Jehovah Edi Ebiet Ubọhọ Nnyịn

“Koro afo, Jehovah, edide ebiet ubọhọ mi. . . . Baba idiọk-n̄kpọ idisịmke fi.”—PSALM 91:9, 10.

1. Ntak emi nnyịn ikemede ndidọhọ ke Jehovah edi ebiet ubọhọ nnyịn?

JEHOVAH edi ata ebiet ubọhọ ikọt esie. Edieke nnyịn iyakde idem ofụri ofụri inọ enye, nnyịn imekeme ‘ndikop mfịghe ke kpukpru edem, edi idụhe ke mbaba; ẹfịna nnyịn ekikere, edi itiehe ke n̄kịm-enyịn; ẹsịn nnyịn enyịn, edi Abasi ikpọn̄ke nnyịn; ẹyịbi nnyịn ẹduọk ke isọn̄, edi ibiatke nnyịn uwem.’ Ntak-a? Koro Jehovah ọnọde nnyịn “akwa ubom odudu.” (2 Corinth 4:7-9) Ih, Ete nnyịn eke heaven an̄wam nnyịn ndidu uwem uten̄e Abasi, ndien nnyịn imekeme nditi mme ikọ andiwet psalm emi: “Koro afo, Jehovah, edide ebiet ubọhọ mi. Afo emenịm Ata Edikon̄ ke ebiet idụn̄ fo. Baba idiọk-n̄kpọ idisịmke fi.”—Psalm 91:9, 10.

2. Nso ke ẹkeme nditịn̄ mban̄a Psalm 91 ye se enye ọn̄wọn̄ọde?

² Ekeme ndidi Moses ekewet mme ikọ Psalm 91 oro. Ikọ enyọn̄ ibuotn̄wed asiak enye nte andiwet ọyọhọ Psalm 90, ndien Psalm 91 etiene ye unana ikọ ekededi oro asiakde andiwet en̄wen. Ekeme ndidi ẹkekwọ Psalm 91 ke adiana ke adiana; oro edi, ekeme ndidi owo kiet ekebem iso ọkwọ (91:1, 2), ekem n̄ka ikwọ ẹbọrọ (91:3-8). Eyedi owo kiet ọkọkwọ udiana ikpehe (91:9) ndien n̄ka ikwọ ẹbọrọ (91:10-13). Ndien ekeme ndidi owo kiet ọkọkwọ mme akpatre ikọ ikwọ oro (91:14-16). Ke usụn̄ ekededi, Psalm ọyọhọ 91 ọn̄wọn̄ọ ukpeme eke spirit ọnọ mme Christian oro ẹyetde aran nte otu onyụn̄ anam ukem un̄wọn̄ọ oro ọnọ mme nsan̄a mmọ oro ẹyakde idem ẹnọ nte otu.a Ẹyak nnyịn ikere iban̄a psalm emi ke usụn̄ emi kpukpru utọ asan̄autom Jehovah oro ẹkerede.

Ẹtie ke ‘Ndịbe Ebiet Abasi’

3. (a) Nso idi “ndịbe ebiet Ata Edikon̄”? (b) Nso ke nnyịn inyene ke ‘ndidụn̄ ke mfụt Ata Ọkpọsọn̄’?

³ Andiwet psalm ọkwọ ete: “Owo eke etiede ke ndịbe ebiet Ata Edikon̄, ke odụn̄ ke mfụt Ata Ọkpọsọn̄. Nyọdọhọ Jehovah, nte, Ubọhọ mi, ye ọkpọsọn̄ ebiet mi; Abasi mi, nyọbuọt idem mi ye enye.” (Psalm 91:1, 2) “Ndịbe ebiet Ata Edikon̄” edi ndamban̄a itie ukpeme ọnọ nnyịn, onyụn̄ edi itie ukpeme akpan akpan ọnọ mbon oro ẹyetde aran, oro ẹdide akpan iso en̄wan Devil. (Ediyarade 12:15-17) Devil okposobo kpukpru nnyịn ke mîkpedịghe ukpeme oro nnyịn inyenede nte mbon oro ẹdụn̄de ye Abasi nte isenowo eke spirit. Ebede ke ‘ndidụn̄ ke mfụt Ata Ọkpọsọn̄,’ nnyịn imenyene mfụt ukpeme Abasi. (Psalm 15:1, 2; 121:5) Idụhe ebiet ubọhọ efen oro ọfọnde akan m̀mê ọkpọsọn̄ ebiet oro ọnọde ukpeme akan Ọbọn̄ Andikara nnyịn, Jehovah.—Mme N̄ke 18:10.

4. Mme usụn̄ edinam ewe ke “ata-ikọt” oro, Satan, ada, ndien nnyịn isan̄a didie ibọhọ?

⁴ Andiwet psalm adian do ete: “Enye [Jehovah] oyosio fi ke afia ata-ikọt, ye ke udọn̄ọ nsobo.” (Psalm 91:3) Ataikọt ke Israel eset ekesiwak ndida afia mmụm inuen. Ndusụk ke otu afia “ata-ikọt” oro, Satan, ẹdi idiọk esop esie ye “n̄kari” esie. (Ephesus 6:11) Ẹsikọk mme afia ke usụn̄ nnyịn man ẹmụm nnyịn ẹsịn ke idiọkido ẹnyụn̄ ẹbiat idaha eke spirit nnyịn. (Psalm 142:3) Nte ededi, ke ntak oro nnyịn isịnde ukwan̄ido, ‘ukpọn̄ nnyịn ọmọbọhọ nte inuen ọbọhọde afia ata-ikọt.’ (Psalm 124:7, 8) Nnyịn iwụt esịtekọm didie ntem nte ke Jehovah anyan̄a nnyịn osio ke ubọk idiọk “ata-ikọt” oro!—Matthew 6:13.

5, 6. “Udọn̄ọ” ewe ida “nsobo” idi, edi ntak emi ikọt Jehovah mîduọhọ udọn̄ọ emi?

⁵ Andiwet psalm etịn̄ aban̄a “udọn̄ọ nsobo.” Ukem nte udọn̄ọ oro ekemede ndibe owo, odu n̄kpọ oro adade “nsobo” ọsọk ekpụk ubonowo ye mme andida nnọ itie edikara Jehovah. Ke afan̄ emi, ewetmbụk oro Arnold Toynbee ekewet ete: “Töñöde ke utịt Eköñ Ererimbot II, ufre-idụt anam ibat mme obio-ukara mbon obio oro ekarade idem ikpöñ awak utịm ikaba . . . Ido ubon-owo idahaemi edi eke ökpösöñ ubahare.”

⁶ Ke ediwak isua ikie emi ẹbede, ndusụk andikara ẹsịn udọn̄ ẹnọ en̄wan utọ ubahade oro ke ofụri ererimbot. Mmọ ẹyom n̄ko ẹte ẹtuak ibuot ẹnọ mmimọ m̀mê ẹtuak ibuot ẹnọ nsio nsio mbiet m̀mê mme idiọn̄ọ. Edi Jehovah idehede iyak mme anam-akpanikọ ikọt esie ẹdọn̄ọ utọ “udọn̄ọ” oro. (Daniel 3:1, 2, 20-27; 6:7-10, 16-22) Nte ima ima otu nditọete ofụri ererimbot, nnyịn inọ Jehovah san̄asan̄a utuakibuot, ika iso ida san̄asan̄a nte ekemde ye N̄wed Abasi, inyụn̄ inyịme ye unana asari nte ke “kpukpru idụt [Abasi] adadara owo ekededi eke abakde Enye onyụn̄ anamde nti ido.” (Utom 10:34, 35; Exodus 20:4-6; John 13:34, 35; 17:16; 1 Peter 5:8, 9) Okposụkedi ẹdade ukọbọ ‘ẹsobo’ nnyịn nte mme Christian, nnyịn imokop idatesịt inyụn̄ inyene ukpeme eke spirit “ke ndịbe ebiet Ata Edikon̄.”

7. Didie ke Jehovah ‘ada ntan̄ esie’ ekpeme nnyịn?

⁷ Sia inyenede Jehovah nte ebiet ubọhọ, nnyịn imọbọ ndọn̄esịt ito mme ikọ emi: “Enye ayada ntan̄ esie ofụk fi, afo oyonyụn̄ efehe odụk ke idak mba esie: akpanikọ esie edi otu-ekọn̄ eke ekpemede fi.” (Psalm 91:4) Abasi esikpeme nnyịn, idem kpa nte eka inuen esikpemede nditọ esie. (Isaiah 31:5) ‘Enye ada ntan̄ esie ofụk nnyịn.’ Nte an̄wan̄ade, “ntan̄” inuen edi mba esie. Inuen esida mmọ ofụk nditọ esie, ekpemede mmọ mbak mme unam emi ẹsitade ekemmọ unam. Ukem nte nditọ inuen, nnyịn imenyene ukpeme ke idak ndamban̄a ntan̄ Jehovah koro nnyịn idịbede ke ata esop Christian esie.—Ruth 2:12; Psalm 5:1, 11.

8. Didie ke “akpanikọ” Jehovah edi akamba otuekọn̄ ye n̄kpọ ukpeme?

⁸ Nnyịn iberi edem ke “akpanikọ,” m̀mê edinam akpanikọ. Enye etie nte akamba otuekọn̄ eset, oro ekesiwakde ndibiet usụn̄ufọk onyụn̄ okponde ekem ndifụk owo ofụri ofụri. (Psalm 5:12) Ndinyene mbuọtidem ke utọ ukpeme oro anam nnyịn ibọhọ ndịk. (Genesis 15:1; Psalm 84:11) Ukem nte mbuọtidem nnyịn, akpanikọ Abasi edi akamba otuekọn̄ oro enịmede enyịm ikan̄ Satan onyụn̄ ọbiọn̄ọde ita mme asua. (Ephesus 6:16) Enye n̄ko edi n̄kpọ ukpeme, kpa ọkpọsọn̄ ibibene oro nnyịn iberide edem.

‘Nnyịn Idifeheke N̄kpọ Ndịk’

9. Ntak emi okoneyo ekemede ndidi ini emi enyenede ndịk, edi ntak emi nnyịn mîfeheke ndịk?

⁹ Ke ekerede aban̄a ukpeme Abasi, andiwet psalm ọdọhọ ete: “Afo udufeheke n̄kpọ ndịk ke okoneyo, ye idan̄ eke efede ke uwemeyo; ye idiọk udọn̄ọ eke asan̄ade ke ekịm; ye nsobo eke abiatde ke ufọt uwemeyo.” (Psalm 91:5, 6) Sia ẹsinamde ediwak ndiọi edinam ke ekịm, okoneyo ekeme ndidi ini emi enyenede ndịk. Ke ufọt ekịm eke spirit oro ofụkde isọn̄ idahaemi, mme asua nnyịn ẹsiwak ndinam mme abian̄a abian̄a edinam ndibiat idaha eke spirit nnyịn nnyụn̄ ntre utom ukwọrọikọ nnyịn. Edi ‘nnyịn ifeheke n̄kpọ ndịk ke okoneyo’ koro Jehovah ekpemede nnyịn.—Psalm 64:1, 2; 121:4; Isaiah 60:2.

10. (a) Eyedi “idan̄ eke efede ke uwemeyo” ada aban̄a nso, ndien didie ke nnyịn inam n̄kpọ iban̄a enye? (b) Nso idi “idiọk udọn̄ọ eke asan̄ade ke ekịm,” ndien ntak emi nnyịn mîfeheke enye?

¹⁰ Etie nte “idan̄ eke efede ke uwemeyo” ada aban̄a mme ikọ isụn̄i. (Psalm 64:3-5; 94:20) Nte nnyịn ikade iso ndisuan ntọt akpanikọ, utọ an̄wan̄wa edibiọn̄ọ edisana utom nnyịn oro inyeneke ufọn. Akan oro, nnyịn ifeheke “idiọk udọn̄ọ eke asan̄ade ke ekịm.” Emi edi ndamban̄a idiọk udọn̄ọ oro asan̄ade ke ekịm ererimbot emi esịnede ke ubọk Satan onyụn̄ ọdọn̄ọde ke n̄kan̄ ido uwem ye ke n̄kan̄ ido ukpono. (1 John 5:19) Enye anam mme owo ẹnyene n̄kpakpa ekikere ye esịt, anamde mme owo ẹnana ifiọk ẹban̄a Jehovah, mme uduak esie, ye mme ima ima ndutịm esie. (1 Timothy 6:4) Ke ufọt ekịm emi, nnyịn ifeheke ndịk, sia inyenede akwa un̄wana eke spirit.—Psalm 43:3.

11. Nso itịbe inọ mbon oro ẹyakde idem ẹnọ “nsobo eke abiatde ke ufọt uwemeyo”?

¹¹ “Nsobo eke abiatde ke ufọt uwemeyo” inamke nnyịn ndịk n̄ko. “Ufọt uwemeyo” ekeme ndida mban̄a inua-okot ntatenyịn ererimbot. Mbon oro ẹyakde idem ẹnọ mme ekikere uma inyene esie ẹsikụt nsobo eke spirit. (1 Timothy 6:20, 21) Nte nnyịn itan̄ade etop Obio Ubọn̄ uko uko, nnyịn ifeheke mme asua nnyịn ekededi, koro Jehovah edi Andikpeme nnyịn.—Psalm 64:1; Mme N̄ke 3:25, 26.

12. Ke n̄kan̄ mmanie ke ediwak tọsịn owo ‘ẹduọn̄ọ,’ ndien ke nso usụn̄?

¹² Andiwet psalm aka iso ete: “Tọsịn owo ẹyeduọn̄ọ fi ke n̄kan̄, ye tọsịn duop ke ubọk nnasia fo; edi idisịmke fi. Afo oyokụt ke enyịn ikpọn̄-ikpọn̄, onyụn̄ okụt usiene mme oburobụt owo.” (Psalm 91:7, 8) Sia ẹkpude ndinam Jehovah edi ebiet ubọhọ mmọ, ediwak owo ‘ẹduọn̄ọ’ ke n̄kpa eke spirit ke “n̄kan̄” nnyịn. Nte utịp, “tọsịn duop” ẹmeduọn̄ọ ke “ubọk nnasia” Israel eke spirit mfịn. (Galatia 6:16) Edi edide nnyịn idi mme Christian oro ẹyetde aran m̀mê idi mme nsan̄a mmọ oro ẹyakde idem ẹnọ, nnyịn imenyene ukpeme ke “ndịbe ebiet” Abasi. Nnyịn n̄kukụre ‘ikokụt usiene mme oburobụt owo,’ oro ẹdọkde afanikọn̄ ke ndutịm unyamurua, ido ukpono, ye ke mme usụn̄ en̄wen.—Galatia 6:7.

‘Baba Idiọk-N̄kpọ Idisịmke Nnyịn’

13. Mme idiọkn̄kpọ ewe mîsisịmke nnyịn, ndien ntak-a?

¹³ Okposụkedi ukpeme ererimbot emi owụrede, nnyịn inịm Abasi akpa inyụn̄ ibọ ndọn̄esịt ito mme ikọ andiwet psalm emi: “Koro afo, Jehovah, edide ebiet ubọhọ mi. Afo emenịm Ata Edikon̄ ke ebiet idụn̄ fo. Baba idiọk-n̄kpọ idisịmke fi, ufen idinyụn̄ isan̄ake ikpere idụk ke ataya fo.” (Psalm 91:9, 10) Ih, Jehovah edi ebiet ubọhọ nnyịn. Nte ededi, nnyịn n̄ko imenịm Ata Edikon̄ Abasi ke ‘ebiet idụn̄ nnyịn,’ ebiet emi nnyịn inyenede ukpeme. Nnyịn imotoro Jehovah nte Andikara Ekondo, ‘idụn̄’ ke enye nte Ebiet ukpeme nnyịn, inyụn̄ itan̄a eti mbụk Obio Ubọn̄ esie. (Matthew 24:14) Ke ntre, ‘baba idiọk-n̄kpọ idisịmke nnyịn’—idiọkn̄kpọ ndomokiet ke otu oro ẹkebemde iso ẹtịn̄ ẹban̄a ke psalm emi. Idem ke ini nnyịn itienede mbon en̄wen isobo utọ afanikọn̄ nte unyekisọn̄, oyobio, ukwọ, akan̄, ye mme nsobo ẹtode ekọn̄, mmọ emi ibiatke mbuọtidem nnyịn m̀mê ndiwụri ukpeme eke spirit nnyịn.

14. Nte mme asan̄autom Jehovah, ntak emi mme akama-n̄kpa udọn̄ọ mîsidọn̄ọke nnyịn?

¹⁴ Mme Christian oro ẹyetde aran ẹtie nte mme odudụn̄ oro ẹdụn̄ọde ke mme ataya oro ẹwọrọde ẹkpọn̄ editịm n̄kpọ emi. (1 Peter 2:11) ‘Baba ufen kiet isan̄ake ikpere ataya mmọ.’ Edide idotenyịn nnyịn edi eke heaven m̀mê eke isọn̄, nnyịn idịghe eke ererimbot, ndien mme utọ akama-n̄kpa udọn̄ọ eke spirit esie nte oburobụt ido, uma inyene, nsunsu ido ukpono, ye edituak ibuot nnọ “unam” ye “mbiet” esie, kpa Edidiana Mme Idụt, isidọn̄ọke nnyịn.—Ediyarade 9:20, 21; 13:1-18; John 17:16.

15. Ke mme usụn̄ ewe ke nnyịn inyene un̄wam mme angel?

¹⁵ Kaban̄a ukpeme oro nnyịn inyenede, andiwet psalm adian do ete: “Enye [Jehovah] oyowụk mme angel esie aban̄a fi, ete ẹkpeme fi ke kpukpru usụn̄ fo. Mmọ ẹyekama fi ke ubọk mmọ, mbak afo edituak ukot fo ke itiat.” (Psalm 91:11, 12) Ẹnọ mme angel odudu ndikpeme nnyịn. (2 Ndidem 6:17; Psalm 34:7-9; 104:4; Matthew 26:53; Luke 1:19) Mmọ ẹkpeme nnyịn ‘ke kpukpru usụn̄ nnyịn.’ (Matthew 18:10) Nnyịn imenyene ndausụn̄ ye ukpeme mme angel nte mme anditan̄a Obio Ubọn̄ ndien nnyịn ituakke ukot iduọn̄ọ ke n̄kan̄ eke spirit. (Ediyarade 14:6, 7) Idem utọ ‘itiat’ nte edikpan utom nnyịn inamke nnyịn ituak ukot iduọn̄ọ inyụn̄ itaba mfọn Abasi.

16. Didie ke en̄wan “lion” ye eke “ibọm” ẹkpụhọde, ndien didie ke nnyịn isinam n̄kpọ iban̄a mmọ?

¹⁶ Andiwet psalm aka iso ete: “Afo eyedịghi lion ye ibọm: eyetịm akparawa lion ye dragon [“akamba urụkikọt,” NW].” (Psalm 91:13) Kpa nte lion esin̄wanade iso ye iso, ndusụk asua nnyịn ẹsibiọn̄ọ nnyịn an̄wan̄wa ebe ke ndinịm mme ibet oro ẹbọpde ndida ntre utom ukwọrọikọ nnyịn. Edi ẹsida mme en̄wan unana idotenyịn oro ẹbietde en̄wan ibọm oro ẹsisịnede ke ndịbe ẹn̄wana, ẹtiene nnyịn. Ke ẹdịbede ke edem edinam emi, ndusụk ini mme ọkwọrọ ederi ẹsida mme ọbọp-ibet, mme ebiereikpe, ye mbon en̄wen ẹn̄wana ye nnyịn. Edi ye un̄wam Jehovah, nnyịn imesiyom ubọhọ ke esopikpe ke emem emem usụn̄, ntem ‘ikpemede inyụn̄ isọn̄ọde iwụk eti mbụk nte ekemde ye ibet.’—Philippi 1:7, NW; Psalm 94:14, 20-22.

17. Didie ke nnyịn isidịghi “akparawa lion”?

¹⁷ Andiwet psalm etịn̄ aban̄a edidịghi “akparawa lion ye dragon [“akamba urụkikọt,” NW].” Akparawa lion ekeme ndinen̄ede nnam ibak, ndien akamba urụkikọt ekeme ndidi ata akamba unam oro ọnyọnide-nyọni. (Isaiah 31:4) Nte ededi, inamke n̄kpọ m̀mê akparawa lion etie ibak ibak adan̄a didie ke ini enye an̄wanade iso ye iso, nnyịn ke ndamban̄a usụn̄ imesidịghi enye ebe ke ndikop uyo Abasi n̄kan uyo owo m̀mê mme esop oro ẹbietde lion. (Utom 5:29) Ntre ibak ibak “lion” isinọhọ nnyịn unan eke spirit.

18. “Akamba urụkikọt” ekeme nditi nnyịn mban̄a anie, ndien nso ke oyom nnyịn inam edieke enye oyomde ndimụm nnyịn?

¹⁸ Ke Edisana Ŋwed Abasi Ibom, ẹkot “akamba urụkikọt” oro “dragon.” Emi ekeme nditịm nti nnyịn mban̄a “akwa dragon . . . , kpa akani urụkikọt oro ẹkotde enye ẹte, andidori ikọt Abasi ikọ ye Satan.” (Ediyarade 12:7-9; Genesis 3:15) Enye ebiet akamba unam oro ọnyọnide-nyọni oro ekemede ndinuak nnyụn̄ mmen unam emi enye omụmde. (Jeremiah 51:34) Ke ini Satan odomode ndimụm nnyịn, ndida mme mfịghe ererimbot emi nnuak nnyụn̄ mmen nnyịn, ẹyak nnyịn ikịbe ibọhọ inyụn̄ idịghi “akamba urụkikọt” emi. (1 Peter 5:8) Ana nsụhọ oro ẹyetde aran ẹnam emi edieke anade mmọ ẹbuana ke edisu Rome 16:20.

Jehovah—Ebiet Emi Edinyan̄a Nnyịn Otode

19. Ntak emi nnyịn ibuọtde idem ye Jehovah?

¹⁹ Andiwet psalm etịn̄ aban̄a Abasi nte etịn̄de aban̄a ata andituak ibuot ete: “Koro enye adianade [“amade,” NW] mi, ndien nyanam enye ọbọhọ; nyemenede enye nnịm ke enyọn̄, koro enye ọfiọkde enyịn̄ mi.” (Psalm 91:14) Ubak udịmikọ oro “nyemenede enye nnịm ke enyọn̄” ọwọrọ, “nyemenede enye nnịm ke ebiet emi ubọk owo mîkemeke ndisịm.” Nnyịn ibuọt idem ke Jehovah nte mme andituak ibuot nnọ enye akpan akpan koro ‘nnyịn imade enye.’ (Mark 12:29, 30; 1 John 4:19) Nte utịp, Abasi ‘anam nnyịn ibọhọ’ mme asua nnyịn. Owo idisọhike nnyịn ifep ke isọn̄ tutu amama. Utu ke oro, ẹyenyan̄a nnyịn koro nnyịn ifiọkde enyịn̄ Abasi inyụn̄ isemede ikot enye ke mbuọtidem. (Rome 10:11-13) Ndien nnyịn imebiere ‘ndisan̄a ke enyịn̄ Jehovah ke nsinsi.’—Micah 4:5; Isaiah 43:10-12.

20. Nte Psalm 91 eberide, nso ke Jehovah ọn̄wọn̄ọ ọnọ anam-akpanikọ asan̄autom esie?

²⁰ Nte Psalm 91 eberide, Jehovah etịn̄ aban̄a anam-akpanikọ asan̄autom esie ete: “Enye eyeseme ọnọ mi, ndien nyeyere enye. Nda ye enye ke itie ukụt; nyanyan̄a enye, nnyụn̄ n̄kpono enye. Nyada ediwak usen nyụhọ enye, nnyụn̄ n̄wụt enye edinyan̄a mi.” (Psalm 91:15, 16) Ke ini nnyịn isemede ikot Abasi ke akam nte ekemde ye uduak esie, enye esiyere nnyịn. (1 John 5:13-15) Nnyịn imokokụt ekese ukụt ke ntak usua oro Satan edemerede. Edi mme ikọ oro ‘nyada ye enye ke ukụt’ ẹtịm nnyịn idem ẹnọ mme idomo ini iso ẹnyụn̄ ẹsọn̄ọ ẹnọ nnyịn nte ke Abasi eyenịm nnyịn uwem ke ini ẹdisobode idiọk editịm n̄kpọ emi.

21. Didie ke ẹnọ mbon oro ẹyetde aran ubọn̄?

²¹ Kpa ye afai afai ubiọn̄ọ Satan, ẹyenọ nsụhọ mbon oro ẹyetde aran oro ẹdude ke otu nnyịn ubọn̄ ke heaven ke edikem ini Jehovah—ke mmọ ẹma ẹkedu “ediwak usen” ke isọn̄. Edi, n̄wọrọnda ubọhọ oro Abasi ọnọde adada ubọn̄ eke spirit ọsọk mbon oro ẹyetde aran. Ndien nso ukpono ke mmọ ẹnyene ntem ndida usụn̄ nte Mme Ntiense Jehovah ke isọn̄ ke ukperedem ini emi! (Isaiah 43:10-12) N̄kponn̄kan ubọhọ oro Jehovah edinọde ikọt esie edidi ke akwa ekọn̄ Armageddon ke ini enye ediwụtde unen itie edikara esie, edinyụn̄ anamde enyịn̄ esie asana.—Psalm 83:18; Ezekiel 38:23; Ediyarade 16:14, 16.

22. Mmanie ke ‘ẹdiwụt edinyan̄a Jehovah’?

²² Edide nnyịn idi mme Christian oro ẹyetde aran m̀mê nsan̄a mmọ oro ẹyakde idem ẹnọ, nnyịn idori enyịn ke Abasi kaban̄a edinyan̄a. Ke “akwa usen Jehovah emi enyenede ndịk,” ẹyenyan̄a mbon oro ẹnamde n̄kpọ Abasi ke edinam akpanikọ. (Joel 2:30-32) ‘Ẹyeda ediwak usen’—anana-utịt uwem—‘ẹyụhọ’ ndusụk nnyịn oro idinamde “akwa otuowo” eke mme andibọhọ ndụk obufa ererimbot Abasi oro idisọn̄ọde ida inam akpanikọ ke akpatre udomo. Enye n̄ko ayanam akwa udịmowo ẹset ke n̄kpa. (Ediyarade 7:9; 20:7-15) Ke akpanikọ Jehovah oyokop inemesịt ‘ndiwụt nnyịn edinyan̄a’ ebe ke Jesus Christ. (Psalm 3:8) Ye utọ utịbe utịbe idotenyịn oro anade nnyịn ke iso do, ẹyak nnyịn ika iso ndidori enyịn ke Abasi kaban̄a un̄wam ke ndibat usen nnyịn ke usụn̄ oro ọnọde enye ubọn̄. Ke ikọ ye edinam nnyịn, nnyịn ikpakam ika iso ndiwụt nte ke Jehovah edi ebiet ubọhọ nnyịn.

[Ikọ idakisọn̄]

Didie ke Afo Ọkpọbọrọ?

• Nso idi “ndịbe ebiet Ata Edikon̄”?

• Ntak emi nnyịn mîfeheke ndịk?

• Didie ke edi nte ke ‘baba idiọk-n̄kpọ idisịmke nnyịn’?

• Ntak emi nnyịn ikemede ndidọhọ ke Jehovah edi ebiet emi edinyan̄a nnyịn otode?

[Ndise ke page 17]

Nte afo ọmọfiọk nte akpanikọ Jehovah edide akamba otuekọn̄ ọnọ nnyịn?

[Mme ndise ke page 18]

Jehovah esin̄wam ikọt esie ndinam utom ukwọrọikọ mmọ kpa ye en̄wan unana idotenyịn ye an̄wan̄wa ubiọn̄ọ

[Ebiet Ẹdade N̄kpọ Ẹto]

Ibọm: A. N. Jagannatha Rao, Trustee, Madras Snake Park Trust