Enen̄ede ọfọn ikpep Bible. Edi imọdiọn̄ọ ke ndikpep Bible idịghe ekpri n̄kpọ. Ndusụk ini emekeme ndikere ke udûkemeke ndika iso n̄kpep Bible. Edi ntak emi ọfọnde anam se ekekeme man aka iso ekpep Bible? Nso idin̄wam fi okûtre ndikpep Bible idem ke ini mîmemke?

1. Ntak emi ọfọnde ekpep Bible?

“Ikọ Abasi enyene uwem onyụn̄ enyene odudu.” (Mme Hebrew 4:12) Bible ayan̄wam fi ọdiọn̄ọ se Abasi aduakde ye adan̄a nte enye amade fi. Bible ayan̄wam fi ọdiọn̄ọ ediwak n̄kpọ, oyonyụn̄ anam fi enyene ọniọn̄ ye idotenyịn. Se ifọnde ikan edi ke Bible ayan̄wam fi enen̄ede ekpere Abasi—edi ufan esie. Nte afo osụk ekpepde Bible, yak Bible an̄wam fi okpụhọde.

2. Ntak emi ọfọnde ọdiọn̄ọ se akpanikọ emi Bible ekpepde ekemede ndinam nnọ fi?

Akpanikọ emi odude ke Bible enen̄ede ọfọn, etie nte n̄kpọuto. Enye esịn Bible ọdọhọ ete, “Dep akpanikọ kûnyụn̄ unyam enye.” (Mme N̄ke 23:23) Edieke idiọn̄ọde adan̄a nte akpanikọ Bible ọfọnde eketre, iyanam se ikekeme man ika iso ikpep Bible, idem ke ini n̄kpọ anamde ọsọn̄ nnyịn ndikpep Bible.—Kot Mme N̄ke 2:4, 5.

3. Nso ke Jehovah edinam man an̄wam fi aka iso ekpep Bible?

Jehovah oyom fi enen̄ede ọdiọn̄ọ imọ, sia enye okobot fi; ti ke enye edi Ufan fo. Enye ekeme ndinọ fi “odudu” ekpep Ikọ esie. (Kot Philippi 4:13.) Ọwọrọ ini ekededi emi idem ememde fi, enye ekeme ndinọ fi odudu ekpep Bible m̀mê anam se ekpepde. Enye onyụn̄ ekeme ndinọ fi odudu ebe idomo ekededi onyụn̄ ọyọ ukọbọ ekededi. Sibọn̄ akam ben̄e Jehovah Abasi ete an̄wam fi aka iso ekpep Bible.—1 Thessalonica 5:17.

SỊN IDEM KPEP

4. Da ndikpep Bible nte ata akpan n̄kpọ

N̄kpọ esiwak ọnọ nnyịn ndusụk usen tutu etie nte ini idụhe se ikpepde Bible. Nso idin̄wam fi ekpetie ntre? Kot Philippi 1:10, ekem ẹbọrọ mbụme emi ẹnyụn̄ ẹneme ẹban̄a mmọ:

• Ekere ke nso ye nso idi “akpan n̄kpọ ikan” ke uwem emi?

• Nso ke akpanam man ndikpep Bible edi akpan n̄kpọ ọnọ fi?

1. Edieke ebemde iso ọdọn̄ ntan ke bọket mbemiso ọdọn̄de ikpọ itiat, bọket oro ididụkke ediwak ikpọ itiat

2. Edieke ebemde iso ọdọn̄ ikpọ itiat mbemiso ọdọn̄de ntan, ediwak ntan oyodụk. Ukem ntre, ekpebem iso anam “se idide akpan n̄kpọ ikan,” ini oyosụhọ se adade anam mme n̄kpọ eken

Ke ini ikpepde Bible, oro owụt ke ‘imokop biọn̄ ye nsatitọn̄ edinen ido’—ke imenen̄ede iyom ndidiọn̄ọ Abasi nnyụn̄ nnam n̄kpọ esie. Kot Matthew 5:6, ekem ẹbọrọ mbụme emi ẹnyụn̄ ẹneme ẹban̄a enye:

• Nso ufọn ke isidia ima ida ndikpep Bible nte akpan n̄kpọ?

5. Ka iso kpep N̄wed Abasi ọkpọkọm ẹkọkọbọ fi

VIDIO: Abasi Ọdiọn̄ Enye ke Se Enye Akanamde (5:22)

• Ke vidio oro, nso ke mme ufan Francesco ye eka esie ẹkenam ke ini enye eketịn̄de se enye ekpepde ọnọ mmọ?

• Nso ikeditịbe ke ntak emi enye mîketreke ndikpep Bible?

Kot 2 Timothy 2:24, 25, ekem ẹbọrọ mbụme emi ẹnyụn̄ ẹneme ẹban̄a mmọ:

• Ndi mbon ubon mbufo ye mme ufan fo ẹma se afo ekpepde ke Bible?

• Itie Bible emi ọdọhọ fi anam n̄kpọ didie edieke mme owo ẹyatde esịt ke ntak emi afo ekpepde Bible? Ntak ọfọnde anam ntre?

6. Yak Jehovah an̄wam fi

VIDIO: Jehovah An̄wam Nnyịn Ikpụhọde (3:56)

• Ke vidio oro, nso ke Jim okokpụhọde ke uwem esie man esịt enem Jehovah?

• Nso ke enen̄ede ama ke mbụk esie?

Kot Mme Hebrew 11:6, ekem ẹbọrọ mbụme emi ẹnyụn̄ ẹneme ẹban̄a mmọ:

• Nso ke Jehovah edinam ọnọ “mbon oro ẹnen̄erede ẹyom enye”—mbon oro ẹnamde se ẹkekeme man ẹnen̄ede ẹdiọn̄ọ enye ẹnyụn̄ ẹnam se inemde enye esịt?

• Ndi itie Bible emi owụt ke esinem Jehovah enye ama okụt nte afo esịnde idem ekpep Bible? Nso inam ọdọhọ ntre?

SE IKPEPDE

Ndikpep Bible idịghe ekpri n̄kpọ. Edi kpa ye oro, ndikpep Bible ekeme ndinam fi odu ata uwem ke nsinsi. Ka iso beri edem ke Jehovah sia enye iditreke ndidiọn̄ fi.

Se M̀mê Emeti

• Nso inam fi enen̄ede ama akpanikọ emi ekpepde ke Bible?

• Nso idin̄wam fi anam “se idide akpan n̄kpọ ikan”?

• Ntak emi anade eben̄e Jehovah ete an̄wam fi aka iso ekpep Bible?

KPEP N̄KPỌ EN̄WEN

Se n̄kpọ inan̄ emi an̄wamde ediwak owo ẹkûbaha ini mmọ.

“Se Akpanamde Man Udûbaha Ini Fo” (g-E 2/14)

Se nte Jehovah akan̄wamde mma kiet emi ebe esie mîkamaha enye anam se enye ekpepde ke Bible.

Jehovah Esin̄wam Nnyịn Iyọ Se Iwọrọde Nnyịn (5:05)

Se ufọn emi ete kiet adiade ke ntak emi n̄wan esie mîketreke ndikpep Bible.

Mma Ndụn̄ọde Akpanikọ Nse (6:30)

Ndusụk owo ẹsidọhọ ke Mme Ntiense Jehovah ẹsisasuan ubon. Ndi akpanikọ?

“Ndi Mme Ntiense Jehovah Ẹsisasuan Ubon M̀mê Ẹsinanam Ẹdiana Kiet?” (Odu ke jw.org)

Kpukpru nnyịn mme owo imenyene se anade ibiere. Ediwak se anade ibiere ebehe nnyịn onyụn̄ ebehe Jehovah. Ke uwụtn̄kpọ, se anade ibiere ekeme ndisịne ebiet ididụn̄de, utọ utom idinamde, ye ndibiere m̀mê iyọdọ ndọ m̀mê ididọhọ. Ikpebiere nnennen n̄kpọ, iyokop inemesịt inyụn̄ inam esịt enem Jehovah.

1. Didie ke Bible ekeme ndin̄wam fi esibiere n̄kpọ ọfọn?

Mbemiso ebierede n̄kpọ, bọn̄ akam nọ Jehovah nyụn̄ dụn̄ọde Bible se m̀mê Jehovah ada didie se oyomde ndibiere oro. (Kot Mme N̄ke 2:3-6.) Ndusụk ini Jehovah esitịn̄ se enye oyomde nnyịn inam. Ama edi ntre, enen̄ede ọfọn ibiere ndinam se enye ọdọhọde.

Edi idinam didie ke n̄kpọ emi Bible mîdọhọke nam emi m̀mê nam oko? Jehovah edisụk inwan̄wam fi ọdiọn̄ọ “usụn̄ emi afo akpasan̄ade.” (Isaiah 48:17) Didie? Bible ọdọn̄ọ item emi ekemede ndin̄wam fi. Item Bible edi mme n̄kpọ emi Bible etịn̄de, emi esin̄wamde nnyịn idiọn̄ọ nte Jehovah adade nsio nsio n̄kpọ ye se enye ekerede aban̄a mmọ. Ediwak ini, mbụk emi ikotde ke Bible esin̄wam nnyịn idiọn̄ọ nte Abasi adade ndusụk n̄kpọ. Ima idiọn̄ọ se Jehovah amade, iyekeme ndibiere ndinam se idinemde enye esịt.

2. Nso ye nso ke ikpanam mbemiso ibierede n̄kpọ?

Bible ọdọhọ ete: “Owo mbufiọk ekere ikpatisan̄ esie.” (Mme N̄ke 14:15) Ọwọrọ ọfọn isinen̄ede ikere kan̄a mbemiso ibierede se iyomde ndinam. Ke ini osụk ekerede aban̄a se oyomde ndinam, bụp idemfo ete: ‘Nso ye nso ke Bible ikeme ndin̄wam mi ke n̄kpọ emi? Ewe ke otu se n̄kerede ndinam emi ke esịt mîdifịnake mi n̄kpanam? Ndi se nyomde ndinam emi ayafịna mbon en̄wen? Ndien ata akpan mbụme kiet edi, ndi se nyomde ndinam emi eyenem Jehovah esịt?’​—Deuteronomy 32:29.

Jehovah odot ndibiere nnọ nnyịn se ikpadade nte eti n̄kpọ ye se ikpadade nte idiọkn̄kpọ. Isikpep esịt nnyịn ndibiere n̄kpọ ọfọn ke ini ikpepde ibet Abasi ye item Bible, inyụn̄ ibierede ndisinam mmọ. Esịt esidọhọ nnyịn se ifọnde ye se idiọkde. (Rome 2:14, 15) Ikpekpep esịt nnyịn n̄kpọ enen̄ede ọfọn, iyekeme ndisibiere n̄kpọ ọfọn.

SỊN IDEM KPEP

3. Yak Bible an̄wam fi

VIDIO: Yak Ikọ Abasi Ada Fi Usụn̄ (5:54)

• Nso ke Jehovah ayak nnyịn inam?

• Nso inam Jehovah ọnọ nnyịn odudu ndisibiere n̄kpọ ke idem nnyịn?

• Nso ke Jehovah ọnọ nnyịn man an̄wam nnyịn ikeme ndibiere n̄kpọ ọfọn?

Kot Ephesus 5:​15, 16 man okụt uwụtn̄kpọ item Bible. Ekem ẹneme nte afo ekemede “ndidep ifet nnọ idemfo” man . . .

• esikot Bible kpukpru usen.

• esikpep se idin̄wamde fi edi eti ebe, eti n̄wan, eti ete, eti eka m̀mê eti eyen.

• esidụk mboho ikọ Abasi nnyịn.

4. Kpep esịt fo ndibiere n̄kpọ ọfọn

VIDIO: “Sinam Se Esịt Mîdifịnake Fi” (5:13)

• Ke vidio oro, nso ye nso ke sista oro akanam man esịt esie an̄wam enye ebiere se Jehovah amade?

Ntak emi nnyịn mîkpọdọhọke owo ọdọhọ nnyịn se ikpanamde, ke n̄kpọ emi anade ibiere ke idem nnyịn? Kot Mme Hebrew 5:​14, ekem ẹbọrọ mbụme emi ẹnyụn̄ ẹneme ẹban̄a mmọ:

• Kpa ye oro etiede nte ndidọhọ owo ọdọhọ nnyịn se ikpanamde eyefere nnyịn utom, nso ye nso ke ana idiọn̄ọ?

• Nso ye nso ikeme ndin̄wam fi enyene eti esịt emi edin̄wamde fi esibiere n̄kpọ ọfọn?

5. Kûsunam se idifịnade mbon en̄wen

Mme owo ẹsibiere n̄kpọ nsio nsio. Nso ke ikpanam man nnyịn idinam se idifịnade mbon en̄wen? Se uwụtn̄kpọ iba emi ise:

Akpa uwụtn̄kpọ: Sista emi esimade ndisịne ọfọn̄ukot n̄ka n̄kpọ edi esop emi ediwak sista mîsimaha n̄wan esịne ọfọn̄ukot.

Kot Rome 15:1 ye 1 Corinth 10:​23, 24, ekem ẹbọrọ mbụme emi ẹnyụn̄ ẹneme ẹban̄a mmọ:

• Itie Bible iba oro owụt ke nso ke sista oro ekeme ndinam? Nso ke afo edinam okpodu ye owo emi esịt esie mîyakke enye anam se esịt fo ayakke fi anam?

Ọyọhọ uwụtn̄kpọ iba: Brọda kiet ọdiọn̄ọ ke Bible ikpanke owo ndin̄wọn̄ mmịn emi ekemede ndinam owo, edi enye ebiere ke imọ idisin̄wọn̄ke utọ mmịn oro. Ekem ẹkot enye edi ekpri usọrọ, m̀mê mboho, ndien ke itie oro enye okụt nditọete ẹn̄wọn̄de utọ mmịn oro.

Kot Ecclesiastes 7:16 ye Rome 14:​1, 10, ekem ẹbọrọ mbụme emi ẹnyụn̄ ẹneme ẹban̄a mmọ:

• Itie Bible iba oro owụt ke nso ke brọda oro ekeme ndinam? Nso ke afo edinam okpodu ye owo emi esịt esie ayakde enye anam se esịt fo mîyakke fi anam?

Nso ye nso isin̄wam owo ebiere n̄kpọ ọfọn?

1. Ben̄e Jehovah an̄wam fi ebiere se edinamde.​—James 1:5.

2. Dụn̄ọde Bible, nyụn̄ se vidio ye mme n̄wed ikọ Abasi emi ẹtịn̄de n̄kpọ ẹban̄a se afo oyomde ndinam oro. Emekeme n̄ko ndineme ye owo emi enen̄erede ama Jehovah.

3. Kere se n̄kpọ oro edidade idi, m̀mê n̄kpọ oro ayanam esịt afịna fi ke ye mbon en̄wen.

SE IKPEPDE

Iyekeme ndibiere n̄kpọ ọfọn ikpoyom usụn̄ idiọn̄ọ nte Jehovah adade se iyomde ndinam, inyụn̄ idiọn̄ọde m̀mê ise iyomde ndinam oro edin̄wan̄wam mbon en̄wen m̀mê edifafịna mmọ.

Se M̀mê Emeti

• Nso ye nso idin̄wam fi esibiere n̄kpọ ọfọn ke enyịn Jehovah?

• Nso ke akpanam man ekpep esịt fo ndibiere n̄kpọ ọfọn?

• Nso ke akpanam man owụt ke uyomke ndinam se idifịnade mbon en̄wen?

KPEP N̄KPỌ EN̄WEN

Didie ke ekeme ndibiere se idinamde fi enen̄ede ọbuọt idem ye Abasi?

“Nam Mme Ubiere Oro Ẹnọde Abasi Ukpono” (Enyọn̄-Ukpeme, April 15, 2011)

Nen̄ede diọn̄ọ nsio nsio usụn̄ oro Jehovah esidade ọnọ nnyịn item.

Jehovah Esida Ikọt Esie Usụn̄ (9:50)

Se se ikan̄wamde ete kiet ebiere n̄kpọ emi ọkọsọn̄de enye ndibiere.

Jehovah Ọyọnọ Nnyịn Kpukpru Nti N̄kpọ (5:46)

Kpep nsio nsio n̄kpọ en̄wen emi edin̄wamde fi anam se Jehovah amade ke ini oyomde ndinam n̄kpọ emi Bible mîtịn̄ke se anade anam.

“Nte Afo Kpukpru Ini Emesiyom Ewụhọ Bible?” (Enyọn̄-Ukpeme, December 1, 2003)