“Da Mmọn̄eyet Mi Sịn ke Ekpeme Fo”

12. Nnyịn isan̄a didie ifiọk ke Jehovah enen̄ede ọfiọk afanikọn̄ oro esịmde ikọt esie?

¹² Jehovah ọfiọk kpukpru mme asan̄autom esie kiet kiet onyụn̄ enen̄ede ọfiọk afanikọn̄ oro owo mmọ kiet kiet osobode. Ke uwụtn̄kpọ, ke ini ẹkesịnde nditọ Israel ke ufụn, Jehovah ọkọdọhọ Moses ete: “Mmetịm n̄kụt ukụt ikọt mi emi ẹdude ke Egypt, mmonyụn̄ n̄kop eseme mmọ [ẹban̄ade] mme otụk mmọ; koro mfiọkde ubiak mmọ.” (Exodus 3:7) Edi n̄kpọ nsịnudọn̄ didie ntem ndifiọk ke ini nnyịn iyọde idomo, ke Jehovah ọfiọk se itịbede inọ nnyịn onyụn̄ okop eseme nnyịn! Ke akpanikọ, enye ọfiọk ndutụhọ oro nnyịn ikụtde.

13. Nso iwụt ke Jehovah esitiene okop ubiak oro mme asan̄autom esie ẹkopde?

¹³ Nte Jehovah ekekerede aban̄a nditọ Israel owụt n̄ko nte enye ekerede aban̄a mbon oro ẹnyenede itie ebuana ye enye. Okposụkedi nditọ Israel ẹkebọde ufen ke ntak nsọn̄ibuot mmọ, Isaiah ekewet ntem aban̄a Jehovah: “Ke ofụri ukụt mmọ enye [“ama okop mfụhọ,” NW].” (Isaiah 63:9) Do, nte anam-akpanikọ asan̄autom Jehovah, afo emekeme ndinịm ke Jehovah esitiene okop ubiak ke ini afo okopde ubiak. Nte oro isịnke udọn̄ inọ fi ndiyọ afanikọn̄ uko uko nnyụn̄ n̄ka iso nsịn ofụri ukeme nnam n̄kpọ esie?—1 Peter 5:6, 7.

14. Nso ikanam ẹwet Psalm 56?

¹⁴ Psalm 56 emi Edidem David ekewetde ke ini enye ekefehede mbak Edidem Saul ediwot imọ enen̄ede owụt ke David ama enịm ke Jehovah ama ekere aban̄a imọ onyụn̄ okop ubiak oro imọ ikokopde. David ama efehe aka Gath, edi enye ama okop ndịk ke mme Philistine oro ẹkedide ẹdidiọn̄ọ imọ ẹyemụm imọ. Enye ekewet ete: “Mme asua mi ẹyom ndimen mi ofụri usen: koro mmọ eke ẹn̄wanade ekọn̄ ye ami ke iseri ẹwakde.” Sia David okodude ke enyene-ndịk idaha, enye ama ọwọn̄ọde ebịne Jehovah. Enye ọkọdọhọ ete: “Mmọ ẹyụt ikọ mi ofụri usen: kpukpru se mmọ ẹkerede ẹban̄a mi, ẹmediọk.”—Psalm 56:2, 5.

15. (a) Nso ke ikọ David ọkọwọrọ ke ini enye ọkọdọhọde Jehovah ọdọn̄ mmọn̄eyet imọ ke ekpeme m̀mê ewet ke n̄wed? (b) Ke ini iyọde idomo oro otụkde mbuọtidem nnyịn, nso nsọn̄ọ ke nnyịn ikeme ndinyene?

¹⁵ Ekem, David ama etịn̄ inem inem ikọ oro ẹwetde mi ke Psalm 56:8, ete: “Afo omobụk ediyo mi: da mmọn̄eyet mi sịn ke ekpeme fo: nte mmọ idụhe ke n̄wed fo?” Ikọ emi enen̄ede owụt didie ntem nte Jehovah ekerede aban̄a owo! Ke ini afanikọn̄ esịmde nnyịn, nnyịn imekeme nditua nseme nnọ Jehovah. Jesus emi akakam edide mfọnmma owo ama anam kpa ntre. (Mme Hebrew 5:7) David ama enịm ke Jehovah okụt imọ ye nte ke enye eyeti ndutụhọ imọ, nte n̄kpọ eke enye ọdọn̄de mmọn̄eyet imọ enịm ke ekpeme m̀mê ewetde mmọ ke n̄wed.e Eyedi afo ekere ke mmọn̄eyet fo ekpere ndiyọhọ ekpeme oro m̀mê ndiyọhọ ediwak page n̄wed oro. Edieke edide ntre, sọn̄ esịt. Bible ọsọn̄ọ ọnọ nnyịn ete: “Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.”—Psalm 34:18.