Ibuot 1
Afo Emekeme Ndinyene Inem Inem Ini Iso!
1, 2. Nso ke Andibot fi oyom fi enyene?
INEM inem mfari otode owo oro afo amade. Ufan ufan imam ke ini adiade eti udia ye ndima ufan. Inemesịt otode edise nte nditọ fo ẹkopde inem mbre. Utọ idaha ẹmi ẹdi mme ini inemesịt ke uwem. Nte ededi, ye ediwak owo, etie nte uwem esida udịm udịm ikpọ mfịna edi. Edieke esidide ntre ye afo, sọn̄ esịt.
2 Edi uduak Abasi nte afo okop inemesịt oro ebịghide ke idak mfọnn̄kan idaha ke utịbe utịbe n̄kann̄kụk. Emi idịghe ikpîkpu ndap, koro Abasi enen̄ede ọnọ fi ukpọhọde utọ inem inem ini iso oro. Ukpọhọde oro edi ifiọk.
3. Ewe ifiọk edi ukpọhọde inemesịt, ndien ntak emi nnyịn ikemede ndinịm ke akpanikọ nte ke Abasi ekeme ndinọ ifiọk oro?
3 Nnyịn itịn̄ iban̄a akpan orụk ifiọk oro otịmde okpon akan ọniọn̄ owo. Enye edi “ifiọk Abasi.” (Mme N̄ke 2:5) Ke ekperede ndisịm isua 2,000 ẹmi ẹkebede, andiwet Bible kiet ọkọdọhọ ete: “Kpukpru ufọk ẹnyene andibọp, edi Enyeemi ọkọbọpde kpukpru n̄kpọ edi Abasi.” (Mme Hebrew 3:4) Kere ban̄a ifiọk oro Andinam kpukpru n̄kpọ enyenede! Bible ọdọhọ ke Abasi abat onyụn̄ osio kpukpru ntantaọfiọn̄ enyịn̄. Nso ifiọk emi akpade owo idem ke emi edi ntem, sia ediwak biliọn ntantaọfiọn̄ ke mme itie ikie ẹdude ke uyọ ntantaọfiọn̄ nnyịn, ndien mme ekpepn̄kpọ mban̄a ikpaenyọn̄ ẹdọhọ ke n̄kpọ nte mme uyọ ntantaọfiọn̄ biliọn ikie efen ẹdu! (Psalm 147:4) Abasi n̄ko ọfiọk kpukpru n̄kpọ aban̄a nnyịn, ntre anie owo efen ekpekeme ndinọ ibọrọ oro ọfọnde akan ke mme akpan mbụme ẹban̄ade uwem?—Matthew 10:30.
4. Ntak emi nnyịn ikpodoride enyịn Abasi ndinọ mme item man ẹda nnyịn usụn̄, ndien ewe n̄wed oyụhọ udọn̄ emi?
4 Kere ban̄a owo iba ẹmi ẹdomode ndidiọn̄ moto mmọ. Ke okụtde edikpu, owo kiet ayak n̄kpọutom esie obon. Enye eken sụn̄sụn̄ ọdiọn̄ se ikabiarade, esịn ukpọhọde afiahade, onyụn̄ atuak inua imam nte engine oro osiorode uyo onyụn̄ asan̄ade mfọn mfọn. Isọn̄ke fi ndifiọk m̀mê anie ke otu owo iba ẹmi ekenyene n̄weditem otode andinam. Nte iwụtke ifiọk nte ke Abasi ọkpọnọ mme item ndida nnyịn usụn̄ ke uwem? Nte afo ekemede ndifiọk, Bible ọdọhọ ke se ikam idide edi oro—n̄weditem ye ndausụn̄ otode Andibot nnyịn, oro ẹnamde man ọnọ ifiọk Abasi.—2 Timothy 3:16.
5. Ifiọk oro esịnede ke Bible edi ọsọn̄urua n̄kpọ adan̄a didie?
5 Edieke se Bible ọdọhọde nte idide edide akpanikọ, kere ban̄a mme utọ ọsọn̄urua ifiọk oro anade ọdọn̄ọ ke n̄wed oro! Ke Mme N̄ke 2:1-5, enye akpak nnyịn ete iyom ọniọn̄, iyom enye nte nnyịn ikpoyomde n̄kpọuto eke odịbede—idịghe ke isọn̄ ekikere owo, edi ke Ikọ Abasi. Edieke nnyịn iyomde do, nnyịn ‘iyesịme ifiọk Abasi.’ Sia Abasi ọfiọkde ukeme ye udọn̄ nnyịn, enye ọnọ nnyịn item oro edin̄wamde nnyịn ndidu uwem emem ye inemesịt. (Psalm 103:14; Isaiah 48:17) N̄ko-n̄ko, ifiọk Abasi ọnọ nnyịn eti mbụk oro aduaide owo idem.
NSINSI UWEM!
6. Nso nsọn̄ọ ke Jesus Christ ọkọnọ kaban̄a ifiọk Abasi?
6 Jesus Christ, ata owo oro ẹtịmde ẹfiọk do, ama etịn̄ in̄wan̄în̄wan̄ aban̄a ikpehe ifiọk Abasi emi. Enye ọkọdọhọ ete: “Nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3, sịghisịghi ubọkn̄wed edi eke nnyịn.) Kam kere—ifiọk oro adade osịm nsinsi uwem!
7. Nso uyarade idu nte ke ikedịghe uduak Abasi nnyịn ndikpan̄a?
7 Kûsọsọp udọhọ ke nsinsi uwem edi ikpîkpu ndap. Utu ke oro, se usụn̄ oro ẹnamde idem owo. Ẹtịm enye ke ediye usụn̄ ndikop inem n̄kpọ, ndikop n̄kpọ, ndikop utebe, ndikụt n̄kpọ, nnyụn̄ n̄kop ntụk. Ata ekese n̄kpọ ẹdu ke isọn̄ ẹmi ẹsinamde nnyịn ikop idatesịt—edinem udia, edinem ikwọ inuen, flawa ẹmi ẹnyenede ufuọn̄, ediye n̄kann̄kụk, eti nsan̄a! Ndien mfre nnyịn oro enyenede ndyọ otịm okop odudu akan ata akamba kọmputa, koro enye an̄wamde nnyịn ndifiọk nnyụn̄ ndara kpukpru utọ n̄kpọ oro. Nte afo ekere ke Andibot nnyịn oyom nnyịn ikpan̄a inyụn̄ itaba ofụri emi? Nte ikpenen̄ekede iwụt ifiọk ndibiere nte ke enye oyom nnyịn idu uwem ke inemesịt inyụn̄ idara uwem ke nsinsi? Ọfọn, oro edi se ifiọk Abasi ekemede ndiwọrọ nnọ fi.
UWEM KE PARADISE
8. Nso ke Bible etịn̄ aban̄a ini iso ubonowo?
8 Ẹkeme nditịn̄ ibio ibio mban̄a se Bible etịn̄de aban̄a ini iso isọn̄ ye ubonowo ke ikọ kiet—Paradise! Jesus Christ ama etịn̄ aban̄a emi ke ini enye akasiande eren kiet emi ekekperede n̄kpa ete: “Afo eyedu ye Ami ke Paradise.” (Luke 23:43) Editịn̄ mban̄a Paradise nte eyịghe mîdụhe ama anam eren oro eti idaha inemesịt oro akpa ete ye eka nnyịn, Adam ye Eve, ẹkedarade. Ke ini Abasi okobotde mmọ, mmọ ẹkedi mfọnmma ẹnyụn̄ ẹdu uwem ke in̄wan̄ ebietde itie nduọkodudu oro Andibot okotịmde onyụn̄ ọtọde. Ẹkekot enye nte odotde in̄wan̄ Eden, kpa enyịn̄ emi adade ọnọ inemesịt.
9. Ndidu uwem ke akpa Paradise eketie didie?
9 In̄wan̄ oro ekenem didie ntem! Enye ekedi ata paradise. Ndusụk ke otu ndiye eto esie ẹma ẹn̄wụm inem inem mfri. Nte Adam ye Eve ẹkedụn̄ọrede ebietidụn̄ mmọ, ẹn̄wọn̄de edinem mmọn̄ esie, ẹnyụn̄ ẹtetde mfri eto esie, mmọ ikenyeneke ntak ndomokiet nditịmede esịt m̀mê ndikop ndịk. Idem mme unam ikedịghe n̄kpọndịk, koro Abasi okonịm eren oro ye n̄wan esie ndikara kpukpru mmọ ke ima ima usụn̄. Ke adianade do, akpa eren ye n̄wan oro ẹma ẹnen̄ede ẹkop nsọn̄idem. Adan̄a nte mmọ ẹkekade iso ẹkop uyo Abasi, nsinsi, ini iso inemesịt ke akana ebet mmọ. Ẹma ẹnọ mmọ ọnọ-uyụhọ utom edise mban̄a utịbe utịbe Paradise ebietidụn̄ mmọ. N̄ko-n̄ko, Abasi ama ọnọ Adam ye Eve ewụhọ ‘ndiyọhọ isọn̄, nnyụn̄ n̄kan enye.’ Mmọ ye nditọ mmọ ẹkenyene nditat mme adan̄a Paradise tutu ofụri ekondo nnyịn akpakabade edi ebiet uyai ye inemesịt.—Genesis 1:28.
10. Ke ini Jesus eketịn̄de aban̄a Paradise, nso ke enye ekenyene ke ekikere?
10 Nte ededi, ke ini Jesus eketịn̄de aban̄a Paradise, enye ikọdọhọke eren oro ekekperede n̄kpa do ekere aban̄a ini edem oro ama ekebe ke anyanini. Baba, Jesus eketịn̄ aban̄a ini iso! Enye ama ọfiọk ete ke ofụri ebietidụn̄ isọn̄ nnyịn eyekabade edi paradise. Abasi ke ntem eyesu akpa uduak esie kaban̄a ubonowo ye isọn̄ nnyịn. (Isaiah 55:10, 11) Ih, ẹyefiak ẹwụk Paradise! Ndien enye editie didie? Yak Ikọ Abasi, kpa Edisana Bible, ọbọrọ.
UWEM KE PARADISE ORO ẸFIAKDE ẸWỤK
11. Ke Paradise oro ẹfiakde ẹwụk, nso iditịbe inọ udọn̄ọ, usọn̄, ye n̄kpa?
11 Udọn̄ọ, usọn̄, ye n̄kpa ididụhe aba. “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ eyenek nte edop, edeme imụm eyenyụn̄ ọkwọ.” (Isaiah 35:5, 6) “Abasi ke Idemesie eyenyụn̄ odu ye [ubonowo], onyụn̄ edi Abasi mmọ. Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Ediyarade 21:3, 4.
12. Ntak emi nnyịn ikemede nditịm mfiọk nte ke ubiatibet, afai, ye idiọkido ididụhe ke Paradise ini iso?
12 Ubiatibet, afai, ye idiọkido ẹyebe ẹfep ke nsinsi. “Ẹyekpok mme idiọkowo ẹfep . . . Osụk esisịt idiọkowo ididụhe . . . Enye ididụhe. Edi mbon nsụkidem ẹyeda isọn̄ ẹnyene.” (Psalm 37:9-11) “Ẹyesobo mme idiọkowo ke isọn̄ ẹfep, ẹnyụn̄ ẹsọhi mbon abian̄a ẹfep ke esịt.”—Mme N̄ke 2:22.
13. Abasi edisan̄a didie ada emem edi?
13 Emem eyedu ke ofụri isọn̄. “Enye [Abasi] anam ekọn̄ etre tutu osịm ke utịt ekondo; eyebụn̄ utịgha, onyụn̄ osịbe eduat.” (Psalm 46:9) “Edinen owo eyefiari ke eyo esie; ye ediwak emem n̄ko tutu ọfiọn̄ okụre.”—Psalm 72:7.
14, 15. Nso ke Bible etịn̄ aban̄a ufọkidụn̄, utom, ye udia ke Paradise oro ẹfiakde ẹwụk?
14 Ufọkidụn̄ ẹyedu utom ẹyenyụn̄ ẹnọ uyụhọ. “Mmọ ẹyebọp ufọk ẹnyụn̄ ẹdụn̄ ke esịt . . . Mmọ idibọpke, ndien owo en̄wen odụn̄; iditọhọ, ndien owo efen adia: koro usen ikọt mi ebietde usen eto, ndien edimek ikọt mi ẹyedia se ubọk mmọ ẹnamde. Mmọ idinamke utom ke ikpîkpu, idinyụn̄ imanke nditọ inọ n̄kpọndịk.”—Isaiah 65:21-23.
15 Udia ọnọde nsọn̄idem eyedu barasuene. “Uwak ibokpot ẹyedu ke isọn̄ ke nsom ikpọ obot; mfri esie ẹyenyen̄e nte Lebanon.” (Psalm 72:16) “Isọn̄ omon̄wụm mbun̄wụm esie; Abasi, kpa Abasi nnyịn eyediọn̄ nnyịn.”—Psalm 67:6.
16. Ntak emi uwem ke Paradise edinemde?
16 Nsinsi uwem ke paradise isọn̄ eyenem. “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) “Wilderness ye nsatisọn̄ ẹyedara; desert eyenyụn̄ ebre, onyụn̄ asiaha ikọn̄ nte rose.”—Isaiah 35:1.
IFIỌK YE INI ISO FO
17. (a) Nso ke akpana afo anam edieke afo amade uwem ke Paradise? (b) Nnyịn isan̄a didie ifiọk ke Abasi eyeda ikpọ ukpụhọde edi ke isọn̄?
17 Edieke afo amade uwem ke Paradise, kûyak baba n̄kpọ kiet ọbiọn̄ọ fi ndinyene ifiọk Abasi. Enye ama ubonowo ndien eyeda mme ukpụhọde oro ẹyomde edi man anam isọn̄ edi paradise. Kamse, edieke afo ekpenyenede odudu ndida utịt nsọk unana inemesịt ye ukwan̄ikpe ẹmi ẹyọhọde ke ererimbot, nte afo ukpanamke ntre? Nte nnyịn ikpodori enyịn Abasi ndinam se isụhọde ikan oro? Ke akpanikọ, Bible etịn̄ in̄wan̄în̄wan̄ aban̄a ini emi Abasi edisiode editịm n̄kpọ emi ọyọhọde ye en̄wan mi efep onyụn̄ ada mfọnmma, edinen ukara okpụhọ ke itie esie. (Daniel 2:44) Edi Bible anam se ikponde ikan editịn̄ nnọ nnyịn mban̄a ofụri emi. Enye owụt nnyịn nte ikemede ndibọhọ ndụk obufa ererimbot oro Abasi ọn̄wọn̄ọde.—2 Peter 3:13; 1 John 2:17.
18. Nso ke ifiọk Abasi ekeme ndinam nnọ fi idahaemi?
18 Ifiọk Abasi ekeme n̄ko ndinam ekese nnọ fi idem idahaemi. Ẹbọrọ ata ntotụn̄ọ mbụme ẹban̄ade uwem ẹnyụn̄ ẹnen̄erede ẹkama editịmede esịt ke Bible. Ndinyịme ndausụn̄ esie eyen̄wam fi ndikọri itie ufan ye Abasi. Nso akwa ifet ke emi edi ntem! Ndien emi eyen̄wam fi ndinyene emem oro Abasi ikpọn̄ ekemede ndinọ. (Rome 15:13, 33) Nte afo ọtọn̄ọde ndikpep akpan ifiọk emi, afo esịn ubọk ke ata akpan edinam emi onyụn̄ akamade utịp ke uwem fo. Afo udutuaha n̄kpọfiọk tutu amama ke ndinyene ifiọk Abasi oro adade osịm nsinsi uwem.
19. Nso mbụme ke nnyịn idineme ke ibuotikọ oro etienede?
19 Nnyịn ima itịn̄ iban̄a Bible nte n̄wed oro ọdọn̄ọde ifiọk Abasi. Edi, nnyịn isan̄a didie ifiọk ke enye idịghe n̄wed oro ọdọn̄ọde ọniọn̄ owo, edi ke ọdọn̄ọ n̄kpọ otịmde okpon akan oro? Nnyịn iyeneme mbụme emi ke ibuotikọ oro etienede.
DOMO IFIỌK FO SE
Ntak emi ifiọk Abasi ekemede ndida fi nsịm nsinsi inemesịt?
Uwem editie didie ke Paradise isọn̄ oro edide?
Ntak emi afo edibọde ufọn oto edikpep ifiọk Abasi idahaemi?