IBUOTIKỌ IKPAEDEM | NSO ISINAM OWO EDI N̄KPỌ?
Nte Afo Ekemede Ndinen̄ede Ndi N̄kpọ
Bible etịn̄ nte ikpenen̄erede idi n̄kpọ. Enye idọhọke ke ibat ibat owo emi ẹfọnde iso kpọt ẹkeme ndidi n̄kpọ. Bible itiehe nte mme n̄wed n̄ke emi ẹdọhọde ke ndinam se ededi oro ọdọn̄de owo esinam enye edi n̄kpọ. Se ẹsikpepde nditọwọn̄ edi emi toto ke edet iba, ndien emi esinam idotenyịn mmọ akpa mfụhọ.
Se idude edi ke owo ekededi ekeme ndidi n̄kpọ, edi enye idiwan̄ke-wan̄ ubọk itie; oyoyom enye anam n̄kpọ. Ẹyak ineme itie N̄wed Abasi ifan̄ emi ẹkemede ndin̄wam fi.
SE BIBLE ỌDỌHỌDE:
“Owo emi amade silver idiyụhọke ye silver, okụk inyụn̄ iyụhọke owo emi amade inyene.”—Ecclesiastes 5:10.
SE EMI ỌWỌRỌDE. Ndisịn ibuot nsịn itọn̄ nyom inyene isinamke owo okop inemesịt. Ke nditịm ntịn̄, emi esikam adada mfịna edi. Dr. Jean M. Twenge ekewet ke n̄wed esie emi ẹkotde Generation Me ete: “Mbon emi ẹsịnde ibuot ẹsịn itọn̄ ẹyom okụk ẹsitịmede esịt ẹnyụn̄ ẹfụhọ ẹkan mbon emi mîdaha ufan mmọ ye mbon en̄wen ibre mbre. Kpukpru ndụn̄ọde oro ẹnamde ẹwụt ke okụk ikemeke ndinam owo okop inemesịt. Owo ama enyenyene okụk ekem se adade ubọk aka inua, se ededi okụk oro enye enyenede adian do ikemeke ndinam enye enen̄ede okop inemesịt.”
SE AKPANAMDE. Yom n̄kpọ emi ọfọnde akan okụk ye inyene. Jesus ọkọdọhọ ete: “Ẹkpeme idem ke kpukpru orụk edisịn esịt ke n̄kpọ owo, koro idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.” —Luke 12:15.
SE BIBLE ỌDỌHỌDE:
“Ntan̄idem ebem nsobo iso, edu iseri onyụn̄ ebem iduọ iso.” —Mme N̄ke 16:18.
SE EMI ỌWỌRỌDE. Nditan̄ idem nnyụn̄ mma ikpọ n̄kpọ idiyakke fi edi n̄kpọ. N̄wed emi ẹkotde Good to Great ọdọhọ ke mme ikpọ owo itieutom emi ẹnen̄erede ẹdi n̄kpọ ẹdi mbon oro “ẹsụhọrede idem mînyụn̄ idaha idem ke n̄kpọ. Edi ata ediwak ikpọ owo ke itieutom ẹkụt idem ẹnyụn̄ ẹtan̄ idem etieti. Emi iyakke itieutom mmọ ẹnam ọfọn, ndusụk itieutom ẹkam ẹdọduọ ke ntak emi.” Nso ke emi ekpep fi? Ndida idem ke n̄kpọ n̄kaha idiyakke fi edi n̄kpọ.
SE AKPANAMDE. Sụhọde idem; kûyom uwọrọiso. Bible ọdọhọ ete: “Edieke owo ekededi ekerede ke imọ idi n̄kpọ ke ini enye mîdịghe n̄kpọ, enye ababian̄a idem.”—Galatia 6:3.
SE BIBLE ỌDỌHỌDE:
‘Idụhe se ifọnde ye owo ikan ndikụt se ifọnde ke ọkpọsọn̄ utom esie.’—Ecclesiastes 2:24.
SE EMI ỌWỌRỌDE. Edieke esisịnde idem anam utom, oyokop inem utom. Dr. Madeline Levine ekewet ke n̄wed esie emi ẹkotde Teach Your Children Well ete: “Kiet ke otu n̄kpọ oro esinamde owo okop inem n̄kpọ edi ndinam n̄kpọ oro ọfọn, ndien se isinamde owo anam n̄kpọ ọfọn edi ndisịn idem nnam se enye anamde.” Oyoyom ekpep n̄ko ndisiyọ n̄kpọ ke ini n̄kpọ mîsan̄ake nte ekekerede.
SE AKPANAMDE. Sịn idem nam utom man enen̄ede ọdiọn̄ọ utom fo, kûnyụn̄ ukpa mba ke ini osobode mfịna. Edieke edide emenyene nditọ, yak mmọ ẹsise ẹban̄a mfịna mmọ ndusụk ini. Kûsọsọp ubiere kpukpru mfịna mmọ unọ mmọ. Edi ti ke ọkpọfọn ekere aban̄a isua emana mmọ ye ukeme mmọ. Nditọwọn̄ ẹsinen̄ede ẹkop inemesịt edieke ẹkpepde mmọ ndiyọ n̄kpọ sia emi eyenyene ufọn ọnọ mmọ ke ini iso.
SE BIBLE ỌDỌHỌDE:
“Odu-uwem ebua ọfọn akan okpo ekpe.”—Ecclesiastes 9:4.
SE EMI ỌWỌRỌDE. Edieke edide emenyene utom, akpana esịn idem anam utom fo, edi ikpanaha ayak utom emi adia fi idem. Ndi okposụk ekere ke imedi n̄kpọ edieke enyenede akwa itie ke itieutom edi ọduọ udọn̄ọ ke ubọk ke ubọk, ubon fo inyụn̄ ikponoke fi aba? Mbon emi ẹnen̄erede ẹdi n̄kpọ edi mbon emi mîyakke utom mmọ abiat ubon mmọ m̀mê anam mmọ ẹdọn̄ọ.
SE AKPANAMDE. Tịm se ban̄a idemfo. Siduọk odudu. Ufọn idụhe ndisịn ibuot nsịn itọn̄ nnam utom edi ukereke uban̄a idemfo, ubon fo, ye mme ufan fo.
SE BIBLE ỌDỌHỌDE:
“Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.”—Matthew 5:3.
SE EMI ỌWỌRỌDE. Edieke owo oyomde ndidi n̄kpọ, ana enye ekpep Bible onyụn̄ anam item esie. Ke nditịm ntịn̄, ata ediwak Mme Ntiense Jehovah ẹkụt ke ndinịm n̄kpọ Abasi akpa ke uwem iyakke mmimọ inen̄ede itịmede esịt iban̄a udia, ọfọn̄, ye mme n̄kpọ ntre.—Matthew 6:31-33.
SE AKPANAMDE. Kpep nte Bible ekemede ndin̄wam fi edi n̄kpọ. Edieke oyomde ndifiọk n̄kpọ en̄wen, mbọk bụp Mme Ntiense Jehovah ke edem mbufo mîdịghe ka ikpehe Intanet nnyịn emi www.jw.org/efi.