UKPEPN̄KPỌ 41
Nso ke Bible Etịn̄ Aban̄a Idan̄?
Ediwak owo isimaha nditịn̄ n̄kpọ mban̄a idan̄. Edi Bible etịn̄ n̄kpọ aban̄a enye ke usụn̄ emi owụtde ukpono, mînyụn̄ ideheke owo ke utọn̄ ndikop. Se Bible etịn̄de aban̄a idan̄ esin̄wam nnyịn. Nso inam edi ntre? Ti ke Jehovah Abasi emi okobotde nnyịn akanam ẹwet Bible. Enye enen̄ede ọdiọn̄ọ se ifọnde ye nnyịn. Jehovah etịn̄ se imọ imade ọnọ nnyịn, onyụn̄ anam nnyịn idiọn̄ọ se idinamde nnyịn idu ata uwem ke nsinsi.
1. Jehovah ada idan̄ didie?
Jehovah enyịme eren ye n̄wan emi ẹma ẹkedọ idemmọ ẹnam idan̄. Idịghe unyene nditọ kpọt anam Jehovah enyịme mmọ ẹnam emi, enye ayak mmọ ẹnam emi sia enye oyom mmọ ẹwụt ke imama idem mmimọ ẹnyụn̄ ẹkop inem ndọ mmọ. N̄kpọ emi anam Ikọ Abasi ọdọhọ ete: “Dara ye n̄wan uyen fo.” (Mme N̄ke 5:18, 19) Jehovah oyom Christian oyụhọ ye ebe m̀mê n̄wan esie; mmọ ididehede inam ima ye owo en̄wen.—Kot Mme Hebrew 13:4.
2. Nso utọ idan̄ idiọk ke enyịn Abasi?
Bible ọdọhọ ke “mbon use . . . ididaha obio ubọn̄ Abasi inyene.” (1 Corinth 6:9, 10) Owo emi ekewetde itie Bible oro ekesịn ikọ Greek emi ẹkotde por·neiʹa ke itie oro, ke ini enye etịn̄de aban̄a idan̄ emi ọdiọkde ke enyịn Abasi. Ikọ oro esịne utọ n̄kpọ nte (1) idan̄a eren ye n̄wan emi mîdọhọ idemmọ, (2) idan̄ eren ye eren m̀mê n̄wan ye n̄wan, ye (3) owo ndidan̄ ye unam. Edieke nnyịn mînamke idan̄ emi Abasi asuade, inam ufọn inọ idem nnyịn, Abasi oyonyụn̄ enem esịt ye nnyịn.—1 Thessalonica 4:3.
SỊN IDEM KPEP
Se se idin̄wamde fi efehe ọkpọn̄ idan̄ emi ọdiọkde ke enyịn Abasi ye ufọn emi edidiade akpanam se Abasi amade.
3. Fehe kpọn̄ idan̄ emi ọdiọkde ke enyịn Abasi
Joseph ama anam se enye ekekeme man enye idinam idan̄ emi ọdiọkde ke enyịn Abasi sia enye ama ama Abasi. Kot Genesis 39:1-12, ekem ẹbọrọ mbụme emi ẹnyụn̄ ẹneme ẹban̄a mmọ:
Nso ikanam Joseph efehe?—Se ufan̄ikọ 9.
Ndi emekere ke nnennen n̄kpọ ke Joseph akanam oro? Nso inam ọdọhọ ntre?
Nso ke n̄kaifere ye n̄kparawa ẹkeme ndinam man ẹfehe ẹkpọn̄ idan̄ emi ọdiọkde ke enyịn Abasi ukem nte Joseph? Se VIDIO emi.
Jehovah iyomke owo nnyịn ndomokiet anam idan̄ emi ọdiọkde ke enyịn esie. Kot 1 Corinth 6:18, ekem ẹbọrọ mbụme emi ẹnyụn̄ ẹneme ẹban̄a mmọ:
Nso ye nso ikeme ndinam owo akanam idan̄ emi ọdiọkde ke enyịn Abasi?
Nso ke akpanam man efehe ọkpọn̄ idan̄ emi ọdiọkde ke enyịn Abasi?
4. Emekeme ndibe idomo
Nso ikeme ndinam ọsọn̄ owo ndibe idomo ndinam idan̄ emi ọdiọkde ke enyịn Abasi? Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
Nso ke brọda oro akanam ini enye edide edikụt ke se isikerede ye ndụk idụkde ekeme ndinam imọ ikanam ima ye owo emi mîdịghe n̄wan imọ?
Ndusụk ini idiọk ekikere esidụk idem mbon emi ẹmade Abasi esịt. Nso ke ikpanam man nnyịn idisitie ikere oburobụt n̄kpọ? Kot Philippi 4:8, ekem ẹbọrọ mbụme emi ẹnyụn̄ ẹneme ẹban̄a mmọ:
Nso ye nso ke ikpesikere?
Didie ke ndisikot Bible nnyụn̄ nsịn idem ke n̄kpọ Jehovah ekeme ndin̄wam nnyịn isibe idomo?
5. Se Jehovah ọdọhọde nnyịn inam edi ke ufọn nnyịn
Jehovah ọdiọn̄ọ se ifọnde ye nnyịn ikan. Enye ekpep nnyịn nte ikpodude eti uwem ye ufọn emi ididiade ikpanam oro. Kot Mme N̄ke 7:7-27 mîdịghe se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
Didie ke akparawa oro ekemen idem ekesịn ke idomo?—Se Mme N̄ke 7:7-9.
Mme N̄ke 7:23, 26, owụt se idan̄ emi ọdiọkde ke enyịn Abasi ekeme ndinam owo. Nso iditịbe edieke ikpemede idem ye utọ n̄kpọ oro?
Ikpodu uwem nte Abasi oyomde, didie ke oro edin̄wam nnyịn idu ata uwem ke nsinsi?
Ndusụk owo ẹsidọhọ ke ọdiọk etieti nte Bible ọdọhọde eren okûdan̄ ye eren, n̄wan okûdan̄ ye n̄wan. Edi Jehovah edi Abasi ima, enye oyom kpukpru owo ẹdu ata uwem ke nsinsi. Kot 1 Corinth 6:9-11, ekem ẹbọrọ mbụme emi ẹnyụn̄ ẹneme ẹban̄a enye:
Ndi iren emi ẹsidan̄de ye iren ye iban emi ẹsidan̄de ye iban kpọt ke Abasi ọdọhọ ẹkpụhọde?
Ana kpukpru nnyịn ikpụhọde edieke iyomde Abasi ama nnyịn. Inyeneke se ifọnde nte ndinam n̄kpọ man Abasi ama nnyịn. Kot Psalm 19:8, 11, ekem ẹbọrọ mbụme emi ẹnyụn̄ ẹneme ẹban̄a mmọ:
Ndi emekere ke ofụri se Abasi ọdọhọde nnyịn inam ọfọn? Nso inam ọdọhọ ntre?
Jehovah an̄wam ata ediwak owo ẹdu uwem nte enye amade. Enye ekeme ndin̄wam fi n̄ko
NDUSỤK OWO ẸSIDỌHỌ ẸTE: “Idiọkke owo ndinam idan̄ ye owo, ama akam edi mmọ ẹma idemmọ.”
Nso ke ọkpọbọrọ utọ owo oro?
SE IKPEPDE
Jehovah enyịme eren ye n̄wan emi ẹma ẹkedọ idemmọ ẹnam idan̄.
Se M̀mê Emeti
Idan̄ emi ọdiọkde ke enyịn Abasi esịne utọ ewe ye ewe?
Nso idin̄wam fi okûnam idan̄ emi ọdiọkde ke enyịn Abasi?
Nso ufọn ke ndinam se Jehovah ọdọhọde anam ọnọ nnyịn?
KPEP N̄KPỌ EN̄WEN
Se ntak emi Abasi oyomde eren ye n̄wan emi ẹyomde ndidụn̄ kiet ẹnam ndọ kan̄a.
Se se inamde Bible ndidọhọ ke ifọnke eren adan̄ ye eren m̀mê n̄wan adan̄ ye n̄wan mîwọrọke ke ana isua mbon en̄wen.
“Ndi Ọdiọk Erenowo Ndidọ Erenowo M̀mê N̄wan Ndidọ N̄wan?” (Odu ke jw.org)
Se se inamde se Abasi ekpepde nnyịn aban̄a idan̄ edi ke ufọn nnyịn.
Se mbụk emi, “Mmọ Ẹma Ẹnam N̄kpọ ye Ami Ukpono Ukpono,” ke oyokụt se ikanamde eren emi ekesidan̄de ye irenowo okpụhọde uwem esie onyụn̄ anam se Abasi amade.
a Idan̄ enye emi esịne eren ndina ye n̄wan, idan̄ inua, idan̄ etịtifuọ, onyụn̄ esịne ndifiọn̄ọ owo ndido idan̄.