye mmụm eke owo mîkemeke nditịn̄.” (Rome 8:26) Edieke Jehovah anamde mme idaha ẹkpụhọde, nnyịn ikpenyene ndiwụt esịtekọm. Edi, ubọk esie ekeme ndinyan̄a nnyịn ke usụn̄ efen. Edieke nnyịn ibọn̄de akam iyom eti ibuot, Jehovah ekeme ndiwụt nnyịn se ikpanamde ebe ke spirit esie onyụn̄ ọnọ ukeme oro ẹyomde ndinam enye. (James 1:5-8) Ye un̄wam esie, nnyịn imekeme ndiyọ ke ini ‘nsio nsio idomo ẹnamde nnyịn ikop mfụhọ’ inyụn̄ ibe mmọ ye mbuọtidem oro ẹdomode ẹnyụn̄ ẹnamde ọsọn̄ idem.—1 Peter 1:6-8.

20. Nso ke nnyịn ididara edieke nnyịn inen̄erede inam nsinsi ubọk Jehovah edi ibetedem nnyịn?

²⁰ Ẹyak nnyịn ikûdede ikpa mba ke ndiwọn̄ọde mbịne Abasi ke akam. David ọkọdọhọ ete, “Enyịn mi osụk ese Jehovah kpukpru ini: koro edi enye edisio ukot mi ke iyịre. Kabade se mi, nyụn̄ tua mi mbọm: koro ami ntiede ikpọn̄ ke nnanenyịn. Ndutụhọ esịt mi omokpon: sio mi ke nnanenyịn mi. Se ukụt mi, ye afanikọn̄ mi; nyụn̄ dahado ke kpukpru mme idiọkido mi.” (Psalm 25:15-18) Ukem nte David, nnyịn iyenyene edinyan̄a, mfọn, ye edifen nnọ Abasi edieke nnyịn inen̄erede inam nsinsi ubọk Abasi edi ibetedem nnyịn.

[Mme Ikọ idakisọn̄]

Didie ke Afo Ọkpọbọrọ?

◻ Didie ke Jehovah esin̄wam mme asan̄autom esie ẹmi ẹdọn̄ọde?

◻ Nso ikeme ndidi n̄kpọ un̄wam ke ini idomode ndiyọ mfụhọ ekikere?

◻ Nso ikeme ndin̄wam ndisụhọde mfụhọ n̄kpa owo ima ubọk?

◻ Didie ke mbon oro ẹdịpde idiọkn̄kpọ mmọ ẹkeme ndinyene ubọhọ?

◻ Nso un̄wam idu ke ini ẹdomode ikọt Jehovah ọkpọsọn̄ ọkpọsọn̄?

[Ndise ke page 16, 17]

Nnyịn imekeme ndinyene ndọn̄esịt ito idotenyịn ediset ke n̄kpa, nte Job owo Abasi ekenyenede