‘Ẹka Iso Ẹtiene Mi’
“Ẹkekot mbufo ẹte ẹdinam oro; koro Christ ke Idem Esie ama okụt ndutụhọ kaban̄a mbufo, onyụn̄ ọkpọn̄ uwụt-n̄kpọ ọnọ mbufo, ete, mbufo ẹkpetiene ẹsan̄a ke nde ikpat Imọ.”—1 PETER 2:21.
1, 2. Ntak emi mfọnmma uwụtn̄kpọ oro Jesus ekenịmde nte andikpep mîsọn̄ke ikaha nnyịn ndikpebe?
JESUS CHRIST ekedi akakan Andikpep oro akanam odude ke isọn̄. N̄ko-n̄ko, enye ekedi mfọnmma owo, ndien akananam ikanamke idiọkn̄kpọ ke ofụri ini oro enye okodude uwem nte owo. (1 Peter 2:22) Nte ededi, ndi oro ọwọrọ ke uwụtn̄kpọ oro Jesus ekenịmde nte andikpep ọsọn̄ akaha nnyịn mme anana-mfọnmma owo ndikpebe? Baba-o.
2 Nte nnyịn ikokụtde ke ibuotikọ oro ekebemde iso, unọ ukpep Jesus ọkọkọn̄ọ ke ima. Ndien ima edi edu oro kpukpru nnyịn ikemede ndikọri. Ikọ Abasi esiwak ndisịn udọn̄ nnọ nnyịn ndinam n̄kọri nnyụn̄ nnam ima oro nnyịn imade mbon en̄wen ọkọri. (Philippi 1:9; Colossae 3:14) Akananam Jehovah iyomke mme edibotn̄kpọ esie ẹnam se mmọ mîdikemeke ndinam. Ke akpanikọ, sia ‘Abasi edide ima’ okonyụn̄ anamde nnyịn ke mbiet esie, ẹkeme ndidọhọ ke enye okobot nnyịn ndiwụt ima. (1 John 4:8; Genesis 1:27) Ntre ke ini nnyịn ikotde mme ikọ apostle Peter oro ẹwetde ke itien̄wed oro ẹdade ẹbọp ibuotikọ nnyịn, nnyịn imekeme ndinam n̄kpọ ye mbuọtidem. Nnyịn imekeme nditiene nde ikpat Christ ketket. Ke akpanikọ, nnyịn imekeme ndinam ewụhọ Jesus emi: ‘Ẹka iso ẹtiene mi.’ (Luke 9:23, NW) Ẹyak nnyịn ikere iban̄a nte nnyịn ikpekpebede ima oro Christ okowụtde, akpa kan̄a ima oro enye akamade akpanikọ oro enye ekekpepde mme owo, ye ima oro enye akamade mbon oro enye ọkọnọde ukpep.
Ndikọri Ima nnọ Akpanikọ Oro Nnyịn Ikpepde
3. Ntak esisọn̄de ndusụk owo ndikpep n̄kpọ, edi nso item ke ẹkụt ke Mme N̄ke 2:1-5?
3 Man ima akpanikọ oro ikpepde mbon en̄wen, ana nnyịn ima ndikpep idem nnyịn mme utọ akpanikọ oro. Ke ererimbot mfịn, isimemke utom ndinyene orụk ima oro. Mme utọ n̄kpọ nte unana ifiọkn̄wed ye ndiọi edu oro ẹkekọride ke ini uyen ẹsinam ediwak owo ẹnyene usua oro ebịghide ẹnọ ukpepn̄kpọ. Nte ededi, edi akpan n̄kpọ nte nnyịn ikpep n̄kpọ ito Jehovah. Mme N̄ke 2:1-5 ọdọhọ ete: “Eyen mi, afo ama ọbọ ikọ mi, onyụn̄ enịm mbet mi ke idem fo; onyụn̄ akpan̄ utọn̄ fo ke eti ibuot, onyụn̄ esịn esịt fo ke mbufiọk; ama ofiori okot asian, emenede uyo fo ọnọ mbufiọk; ama oyom enye nte silver, onyụn̄ odụn̄ọde enye nte n̄kpọ-uto eke edịbede; ndien afo eyetịm ọfiọk uten̄e Jehovah, onyụn̄ esịme ifiọk Abasi.”
4. ‘Ndisịn’ esịt ọwọrọ nso, ndien nso ekikere edin̄wam nnyịn ndinam emi?
4 Tịm fiọk ete ke ẹteme nnyịn ndien ndien ke ufan̄ikọ 1 esịm 4 ẹte isịn ukeme idịghe n̄kukụre man ‘ibọ’ inyụn̄ ‘inịm’ edi n̄ko man ‘iyom’ inyụn̄ ‘idụn̄ọde.’ Nte ededi, nso idinụk nnyịn ndinam kpukpru emi? Ọfọn, tịm fiọk ubak udịmikọ oro ‘sịn esịt fo ke mbufiọk.’ N̄wed ndụn̄ọde kiet ọdọhọ ke item emi “iben̄eke ite ẹnọ n̄kpan̄utọn̄ kpọt; enye edi eben̄e kaban̄a akpan edu kiet: ndinyịme ukpepn̄kpọ oro ye ọkpọsọn̄ udọn̄.” Ndien nso ikeme ndinam nnyịn inyịme inyụn̄ inyene ọkpọsọn̄ udọn̄ ndikpep se Jehovah etemede nnyịn? Ekikere nnyịn. Oyom nnyịn ida “ifiọk Abasi” nte “silver” ye nte “n̄kpọ-uto eke edịbede.”
5, 6. (a) Nso ikeme nditịbe nte ini ebede, ndien didie ke nnyịn ikeme ndibiọn̄ọ oro? (b) Ntak emi nnyịn ikpakade iso ndidian ifiọk efen efen ke ọsọn̄urua ifiọk oro nnyịn ikụtde ke Bible?
5 Isọn̄ke ndinyene utọ ekikere oro. Ke uwụtn̄kpọ, eyedi “ifiọk Abasi” oro afo ọbọde esịne akpanikọ oro nte ke Jehovah aduak ndinam anam-akpanikọ ubonowo odu nsinsi uwem ke Paradise isọn̄. (Psalm 37:28, 29) Ke akpa ini oro afo ekekpepde akpanikọ oro, eyịghe idụhe nte ke afo akada enye nte ata n̄kpọuto, akpanikọ oro akanamde esịt ye ekikere fo ẹyọhọ ye idotenyịn ye idatesịt. Nso kaban̄a idahaemi? Nte esịtekọm oro afo enyenede aban̄a n̄kpọuto fo osụhọde nte ini ebede? Do, domo ndinam n̄kpọ iba. Akpa, demede esịtekọm fo, oro edi, kpukpru ini ti se inamde fi ada akpanikọ kiet kiet oro Jehovah ekpepde fi ke ọsọn̄urua, idem ye mbon oro afo ekekpepde ediwak isua ke edem.
6 Ọyọhọ iba, ka iso ndidian n̄kpọuto efen efen ke n̄kpọuto fo. Kamse, edieke afo ọkpọdọkde ọsọn̄urua n̄kpọuto, ndi afo n̄kukụre ekpesịn enye ke ekpatọfọn̄ asan̄a ebe? Mîdịghe ndi afo akpaka iso ọdọk ndise m̀mê n̄kpọuto efen efen ẹdu? Ikọ Abasi ọyọhọ ye mme ọsọn̄urua akpanikọ oro ẹbietde silver ye n̄kpọuto eke edịbede. Inamke n̄kpọ m̀mê se afo ọfiọhọde ẹwak didie, afo emekeme ndifiọhọ n̄kpọuto efen efen. (Rome 11:33) Nte afo ekpepde obufa n̄kpọ, bụp idemfo: ‘Nso inam enye edi n̄kpọuto? Ndi enye anam mi nnyene ntotụn̄ọ ifiọk mban̄a edu m̀mê mme uduak Jehovah? Ndi enye ọnọ mi ndusụk nti ndausụn̄ oro ẹkemede ndin̄wam mi nditiene nde ikpat Jesus?’ Nditie n̄kere mme utọ mbụme emi ayan̄wam fi ndinam ima oro afo amade akpanikọ oro Jehovah ekpepde fi ọkọri.
Ndima Akpanikọ Oro Nnyịn Ikpepde Mme Owo
7, 8. Nso idi ndusụk usụn̄ oro nnyịn ikemede ndiwụt mbon en̄wen nte ke nnyịn imama akpanikọ oro ikpepde ito Bible? Nọ uwụtn̄kpọ.
7 Nte nnyịn inọde mbon en̄wen ukpep, didie ke nnyịn ikeme ndiwụt ke imama akpanikọ oro nnyịn ikpepde ke Ikọ Abasi? Sia ikpebede uwụtn̄kpọ Jesus, nnyịn inen̄ede iberi edem ke Bible ke ukwọrọikọ ye unọ ukpep nnyịn. Ke ndondo emi, ẹsịn udọn̄ ẹnọ ikọt Abasi ke ofụri ererimbot ndinen̄ede nda Bible nnam n̄kpọ ke an̄wan̄wa utom ukwọrọikọ mmọ. Nte afo adade ekikere oro anam n̄kpọ, yom mme usụn̄ ndinam enyeneufọk ọfiọk ke afo ke idemfo amada se afo osiode ke Bible abuana ye imọ ke ọsọn̄urua.—Matthew 13:52.
8 Ke uwụtn̄kpọ, ke etienede edinam oyomonsia isua oko ke New York City, Christian eyenete an̄wan kiet akabuana Psalm 46:1, 11 ye mme owo oro enye okosobode ke an̄wautom. Enye ama ebem iso obụp mme owo nte n̄kpọ etiede ye mmọ ke n̄kpọ mmọn̄eyet oro ama ekebe. Enye ama enen̄ede ọnọ n̄kpan̄utọn̄ ke ibọrọ mmọ, enyịme, ndien ọdọhọ ete: “Ndi mmekeme ndibuana itie N̄wed Abasi oro enen̄erede ọnọ mi ndọn̄esịt ke ọkpọsọn̄ ini emi ye mbufo?” Ibat ibat owo kpọt mîkenyịmeke, ndien emi ama osụn̄ọ ke ekese inem inem nneme. Ke enemede nneme ye n̄kparawa, eyenete an̄wan emi ama esiwak ndidọhọ: “Ami mmada Bible nnọ ukpep ke isua 50 idahaemi, edi ndi ọmọfiọk se idude? Akanam n̄kwe mfịna ndomokiet oro n̄wed emi mîn̄wamke ndikọk.” Ebede ke ndikama in̄wan̄-in̄wan̄ ye ufiop ufiop usụn̄ edisobo ye owo, nnyịn iwụt mme owo ke imama inyụn̄ ida se ikpepde ito Ikọ Abasi ke ọsọn̄urua.—Psalm 119:97, 105.
9, 10. Ntak edide akpan n̄kpọ ndida Bible mbọrọ mme mbụme ẹban̄ade mme edinịm ke akpanikọ nnyịn?
9 Nnyịn imenyene eti ifet ndiwụt ke imama Ikọ Abasi ke ini mme owo ẹbụpde nnyịn ẹban̄a mme edinịm ke akpanikọ nnyịn. Ke itienede uwụtn̄kpọ Jesus, nnyịn idikam inamke mme ibọrọ nnyịn ẹkọn̄ọ ke ekikere idem nnyịn. (Mme N̄ke 3:5, 6) Utu ke oro, nnyịn idida Bible inọ ibọrọ. Ndi afo omokop ndịk nte ke owo ekeme ndibụp fi mbụme oro afo mûdukemeke ndibọrọ. Kere ban̄a in̄wan̄-in̄wan̄ usio-ukot iba oro afo ekemede ndinam.
10 Nam se ekemede ndidu ke mben̄eidem. Apostle Peter ekewet ete: “Edi ẹten̄e Christ ke esịt mbufo nte Ọbọn̄. Kpukpru ini ẹben̄e idem ndibọrọ kpukpru owo eke ẹdibụpde mbufo ntak idotenyịn emi mbufo ẹnyenede; edi ẹkpeme ndibọrọ ke sụn̄-sụn̄ ido ye ke ido uten̄e.” (1 Peter 3:15) Ndi afo emeben̄e idem ndida nnọ mme edinịm ke akpanikọ fo? Ke uwụtn̄kpọ, edieke owo oyomde ndifiọk ntak emi afo mûsutieneke ubuana ke ndusụk ido m̀mê edinam oro mîkemke ye N̄wed Abasi, kûyụhọ ke ndidọhọ, “Emi atuaha ye ido ukpono mi.” Utọ ibọrọ oro ekeme ndinọ ekikere nte ke afo ayak mbon en̄wen ẹnam ubiere ẹnọ fi ndien ke anaedi afo edi owo ndedịbe n̄ka. Ekpenen̄ede ọfọn ndidọhọ, “Ikọ Abasi, kpa Bible, akpan emi” m̀mê, “Emi idinemke Abasi mi esịt.” Ekem nọ eti ntak ndinam emi an̄wan̄a.—Rome 12:1.
11. Nso n̄kpọ unam ndụn̄ọde ekeme ndin̄wam nnyịn ndidu ke mben̄eidem ndibọrọ mme mbụme ẹban̄ade akpanikọ Ikọ Abasi?
11 Edieke afo ekerede ke imọ iben̄eke idem, ntak mûdaha ini ndikpep ekpri n̄wed oro Nte Ẹkpetọn̄ọde Ẹnyụn̄ Ẹkade Iso ke Nneme Bible?a Sat ibat ibat ibuot nneme oro ẹtiede nte ẹsiwak ndibụp mbụme mban̄a, nyụn̄ mụm ndusụk akpan n̄kpọ ẹtode N̄wed Abasi dọn̄ ke ibuot. Nam ekpri n̄wed Nte Ẹkpetọn̄ọde ye Bible fo ẹdu ẹkpere. Kûmen̄e ndida mmọ nnam n̄kpọ, ọdọhọde ke imọ imenyene n̄kpọ unam ndụn̄ọde oro imọ ikpamade ndikama man an̄wam ẹkụt ibọrọ Bible ke mme mbụme.
12. Nnyịn ikpanam n̄kpọ didie edieke nnyịn mîfiọkke ibọrọ mbụme Bible?
12 Domo nditre nditịmede esịt nte mîdotke. Idụhe anana-mfọnmma owo oro ekemede ndibọrọ kpukpru mbụme. Ntre ke ini ẹbụpde fi mbụme Bible oro afo mûkemeke ndibọrọ, kpukpru ini afo emekeme ndidọhọ ntem: “Sọsọn̄ọ ke ndibụp utọ inem inem mbụme emi. Ke nditịn̄ akpanikọ, ami mfiọkke ibọrọ, edi mmetịm nnịm ke Bible etịn̄ aban̄a n̄kpọ emi. Mmesima ndinam ndụn̄ọde Bible, ntre nyanam ndụn̄ọde ke mbụme emi nnyụn̄ nda ibọrọ nsọk fi.” Utọ in̄wan̄-in̄wan̄ usụn̄ unam n̄kpọ emi eyeberede usụn̄ ọnọ nneme efen efen.—Mme N̄ke 11:2.
Ndima Mbon Oro Inọde Ukpep
13. Ntak emi nnyịn ikpenyenede in̄wan̄-in̄wan̄ ekikere iban̄a mbon oro nnyịn ikwọrọde ikọ inọ?
13 Jesus ama ama mbon oro enye ọkọnọde ukpep. Didie ke nnyịn ikpekpebe enye ke afan̄ emi? Nnyịn ikpedehede ikọri edu nsọn̄ido ye mbon oro ẹdude ẹkpere nnyịn. Edi akpanikọ, “ekọn̄ akwa usen Abasi, Andikara kpukpru n̄kpọ” ke enen̄ede asan̄a ekpere, ndien ẹyesobo ediwak biliọn owo. (Ediyarade 16:14; Jeremiah 25:33) Edi, nnyịn ifiọkke m̀mê anie edidu uwem m̀mê anie edikpa. Ubiereikpe oro edida itie ke ini iso onyụn̄ enyene Jesus Christ, enye emi Jehovah eyetde aran. Tutu ẹbiere ikpe, nnyịn ibat ke owo kiet kiet ekeme ndikabade ndi asan̄autom Jehovah.—Matthew 19:24-26; 25:31-33; Utom 17:31.
14. (a) Didie ke nnyịn ikpodụn̄ọde idem nnyịn ise m̀mê nnyịn imatua mme owo mbọm? (b) Ke nso nti usụn̄ ke nnyịn ikpatua mbon en̄wen mbọm inyụn̄ inyene ọkpọkpọ udọn̄ ke idemmọ?
14 Do, ukem nte Jesus, oyom nnyịn itua mbon en̄wen mbọm. Nnyịn imekeme ndibụp idem nnyịn: ‘Ndi mmokop mbọm mban̄a mbon oro ẹdade n̄kari ye abian̄a ndutịm ido ukpono, ndutịm ukaraidem, ye ndutịm unyamurua ererimbot emi ẹtụn usụn̄? Edieke etiede nte mmọ inyeneke udọn̄ ke etop oro nnyịn idade isọk mmọ, ndi mmoyom ndifiọk ntak oro etiede mmọ ntre ke idem? Ndi mmọfiọk ke ama etie mi, m̀mê mbon oro ẹnamde n̄kpọ Jehovah idahaemi ke edinam akpanikọ, ke idem ntre ini kiet ko? Ndi mmanam usụn̄ utọn̄ọ nneme mi ada ekekem? Mîdịghe ndi mmofụmi mme owo emi nte mbon oro mîkemeke ndinam ukpụhọde?’ (Ediyarade 12:9) Ke ini mme owo ẹkụtde mbọm oro nnyịn iwụtde ke ofụri esịt, enen̄ede etie nte mmọ ẹyenam n̄kpọ ẹban̄a etop nnyịn. (1 Peter 3:8) Mbọm ekeme n̄ko ndinụk nnyịn ndinen̄ede nnyene udọn̄ ke idem mbon oro nnyịn isobode ke utom ukwọrọikọ nnyịn. Nnyịn imekeme ndiwet mme mbụme ye ekikere mmọ. Ke ini ifiakde ika, nnyịn imekeme ndiwụt mmọ nte ke nnyịn ima ikere iban̄a se mmọ ẹketịn̄de akpatre ini oro nnyịn ikawahade. Ndien edieke mmọ ẹnyenede mfịna oro anade ẹse ẹban̄a usọp usọp, nnyịn imekeme ndinọ ndusụk nti un̄wam.
15. Ntak emi ikpokụtde eti n̄kpọ ke idem mme owo, ndien didie ke nnyịn ikpanam oro?
15 Ukem nte Jesus, nnyịn ikpenyene ndikụt eti n̄kpọ ke idem mme owo. Eyedi ete m̀mê eka oro ọbọkde nditọ ikpọn̄ ke esịn ukeme oro odotde itoro ndibọk nditọ esie. Eren kiet ke an̄wana ndise mban̄a ubon esie. Owo usọn̄ owụt udọn̄ ke mme n̄kpọ eke spirit. Ndi nnyịn imokụt mme utọ edu oro ke idem mbon oro nnyịn isobode inyụn̄ itoro mmọ nte ekemde? Ke ndinam ntem, nnyịn iyenen̄ede inyene unyịme edem mbiba inyụn̄ ikeme ndinam usụn̄ eberede ndinọ ikọ ntiense mban̄a Obio Ubọn̄.—Utom 26:2, 3.
Nsụhọdeidem Edi Akpan N̄kpọ ke Ndiwụt Ima
16. Ntak edide akpan n̄kpọ nditie ifụre ifụre nnyụn̄ n̄wụt ukpono nnọ mbon oro nnyịn ikwọrọde ikọ inọ?
16 Ima oro imade mbon oro inọde ukpep oyonụk nnyịn ndikere mban̄a ọniọn̄ ọniọn̄ ntọt Bible emi: “Ifiọk anam owo okohode idem, edi ima ọbọp owo ọkọri ke nti ido.” (1 Corinth 8:1) Jesus ama enyene akwa ifiọk, edi akananam enye ikatan̄ke idem. Ntem nte afo abuanade mme edinịm ke akpanikọ fo, fep nditie mfan̄a mfan̄a m̀mê ndida idem ke mfiọk n̄kaha. Utịt mbuba nnyịn edi ndisịm esịt nnyụn̄ ndụri mme owo ndi akpanikọ oro nnyịn inen̄erede ima. (Colossae 4:6) Ti ete ke ini Peter ọkọnọde mme Christian item ete ẹben̄e idem ndinọ ibọrọ, enye ama eti nnyịn ete ke ikpenyene ndinam ntre “ke sụn̄-sụn̄ ido ye ke ido uten̄e.” (1 Peter 3:15) Edieke nnyịn itiede ifụre ifụre inyụn̄ iwụtde ukpono, etie nte nnyịn iyetịm idụri mme owo ikpere Abasi oro nnyịn inamde n̄kpọ esie.
17, 18. (a) Didie ke nnyịn ikpanam n̄kpọ iban̄a etikwo etikwo edu oro ẹnyenede ẹban̄a nnyịn ndidot nte mme ọkwọrọikọ? (b) Ntak emi edinyene ifiọk mban̄a mme usem eset oro ẹkedade ẹwet Bible mîdịghe akpan n̄kpọ inọ nditọ ukpepn̄kpọ Bible?
17 Ufọn idụhe ndida ifiọk m̀mê ubọ ukpep nnyịn nnem mme owo esịt. Edieke ndusụk owo ke efakutom mbufo ẹsịnde ndikpan̄ utọn̄ nnọ owo ekededi oro mînyeneke akpan n̄weditoro m̀mê udorienyịn̄ ufọkn̄wed ntaifiọk, kûyak edu mmọ anam idem emem fi. Jesus ikọdọn̄ke enyịn ke mfan̄a oro nte ke enye ikakaha ọwọrọetop ufọkn̄wed mme rabbi eke eyo esie; m̀mê enye ndikanam n̄kpọ mban̄a mme ọsọ asari ebe ke ndidomo ndida akwa ifiọk esie nnem mme owo esịt.—John 7:15.
18 Nsụhọdeidem ye ima ẹnen̄ede ẹdi akpan n̄kpọ ẹnọ mme asan̄autom Christian ẹkan udomo ifiọkn̄wed ererimbot ekededi. Jehovah, Akwa Ọnọ-Ukpep, anam nnyịn idot ndikwọrọ ikọ. (2 Corinth 3:5, 6) Ndien inamke n̄kpọ m̀mê nso ke ndusụk mme ọkwọrọ ederi Christendom ẹtịn̄, iyomke nnyịn ikpep mme usem eset oro ẹkedade ẹwet Bible man ikabade idi mme andikpep Ikọ Abasi. Jehovah ama ọnọ odudu spirit man ẹda ẹwet Bible ke utọ in̄wan̄-in̄wan̄ usem oro ekperede ndidi kpukpru owo ẹkeme ndifiọk ọsọn̄urua akpanikọ esie. Mme akpanikọ oro ẹsika iso ẹdu idem ke ẹma ẹkekabade enye ẹsịn ke ediwak usem ke mme itie ikie. Ntre, ke adan̄aemi ndifiọk mme usem eset ekemede ndinyene ufọn ke ini ke ini, emi idịghe akpan n̄kpọ. N̄ko-n̄ko, ntan̄idem ke ntak ẹnyenede ukeme ndifiọk usem ekeme ndinam owo ataba edu oro edide akpan n̄kpọ ọnọ ata mme Christian—ndidi se ẹkemede ndinọ ukpep.—1 Timothy 6:4.
19. Ke nso usụn̄ifiọk ke utom ukwọrọikọ Christian nnyịn edi utom edinam n̄kpọ nnọ mbon en̄wen?
19 Eyịghe idụhe nte ke utom ukwọrọikọ Christian nnyịn edi utom oro oyomde nsụhọdeidem. Nnyịn imesiwak ndisobo ubiọn̄ọ, unana udọn̄, ye idem ukọbọ. (John 15:20) Edi, ke ndika iso nnam utom ukwọrọikọ nnyịn ke edinam akpanikọ, nnyịn inam akpan utom. Edieke nnyịn ke nsụhọdeidem ikade iso ndida utom emi nnam n̄kpọ nnọ mbon en̄wen, nnyịn ikpebe ima oro Jesus Christ okowụtde mme owo. Kere: Edieke nnyịn ikpenyenede ndikwọrọ ikọ nnọ tọsịn owo oro ẹnanade udọn̄ m̀mê oro ẹbiọn̄ọde nnyịn man isịm owo mbieterọn̄ kiet, nte oro ikpodotke ye ukeme oro isịnde? Ke akpanikọ okpodot! Ntre ebede ke ndisịn ifịk nnam utom emi, itrede ndikpa mba, nnyịn ke edinam akpanikọ inam n̄kpọ inọ mbon mbieterọn̄ oro nnyịn idisịmde ke ini iso. Eyịghe idụhe nte ke Jehovah ye Jesus ẹyekụt ẹte ke ẹkụt ẹnyụn̄ ẹn̄wam mme utọ ediwak owo oro efen efen emi ẹdide ọsọn̄urua mi mbemiso utịt edide.—Haggai 2:7.
20. Nso idi ndusụk usụn̄ oro nnyịn ikemede ndinọ ukpep ebe ke ndinịm eti uwụtn̄kpọ?
20 Ndinọ ukpep ebe ke ndinịm eti uwụtn̄kpọ edi usụn̄ efen ndiwụt unyịme ndinam n̄kpọ nnọ mbon en̄wen. Ke uwụtn̄kpọ, nnyịn iyom ndikpep mme owo nte ke ndinam n̄kpọ Jehovah, kpa “Abasi inemesịt,” edi usụn̄ uwem oro ọfọnde akan onyụn̄ etịmde ọnọ uyụhọ. (1 Timothy 1:11, NW) Nte mmọ ẹkụtde edu uwem nnyịn ye nte nnyịn inamde n̄kpọ ye mme mbọhọidụn̄, mme nsan̄a ufọkn̄wed, ye mme nsan̄autom nnyịn, nte mmọ ẹkeme ndikụt ke nnyịn imokop inemesịt ye uyụhọ? Kpasụk ntre, nnyịn ikpep nditọ ukpepn̄kpọ Bible nte ke esop Christian edi ebiet oro ima odude ke ibak ibak anana-mbọm ererimbot emi. Nte nditọ ukpepn̄kpọ nnyịn ẹkeme ndisọsọp n̄kụt ke nnyịn imama kpukpru owo ke esop inyụn̄ in̄wana ndidu ke emem ye kiet eken?—1 Peter 4:8.
21, 22. (a) Ndidụn̄ọde idem nnyịn ke se iban̄ade utom ukwọrọikọ nnyịn edida esịm nnyịn ndida mme ewe ifet nnam n̄kpọ? (b) Nso ke ẹdineme ke mme ibuotikọ nsiondi Enyọn̄-Ukpeme efen?
21 Ke ndusụk idaha, edu unyịmesịt oro inyenede iban̄a utom ukwọrọikọ nnyịn ekeme ndinụk nnyịn ndifiak ndụn̄ọde idem nnyịn. Ke ẹnamde oro ke ofụri esịt, ediwak owo ẹsikụt nte ke imekeme nditat utom ukwọrọikọ mmimọ ebe ke ndinam utom ukwọrọikọ uyọhọ ini m̀mê ndiwọrọ n̄kanam utom ke ebiet oro udọn̄ okponde akan. Mbon en̄wen ẹmekpep usem esenidụt man ẹn̄wam mme owo emi ibat mmọ ọkọride-kọri emi ẹwọrọde ẹdidụn̄ ke obio emana mmọ. Edieke mme utọ ifet emi ẹbererede ẹnọ fi, tịm kere nyụn̄ bọn̄ akam ban̄a mmọ. Uwem oro ẹyakde ẹsịn ke ndinam n̄kpọ nnọ mbon en̄wen esida akwa idatesịt, uyụhọ, ye ifụre ekikere edi.—Ecclesiastes 5:12.
22 Ke usụn̄ ekededi, ẹyak ika iso ndikpebe Jesus Christ ebe ke ndinam ima oro imade akpanikọ oro ikpepde mme owo ye ima oro imade mbon oro inọde ukpep, ọkọri. Ndikọri nnyụn̄ n̄wụt ima ke usụn̄ iba emi ayan̄wam nnyịn ndisịn eti itiat idakisọn̄ nnọ edidi mme andikpep ẹbietde Christ. Nte ededi, didie ke nnyịn ikeme ndibọp ndori ke itiat idakisọn̄ oro? Ke nsiondi Enyọn̄-Ukpeme efen, udịm udịm ibuotikọ ẹyeneme ndusụk ke otu akpan usụn̄ unọ ukpep oro Jesus ekesikamade.
[Ikọ idakisọn̄]
a Mme Ntiense Jehovah ẹsio.
Didie ke Afo Ọkpọbọrọ?
• Nso nsọn̄ọ ke nnyịn inyene nte ke uwụtn̄kpọ oro Jesus ekenịmde nte andikpep isọn̄ke ikaha nnyịn ndikpebe?
• Didie ke nnyịn ikeme ndiwụt ke imama akpanikọ oro nnyịn ikpepde ito Bible?
• Ntak edide akpan n̄kpọ ndika iso nsụhọdeidem nte nnyịn ikọride ke ifiọk?
• Nso idi ndusụk usụn̄ emi nnyịn ikemede ndiwụt ke imama mme owo oro nnyịn idomode ndinọ ukpep?
[Mme ndise ke page 16]
Nam se ekemede ndidu ke mben̄eidem
[Mme ndise ke page 17]
Afo emekeme ndida Bible nnam n̄kpọ uforo uforo edieke afo adade “ifiọk Abasi” nte n̄kpọuto
[Ndise ke page 18]
Nnyịn iwụt mme owo ima ke ini ibuanade eti mbụk ye mmọ