Ntak Ọfọnde Ndidiọn̄ọ ke Abasi Odu
Ntak emi ọfọnde ndidiọn̄ọ m̀mê Abasi odu? Edieke se okụtde anamde enịm ke Abasi odu, ọkpọfọn oyom usụn̄ ọdiọn̄ọ mme n̄kpọ oro ẹwụtde ke enye akanam ẹwet Bible. Ndien edieke enịmde se Bible etịn̄de, ayadia mme ufọn oro idisiakde mi.
Uwem eyenen̄ede enem fi
SE BIBLE ỌDỌHỌDE: ‘Abasi ọfọn ido, ọnọ mbufo edịm emi otode enyọn̄ ye ini eduek, ọnọ mbufo udia barasuene onyụn̄ anam esịt mbufo ọyọhọ ye idatesịt.’—Utom 14:17.
NSO KE EMI ỌWỌRỌ? Kpukpru n̄kpọ emi ẹdude ke isọn̄ ẹdi enọ Abasi. Afo eyenen̄ede ama mme enọ emi edieke ọdiọn̄ọde ke Abasi emi ọnọde nnyịn mme n̄kpọ emi enen̄ede ama fi.
Oyokụt nti item emi ẹdin̄wamde fi
SE BIBLE ỌDỌHỌDE: “Afo ọyọfiọk edinen ido ye edinen ikpe ye se inende, kpa ofụri se ifọnde.”—Mme N̄ke 2:9.
NSO KE EMI ỌWỌRỌ? Sia edide Abasi okobot nnyịn, enye ọdiọn̄ọ se ikemede ndinam nnyịn ikop inemesịt. Edieke okotde Bible, oyokụt ediwak n̄kpọ emi edin̄wamde fi.
Eyenyene ibọrọ mbụme fo
SE BIBLE ỌDỌHỌDE: ‘Afo oyokụt ifiọk Abasi.’—Mme N̄ke 2:5.
NSO KE EMI ỌWỌRỌ? Edieke ọdiọn̄ọde ke Abasi odu, oro ayanam enyene ibọrọ utọ mbụme nte: Ntak emi idude uwem? Ntak emi mme owo ẹbọde ufen ntem? Nso isitịbe owo ama akpa? Bible ọbọrọ mme mbụme emi ke usụn̄ emi afo edimade.
Eyenyene idotenyịn
SE BIBLE ỌDỌHỌDE: “‘Ami mmọfiọk ekikere oro ami n̄kerede mban̄a mbufo,’ uyo Jehovah edi emi, ‘ekikere emem, idịghe eke afanikọn̄, man nnọ mbufo ini iso ye idotenyịn.’”—Jeremiah 29:11.
NSO KE EMI ỌWỌRỌ? Abasi ọdọhọ ke iyanam idiọkn̄kpọ, ufen, ye n̄kpa ẹtre ke ini iso. Edieke enịmde ke Abasi ayanam se enye ọn̄wọn̄ọde emi, oro ayanam ekeme ndiyọ mme mfịna oro enyenede idahaemi.