LKPEPN̄KPỌ 14
Nso Idinam Abasi Ama Nte Ikponode Enye?
Ima ikụt ke Ukpepn̄kpọ 13 ke Abasi imaha kpukpru ufọkabasi. Edi imosụk ikeme ndikpono Abasi nte Abasi oyomde. Utọ utuakibuot ewe ke Abasi ama? Abasi oyom ikpono enye didie? (James 1:27) Se nte Bible ọdọhọde ikpono Abasi.
1. Nso ikpowụt nnyịn nte ikpokponode Abasi?
Ọfọn iyak Bible owụt nnyịn nte ikpokponode Abasi. Jesus ọkọdọhọ Abasi ete: “Ikọ fo edi akpanikọ.” (John 17:17) Edi ndusụk ufọkabasi itieneke se Bible ọdọhọde. Mmọ ẹmia se Bible etịn̄de ẹberi, ẹkabade ẹtiene nsio nsio ukpepn̄kpọ ye ubono-n̄kpọ, oro mme owo ẹkesiode ẹdi. Jehovah imaha mbon oro ‘ẹkpọnọrede ewụhọ esie ẹnịm’ ẹnam eke owo. (Kot Mark 7:9.) Enye esinen̄ede enem esịt ima inam item esie ye se Bible ọdọhọde.
2. Ikpokpono Jehovah didie?
Jehovah okobot nnyịn. Enye edi n̄kukụre Abasi oro ikpokponode. (Ediyarade 4:11) Emi ọwọrọ ke ana ima enye inyụn̄ inọ enye san̄asan̄a ukpono, ikûda ndisọi n̄kpọ m̀mê mbiet owo ekededi utuak ibuot unọ enye.—Kot Isaiah 42:8.
Jehovah oyom utuakibuot emi ‘asanade, emi enye onyụn̄ enyịmede.’ (Rome 12:1) Ọwọrọ ana idu uwem nte enye ọdọhọde. Ke uwụtn̄kpọ, mbon emi ẹmade Jehovah ẹma se enye etịn̄de aban̄a ndọ ẹnyụn̄ ẹsinam mmọ. Mmọ isinamke se isibiatde owo n̄kpọ ke idem, utọ nte ndin̄wọn̄ sika, ndisịn un̄wọn̄, ndida idiọk ibọk, ndida ibọk mbakara ke idiọk usụn̄, m̀mê ndin̄wọn̄ ọkpọsọn̄ mmịn n̄kaha.a
3. Ntak emi anade idiana ye ikọt Jehovah ikpono Jehovah?
Ke mboho ikọ Abasi oro isinịmde kpukpru urua, imesitoro Jehovah ke esop ikọt esie. (Psalm 111:1, 2) N̄kpọ kiet emi isidade itoro enye edi ikwọ. (Kot Psalm 104:33.) Ima anam Jehovah ọdọhọ nnyịn isidụk ikọ Abasi ye ikọt esie. Enye ọdiọn̄ọ ke oro ayanam nnyịn idu ata uwem ke nsinsi. Ke ini idụkde ikọ Abasi ye ikọt Jehovah, mmọ ẹsisọn̄ọ nnyịn idem, nnyịn inyụn̄ isọn̄ọ mmọ idem.
SỊN IDEM KPEP
Se ntak emi Jehovah Abasi mîmaha ikama ndisoi n̄kpọ m̀mê mbiet owo ekededi ikpono enye. Oyonyụn̄ okụt nsio nsio usụn̄ emi ikpotorode Abasi.
4. Ifọnke ikama ndisọi n̄kpọ m̀mê mbiet owo ekededi ikpono Abasi
Inam didie idiọn̄ọ ke Abasi imaha ikama mbiet owo m̀mê mbiet n̄kpọ ekededi ikpono enye? Se VIDIO emi, ekem ẹbọrọ mbụme emi ẹnyụn̄ ẹneme ẹban̄a enye.
Nso iketịbe ini ndusụk ikọt Abasi ke eset ẹkedade edisọi mbiet ẹkpono Abasi?
Ndusụk owo ẹsikama mbiet nsio nsio n̄kpọ ẹkpono Abasi sia mmọ ẹkere ke oro edinam mmimọ inen̄ede ikpere Abasi. Edi utọ n̄kpọ oro esikam adadian̄ade owo ọkpọn̄ Abasi. Kot Exodus 20:4-6 ye Psalm 106:35, 36, ekem ẹbọrọ mbụme emi ẹnyụn̄ ẹneme ẹban̄a mmọ:
Ewe edisọi n̄kpọ m̀mê mbiet ke afo esikụt nte mme owo ẹkamade ẹkpono Abasi?
Ndi Jehovah Abasi enyịme ẹkama mbiet owo m̀mê mbiet n̄kpọ ekededi ẹkpono enye?
Ndi emekere ke ọfọn ẹkama edisọi mbiet ẹkpono Abasi? Nso inam ọdọhọ ntre?
5. Ndituak ibuot nnọ Jehovah kpọt idiyakke ẹda nsu ẹbian̄a nnyịn
Ikpokpono Jehovah nte enye oyomde, nnyịn ididụkke ufụn inọ n̄kpọ emi mîdịghe akpanikọ. Se VIDIO emi.
Kot Psalm 91:14, ekem ẹbọrọ mbụme emi ẹnyụn̄ ẹneme ẹban̄a enye:
Nso ke Jehovah edinam inọ nnyịn edieke imade enye inyụn̄ ituakde ibuot inọ enye kpọt?
6. Jehovah Abasi ke isikpono ke mboho ikọ Abasi nnyịn
Imesitoro Jehovah inyụn̄ isọn̄ọ mbon en̄wen idem ke ini ikwọde ikwọ ye ke ini itienede isịn uyo ke se ẹnemede ke mbono esop nnyịn. Kot Psalm 22:22, ekem ẹbọrọ mbụme emi ẹnyụn̄ ẹneme ẹban̄a mmọ:
Ndi esinem fi ama okop mme owo ẹbọrọde mbụme ke mboho ikọ Abasi nnyịn?
Ndi akpama ndisitiene nsịn uyo ọkpọkọm ini kiet ke se ẹnemede ke mbono esop?
7. Esinem Jehovah ke ini itịn̄de se ikpepde ke Ikọ esie inọ mbon en̄wen
Awawak usụn̄ emi ikemede ndinam mme owo ẹdiọn̄ọ akpanikọ emi ikpepde ke Bible. Kot Psalm 9:1 ye 34:1, ekem ẹbọrọ mbụme emi ẹnyụn̄ ẹneme ẹban̄a enye:
Ewe ke otu ofụri n̄kpọ oro afo ekpepde ke Bible ke akpama ndinam owo en̄wen ọdiọn̄ọ?
NDUSỤK OWO ẸSIDỌHỌ ẸTE: “Owo ikemeke ndikpono Abasi nte Abasi oyomde.”
Afo ekere didie?
SE IKPEPDE
Esịt esinem Jehovah ima ikpono enye ikpọn̄-ikpọn̄, itoro enye ke mbono esop, inyụn̄ itịn̄ se ikpepde ke Bible inọ mbon en̄wen.
Se M̀mê Emeti
Nso idin̄wam nnyin ifiọk nte ikpokponode Abasi nte enye oyomde?
Ntak emi ikpatuakde ibuot inọ Jehovah Abasi kpọt?
Ntak emi anade idiana ye ata ikot Abasi ikpono Abasi?
KPEP N̄KPỌ EN̄WEN
Se mbụk emi, “Ndụkke Aba Ufụn Nnọ Ndem,” ke oyokụt se ikosiode mma kiet ke ufụn ukpono ndem.
Se se idin̄wamde fi etiene esịn uyo ke se ẹnemede ke mboho ikọ Abasi nnyịn.
Se nte mboho ikọ Abasi Mme Ntiense Jehovah akan̄wamde akparawa kiet, kpa ye oro ndịk akanamde enye ke nsonso oro.
Ediwak owo ẹsida cross nte n̄kpọ mme Christian. Edi ndi ọfọn ida cross idisịn ke n̄kpọ Abasi?
“Ntak Emi Mme Ntiense Jehovah Mîsikamake Cross Ikpono Abasi?” (Odu ke jw.org)
a Ẹyeneme ẹban̄a emi ke nsio nsio ukpepn̄kpọ.