Ndikpep Edisana Ndịben̄kpọ Eke Uten̄e Abasi
Koro Christ ke idemesie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ.”—1 PETER 2-21.
1. Nso ikedi uduak Jehovah kaban̄a ‘edisana ndịben̄kpọ eke uten̄e Abasi’?
‘EDISANA ndịben̄kpọ eke uten̄e Abasi’ emi idịghe aba ndịben̄kpọ! (1 Timothy 3:16) Didie ke enye okpụhọde ntem ye mme ndịben̄kpọ eke nsunsu ido ukpono, nte ndịben̄kpọ Abasi-Ita-ke-Kiet, emi osụk atakde ndidi ndịben̄kpọ! Owo ndomokiet ikemeke ndidiọn̄ọ mmọ. Utu ke oro, Jehovah amaduak ete ke edisana ndịben̄kpọ eke uten̄e Abasi oro ẹyararede ke idem Jesus Christ mi ekpenyene ndidi se ẹkwọrọde ke usụn̄ oro atarade akan. Jesus ke idemesie ama akabade edi n̄wọrọnda uwụtn̄kpọ nte enyene-ifịk andikwọrọ Obio Ubọn̄ Abasi. Nnyịn imekeme ndikpep ekese ito etop ye ido ukwọrọikọ esie, nte nnyịn idikụtde idahaemi.
2. Ntak ẹnịmde usan̄autom Jesus akpa mbemiso ufak-a? (Matthew 20:28)
2 Ẹyak nnyịn ifiak, ndien, ibịne Jesus emi “akayararede Idemesie ke obụkidem.” (1 Timothy 3:16) Ke Matthew 20:28 nnyịn ikot ite ke Jesus “[ikedịghe] man ẹnam n̄kpọ ẹnọ Enye, edi man Enye anam n̄kpọ ọnọ owo, onyụn̄ ọnọ uwem Esie ndifak ediwak owo.” Emi anam usan̄autom esie edi akpa n̄kpọ mbemiso idem ufak. Ntak edide ntre-e? Ọfọn, ke edem ko, ke Eden, akari-n̄kari Urụkikọt oro ama eneni aban̄a unen oro Jehovah enyenede ndikara ofụri ubonowo, owụtde nte ke se Abasi obotde ẹnyene ndo n̄ko nte ke idụhe owo ndomokiet, ke osobode idomo, oro ekpekemede ndimụm nsọn̄ọnda esie n̄kama ke Ata Edikon̄. (Men Job 1:6-12; 2:1-10 domo.) Anana-ndo utom Jesus, nte mfọnmma owo, kpa “akpatre Adam,” ama ọsọn̄ọ nte ke Satan osụn̄i-isụn̄i edi idiọk osu nsu. (1 Corinth 15:45) Akande oro, Jesus ama owụt ọyọhọ ọyọhọ mme n̄kpọ oro ẹnamde enye odot ndinam n̄kpọ nte “Ọbọn̄ ye Andinyan̄a” oro Abasi emekde ndinyụn̄ ‘n̄kpe ikpe nnọ ererimbot ke edinen ido,’ ke ndimenede itie ukara Jehovah ke enyọn̄.—Utom 5:31; 17:31.
3. Didie ke Jesus ke ofụri ofụri akakan ata oro Satan akamiade?
3 Jesus ke ofụri ofụri ama akan ata oro Satan akamiade! Ke ofụri mbụk, idụhe owo ndomokiet ke isọn̄ emi anamde n̄kpọ Abasi ntre ke ofụri esịt—anamde oro kpa ye nsahi, imia, ye ndutụhọ ke ikpọkidem ye ke ekikere. Christ ekenyene ndiyọ esuene ke emiom ẹkemiomde enye ndidi Eyen Abasi. Ke kpukpru emi—idem kpa ye ibak ibak ye esuene esuene n̄kpa—enye ama ọsọn̄ọ ada, isehekede ke ndinam akpanikọ nnọ Ete esie. Ke Philippi 2:8, 9, Paul ewet ete sia Jesus okosụkde ibuot ‘tutu osụn̄ọ ke n̄kpa kpa n̄kpa ke eto ndutụhọ, Abasi ama emenede Enye onịm ke enyọn̄, onyụn̄ ọnọ Enye enyịn̄ emi okon̄de akan kpukpru enyịn̄.’ Jesus ama ayarade Satan nte ata idiọk osu nsu!
4. Ntak emi Jesus ekekemede ndidọhọ Pilate nte ke imọ ikedi ererimbot nditie ntiense nnọ akpanikọ-ọ?
4 Ntre, ke okụrede utom ukwọrọikọ eke n̄kpasịp isua ifan̄, Jesus ama ekeme nditịn̄ ikọ ntiense uko uko nnọ Pontius Pilate ete: “Omotịm etịn̄ ete ndi Edidem. N̄kamana kaban̄a ntak emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ. Kpukpru mmọ eke ẹdide eke akpanikọ ẹkop uyo Mi.” (John 18:37) Jesus ama owụt uten̄e Abasi ke akpatre idaha ke ndikwọrọ akpanikọ Obio Ubọn̄ Abasi ke ofụri Palestine. Enye ama ọnọ mme mbet esie ukpep ndidi ifịk ifịk mme ọkwọrọikọ n̄ko. Didie ke uwụtn̄kpọ esie edemede nnyịn ntem nditiene nde esie mfịn!
Ndikpep N̄kpọ Nto Uwụtn̄kpọ Nnyịn
5. Nso ke nnyịn ikeme ndikpep mban̄a uten̄e abasi ndise Jesus?
5 Ebede ke uten̄e Abasi nnyịn ke ndinam uduak Jehovah, nnyịn’ n̄ko imekeme ndiwụt nte ke Devil edi osu nsu. Sededi idom oro osịmde nnyịn, tutu amama ndomokiet idimenke udomo ye akwa ubiak ye mme n̄kpọ esuene oro Jesus okosobode. Ẹyak nnyịn, ndien, ikpep n̄kpọ ito Uwụtn̄kpọ nnyịn. Nte Mme Hebrew 12:1, 2 akpakde nnyịn, nnyịn ikpakam ifehe mbuba ye ime, “iwụk enyịn ise Jesus, Anditọn̄ọ mbuọtidem nnyịn ye Andinam enye ọfọn ama.” Ke edide isio ye Adam, emi okokpude ke ini ẹkedomode enye ke se iban̄ade uten̄e Abasi, Jesus ama akabade edi owo kiet ke isọn̄ emi akakande kpukpru idomo ke mfọnmma usụn̄. Tutu osụn̄ọ ke n̄kpa, enye ama owụt ke ‘imasana, inyeneke n̄kari, inyụn̄ iduehe, isan̄ake ye mme anam-idiọk.’ (Mme Hebrew 7:26) Ke nsọn̄ọnda oro ananade ndo, enye ama ekeme ndidọhọ mme asua esie ete: “Ewe owo ke otu mbufo ekeme ndiwụt idiọkn̄kpọ eke nnamde?” Jesus n̄ko ama akan ata oro Satan akamiade, ọdọhọde ete: “Ọbọn̄ ererimbot emi . . . inyeneke baba n̄kpọ kiet ke esịt Mi.” Ndien ke etrede akpatre utịn̄ikọ oro enye eketịn̄de ọnọ mme mbet esie mbemiso ẹdade enye ẹnọ ẹnyụn̄ ẹmụmde enye, enye ọkọdọhọ mmọ ete: “Ẹsọn̄ esịt; Ami n̄kakan ererimbot.”—John 8:46; 14:30; 16:33.
6. (a) Ntak emi Jesus ọdiọn̄ọde orụk nduọkodudu emi ubonowo oyomde-e? (b) Ke nso udomo ke Jesus okowụt uten̄e Abasi?
6 Ke odude ke obụkidem mi ke isọn̄, Jesus ama ọdiọn̄ọ se ndidi owo ọwọrọde, “ekpri akan mme angel.” (Mme Hebrew 2:7) Enye ama akabade emehe ye mmemme oro owo ẹnyenede ndien ke ntre ẹtịmde enye idem mfọn mfọn ndidi Edidem ye Ebiereikpe ubonowo ke tọsịn isua. Eyen Abasi emi, emi ọkọdọhọde ete, “Etiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyenọ mbufo nduọkodudu,” ọdiọn̄ọ orụk nduọkodudu oro ubonowo oyomde. (Matthew 11:28) Mme Hebrew 5:7-9 asian nnyịn ete: “Ke mme usen ẹmi Enye odude ke obụkidem Enye ọkọbọn̄ akam onyụn̄ anam n̄kpeubọk ye ọkpọsọn̄ eseme ye mmọn̄eyet ọnọ Abasi emi ekemede ndinyan̄a Enye nsio ke n̄kpa, Abasi onyụn̄ eyere Enye, koro Enye eten̄ede Abasi; okposụkedi nte Enye edide Eyen, Enye ekpep nsụkibuot ọfiọk oto ke ndutụhọ eke Enye okokụtde; ndien ke ẹma ẹkenam Enye ọfọn ama, Enye akabade edi ntak nsinsi edinyan̄a ọnọ kpukpru owo ẹmi ẹkopde uyo esie.” Jesus ikesehekede, idem okposụkedi enye ekenyenede ndiyọ n̄kosịm udomo oro enye osobode ifọt n̄kpa ke ndibọ ‘unan nditịn̄-ikpat’ nto Urụkikọt enyene esịt usua. (Genesis 3:15) Ukem nte Jesus, nnyịn kpukpru ini ikpakam iwụt uten̄e Abasi, idem tutu osịm n̄kpa edieke edide se ẹyomde, inyenede mbuọtidem nte ke Jehovah Abasi eyekop akam nnyịn onyụn̄ ọnọ nnyịn edinyan̄a.
‘Ndidu Uwem Nnọ Edinen Ido’
7. Nte ekemde ye 1 Peter 2:21-24, nso uwụtn̄kpọ ke Christ ọkọkpọn̄ ọnọ nnyịn, ndien didie ke usụn̄uwem esie okpotụk nnyịn?
7 Ke adan̄aemi akayarade idem ke obụkidem, Jesus ke edinam akpanikọ ama ayarade edisana ndịben̄kpọ eke uten̄e Abasi. Nnyịn ikot ke 1 Peter 2:21-24 ite: “Koro Christ ke Idemesie ama okụt ndutụhọ kaban̄a mbufo, onyụn̄ ọkpọn̄ uwụtn̄kpọ ọnọ mbufo, ete, mbufo ẹkpetiene ẹsan̄a ke nde-ikpat Imọ. Enye ikanamke idiọkn̄kpọ, akanam inyụn̄ ikwe Enye abian̄a ke inua. Ke ini owo osụn̄ide Enye, Enye isụn̄ike mmọ usiene; ke ini Enye ebede ke ndutụhọ, Enye itịn̄ke ikọ ndịghe; edi ayak ikọ Esie esịn ke ubọk Andikpe edinen ikpe. Enye ke Idemesie obiom mme idiọkn̄kpọ nnyịn ke ikpọkidem Esie ke eto, man nnyịn ikpakpa ikpọn̄ idiọkn̄kpọ, inyụn̄ idu uwem inọ edinen ido.” Nte nnyịn itiede ikere usụn̄uwem Jesus, didie ke enye esịn udọn̄ ọnọ nnyịn ntem ndibịne uten̄e Abasi, ndimụm nsọn̄ọnda n̄kama, ndinyụn̄ ndu uwem nnọ edinen ido nte enye okodude!
8. Didie ke nnyịn ikeme ndidu uwem nnọ edinen ido nte Jesus okodude?
8 Jesus ke akpanikọ ama odu uwem ọnọ edinen ido. Psalm 45:7 ama etịn̄ prọfesi aban̄a enye ete: “Afo ama se inende, onyụn̄ asua se ikwan̄ade.” Ke adade ikọ oro etịn̄ aban̄a Jesus, apostle Paul ọkọdọhọ ke Mme Hebrew 1:9 ete: “Afo amama se inende, onyụn̄ asua se ikwan̄ade.” Ye ifiọk oro nnyịn inyenede iban̄a edisana ndịben̄kpọ eke uten̄e Abasi emi, nnyịn ukem nte Jesus ikpakam ima se inende kpukpru ini inyụn̄ isua se ikwan̄ade. Ke nti ido Christian, oro ọbọde esuene idiọk idiọk ke ererimbot Satan, ye ke kpukpru n̄kpọ oro nnyịn inamde ye mbon oro ẹdude ke esịt esop Abasi ye mbonan̄wa, ẹyak nnyịn ibiere ndidu uwem nnọ edinen ido, imụmde ndinen edumbet Jehovah ikama. Ndien ẹyak nnyịn ikaiso ikop inem Ikọ Abasi man otodo inyene ikike Abasi oro otịmde edi akpan n̄kpọ ke ndibiọn̄ọ Devil ye mme n̄kukan esie!
9. Nso ikadian n̄kpọ ke ifịk oro Jesus ekenyenede ke utom ukwọrọikọ, ndien emi abuana nso ke se iban̄ade mme ekpemerọn̄ nsunsu ido ukpono?
9 Odu n̄kpọ efen oro ekedemerede Jesus esịt ndisịn ifịk ke utom esie. Nso ikedi oro? Ke Matthew 9:36 nnyịn ikot ite: “Ke adan̄aemi Enye okụtde mme otuowo, atua mmọ mbọm, koro mmọ ẹdude ke nnanenyịn ẹnyụn̄ ẹsuanade, nte erọn̄ eke mînyeneke andikpeme.” Ntre Jesus “onyụn̄ ọtọn̄ọ ndikpep mmọ ediwak n̄kpọ.” (Mark 6:34) Sia edide se ẹyomde, emi ama abuana ediyarade ndiọi edinam ye ubiatibet oro mme ekpemerọn̄ nsunsu ido ukpono ẹkenamde. Nte ekemde ye Matthew 15:7-9, Jesus ọkọdọhọ ndusụk mmọemi ete: “Mbufo mbon mbubịk, Isaiah ototịm etịn̄ nte prọfet aban̄a mbufo, ete, Mbio ẹmi ẹkpono Mi ke n̄kpọkinua mmọ; edi esịt mmọ ada nsannsan ye Ami. Edi mmọ ẹkpono Mi ikpîkpu, sia ẹkpepde item owo ke ukpepn̄kpọ mmọ.”
Eseme Eseme Ndịben̄kpọ
10. Mfịn, “ndịbe odudu eke edibiat ibet’ osu mmanie ke idem, ndien nso ke mmọ ẹnyene ubiomikpe?
10 Nte Jesus eketịn̄de n̄kpọ abiat nsunsu mme adaiso ido ukpono, ntre nnyịn mfịn imeseme iban̄a ndịben̄kpọ oro ọwọrọde ada ata isio isio ye edisana ndịben̄kpọ eke uten̄e Abasi. Ke 2 Thessalonica 2:7, Paul okokot enye “ndịbe odudu edibiat ibet.” Enye ekedi ndịben̄kpọ ke akpa isua ikie C.E. sia owo mîkayarakede enye tutu ke anyanini ke mme apostle ẹma ẹkekpan̄a. Mfịn, enye osu mme ọkwọrọ ederi Christendom ke idem, ẹmi ẹtịmde ẹma mbre ukara ẹkan edikwọrọ eti mbụk edinen Obio Ubọn̄ Abasi. Mbubịk ido ọyọyọhọ ke otu mmọ. Mme ọkwọrọ ederi television ke n̄ka Protestant eke Christendom ẹdi in̄wan̄în̄wan̄ uwụtn̄kpọ kiet: mbon abian̄a oro ẹwode otu erọn̄ mmọ, ẹbọpde ikpọ obio ukara oro akpade ediwak million naira, ẹnamde ufan ye mme akpara, ẹtuade eyet mbubịk ke ini ẹyararede mmọ, ẹnyụn̄ ẹtakde ke ndiben̄e okụk, kpukpru ini ẹyomde okụk efen efen. Vatican eke Ido Ukpono Roman Catholic onịm mbiet idiọk uwụtn̄kpọ oro, ye ndiọi ebuana esie ke ukaraidem, enyọn̄ enyọn̄ n̄wụtidem, ye ndiọi edinam ke bank.
11. Nso iditịbe inọ mme ọkwọrọ ederi Christendom ye kpukpru mbon Akwa Babylon?
11 Eyịghe idụhe ẹkemede ndidọhọ ke mme ọkwọrọ ederi Christendom ẹdi “owo eke edide ata abiatibet”! (2 Thessalonica 2:3) Eyeyarade akwa ikpehe Akwa Babylon emi ebietde akpara mi ọyọhọ ọyọhọ ẹnyụn̄ ẹsobo enye, ọkọrọ ye kpukpru nsunsu ido ukpono eken. Nte nnyịn ikotde ke Ediyarade 18:9-17, mbon ukaraidem ye mbonurua isọn̄ (ye mme akama-okụk mmọ) ẹyeseme adan̄aoro ẹte: “Mbọm, mbọm, akwa obio”! Adan̄aoro eyedi ẹma ẹnenịm Akwa Babylon ye mme ndịben̄kpọ esie iferi, emi edide ata isio isio ye kpukpru se iyararede edisana ndịben̄kpọ eke uten̄e Abasi.
12. Ima oro Jesus akamade se inende akada enye okosụn̄ọ ke ndinam nso?
12 Ima oro Jesus amade se inende onyụn̄ asuade ubiatibet okonụk enye ndisịn̄ede idemesie ofụri ofụri ntre ke ufọn utuakibuot akpanikọ. Ke akpa isan̄ oro enye akakade Jerusalem nte Eyen Abasi oro ẹyetde aran, Christ ama ebịn mme anyamurua ye mme okpụhọ-okụk osion̄o ke temple, ọdọhọde ete: “Ẹtan̄ n̄kpọ ẹmi ẹnyọn̄ọ; ẹkûnịm ufọk Ete Mi ke ufọk mbubịne.” (John 2:13-17) Ke afiakde aka temple oro isan̄ efen, Jesus ama ọdọhọ mme Jew oro ẹkedide mme andibiọn̄ọ ete: “Mbufo ẹdi nditọete mbufo, kpa Satan, ẹnyụn̄ ẹyom ndinam obukpo udọn̄ ete mbufo. Enye edi owotowo toto ke editọn̄ọ, ikonyụn̄ isọn̄ọke ida ke akpanikọ, koro enye mînyeneke akpanikọ ke esịt esie. Ke ini enye osude nsu, enye osio se idude ke esịt esie etịn̄: koro enye edi osu nsu, ye ete nsu.” (John 8:44) Nso uko ke Jesus okowụt ntem ke ndisian mbon ido ukpono oro ke iso mmọ nte ke mmọ ẹkedi mme osu nsu ye nditọ Devil!
13. (a) M̀mọ̀n̄ akpan akpan ke ẹwụt usua oro Jesus akasuade se idiọkde? (b) Ntak emi mme ọkwọrọ ederi ẹmi ẹdide mme abiatibet ẹdotde ndibọ ukem ubiereikpe oro Jesus akatan̄ade odori mme scribe ye mme Pharisee?
13 Idụhe usụn̄ efen oro ẹtịmde ẹwụt usua oro Jesus akasuade ubiatibet nte oro ẹwụtde ke ubiak ubiak ubiomikpe oro enye okobiomde mme scribe ye mme Pharisee oro ẹkebietde ibọm, nte ẹwetde ke Matthew ibuot 23. Do, enye ama ọdọhọ mmọ ete “eyedọdiọk ọnọ mbufo” utịm ikatiaba, emende mmọ odomo ye ‘udi eke ẹyetde ndom—emi ọyọhọde ye kpukpru ndek, mbubịk ido, ye ubiatibet.’ Ọkọdọn̄ Jesus didie ntem ndinyan̄a mbon oro ẹkefịkde nsio ke itie ubiatibet oro! “Jerusalem, Jerusalem,” ntre ke enye okofiori, “adan̄a ediwak ini didie ke n̄koyom ndibon nditọ fo ọtọkiet, kpa nte unen obonde nditọ esie ke idak mba esie, ndien mbufo ikonyịmeke. Sese, ẹyak ufọk mbufo ẹkpọn̄ ẹnọ mbufo nte ndon.” (Ufan̄ikọ 37, 38) Mme ọkwọrọ ederi eyomfịn oro ẹdide mme abiatibet ẹdot ndibọ mbiet ubiomikpe oro koro, ke ikọ eke 2 Thessalonica 2:12, ‘mmọ idaha akpanikọ, edi ẹdara ke ukwan̄ido.’ Ubiatibet mmọ edi ata n̄kpọ oro ọbiọn̄ọde-biọn̄ọ edu uten̄e Abasi oro Jesus ekenen̄erede osio owụt ke adan̄aemi odude ke isọn̄.
Nditan̄a Mme Ubiereikpe Abasi
14. Esịtekọm inyenede iban̄a edisana ndịben̄kpọ eke uten̄e Abasi ekpedemede nnyịn ndinam nso?
14 Esịtekọm oro nnyịn inyenede inọ edisana ndịben̄kpọ eke uten̄e Abasi ekpenyene ndida nnyịn usụn̄ kpukpru ini nditiene nde-ikpat Jesus ket-ket. Ukem nte enye, nnyịn ikpenyene ndisịn ifịk ke ndikwọrọ se Isaiah 61:2 ọdọhọde ke edi “isua mfọnido Jehovah, ye usen usiene Abasi nnyịn.” Nnyịn n̄ko ikpakam isịn ifịk inam udeme nnyịn ke “n[di]dọn̄ kpukpru mme atua-eyet esịt.” Nte ekedide ke ini Jesus okodude ke isọn̄, oyom uko mfịn man ikeme nditan̄a mme ubiereikpe Jehovah, oro esịnede ọkpọsọn̄ etop oro odude ke mme ibuotikọ Enyọn̄-Ukpeme oro etịn̄de ikọ ye unana ndịk ye ke n̄wed oro Revelation—Its Grand Climax At Hand! Ana nnyịn ikwọrọ ikọ uko uko ye ke usọ, inamde ikọ nnyịn ‘esịne inụn̄’ man enye ekpenyene inem ọnọ mbon oro ẹmade edinen ido. (Colossae 4:6) Ke ima ikekpep n̄kpọ ito uwụtn̄kpọ Jesus oro aban̄ade uten̄e Abasi, nnyịn ikpakam ikeme nditọt ke edikem ini nte ke imokụre utom oro Jehovah ọkọnọde nnyịn ete inam.—Matthew 24:14; John 17:4.
15. Kaban̄a edisana ndịben̄kpọ Abasi, nso ikotịbe ọtọn̄ọde ke 1914?
15 Ke adan̄aemi akayarade idemesie ke obụkidem, nso ata ediye Uwụtn̄kpọ ke Jesus ekedi ntem! Didie ke edisana ndịben̄kpọ eke uten̄e Abasi okosu in̄wan̄în̄wan̄ ntem ke idemesie! Enye okotoro Jehovah uko uko didie ntem! Ndien Ete Jesus ọkọnọ enye utịp utịbe utịbe didie ntem ke edimụm nsọn̄ọnda esie n̄kama! Edi ekese n̄kpọ ẹsụk ẹdodu ke se iban̄ade edisana ndịben̄kpọ Abasi. Ọtọn̄ọde ke 1914, nnyịn idu ke “usen Ọbọn̄.” (Ediyarade 1:10) Nte Ediyarade 10:7 ọdọhọde, enye edi ini oro anade ‘edisana ndịben̄kpọ Abasi nte ekemde ye eti etop esie osu ama.’ Uyo otode heaven ofiori kemi ete: “Obio ubọn̄ ererimbot emi amakabade edi Obio Ubọn̄ Ọbọn̄ nnyịn [Jehovah] ye Christ Esie. Enye eyenyụn̄ ada ubọn̄ ke nsinsi nsinsi.” (Ediyarade 11:15) Jehovah omodori Jesus nte Edidem Messiah ke ubọn̄ ubọn̄ ebekpo esie man edi Andikara ye Enye!
16. Didie ke Edidem oro ẹkedoride ke ebekpo obufa obufa, kpa Jesus Christ, ọkọsọsọp owụt ukpono oro enye enyenede ọnọ edu uten̄e Abasi ke heaven?
16 Nte anditiene n̄kara ye Abasi ke Obio Ubọn̄ oro amanade obufa mi, ẹkot Jesus n̄ko Michael (emi ọwọrọde, “Anie Etie Nte Abasi?”). Idụhe owo nsọn̄ibuot ndomokiet oro edikụtde unen ke nditie nte Abasi tutu amama, ndien Edidem oro ẹkedoride ke ebekpo obufa obufa mi ama ọsọsọp owụt emi ke ndisio akani Urụkikọt, kpa Satan, ye mme angel esie nduọn̄ọ ke isọn̄. (Ediyarade 12:7-9) Ih, Jesus omowụt ukpono ọnọ edu uten̄e Abasi ke heaven kpasụk nte enye okowụtde edu uten̄e Abasi ke adan̄aemi okodude ke isọn̄. Jesus Christ oro ẹnọde ubọn̄ mi ididuọkke odudu tutu enye osobo nsunsu ido ukpono onyụn̄ ọsọhi esop Satan oro ẹkụtde ke enyịn ye oro enyịn mîkwe, efep ofụri ofụri.
17. Ọtọn̄ọde ke 1914, nso ikotịbe ke ndisu Matthew 25:31-33?
17 Ọtọn̄ọde ke 1914, edisu oro prọfesi Jesus ke Matthew 25:31-33 osude esịn un̄wana etieti ke edisana ndịben̄kpọ Abasi. Do Jesus ọdọhọ ete: “Ke ini Eyen owo edidide ke ubọn̄ Esie, asan̄a ye kpukpru mme angel, adan̄aoro ke Enye eyetie ke ebekpo ubọn̄ Esie. Ndien ẹyebon kpukpru mme idụt ke iso Esie: Enye eyenyụn̄ abahade mmọ kiet ye eken, nte emi ekpemerọn̄ abaharede erọn̄ ye ebot; ndien ẹyenịm erọn̄ ke ubọk nnasia Esie, ye ebot ke ufien.” Ke heaven oro enye ekemede nditie n̄kụt n̄kpọ mfọn mfọn mi, ubọn̄ ubọn̄ Edidem, Ebiereikpe, ye Andida nnọ uten̄e Abasi emi eyebemiso osio “owo eke edide ata abiatibet” usiene ye mme ikpehe Akwa Babylon eken, ndien ekem osiode kpukpru n̄kpọ eken ẹsụhọde ye mbon oro ẹbietde ebot ẹmi ẹnọde idiọk esop Satan eke isọn̄ ibetedem, usiene. Adan̄aoro ẹyetop Satan ẹsịn ke editụn̄ọ ukpe. (Ediyarade 20:1-3) Edi “ndinen owo” oro ẹbietde erọn̄ ẹyedaha ẹkedụk ke nsinsi uwem. (Matthew 25:46) Ediyom oro afo oyomde ido uten̄e Abasi akpakam esịn fi ke otu oro!
18. Nso idara idara ifet ke nnyịn inyene ke ebuana ye edisana ndịben̄kpọ eke uten̄e Abasi?
18 Ediyarade 19:10 esịn udọn̄ ọnọ nnyịn ‘ndituak ibuot nnọ Abasi.’ Ndien ntak-a? Itien̄wed oro akaiso ete: “Koro ikọ ntiense Jesus edi spirit prọfesi.” Ata ediwak prọfesi eke odudu spirit ke eset ẹketie ntiense ẹban̄a Jesus! Ndien nte mme prọfesi ẹmi ẹkesude, edisana ndịben̄kpọ Abasi ẹma ẹkabade ẹna ata in̄wan̄în̄wan̄. Nnyịn imadara, ke ntre, ndidiọn̄ọ nte ke edisana ndịben̄kpọ eke uten̄e Abasi emi ama edi ediyarade ke idem Jesus. Edi utịbe ifet didie ntem nnyịn nditiene nde-ikpat esie nte mme asan̄autom Obio Ubọn̄ Abasi oro ẹsụhọrede idem. Ih, ẹnọ nnyịn ukpono ndibuana ke ndidiọn̄ọ nnyụn̄ ntan̄a kpukpru edisana ndịben̄kpọ Abasi nte ekemde ye eti mbụk!
Didie ke Afo Ọkpọbọrọ?
◻ Nso ke nnyịn ikeme ndikpep nto uwụtn̄kpọ uten̄e Abasi Jesus?
◻ Didie ke nnyịn ikeme ndidu uwem nnọ edinen ido nte Christ okodude?
◻ Nso eseme eseme ndịben̄kpọ iwọrọ ida ata isio isio ye edisana ndịben̄kpọ eke uten̄e Abasi?
◻ Esịtekọm oro inyenede iban̄a edisana ndịben̄kpọ eke uten̄e Abasi ekpedemede nnyịn ndinam nso?
[Ndise ke page 16]
Nte andida nnọ uten̄e Abasi ye enyene-ifịk owo oro ọkwọrọde Obio Ubọn, Jesus ama ekeme ndidọhọ Pilate ete: “N̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ”
[Ndise ke page 18]
Jesus ama owụt uten̄e Abasi oro enye ekenyenede ke ini okobiomde mme scribe ye mme Pharisee ikpe