² Bible etịn̄ n̄kpọ emi owo mîkemeke ndifan̄a, ete: “Owo eke asan̄ade ye mbon ọniọn̄ eyenyene ọniọn̄, edi ọyọdiọk ye owo eke odụkde nsan̄a ye mme ndisịme.” (Mme N̄ke 13:20) N̄ke emi itịn̄ke iban̄a owo ndisan̄a ye owo ke ini ke ini. Ikọ oro, “asan̄ade ye” owụt ke owo odụk ndụk ye owo.a N̄wed kiet emi etịn̄de n̄kpọ aban̄a Bible etịn̄ n̄kpọ aban̄a ufan̄ikọ emi. Enye ọdọhọ ke “ndisan̄a ye owo owụt ke amama owo oro onyụn̄ adiana ye enye anam n̄kpọ.” Ndi idịghe akpanikọ ke imesiwak ndikpebe mbon emi imade? Imesinen̄ede idian idem ye mbon emi imade, emi ekeme ndinam itiene inam se mmọ ẹnamde​—m̀mê edi eti m̀mê idiọk.