Kûyak Idem Unọ Editịmede Esịt
“ẸKÛTỊMEDE esịt ẹban̄a n̄kpọn̄ ndien; koro n̄kpọn̄ ayada utịmede-esịt esie edi. Afanikọn̄ usen ekem ye usen.” (Matthew 6:34) Item oro Jesus Christ ọkọnọde do enen̄ede enyene ufọn ọnọ kpukpru nnyịn ẹmi idude uwem ke n̄kaowo mfịn emi kpukpru n̄kpọ ẹdide itọk itọk onyụn̄ ọyọhọde ye mfịghe.
Nte ededi, ke nditịn̄ akpanikọ, ndi edi mmemmem n̄kpọ nnyịn nditre nditịmede esịt mban̄a mme mfịna, ubiere, utom, ye mbiomo nnyịn? Ediwak miliọn owo ẹkpa mba, ẹkop mfụhọ, ẹnyụn̄ ẹkop mfịghe. Ntak edi oro mme ibọk usụhọde mfiomo ye ibọk ufịk ntụk nnịm ẹdide mbubehe oro ẹnyamade ata etieti.
Ebiet Ndinịm Adan̄a
Oyom nnyịn inam ndutịm inyụn̄ itịm idem inọ mme mbiomo, utom, ubiere, ye mme mfịna nnyịn—edide mmọ ẹdi usọp usọp m̀mê idịghe. Bible esịn udọn̄ ọnọ nnyịn ete “itie ibat se iditakde” mbemiso itọn̄ọde akpan edinam ekededi. (Luke 14:28-30) Emi esịne ndidụn̄ọde mme edimek oro ẹdude nse, ndidụn̄ọde mme utịp oro ẹkemede ndito oro, nnyụn̄ ndụn̄ọde ini, ukeme, ye okụk oro ẹditakde.
Ke adan̄aemi owo enyenede nditịn̄ enyịn ndụn̄ọde se ikemede nditịbe, owo ikemeke, ufọn inyụn̄ idụhe, ndidomo ndikere mban̄a kpukpru se ikemede nditịbe. Ke uwụtn̄kpọ, man ubon enyene ukpeme, afo emekeme ndikere mban̄a se ẹkpenamde edieke ikan̄ odụkde ufọk fo. Afo emekeme ndidep n̄kanika oro esimiade ke ini nsụn̄ikan̄ ọwọrọde ye mme n̄kpọ unịme ikan̄ ndọn̄ ke ufọk. Afo emekeme ndidiomi ndinam ndomonse ke mme usụn̄ oro ẹkpesan̄ade ẹto nsio nsio ikpehe ke ufọk ẹwọrọ. Edi ini ewe ke eti ndutịm oro owụtde eti ibuot etre ndien ini ewe ke ebeubọk editịmede esịt oro mîdotke ọtọn̄ọ? Utọ editịmede esịt oro ọtọn̄ọ ke ini afo ọtọn̄ọde nditịmede esịt mban̄a anana-ibat idaha oro ẹkerede-kere, ẹmi ediwak ẹkemede ndito ọkpọsọn̄ ekikere. Ntịme ntịme ekikere ẹkeme ndikan fi ubọk, anamde fi enịm ke enyene n̄kpọ emi afo eketrede ndinam m̀mê nte ke afo unamke se ikemde man ekpeme ubon fo. Editịmede esịt emi ọnọde idemfo mi ekeme ndidi mbiomo oro odobide tutu afo ukemeke ndide idap ke ntak oro.
Moses ke Iso Pharaoh
Jehovah Abasi ama ọnọ prọfet esie Moses ọkpọsọn̄ utom ndinam. Akpa, Moses ekenyene ndiwụt nditọ Israel idem nnyụn̄ nnam mmọ ẹnịm ke akpanikọ nte ke Jehovah ekemek imọ ndida mmọ n̄wọrọ ke Egypt. Ekem, Moses ekenyene ndida ke iso Pharaoh nnyụn̄ mben̄e enye ayak nditọ Israel ẹnyọn̄ọ. Ke akpatre, Moses ekenyene ndida akwa otuowo ẹdide ediwak miliọn mbe wilderness ndụk isọn̄ oro mme asua ẹkedụn̄de. (Exodus 3:1-10) Ekeme ndidi kpukpru emi ekedi ata enyene-ndịk utom, edi ndi Moses ama ayak mbiomo emi etịmede enye esịt nte mîdotke?
Nte an̄wan̄ade, Moses ama ekere aban̄a ediwak n̄kpọ. Enye ama obụp Jehovah ete: “Sese, adan̄aemi ami n̄kade n̄kesịm nditọ Israel, nnyụn̄ ndọhọ mmọ nte, Abasi mme ete mbufo ọdọn̄ mi ntiene mbufo; ndien mmọ ẹdọhọ mi ẹte, Enye ekere didie? ndidọhọ mmọ didie?” Jehovah ama ọnọ enye ibọrọ. (Exodus 3:13, 14) Moses ama ekere n̄ko aban̄a se ikemede nditịbe edieke Pharaoh esịnde ndinịm enye ke akpanikọ. Inikiet efen, Jehovah ama ọbọrọ prọfet oro. Akpatre mfịna—Moses ama enyịme ete ke imọ idịghe “owo udọn-ikọ.” Didie ke ẹkekeme ndikọk mfịna emi? Jehovah ama ọnọ Aaron man etịn̄ ikọ ke ibuot Moses.—Exodus 4:1-5, 10-16.
Ke ẹma ẹkeda mme ibọrọ mbụme esie ẹtịm enye idem, adianade ye mbuọtidem ke Abasi, Moses ama aka iso ndinam kpa nte Jehovah eketemede. Utu ke ndida mme enyene-ndịk ekikere kaban̄a se ikemede nditịbe ke ini enye osobode ye Pharaoh ntịmede idemesie esịt, ‘ntem ke Moses akanam.’ (Exodus 7:6) Ke ekpedide enye ama ayak editịmede esịt akan enye ubọk, emi n̄ko okpokosụhọde mbuọtidem ye uko oro okoyomde enye enyene man anam utom esie.
Moses ndida usụn̄ oro adade ukem ukem nnam utom esie edi uwụtn̄kpọ kaban̄a se apostle Paul okokotde “eti ibuot.” (2 Timothy 1:7, NW; Titus 2:2-6) Edieke Moses mîkpekenyeneke eti ibuot, ekeme ndidi nte utom esie okokponde akpanam enye ndịk tutu ekeme ndidi enye ikpekenyịmeke ndinam.
Ndikara Mme Ekikere Fo
Didie ke afo esinam n̄kpọ ke ini osobode mme idomo mbuọtidem fo m̀mê mme udomo ke uwem fo eke usen ke usen? Ndi afo emesinyek idem ekerede aban̄a sụk mme n̄kpọ ubiọn̄ọ ye mme n̄kpọ-ata oro ẹnade ke iso? Mîdịghe ndi afo emesise mmọ ke usụn̄ oro adade ukem ukem? Nte ndusụk owo ẹsidọhọde, ‘Kûtop n̄kpana mbemiso okụtde ibuot eyen.’ Ekeme ndidi idikam iyomke otop n̄kpana oro! Ntre ntak emi ayakde n̄kpọ oro ekemede ndidi iditịbeke tutu amama otụhọde fi? Bible ọdọhọ ete: “Mfụhọ ke esịt owo oyonụk enye ọduọ.” (Mme N̄ke 12:25) Utịp esiwak ndidi owo ndisịk edinam ubiere nnịm, ndisịk mme n̄kpọ mbon tutu ini ebe akaha.
Se itịmde idiọk ikan edi unan eke spirit oro editịmede esịt oro mîdotke ekemede ndinọ. Jesus Christ ama owụt ete ke abian̄a abian̄a odudu inyene ye “ekikere n̄kpọ eyo emi” ẹkeme ndibaba esịtekọm ẹnyenede ẹban̄a “ikọ Obio Ubọn̄ Heaven” ẹwot ofụri ofụri. (Matthew 13:19, 22) Kpa nte n̄kukịm ẹkemede ndibiọn̄ọ n̄kpasịp ndikọri n̄wọrọ nnyụn̄ n̄n̄wụm mfri, kpa ntre ke editịmede esịt oro owo mîkarake ekeme ndibiọn̄ọ nnyịn ndinam n̄kọri eke spirit ye edin̄wụm mfri oro ọnọde Abasi itoro. Akama-nsobo editịmede esịt oro owo adade ọsọk idemesie akam ọbiọn̄ọ ndusụk owo ndiyak idemmọ nnọ Jehovah. Mmọ ẹtịmede esịt ẹte, ‘Nso edieke ami mmendụhe uwem ekekem ye uyakidem mi nnọ?’
Apostle Paul akasian nnyịn ete ke ekọn̄ eke spirit oro nnyịn in̄wanade, nnyịn idomo ‘ndimụm kpukpru ekikere nte mbuot-ekọn̄, inam mmọ ẹsụk ibuot ẹnọ Christ.’ (2 Corinth 10:5) Akpan asua nnyịn, Satan kpa Devil, eyenen̄ede okop inemesịt ndida mme editịmede esịt nnyịn nnam n̄kpọ man ọbiọn̄ọ nnyịn onyụn̄ anam idem emem nnyịn ke n̄kan̄ eke obụk, eke ntụk, ye eke spirit. Enye enyene usọ ke ndida eyịghe mmụm mbon oro mîdụhe ke edidemede. Ntak edi oro Paul okodụride mme Christian utọn̄ ete ‘ẹkûnọ Satan ufan̄.’ (Ephesus 4:27) Nte “abasi eyo emi,” Satan okụt unen ke ‘ndinam ikike mmọ eke mînịmke ke akpanikọ ekịm.’ (2 Corinth 4:4) Akpakam nnyịn idehede iyak enye akara ikike nnyịn!
Un̄wam Odu
Ke ini osobode mme mfịna, eyen ekeme ndika mbịne ima ima ete n̄kọbọ un̄wam ye ndọn̄esịt. Ukem ntre, nnyịn imekeme ndida mme mfịna nnyịn mbịne Ete nnyịn eke heaven, Jehovah. Ke akpanikọ, Jehovah okot nnyịn ete itop mme mbiomo ye mme editịmede esịt nnyịn idori imọ. (Psalm 55:22) Ukem nte eyen oro mîtịmekede esịt aba iban̄a mme mfịna esie ke enye ama ọkọbọ nsọn̄ọ oto ete esie, nnyịn ikpenyeneke n̄kukụre nditop mme mbiomo nnyịn ndori Jehovah edi n̄ko ikpenyene ndiyak mmọ nnọ enye.—James 1:6.
Didie ke nnyịn itop mme editịmede esịt nnyịn idori Jehovah? Philippi 4:6, 7 ọbọrọ ete: “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpe-ubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” Ih, ke ndibọrọ uyịre uyịre akam ye eben̄e nnyịn, Jehovah ekeme ndinọ nnyịn ifụre esịtidem oro ekpemede ekikere nnyịn mbak editịmede esịt oro mîdotke edifịna nnyịn.—Jeremiah 17:7, 8; Matthew 6:25-34.
Nte ededi, man inam n̄kpọ ke n̄kemuyo ye akam nnyịn, nnyịn ikpenyeneke ndidu ikpọn̄ edide ata edidu ikpọn̄ m̀mê ke ekikere. (Mme N̄ke 18:1) Utu ke oro, nnyịn iyanam ọfọn ndikere mme edumbet Bible ye mme ndausụn̄ oro ẹtụkde mfịna nnyịn, ntem ifepde ndiberi edem ke asian nnyịn. (Mme N̄ke 3:5, 6) N̄kpri ye ikpọ owo ẹkeme ndiwọn̄ọde mbịne Bible ye mme n̄wed Watch Tower man ẹnyene akpakịp ntọt ke ndinam mme ubiere ye ndise mban̄a mme mfịna. Adianade do, ke esop Christian, nnyịn imenyene mbiowo ẹmi ẹnyenede ọniọn̄ ye mbufiọk ye mme Christian eken oro ẹkọride ẹsịm ọyọhọ idaha ẹmi ẹdude ke mben̄eidem ndineme nneme ye nnyịn kpukpru ini. (Mme N̄ke 11:14; 15:22) Mbon oro mîbuanake mme mfịna nnyịn ke n̄kan̄ eke ntụk, ẹmi ẹnyụn̄ ẹnyenede ekikere Abasi ke n̄kpọ ẹkeme ndin̄wam nnyịn ediwak ini ndise mme mfịna nnyịn ke usụn̄ efen. Ndien ke adan̄aemi mmọ mîdinamke mme ubiere inọ nnyịn, mmọ ẹkeme ndidi akwa ebiet emi nsịnudọn̄ ye ibetedem ẹtode.
“Dori Enyịn ye Abasi”
Owo ndomokiet ikemeke ndifan̄a nte ke nnyịn imenyene ekese mfịghe ke ndise mban̄a mme ata mfịna nnyịn ke usen kiet kiet ye unana edidian efen ebe ke nditịmede esịt mban̄a mbon oro ẹkerede-kere. Edieke editịmede esịt kaban̄a se ikemede nditịbe anamde nnyịn ikop ndịk inyụn̄ inana ifụre, do ẹyak nnyịn iwọn̄ọde ibịne Jehovah ke akam ye n̄kpeubọk. Se Ikọ ye esop esie kaban̄a ndausụn̄, ọniọn̄, ye eti ibuot. Nnyịn iyokụt ite ke idaha ekededi oro ekemede ndidemede, un̄wam odu ndida nse mban̄a enye.
Ke okopde mfụhọ ye editịmede esịt, andiwet psalm ama ọkwọ ete: “O ukpọn̄ mi, nsinam afo ofụhọde? Nsinyụn̄ inam afo etịmerede mi ke idem? Dori enyịn ye Abasi: koro nyosụk ntoro enye, kpa edinyan̄a iso mi, ye Abasi mi.” (Psalm 42:11) Yak oro edi ekikere nnyịn.
Ih, nam ndutịm ban̄a se ekemede ndidori enyịn, nyụn̄ yak se mûkemeke ndidori enyịn nọ Jehovah. “Ẹtop kpukpru ọkpọsọn̄ ekikere eke etịmerede mbufo esịt ẹduọk ẹdori Enye, koro Enye ke ekere mbufo.”—1 Peter 5:7.
[Ndise ke page 23]
Ndi afo, ukem nte David, omotop mme mbiomo fo ye mme editịmede esịt fo odori Jehovah?