Nso ke Bible Etịn̄ Aban̄a Ndinọ Enọ?
Se Bible ọdọhọde
Bible ọdọhọ isinọ owo n̄kpọ ke imaesịt ye ke eti esịt. Emi esinam owo emi ọnọde owo n̄kpọ ye owo emi ọbọde enọ oro ẹkop inemesịt. (Mme N̄ke 11:25; Luke 6:38) Jesus ọkọdọhọ ete: “Inemesịt odu ke ndinọnọ akan ke ndibọbọ.”—Utom 20:35.
Nso utọ enọ isinem Abasi esịt?
Enọ emi owo ọnọde ke imaesịt esinem Abasi esịt. Bible ọdọhọ ete: “Yak owo kiet kiet anam kpa nte enye ebierede ke esịt esie, okûnam mmen̄e mmen̄e m̀mê ke edinyenyịk, koro Abasi amama owo eke ọnọde ke idatesịt.”—2 Corinth 9:7.
Ndinọ owo n̄kpọ ke ofụri esịt esịne ke otu n̄kpọ emi edinamde utuakibuot nnyịn asana ke enyịn Abasi. (James 1:27) Owo emi esitatde ubọk ọnọ mbon unana n̄kpọ anam utom kiet ye Abasi—Abasi esida nte ke enye ọnọ imọ ebuọt. (Mme N̄ke 19:17) Bible ọdọhọ ke Abasi ọyọnọ owo oro usiene.—Luke 14:12-14.
Nso utọ enọ mîsinemke Abasi esịt?
Enọ emi owo mînọhọ ke eti esịt. Emi esịne:
Ndinọ owo n̄kpọ man mme owo ẹtoro fi.—Matthew 6:2.
Ndinọ owo n̄kpọ man ẹnọ fi usiene.—Luke 14:12-14.
Ndinọ enọ sia oyom Abasi ada oro anyan̄a fi.—Utom 8:20.
Enọ emi ẹyomde ndida nnam n̄kpọ emi Abasi asuade. Ke uwụtn̄kpọ, ifọnke ọnọ owo okụk ekebre nsa (mbre mfọniso), ekedep mmịn ọn̄wọn̄ anam, m̀mê ekedep ọkpọsọn̄ ibọk ada. (1 Corinth 6:9, 10; 2 Corinth 7:1) Inyụn̄ ifọnke ọnọ owo enọ edieke edide enye ekeme ndinam utom man ese aban̄a idemesie edi imaha ndinam.—2 Thessalonica 3:10.
Enọ emi ọnọde mbon en̄wen tutu unyeneke aba se adade ese aban̄a ubon mbufo. Bible ọdọhọ ke ana mme ibuotufọk ẹnọ ubon mmọ se mmọ ẹyomde. (1 Timothy 5:8) Ntre ifọnke ibuotufọk ama ndinọ mbon en̄wen n̄kpọ tutu enye inyeneke se ada ese aban̄a ubon esie. Jesus ama onyụn̄ asua ọnọ mbon oro mîkamaha ndise mban̄a mme ete ye eka mmọ emi ẹma ẹkesọn̄ ke ntak emi mmọ ẹkedọhọde ke kpukpru inyene mmimọ edi “enọ oro ẹyakde ẹnọ Abasi.”—Mark 7:9-13.