Afo Ọbọp Odori ke Ewe Itiat Idakisọn̄?

EDIEKE itiat idakisọn̄ ufọk ọsọn̄de, ufọk oro eyenen̄ede ebịghi. Bible esida edumbet emi etịn̄ ikọ ke ndamban̄a usụn̄ ndusụk ini.

Ke uwụtn̄kpọ, prọfet Isaiah ọdọhọ ke Jehovah Abasi edi enye emi “esịnde itiat idakisọn̄ isọn̄.” (Isaiah 51:13, NW) Itiat idakisọn̄ emi esịne mbet Abasi oro mîkemeke ndikpụhọde, oro ẹkarade nte isọn̄ esisan̄ade akanade onyụn̄ omụmde enye akama ke itie esie. (Psalm 104:5) Ikọ Abasi, kpa Bible, etịn̄ n̄ko aban̄a “mme adaha,” m̀mê itiat idakisọn̄ emi ubonowo odorode. Mmọ ẹdi unenikpe, mbet, ye ewụhọ. Ke ini ukwan̄ikpe, n̄wo, ye afai ‘ẹwụride’ m̀mê ẹnamde mmọ ẹmem, ndutịme esidu ke n̄kaowo.—Psalm 11:2-6; Mme N̄ke 29:4.

Edumbet emi enyene n̄kpọ ndinam ye owo kiet kiet n̄ko. Ke utịt ọwọrọetop Ukwọrọikọ esie Oro ke Obot, Jesus Christ ọkọdọhọ ete: “Ke ntre ẹyemen kpukpru owo eke ẹkopde ẹnyụn̄ ẹnamde mme ikọ mi emi ẹdomo ye owo ọniọn̄, emi ọkọbọpde ufọk esie odori ke enyọn̄ akamba itiat. Edịm onyụn̄ edep, ukwọ edi, ofụm abara onyụn̄ eberi ufọk oro edi enye iduọhọ, koro ẹkebọpde enye ẹdori ke enyọn̄ akamba itiat. N̄ko-n̄ko, ẹyemen kpukpru owo eke ẹkopde mme ikọ mi emi edi mînamke mmọ ẹdomo ye ndisịme owo, emi ọkọbọpde ufọk esie odori ke utan. Ndien edịm edep, ukwọ onyụn̄ edi, ofụm abara onyụn̄ eberi ufọk oro ndien enye ọduọ, n̄wụre esie onyụn̄ okpon.”—Matthew 7:24-27.

Ewe itiat idakisọn̄ ke afo ọbọp uwem fo odori? Ndi afo ọbọp odori ke utatan emi edide ukpepn̄kpọ akwaifiọk mbon ererimbot, oro ediwụrede? Mîdịghe ndi ọbọp odori ke enyọn̄ edisọn̄ akamba itiat emi edide edinam mme ikọ Jesus Christ, oro edin̄wamde fi ọbọhọ ndamban̄a oyobio uwem?