Ubonowo Oyom Ifiọk Abasi

“Afo eyetịm ọfiọk uten̄e Jehovah, onyụn̄ osịme ifiọk Abasi.”—MME N̄KE 2:5.

1. Ntak ẹkemede ndidọhọ ke esịt owo edi n̄wọrọnda utomusọ Abasi?

N̄KPỌ nte oti owo 5,600,000,000 ke ẹtuak ata idahaemi ke isọn̄. Kpukpru usen, oti fo esituak utịm ike 100,000 onyụn̄ asuan iyịp emi edide n̄kpọ nte lita 7,600 ke ofụri ekwa iyịp idemfo emi ọniọn̄de ke n̄kpọ nte kilomita 100,000. Idụhe osịp efen emi anamde utom ọkpọsọn̄ akan n̄wọrọnda utomusọ Abasi emi.

2. Didie ke afo ekeme ndinam ndamban̄a esịt an̄wan̄a?

² Ndamban̄a esịt 5,600,000,000 n̄ko ke ẹnam utom ke isọn̄. Mme ntụk nnyịn, mme udọn̄ nnyịn, mme uduak nnyịn ẹdu ke ndamban̄a esịt. Enye edi ebiet emi ekikere nnyịn, ifiọk nnyịn, ye uduak nnyịn ẹtode. Ndamban̄a esịt ekeme nditan̄ idem m̀mê osụhọde idem, etie mfụhọ mfụhọ m̀mê idara idara, odu ke ekịm m̀mê ke un̄wana.—Nehemiah 2:2; Mme N̄ke 16:5; Matthew 11:29; Utom 14:17; 2 Corinth 4:6; Ephesus 1:16-18.

3, 4. Didie ke ẹda eti mbụk ẹsịm esịt?

³ Jehovah Abasi ekeme ndikot esịt owo. Mme N̄ke 17:3 ọdọhọ ete: “Eso-atara edi eke silver, furnace onyụn̄ edi eke gold: edi Jehovah odomo esịt owo.” Nte ededi, utu ke ikpîkpu edikot esịt kiet kiet nnyụn̄ nnọ ubiereikpe, Jehovah ke ada Mme Ntiense esie ndinam eti mbụk osịm esịt mme owo. Emi odu ke n̄kemuyo ye mme ikọ apostle Paul ẹmi: “Owo ekededi eke edisemede okot enyịn̄ Jehovah eyebọhọ. Edi mmọ ẹdinam didie ẹseme ẹkot Enyeemi mmọ mîkọbuọtke idem ye Enye? Mmọ ẹdinyụn̄ ẹnam didie ẹbuọt idem ye Enye emi mmọ mîkokopke iban̄a? Mmọ ẹdinyụn̄ ẹnam didie ẹkop, ke ọkwọrọikọ mîdụhe? Mmọ ẹdinyụn̄ ẹnam didie ẹkwọrọ, ke mîbọhọke ẹdọdọn̄ mmọ? Kpa nte ẹwetde ẹte, Ikpat mmọ ẹmi ẹdade etop nti n̄kpọ ẹye adan̄a didie!”—Rome 10:13-15.

⁴ Enem Jehovah esịt ndinọ Mme Ntiense esie ẹka ofụri ikpehe isọn̄ man “[ẹketan̄a] etop nti n̄kpọ” ẹnyụn̄ ẹyom mbon eti esịt. Nnyịn idahaemi imawak ibe owo 5,000,000—mbahade Ntiense 1 ke n̄kpọ nte owo 1,200 ẹmi ẹdude ke isọn̄. Ndida eti mbụk nsịm ediwak biliọn owo ẹmi ẹdude ke isọn̄ idịghe mmemmem n̄kpọ. Edi Abasi ke ọnọ ndausụn̄ ke utom emi ebe ke Jesus Christ ke onyụn̄ odụri mbon esịt akpanikọ ada. Ntem, prọfesi emi ẹwetde ke Isaiah 60:22 ke osu: “Ekpri eyekabade edi tọsịn, esisịt eyenyụn̄ akabade edi ọkpọsọn̄ idụt: ami Jehovah nyenam enye awara ke ekem ini esie.”

5. Nso idi ifiọk, ndien nso ke ẹkeme nditịn̄ mban̄a ọniọn̄ ererimbot?

⁵ Ini oro edi emi, ndien n̄kpọ kiet ana in̄wan̄în̄wan̄—ediwak biliọn owo ke isọn̄ ẹyom ifiọk. Akpa kan̄a, ifiọk edi edimehe ye mme akpanikọ ẹmi ẹnyenede ẹto ifiọk n̄kpọntịbe, ndụn̄ọde, m̀mê ukpepn̄kpọ. Ererimbot ọmọkọ ekese ifiọk. Ẹmenam n̄kọri ke mme utọ afan̄ nte ndutịm n̄kpọ ukaisan̄, edise mban̄a nsọn̄idem, ye mme usụn̄ unyene nneme. Edi ndi ifiọk ererimbot ke ubonowo enen̄ede oyom? N̄wan̄ansa-o! Ekọn̄, ufịk, udọn̄ọ, ye n̄kpa ẹkaiso ndinọmọ ubonowo. Ọniọn̄ ererimbot esiwak ndidi se owo mîkemeke ndiberi edem.

6. Ke se iban̄ade iyịp, didie ke ẹmen ifiọk Abasi ẹdomo ye ọniọn̄ ererimbot?

⁶ Ke ndinam an̄wan̄a: Ke isua ikie iba ẹmi ẹkebede, ekesidi ido ndisio owo iyịp ke idem ke se ẹkedọhọde nte edide usọbọ. Ẹma ẹsio George Washington, akpa adaibuot ukara United States, iyịp ndien ndien ke mme akpatre hour uwem esie. Ke idaha kiet enye ama ọdọhọ ete: “Ẹyak mi n̄kpa ke ifụre; n̄kemeke ndidu uwem mbịghi.” Enye ama enen, koro enye akakpa kpa ke usen oro—December 14, 1799. Utu ke ndisio owo iyịp ke idem, mfịn ẹdori nsọn̄uyo ke edikịm iyịp nsịn owo ke idem. Usụn̄ edinam mbiba ẹmi ẹyọhọ ye mme mfịna ẹkamade n̄kpa. Nte ededi, ke ofụri ini emi, Ikọ Abasi ama ọdọhọ ete: “Ẹbet . . . iyịp.” (Utom 15:29) Ifiọk Abasi enenen kpukpru ini, edi se ẹkemede ndiberi edem, ekem ye idahaemi.

7. Didie ke ẹmen nnennen ifiọk N̄wed Abasi ẹdomo ye ọniọn̄ ererimbot ke se iban̄ade edinọ eyen ukpep?

⁷ Kere ban̄a uwụtn̄kpọ efen aban̄ade ọniọn̄ ererimbot oro owo mîkemeke ndiberi edem. Ke ediwak isua mme ekpepn̄kpọ mban̄a ekikere ẹmesịn udọn̄ ẹnọ edibọk nditọ ye unana ukpan, edi kiet ke otu mbon oro ẹsịnde udọn̄ ẹnọ utọ usụn̄uwem emi ama onyịme ke ukperedem ete ke emi ekedi ndudue. N̄ka Mme Ekpepn̄kpọ Mban̄a N̄wed ke Germany ama onyịme ini kiet ete ke unana ukpan “ke nsụhọde n̄kaha edi ntak mfịna ẹmi nnyịn inyenede kemi ye n̄kparawa owo.” Ọniọn̄ ererimbot emi ekeme ndidi akaiso afiak edem nte n̄kpọ eke ofụm eberide, edi nnennen ifiọk N̄wed Abasi isehekede. Bible ọnọ item oro adade ukem ukem kaban̄a edinọ eyen ukpep. Mme N̄ke 29:17 ọdọhọ ete: “Tụnọ eyen fo, ndien enye eyenọ fi nduọk-odudu, onyụn̄ adat fi esịt.” Ẹnyene ndinọ utọ ntụnọ oro ke ima, koro Paul ekewet ete: “Mme ete, ẹkûfiomo nditọ mbufo; edi ẹkama mmọ ke ntụnọ ye item Ọbọn̄.”—Ephesus 6:4.

“Ifiọk Abasi”

8, 9. Didie ke afo akpanam se Mme N̄ke 2:1-6 etịn̄de aban̄a ifiọk oro ubonowo enen̄erede oyom an̄wan̄a?

⁸ Okposụkedi Paul ekedide ọfiọkn̄wed owo, enye ama ọdọhọ ete: “Edieke owo mbufo ekededi esede idem ke enyene-ibuot owo ke eyo emi, yak enye akabade edi ndisịme, man enye ọfiọk n̄kpọ. Koro ifiọk ererimbot emi edi ndisịme ke iso Abasi.” (1 Corinth 3:18, 19) Abasi ikpọn̄îkpọn̄ ekeme ndinọ ifiọk oro ubonowo enen̄erede oyom. Kaban̄a emi, Mme N̄ke 2:1-6 ọdọhọ ete: “Eyen mi, afo ama ọbọ ikọ mi, onyụn̄ onịm mbet mi ke idem fo; onyụn̄ akpan̄ utọn̄ fo ke eti ibuot, onyụn̄ esịn esịt fo ke mbufiọk; ama ofiori okot asian, emenede uyo fo ọnọ mbufiọk; ama oyom enye nte silver, onyụn̄ odụn̄ọde enye nte n̄kpọ-uto eke edịbede; ndien afo eyetịm ọfiọk uten̄e Jehovah, onyụn̄ osịme ifiọk Abasi. Koro Jehovah enyene eti ibuot; ifiọk ye mbufiọk ẹto enye ke inua.”

⁹ Mbon oro eti esịt onụkde ẹkpan̄ utọn̄ ke ọniọn̄ ebe ke ndida ifiọk emi Abasi ọnọde nnam n̄kpọ ke eti usụn̄. Mmọ ẹsịn esịt ke mbufiọk, ẹnen̄ede ẹdomo mme akpanikọ oro mmọ ẹkpepde. Ke nditịm ntịn̄, mmọ ẹfiori ẹkot asian, m̀mê ukeme ndikụt nte mme ikpehe ibuot nneme ẹnyenede ebuana ye kiet eken. Mbon oro ẹnyenede eti esịt ẹsịn idem nte n̄kpọ eke ẹdọkde ẹyom silver ẹnyụn̄ ẹdụn̄ọrede ẹyom mme n̄kpọuto eke ẹdịbede. Nso akwa n̄kpọuto ke mbon oro ẹnyenede eti esịt ẹkụt? Edi “ifiọk Abasi.” Nso ke oro edi? Ke nditịn̄ ke mmemmem usụn̄, enye edi ifiọk emi odude ke Ikọ Abasi, kpa Bible.

10. Nso ke ana nnyịn inam man inyene nsọn̄idem eke spirit?

¹⁰ Ifiọk Abasi ọfọn, enyene iwụk, ọnọ uwem. Enye esịn udọn̄ ọnọ nsọn̄idem eke spirit. Paul akakpak Timothy ete: ‘Mụm ido nti ikọ eke okokopde mi ke inua kama tutu osịm usen oro nte item uwem fo, ke mbuọtidem ye ima eke odude ke Christ Jesus.’ (2 Timothy 1:13) Usem enyene ido nte ẹbonde ikọ. Ukem ntre, “edisana usem” eke akpanikọ N̄wed Abasi enyene “ido nti ikọ,” ọkọn̄ọde akpan akpan ke ibuotikọ Bible aban̄ade ediwụt unen itie edikara Jehovah ebe ke Obio Ubọn̄. (Zephaniah 3:9) Ana nnyịn inyene ido nti ikọ emi ke esịt ye ekikere. Edieke iyomde ndifep udọn̄ọ ndamban̄a esịt nnyụn̄ ndu ke nsọn̄idem ke n̄kan̄ eke spirit, ana nnyịn ida Bible isịn ke edinam ke uwem inyụn̄ ida mme ndutịm eke spirit emi Abasi anamde ebe ke “asan̄autom emi anamde akpanikọ, onyụn̄ enyenede ọniọn̄,” inam n̄kpọ ọyọhọ ọyọhọ. (Matthew 24:45-47; Titus 2:2) Ẹyak nnyịn iti kpukpru ini ite ke man inyene nsọn̄idem eke spirit, nnyịn imoyom ifiọk Abasi.

11. Nso idi ndusụk ntak oro anamde ubonowo oyom ifiọk Abasi?

¹¹ Kere ban̄a ntak efen emi ediwak biliọn owo ke isọn̄ ẹyomde ifiọk Abasi. Ndi kpukpru mmọ ẹfiọk nte isọn̄ ye mme owo ẹkesan̄ade ẹdidu? Baba, mmọ ifiọkke. Ndi ofụri ubonowo ọfiọk ata Abasi ye Eyen esie? Nte kpukpru owo ẹnyene ifiọk ẹban̄a eneni oro Satan ekedemerede aban̄a itie edikara Abasi ye nsọn̄ọnda owo? Ibọrọ osụk edi baba. Ndi mme owo ke ofụri ofụri ẹfiọk ntak emi nnyịn ikọride isọn̄ inyụn̄ ikpade? Ini kiet efen nnyịn inyene ndidọhọ baba. Ndi kpukpru mme andidụn̄ isọn̄ ẹfiọk ẹte ke Obio Ubọn̄ Abasi ke akara idahaemi ye nte ke nnyịn idu uwem ke ukperedem ini? Nte mmọ ẹnyene ifiọk ẹban̄a udịm mme idiọk spirit? Ndi kpukpru owo ẹnyene ifiọk oro ẹkemede ndiberi edem kaban̄a nte ẹkemede ndinyene uwem ubon oro enyenede inemesịt? Ndien nte mme owo ẹfiọk ẹte ke idara idara uwem ke Paradise edi uduak Andibot nnyịn kaban̄a okopitem ubonowo? Kaban̄a mbụme ẹmi n̄ko ibọrọ ẹdi baba. Nte an̄wan̄ade, ndien, ubonowo oyom ifiọk Abasi.

12. Didie ke nnyịn ikeme ndituak ibuot nnọ Abasi “ke spirit ye ke akpanikọ”?

¹² Ubonowo n̄ko oyom ifiọk Abasi ke ntak se Jesus eketịn̄de ke akam esie ke akpatre okoneyo uwem esie eke isọn̄. Enyene ndidi ama enen̄ede otụk mme apostle esie andikokop enye ọdọhọde ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.” (John 17:3) Ndida utọ ifiọk oro nsịn ke edinam edi n̄kukụre usụn̄ ndituak ibuot nnọ Abasi nte ẹnyịmede. Jesus ọkọdọhọ ete: “Abasi edi spirit: ndien mme andituak ibuot nnọ Enye ẹnyene ndituak ibuot ke spirit ye ke akpanikọ.” (John 4:24) Nnyịn ituak ibuot inọ Abasi “ke spirit” ke ini esịt oro ọyọhọde ye mbuọtidem ye ima onụkde nnyịn. Didie ke nnyịn ituak ibuot inọ enye “ke akpanikọ”? Ebe ke ndikpep Ikọ esie nnyụn̄ ntuak ibuot nnọ enye nte ekemde ye akpanikọ esie oro ẹyararede—kpa “ifiọk Abasi.”

13. N̄kpọntịbe ewe ke ẹwet ke Utom 16:25-34, ndien nso ke ikeme ndikpep nto oro?

¹³ Ediwak tọsịn owo ẹsitọn̄ọ ndituak ibuot nnọ Jehovah kpukpru isua. Edi, nte ana nnyịn inịm ukpepn̄kpọ Bible ye mbon oro ẹnyenede udọn̄ ke anyanini, mîdịghe nte mbon esịt akpanikọ ẹkeme ndisịm idaha edina baptism usọp usọp? Ọfọn, kere ban̄a se ikotịbede ke se iban̄ade ekpeme ufọk-n̄kpọkọbi ye mbonufọk esie oro ẹtịn̄de ke Utom 16:25-34. Ẹkesịn Paul ye Silas ke ufọk-n̄kpọkọbi ke Philippi, edi ke ufọt okoneyo, akwa unyekisọn̄ ama eberede usụn̄ ufọk-n̄kpọkọbi. Ke ekerede ete ke kpukpru mbon n̄kpọkọbi ẹma ẹfen̄e ye nte ke ẹyenọ imọ ọkpọsọn̄ ufen, ekpeme ufọk-n̄kpọkọbi ama oyom ndiwot idem ke ini Paul ọkọdọhọde enye ete ke kpukpru mmimọ mmọmi. Paul ye Silas ẹma “ẹkwọrọ ikọ Ọbọn̄ ẹnọ enye, ye kpukpru mmọ ẹmi ẹdude ke ufọk esie.” Ekpeme ufọk-n̄kpọkọbi oro ye ubon esie ẹkedi mme Gentile oro mîkọfiọkke n̄kpọ iban̄a Edisana N̄wed Abasi. Edi, kpa ke okoneyo oro, mmọ ẹma ẹkabade ẹdi mme andinịm ke akpanikọ. Ke akande oro, “enye ana baptism ye ofụri ufọk esie.” Mmọ oro ẹkedi mme esen esen idaha, edi ẹma ẹkpep mbufa owo mme isọn̄ akpanikọ ndien ekem mmọ ẹma ẹkpep mme n̄kpọ eken ke mme mbonoesop. Ẹkpenyene ndinam n̄kpọ ebietde oro mfịn.

Idọk Okpon!

14. Ntak emi udọn̄ odude kaban̄a edinịm ediwak ibat ukpepn̄kpọ Bible ẹmi ẹnyenede uforo ke esisịt ikpehe ini?

¹⁴ Ọkpọfọn edieke Mme Ntiense Jehovah ẹkemede ndinịm ediwak ibat ukpepn̄kpọ Bible oro ẹnyenede uforo ke esisịt ikpehe ini. Ata udọn̄ odu kaban̄a emi. Ke mme idụt Edem Usiahautịn Europe, ke uwụtn̄kpọ, mme owo ẹnyene ndidu ke udịm mbon oro ẹbetde ukpepn̄kpọ Bible. Edi ukem oro n̄ko ke ebiet efen. Ke obio kiet ke Dominican Republic, Ntiense ition ẹma ẹnyene ata ediwak ikot tutu mmọ ikekemeke ndinịm ofụri ukpepn̄kpọ oro. Nso ke mmọ ẹkenam? Mmọ ẹma ẹsịn udọn̄ ẹnọ mbon oro ẹnyenede udọn̄ mi ndisidụk mme mbonoesop ke Ufọkmbono Obio Ubọn̄ nnyụn̄ ndu ke udịm mbon oro ẹbetde ukpepn̄kpọ Bible. Ukem idaha oro odu ke ediwak itie ke ofụri ererimbot.

15, 16. Nso ke ẹnọ man ẹsuan ifiọk Abasi usọp usọp ẹkan, ndien nso idi ndusụk akpanikọ aban̄ade enye?

¹⁵ Mme ntatara efakutom—ikpọ in̄wan̄ ndidọk idọk—ke ẹberede ẹnọ ikọt Abasi. Okposụkedi edide Jehovah, “Enyene-idọk,” ke osio mbonutom efen efen edi, ekese utom osụk odudu ndinam. (Matthew 9:37, 38) Man ẹsuan ifiọk Abasi ata usọp usọp, ke ntre, “asan̄autom emi anamde akpanikọ” ọmọnọ n̄kpọ oro ọnọde san̄asan̄a ntọt ke ibio ibio usụn̄ man nditọ ukpepn̄kpọ Bible ẹnam n̄kọri eke spirit ke ukpepn̄kpọ kiet kiet. Enye edi obufa n̄wed oro ẹkemede ndikụre ke ukpepn̄kpọ Bible usọp usọp—iso-ọfọn ke ọfiọn̄ ifan̄. Ndien imekeme ndikama enye mmemmem mmemmem ke ekpatisan̄ nnyịn, ekpatokụk nnyịn, m̀mê idem ke ekpatọfọn̄ nnyịn! Ediwak tọsịn owo ke mme itie ikie oro ẹkesopde idem ke Mme Mbono District “Idara Idara Mme Anditoro” eke Mme Ntiense Jehovah ẹma ẹkop inemesịt ndibọ obufa n̄wed oro enyenede page 192 emi ẹkotde Ifiọk Oro Adade Osịm Nsinsi Uwem.

¹⁶ Mme ewetn̄wed ke nsio nsio idụt ẹkewet n̄kpọ ẹmi ẹketịmde ye ntịn̄enyịn ke akpatre ẹdọn̄ ke n̄wed Ifiọk. Enye ke ntre ekpenyene ndidemede udọn̄ mme owo ke ofụri ererimbot. Edi nte eyebịghi mbemiso ẹsiode obufa n̄wed emi ke usem emana mme owo ke ofụri ererimbot? Baba, koro ẹkeme ndisọp n̄kabade n̄wed emi enyenede page 192 n̄kan ikpọ n̄wed. Etisịm October 1995, Kọmiti Uwetn̄wed eke Otu Ukara ama ọnọ unyịme ete ẹkabade n̄wed emi ke Ikọmbakara ẹsịn ke se ibede usem 130.

17. Mme n̄kpọ ewe ẹkpenam edi mmemmem n̄kpọ ndida n̄wed Ifiọk nnam n̄kpọ?

¹⁷ Mme akpan n̄kpọ ke ibuot kiet kiet ke n̄wed Ifiọk ẹkpenyene ndinam nditọ ukpepn̄kpọ ẹsọp ẹnam eti n̄kọri eke spirit. N̄wed emi eneme mme akpanikọ N̄wed Abasi ke usụn̄ oro ọbọpde-bọp. Enye iwụkke ntịn̄enyịn ke mme nsunsu ukpepn̄kpọ. In̄wan̄în̄wan̄ usem ye nte ẹnemede n̄kpọ ke usụn̄ esịnede ifiọk ekpenyene ndinam edi mmemmem n̄kpọ ndida n̄wed emi nnịm mme ukpepn̄kpọ Bible nnyụn̄ n̄n̄wam mme owo ẹnyene ifiọk Abasi. Ke adianade ye mme itien̄wed oro ẹkotde-kot ẹsịn, odu mme itien̄wed Bible oro ẹsiakde-siak ẹsịn emi eyen ukpepn̄kpọ ekemede ndikot ke otịmde idem ọnọ nneme. Ẹkeme ndikot mmọemi ke ini ukpepn̄kpọ nte ini ayakde, okposụkedi mîdiwụtke eti ibuot ndida mme n̄kpọ efen efen ndisịn ẹmi ẹkemede ndifụk mme akpan n̄kpọ. Utu ke oro, mbon oro ẹnịmde ukpepn̄kpọ Bible ẹkpenyene ndisịn ukeme ndifiọk nnyụn̄ ntịn̄ se n̄wed oro ọsọn̄ọde ke ibuot kiet kiet nnọ eyen ukpepn̄kpọ. Emi ọwọrọ ete ke ana andikpep ebemiso ekpep n̄wed emi ye ntịn̄enyịn man enyene mme akpan n̄kpọ in̄wan̄în̄wan̄ ke ekikere esie.

18. Nso ekikere ke ẹnọ kaban̄a edikama n̄wed Ifiọk nnam n̄kpọ?

¹⁸ Didie ke n̄wed Ifiọk Oro Adade Osịm Nsinsi Uwem ekeme ndinam utom edinam mbet awara? Ẹkeme ndikpep n̄wed oro enyenede page 192 mi ke esisịt ikpehe ini ke ẹmende ẹdomo, ndien mbon oro “ẹkenịmde ẹnọ nsinsi uwem” ẹkpenyene ndikeme ndikpep n̄kpọ oro ẹkemde ebe ke ndikpep enye man ẹnam uyakidem ẹnọ Jehovah ẹnyụn̄ ẹna baptism. (Utom 13:48) Ntre ẹyak nnyịn ida n̄wed Ifiọk inam n̄kpọ nte ọfọnde ke utom ukwọrọikọ. Edieke edide eyen ukpepn̄kpọ Bible akaka anyan ke ndikpep n̄wed efen, ọkpọfọn ndikụre enye. Ke ẹsiode oro ẹfep, ẹnọ ekikere nte yak ẹkpụhọde ẹkama n̄wed Ifiọk ke mme ukpepn̄kpọ Bible. Ke ẹma ẹkekụre obufa n̄wed emi, owo inọhọ ekikere ite yak ẹnịm ukpepn̄kpọ ye eyen ukpepn̄kpọ emi ke ọyọhọ n̄wed iba. Mbon oro ẹbọde akpanikọ ẹkeme ndinam ifiọk mmọ ọyọhọ ke ndidụk mme mbonoesop eke Mme Ntiense Jehovah ọkọrọ ye edikot Bible ye nsio nsio n̄wed Christian ke idemmọ.—2 John 1.

19. Mbemiso ẹnịmde ukpepn̄kpọ Bible ke n̄wed Ifiọk, ntak ekpedide n̄kpọ oro ọnọde un̄wam ndidụn̄ọde page 175 osịm 218 ke Ẹtịm Man Inam Utom Nnyịn Ima?

¹⁹ Ẹkewet n̄wed Ifiọk ye uduak edin̄wam owo ndibọrọ kpukpru mbụme oro mbiowo ẹsidụn̄ọrede ye mme asuanetop oro mînaha baptism edi oro ẹyomde ndina baptism nte Mme Ntiense Jehovah. Ntem, mbemiso afo okpụhọde akama obufa n̄wed emi ke mme ukpepn̄kpọ Bible fo idahaemi, ẹtoro ẹte ada hour ifan̄ odụn̄ọde mme mbụme oro ẹdude ke page 175 osịm 218 ke n̄wed Ẹtịm Man Inam Utom Nnyịn Ima.a Emi eyen̄wam fi ndidori nsọn̄uyo ke mme ibọrọ utọ mbụme oro ke ini ukpepn̄kpọ Bible ke n̄wed Ifiọk.

20. Nso ke afo odiomi ndida n̄wed Ifiọk Oro Adade Osịm Nsinsi Uwem nnam?

²⁰ Mme owo ke kpukpru ebiet ẹkpenyene ndikop eti mbụk. Ih, ubonowo oyom ifiọk Abasi, ndien Jehovah ada Mme Ntiense esie ndinam ẹdiọn̄ọ emi. Idahaemi nnyịn imenyene obufa n̄wed emi ima ima Ete nnyịn eke heaven ọnọde ebe ke asan̄autom emi anamde akpanikọ onyụn̄ enyenede ọniọn̄. Nte afo eyekama enye ndikpep akpanikọ onyụn̄ ada ubọn̄ ọsọk edisana enyịn̄ Jehovah? Jehovah ke akpanikọ eyediọn̄ fi nte afo esịnde ofụri ukeme ndinam ifiọk oro adade osịm nsinsi uwem odu ọnọ ediwak owo.

[Mme Ikọ idakisọn̄]

Didie ke Afo Ọkpọbọrọ?

◻ Didie ke afo akpanam ndamban̄a esịt an̄wan̄a?

◻ Nso idi ifiọk Abasi?

◻ Ntak emi ubonowo oyomde ifiọk Abasi?

◻ Ewe obufa n̄wed odu, ndien didie ke afo odiomi ndida enye nnam n̄kpọ?

[Ndise ke page 11]

Ediwak ntak ẹdu emi anamde ediwak biliọn owo ke isọn̄ ẹyom ifiọk Abasi